شي جينپيڭ مىنالاردى انىق ايتتى: جۇڭگو مەن سلوۆەنيا ديپلوماتيالىق قاتىناس ورناتقان 30 جىلدان بەرى، ەكى جاق ءوزارا قۇرمەت ەتىپ، تەڭ تۇرعىدا مامىلە جاساپ، ءوزارا ءتيىمدى سەلبەستىكتە بەلسەندى تابىستارعا قول جەتىپ، گۋمانيتارلىق اۋىس-كۇيىس كۇن سايىن جاندانىپ، ەكى ەل حالقى ناقتى پايداعا كەنەلدى. جاڭا ءتيپتى ايدارشا ۆيرۇسپەن جۇعىمدالعان وكپە قابىنۋ اۋرۋى تارالعان جاعدايدا، ەكى ەل حالقى ءبىر بىرىنە قارايلاسىپ، جۇڭگو مەن سلوۆەنيانىڭ تەرەڭ دوستىعى ايگىلەندى.

 

شي جينپيڭ مىنالاردى باسا دارىپتەدى: مەن جۇڭگو-سلوۆەنيا قاتىناسىن دامىتۋعا وسكەلەڭ ءمان بەرەمىن، پاحور پرەزيدەنتپەن بىرلىكتە قۇلشىنىپ، ەكى ەل ديپلوماتيالىق قاتىناس ورناتقاندىعىنىڭ 30 جىلدىعىن جاڭا باستاما ەتە، «ءبىر بەلدەۋ، ءبىر جولدى» ورتاق قۇرۋ تاريحي ورايىن ويداعىداي يگەرىپ، دامۋ ستراتەگياسىن ۇشتاستىرۋدى كۇشەيتىپ، ناقتى سەلبەستىكتى تەرەڭدەتىپ، جۇڭگو-سلوۆەنيا قاتىناسىنىڭ دامۋىنا تىڭ قوزعاۋشى كۇش قوسىپ، ەكى ەلدى جانە ەكى ەل حالقىن باقىتقا كەنەلتۋ جولىندا قۇلشىنۋدى قالايمىن.

 

پاحور جۇڭگونىڭ كوپتەگەن سالالاردا سەكىرمەلى دامۋدى جۇزەگە اسىرعاندىعىن شىن جۇرەكتەن قۇتتىقتادى. ول بىلاي دەدى: سلوۆەنيا-جۇڭگو قاتىناسىنىڭ تاريحى ۇزاق. ديپلوماتيالىق قاتىناس ورناتقان 30 جىلدان بەرى، ەكى جاقتى قاتىناس جەدەل دامىدى، ەكونوميكا-ساۋدا سەلبەستىگى ناتيجەلى بولدى، سەلبەستىك سالالار ۇزدىكسىز كەڭەيدى، قار-مۇز سپورتى سەلبەستىكتىڭ جاڭا جارقىن تۇيىنىنە اينالدى. ەۆروپا وداعىنا مۇشە ەل رەتىندە، سلوۆەنيا ەۆروپا-جۇڭگو قاتىناسىن كۇشەيتۋدى بەلسەنە قولداپ، سەلبەستىك جەتىستىكتەرىنەن ەكى جاقتى جانە حالىقارالىق قوعامدى يگىلىككە كەنەلتۋگە كۇش سالادى.

 

اۋدارعان: قاناتبەك جۇماباي ۇلى