شي جينپيڭ جاۋاپ حات جازىپ، اۋمىن عىلىم-تەحنيكا داشۋەسىندەگى وقىتۋشى-وقۋشىلاردى شابىتتاندىردى
ءوز حابارىمىز. ءتوراعا شي جينپيڭ 5-ايدىڭ 23-كۇنى «اۋمىن عىلىم 1-ءنومىرلى» جاساندى سەرىگىن زەرتتەپ جاساۋعا قاتىناسقان اۋمىن عىلىم-تەحنيكا داشۋەسىندەگى وقىتۋشى-وقۋشىلاردىڭ ۋاكىلدەرىنە جاۋاپ حات جازىپ، ولارعا شىنايى شابىت بەردى.
شي جينپيڭ جاۋاپ حاتتا بىلاي دەدى: سىزدەردىڭ حاتتاعى ءسوز-سويلەمدەرىڭىزدەن مەملەكەتتىڭ عىلىم-تەحنيكا ىستەرىنە جانە عارىش ىستەرىندەگى قۇدىرەتتى ەل قۇرۋعا ات سالىسۋداعى قىزۋ سۇيىسپەنشىلىكتەرىڭىز بەن جاۋاپكەرشىلىكتەرىڭىزدى سەزىندىم. سىزدەر زەرتتەپ جاساۋعا ات سالىسقان «اۋمىن عىلىم 1-ءنومىرلى» جاساندى سەرىگىنىڭ ءساتتى ۇشىرىلعاندىعىنان حاباردار بولدىم، كوپشىلىكتى قىزۋ قۇتتىقتايمىن!
شي جينپيڭ بىلاي دەپ اتاپ كورسەتتى: تاياۋ جىلداردان بەرى، اۋمىن ىشكى ولكەلەرمەن عارىش سياقتى سالالارداعى عىلىم-تەحنيكالىق سەلبەستىكتى تەرەڭدەتىپ، قۋانارلىق تابىستارعا قول جەتكىزدى. دۇنيە جۇزىندەگى عىلىم-تەحنيكادا قۇدىرەتتى ەل قۇرۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ-اۋمىنداعى جوعارى مەكتەپتەرگە، اۋمىنداعى عىلىم-تەحنيكا قىزمەتكەرلەرىنە اناعۇرلىم شالقار دامۋ كەڭىستىگىن ازىرلەدى. وتاندى ءسۇيۋ، اۋمىندى ءسۇيۋ تاڭداۋلى داستۇرىنە ۇزدىكسىز مۇراگەرلىك ەتىپ، مەملەكەتتىڭ دامۋ جالپى جاعدايىمەن بەلسەنە توعىسىپ، گۋاڭدۇڭ-شياڭگاڭ-اۋمىن ۇلكەن شىعاناق رايونى قۇرىلىسىنا بەلسەنە ات سالىسىپ، اۋمىن ەكونوميكاسىنىڭ ۇيلەسىمدى، كوپ نەگىزدى دامۋىنا دەم بەرىپ، «ءبىر ەل، ەكى ءتۇزىمنىڭ» اۋمىنداعى تابىستى امالياتىنا تىڭ ۇلەس قوسۋلارىڭىزدى ءۇمىت ەتەمىن.
«اۋمىن عىلىم 1-ءنومىرلى» جاساندى سەرىگى ىشكى ولكەلەر مەن اۋمىن سەلبەسىپ زەرتتەپ جاساعان تۇڭعىش كەڭىستىك عىلىمى جاساندى سەرىگى بولىپ، نەگىزىنەن جەر شارىنىڭ ماگنيت ءورىسىن بارلاۋعا جانە زەرتتەۋگە پايدالانىلادى، 5-ايدىڭ 21-كۇنى جيۋچۋان جاساندى سەرىك ۇشىرۋ ورتالىعىندا ءساتتى ۇشىرىلدى. جاساندى سەرىكتى زەرتتەپ جاساۋعا قاتىناسقان اۋمىن عىلىم-تەحنيكا داشۋەسىندەگى وقىتۋشى-وقۋشىلاردىڭ 18 ۋاكىلى ءتوراعا شي جينپيڭگە حات جازىپ، جاساندى سەرىكتىڭ ءساتتى ۇشىرىلعاندىعى جونىندەگى قۋانىشتى حاباردى جانە جاساندى سەرىكتى زەرتتەپ جاساۋ قىزمەتىنە قاتىناسقانداعى اسەرلەرىن مالىمدەپ، وتاننىڭ عىلمي زەرتتەۋ قۇرىلىسىنا بەلسەنە ات سالىسۋ تىلەگى مەن بەكىمدەرىن ءبىلدىردى.
اۋدارعان: گۇلنۇر قابىلقاق قىزى
