ءوز حابارىمىز.  مەملەكەت ءتوراعاسى شي جينپيڭ جەرگىلىكتى ۋاقىت 5-ايدىڭ 7-كۇنى  كەشتە ارناۋلى ايروپلانمەن موسكۆاعا جەتتى، رەسەيدىڭ زۇڭتۇڭى پۋتيننىڭ ۇسىنىسى بويىنشا، رەسەيدە مەملەكەت ىستەر ساپارىندا بولادى ءارى سوۆەت وداعى ۇلى وتان قورعاۋ سوعىسى جەڭىسكە جەتكەندىگىنىڭ 80 جىلدىعىن ەسكە ءتۇسىرۋ قۇتتىقتاۋ سالتىنا قاتىناسادى.

شي جينپيڭ وتىرعان ارناۋلى ايروپلان رەسەيدىڭ اۋە كەڭىستىگىنە كىرگەننەن كەيىن، رەسەي اۋە ارمياسىنىڭ سوعىس ايروپلانى كەڭىستىككە كوتەرىلىپ قورعادى.

شي جينپيڭ موسكۆا ۆنۋكوۆو ارناۋلى ايروپلان اۋەجايىنا جەتكەندە، رەسەيدىڭ ورىنباسار زۇڭليى گوليكوۆا قاتارلى ۇكىمەتتىڭ جوعارى دارەجەلى ءمانساپتىلارى ىستىق ىقىلاسپەن قارسى الدى.

رەسەي اۋەجايدا سالتاناتتى قارسى الۋ سالتىن وتكىزدى. اسكەري وركەستر جۇڭگو مەن رەسەيدىڭ مەملەكەت اندەرىن ورىندادى. شي جينپيڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.

شي جينپيڭ جازباشا ءسوز سويلەپ، جۇڭگو ۇكىمەتى مەن حالقى اتىنان رەسەي ۇكىمەتىنە جانە رەسەي حالقىنا شىنايى سالەم جولدادى جانە ىزگى تىلەك ءبىلدىردى.

 شي جينپيڭ مىنالاردى اتاپ كورسەتتى: جۇڭگو مەن رەسەي ايىرىلماس تاتۋ كورشى، تاۋقىمەتتى بىرگە تارتقان ناعىز دوستار، ءوزارا تابىسقا جەتۋدى قولدايتىن جەتكەن سەنىمدى سەرىكتەر. ەكى جاق كورشىلەس ءىرى ەلدەردىڭ دۇرىس قاتىناس جولىن ءساتتى قاراستىرىپ، جاڭا داۋىردەگى جۇڭگو مەن رەسەيدىڭ ستراتەگيالىق سەلبەستىك رۋحىن سومدادى. دەربەس، ءوز-وزىنە قوجايىن بولعان، كەمەلدى، بەرىك جۇڭگو-رەسەي قاتىناسى ەكى ەل حالقىنا وراسان زور باقىت اكەلۋمەن بىرگە، دۇنيە ءجۇزىنىڭ ستراتەگيالىق ورنىقتىلىعىن قورعاۋعا، تەپە-تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن ىلگەرىلەتۋگە ماڭىزدى ۇلەس قوستى. بيىل دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى جانە بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو مەن رەسەي دۇنيە جۇزىندەگى نەگىزگى ءىرى ەل جانە ب م ۇ حاۋىپسىزدىك القالار كەڭەسىنىڭ تۇراقتى القا ەلى رەتىندە، دۇنيە جۇزىلىك ەكىنشى سوعىستىڭ جەڭىس جەتىستىكتەرىن قول ۇستاسا قورعاپ، زورەكەرلىك پەن وكتەمدىك ساياسيعا باتىل قارسى تۇرىپ، ناعىز كوپ جاقتىلىقتى امالياتتا ايگىلەپ، اناعۇرلىم ءادىل، ۇيلەسىمدى الەمدىك جونگە سالۋ جۇيەسىن ورناتۋدى ىلگەرىلەتەدى. مەن پۋتين زۇڭتۇڭمەن ەكى جاقتى قاتىناس، ناقتى سەلبەستىك، سونداي-اق ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىرلەسىپ، جۇڭگو مەن رەسەيدىڭ جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قاتىناسىنىڭ دامۋىن ىلگەرىلەتۋگە پارمەندى قوزعاۋشى كۇش قوسۋدى ءۇمىت ەتەمىن؛ كوپ ەلدىڭ باسشىلارىمەن جانە رەسەي حالقىمەن بىرگە دۇنيە جۇزىلىك فاشيزمگە قارسى سوعىس جەڭىسىنە ەرلىكپەن ءوزىن ارناعان قۇربانداردى ساعىنا ەسكە الىپ، حالىقارالىق تەڭدىك پەن ادىلدىكتى قورعاۋدىڭ داۋىرلىك ايبىندى ءۇنىن بىرلىكتە اسقاقتاتۋدى كۇتەمىن. 

ساي چي، ۋاڭ ي قاتارلى ساپارلاستارى سول ايروپلانمەن بىرگە باردى.

جۇڭگونىڭ رەسەيدەگى باس ەلشىسى جاڭ حانحۇي دا اۋەجايعا بارىپ قارسى الدى.

شي جينپيڭ اۆتوكولىكپەن اۋەجايدان قوناقجايعا بارا جاتقان جولدا جەرگىلىكتى بۇقارانىڭ، سونداي-اق جۇڭگو قارجىلاندىرعان كاسىپورىنداردىڭ جانە سول ەلدە وقىپ جاتقان جۇڭگولىق وقۋشىلاردىڭ ۋاكىلدەرى جولدىڭ ەكى جاعىنا جينالىپ، «ءتوراعا شي جينپيڭنىڭ رەسەيگە ساپارلاي كەلگەندىگىن قىزۋ قارسى الامىز» دەگەن قىزىل كەرمە تۋ ۇستاپ، جۇڭگو مەن رەسەيدىڭ مەملەكەت تۋىن بۇلعاپ، شي جينپيڭنىڭ ساپارلاي كەلگەندىگىن ىستىق ىقىلاسپەن قارسى الدى.