ءوز حابارىمىز. 7-ايدىڭ 27-كۇنى تۇستەن بۇرىن، مەملەكەت ءتوراعاسى شي جينپيڭ ۋادە بويىنشا برازيليانىڭ زۇڭتۇڭى لۋلامەن تەلەفوندا سويلەستى.

شي جينپيڭ مىنالاردى اتاپ كورسەتتى: تاياۋ جىلداردان بەرى، جۇڭگو مەن برازيليانىڭ تاعدىرلاس ورتاق تۇلعا قۇرىلىسىندا جانە ەكى ەلدىڭ دامۋ ستراتەگياسىن ۇشتاستىرۋدا بەلسەندى ىلگەرىلەۋشىلىككە قول جەتىپ، جۇڭگو مەن برازيليانىڭ دامۋىندا، ەكى ەل حالقىنىڭ باقىتىن جەبەۋدە ماڭىزدى رول اتقاردى، سونداي-اق اۋمالى-توكپەلى حالىقارالىق جاعدايعا قىمباتتى ورنىقتىلىق قوستى. بيىل جۇڭگو كوممۋنيستىك پارتياسى قۇرىلعاندىعىنىڭ 105 جىلدىعى جانە جۇڭگونىڭ «15-بەسجىلدىعىنىڭ» باستاما جىلى، برازيليا دا ماڭىزدى ەل ءىشى ساياسي كەڭەس ءتارتىبىن اتقارماقشى. جۇڭگو برازيليامەن بىرگە ەكى جاقتى جانە كوپ جاقتى ستراتەگيالىق سەلبەستىكتى اناعۇرلىم كۇشەيتىپ، ەكى ەلدىڭ تاعدىرلاس ورتاق تۇلعا قۇرىلىسىنىڭ تاماشا جاعدايىن جالعاستىرۋدى قالايدى.

شي جينپيڭ مىنالاردى باسا دارىپتەدى: جاڭا جاعداي، جاڭا سىن-سايىستار الدىندا، جۇڭگو مەن برازيليا دۇنيە ءجۇزى وڭتۇستىك ەلدەردىڭ ماڭىزدى مۇشەسى رەتىندە، تاريحتىڭ دۇرىس جانە وركەنيەتتىڭ العا باسۋ جاعىندا باتىل تۇرىپ، الەمدىك باسقارۋ جۇيەسىن رەفورمالاۋدا، كەمەلدەندىرۋدە، حالىقارالىق تەڭدىك پەن ادىلدىكتى قورعاۋدا اناعۇرلىم زور سىندارلى رول اتقارۋى كەرەك. ەكى جاق «ۇلكەن بريكس سەلبەستىگىنىڭ» جوعارى ساپالى دامۋىن قول ۇستاسا ىلگەرىلەتىپ، سەلبەستىك بەتالىسىن ءدال يگەرىپ، ىنتىماق اۋقىمىن قورعاپ، اناعۇرلىم كوپ ناتيجە جاراتىپ، دۇنيە ءجۇزى وڭتۇستىك ەلدەردىڭ ىنتىماقتاسىپ ءوزىن الۋەتتەندىرۋىنىڭ جاڭا تاراۋىن جازۋ كەرەك. جۇڭگو برازيليانىڭ حالىقارالىق ورنى مەن ماڭىزدى ىقپال كۇشىنە ايرىقشا ءمان بەرەدى، برازيليانىڭ ءوزىنىڭ يەلىك ۇقىعىن، تاۋەلسىزدىگىن قورعاۋىن، سىرتقى كۇشتەردىڭ كيلىگۋىنە قارسى تۇرۋىن، ءارى ءوڭىردىڭ جانە دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋعا برازيليا جاقتىڭ ۇلەسىن قوسۋىن قولدايدى. 

لۋلا بىلاي دەدى: برازيليا مەن جۇڭگونىڭ اناعۇرلىم ءادىل دۇنيە جانە اناعۇرلىم باياندى پلانەتا تاعدىرلاس ورتاق تۇلعاسىن قۇرۋى بەلسەندى ىلگەرىلەۋشىلىككە قول جەتكىزدى، ءار سالاداعى سەلبەستىگى تەز دامىدى، ەكى ەلدىڭ ساۋدا سوماسى تاعى دا تىڭ دەڭگەيگە كوتەرىلدى، «برازيليا-جۇڭگو مادەنيەت جىلىنىڭ» ءتۇرلى قيمىلدارى ەكى ەل دوستىعىنىڭ حالىق رايى نەگىزىن ونان ارى بەكەمدەدى. برازيليا جۇڭگومەن جاساندى زەردە، ەنەرگيا، كەن ونىمدەرى سياقتى سالالارداعى سەلبەستىكتى كۇشەيتۋدى ءۇمىت ەتەدى، ءتىپتى دە كوپ جۇڭگو كاسىپورىندارىنىڭ برازيلياعا بارىپ قارجى قوسىپ، ەكى ەل سەلبەستىگىنىڭ اناعۇرلىم كوپ نەگىزدى بولۋىنا، ءتىپتى دە كوپ تابىستارعا قول جەتكىزۋىنە مۇمكىندىك جاساۋدى قارسى الادى. برازيليا جۇڭگونىڭ 2026-جىلعى دۇنيە جۇزىلىك جاساندى زەردە جينالىسىن ءساتتى وتكىزگەندىگىن قۇتتىقتايدى، ءتوراعا شي جينپيڭ العا قويعان اشىق، قامتىمدى جاساندى زەردە حالىقارالىق سەلبەستىگى مەن الەمدىك باسقارۋ تانىمىن ايرىقشا القايدى. برازيليا جۇڭگومەن كوپ جاقتى سايكەسۋدى جيىلەتىپ، ب م ۇ-نىڭ بەدەلىن قورعاپ، بريكس ەلدەرىنىڭ ىنتىماعىن، سەلبەستىگىن نىعايتىپ، كوپ جاقتىلىقتى باتىل قورعاۋدى، وكتەمدىك ساياسيعا باتىل قارسى تۇرۋدى، قولامتالى ماسەلەلەردى پىكىرلەسۋ، كەڭەسۋ ارقىلى شەشۋگە تاباندى بولۋدى، حالىقارالىق تەڭدىك پەن ادىلدىكتى جانە دۇنيە ءجۇزىنىڭ بەيبىتشىلىگى مەن ورنىقتىلىعىن بىرگە قورعاۋدى قالايدى.