ءوز حابارىمىز. 7-ايدىڭ 28-كۇنى تۇستەن بۇرىن، مەملەكەت ءتوراعاسى شي جينپيڭ بەيجيڭدە حالىق سارايىندا جۇڭگوعا مەملەكەت ىستەر ساپارىمەن كەلگەن سلوۆاكيانىڭ زۇڭتۇڭى پەللەگرينيمەن كەڭەس وتكىزدى.

 

مەملەكەت ءتوراعاسى شي جينپيڭ  7-ايدىڭ 28-كۇنى تۇستەن بۇرىن حالىق سارايىنىڭ سولتۇستىك زالىندا سالت وتكىزىپ، سلوۆاكيا رەسپۋبليكاسىنىڭ زۇڭتۇڭى پەللەگرينيدىڭ ەلىمىزدە مەملەكەت ىستەر ساپارىندا بولعاندىعىن قارسى الدى.

 

تيان-انمىن الاڭىندا 21 رەت ساليۋت اتىلدى.

 

پەللەگرينيمەن بىرگە جۇڭگوعا ساپارلاي كەلگەندەردەن سلوۆاكيانىڭ جۇڭگودا تۇراتىن باس ەلشىسى، زۇڭتۇڭ كەڭسەسىنىڭ مەڭگەرۋشىسى قاتارلىلار بار.

 

ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق سىرتقى ىستەر قىزمەت كوميتەتى كەڭسەسىنىڭ مەڭگەرۋشىسى ۋاڭ ي قاتارلىلار قارسى الۋ سالتىنا قاتىناستى.

 

اسكەري وركەستر سلوۆاكيا مەن جۇڭگونىڭ مەملەكەت ءانىن ورىندادى.

 

پەللەگريني شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى.

 

ەكى ەلدىڭ مەملەكەت باسشىلارى قۇرمەت قاراۋىلى مىنبەسىنە قايتىپ كەلىپ، قۇرمەت قاراۋىلىنىڭ سالتانات قاتارىن تاماشالادى.

 

پەللەگريني شي جينپيڭنىڭ ۇسىنىسى بويىنشا ەلىمىزدە مەملەكەت ىستەر ساپارىندا بولدى.

 

قارسى الۋ سالتىنان كەيىن، ءتوراعا شي جينپيڭ پەللەگريني زۇڭتۇڭمەن كەڭەس وتكىزدى.

 

شي جينپيڭ مىنالاردى اتاپ كورسەتتى: سلوۆاكيا جاڭا جۇڭگومەن ەڭ ەرتە ديپلوماتيالىق قاتىناس ورناتقان ەلدەردىڭ ءبىرى، جۇڭگو مەن سلوۆاكيانىڭ دوستىق بايتەرەگىنىڭ تامىرى تەرەڭ، جايقالا ءوسىپ كەلەدى. 2024-جىلى ەكى ەل قاتىناسى ستراتەگيالىق سەرىكتەستىك قاتىناس دارەجەسىنە كوتەرىلدى. ەكى جاقتىڭ بىرگە قۇلشىنۋىندا، ەكى ەلدىڭ ءوزارا سەنىمدىلىگى ۇزدىكسىز تەرەڭدەپ، سەلبەستىك جەتىستىكتەرى ۇزدىكسىز جارىققا شىعىپ، ءداستۇرلى دوستىق جۇرت جۇرەگىنە تەرەڭ ۇيالادى. جۇڭگو سلوۆاكيامەن بىرگە جۇڭگو مەن سلوۆاكيانىڭ ءوزارا قۇرمەت ەتەتىن، ءوزارا سەنەتىن، تەڭ تۇرعىدا ءوزارا پايدا جەتكىزەتىن، ورنىقتى، بەكەم ستراتەگيالىق سەرىكتەستىك قاتىناسىن قالىپتاستىرىپ، ەكى ەل حالقىنا ءتىپتى دە زور باقىت جاراتۋدى قالايدى.

 

شي جينپيڭ مىنالاردى باسا دارىپتەدى: كەلەسى كەزەڭدە ەكى جاقتىڭ 4 جاقتاعى قىزمەتتى ءتۇيىندى تۇردە ويداعىداي ىستەۋىنە بولادى. ءبىرىنشى، ستراتەگيالىق ءوزارا سەنىمدىلىكتى بەكەمدەپ، ءبىرىن-ءبىرى باتىل قولداۋ. جۇڭگو مەن سلوۆاكيانىڭ ساياسي ءتۇزىلىسى ۇقساماعانىمەن، ەكى جاق وزدەرى تاڭداعان دامۋ جولىنا قۇرمەت ەتىپ، دوستىق سەلبەستىك سىندى ەكى جاقتى قاتىناستىڭ نەگىزگى ىرعاعىنا تاباندى بولدى، بۇل جۇڭگو مەن سلوۆاكيا قاتىناسىنىڭ اقاۋسىز، جەدەل دامۋىنىڭ نەگىزى. جۇڭگو سلوۆاكيانىڭ ءبىر جۇڭگو پرينسيبىنە تاباندى بولعاندىعىن القايدى، سلوۆاكيامەن بىرگە ءبىر-ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىنە ۇزدىكسىز تولىق ءمان بەرۋدى قالايدى. ەكىنشى، ءوزارا ءتيىمدى سەلبەستىكتى تەرەڭدەتىپ، بىرگە دامۋدى جەبەۋ. سلوۆاكيا «ءبىر بەلدەۋ، ءبىر جولدى» بىرگە قۇرۋعا جانە جۇڭگو-ورتا، شىعىس ەۆروپا ەلدەرى سەلبەستىگىنە بەلسەنە ات سالىسىپ، سۇبەلى تابىستارعا قول جەتكىزدى. ەكى جاق ەكى ەلدىڭ ۇكىمەتتەر ارا سەلبەستىك كوميتەتى سياقتى مەحانيزمدەردەن اناعۇرلىم ويداعىداي پايدالانىپ، ەكى ەلدىڭ سەلبەستىگىن تەرەڭدەتۋگە ساياساتتىق قولداۋ كورسەتىپ، تازا ەنەرگيا، سيفرلى ەكونوميكا، روبوت جاساۋ، جاساندى زەردە سياقتى جاڭادان گۇلدەنگەن كاسىپتەر مەن الدىڭعى لەكتىك سالالارداعى سەلبەستىك كومەسكى كۇشىن اشىپ، اناعۇرلىم كوپ سەلبەستىكتىڭ جاڭا جارقىن تۇيىندەرىن قالىپتاستىرۋ كەرەك. ءۇشىنشى، حالىق تىلەگىنىڭ توعىسۋىن كۇشەيتىپ، ءداستۇرلى دوستىقتى جالعاستىرۋ. مادەنيەت، دەنە تاربيە، ساياحات، جاستار، جەرگىلىكتى ورىندار سياقتى سالالارداعى سەلبەستىكتى كەڭەيتىپ، ادامدار بارىس-كەلىسىنە قولايلىلىق جاساپ، ەكى ەل جاستارىن اۋىس-كۇيىس جاساۋعا ۇزدىكسىز شابىتتاندىرىپ، ءوزارا ۇيرەنۋ، ءوزارا ۇلگى الۋ بارىسىندا ءتۇسىنىسۋدى كۇشەيتىپ، دوستىققا قول جەتكىزۋ. ءتورتىنشى، حالىقارالىق تەڭدىك پەن ادىلدىكتى قورعاپ، الەمدىك باسقارۋدى رەفورمالاۋ جانە كەمەلدەندىرۋ. كوپ جاقتى سايكەستىكتى كۇشەيتىپ، بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى باتىل قورعاپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، جالپىعا ءتيىمدى، قامتىمدى ەكونوميكانىڭ جاھاندانۋىن قول ۇستاسا ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى جەبەۋ.

 

شي جينپيڭ مىنالاردى اتاپ كورسەتتى: دۇنيە جۇزىندە 100 جىلدىق وزگەرىس جاعدايى جەدەل دامىپ، جۇڭگو-ەۆروپا قاتىناسى جاڭا ماڭىزدى ورايعا ءدوپ كەلۋمەن بىرگە، كوپتەگەن سىن-سايىستارعا دا ۇشىرادى، سىن-سايىستاردى ورايعا اينالدىرا الۋ-الماۋداعى شەشۋشى ءتۇيىن تەڭ تۇرعىدا كەڭەسۋ، ورتاقتىقتى شوعىرلاندىرىپ، پارىقتاردى جويۋ. جۇڭگو ەۆروپا وداعىن باستان-اياق سەرىك دەپ قارايدى، ەۆروپا وداعىمەن قاتىناستى شىن كوڭىلمەن جانە ىزگى نيەتپەن دامىتادى. سلوۆاكيانىڭ ەۆروپا وداعىنىڭ نازاردى جۇڭگو مەن ەۆروپانىڭ ورتاق تانىمىنا شوعىرلاندىرىپ، قايشىلىقتار مەن الاۋىزدىقتاردى ۇيلەسىمدى ءبىر جاقتى ەتىپ، جۇڭگو-ەۆروپا قاتىناسىنىڭ اقاۋسىز، ورنىقتى دامۋىن ىلگەرىلەتۋدە سىندارلى رول اتقارۋىن ءۇمىت ەتەمىن.

 

پەللەگريني بىلاي دەدى: سلوۆاكيا جۇڭگونىڭ ءتوراعا شي جينپيڭنىڭ باسشىلىعىندا دۇنيەنى جالت قاراتقان دامۋ جەتىستىكتەرىنە قول جەتكىزگەندىگىن جوعارى باعالايدى، جۇڭگونىڭ 5 جىلدىق جوبانى جاساپ جانە ۇزدىكسىز اتقارىپ، جۇڭگو ۇلگىسىندەگى وسىزامانداندىرۋ قۇرىلىسىن ورنىقتى ىلگەرىلەتۋ قابىلەتى ادامدى سۇيىندىرەدى، ۇلگى الۋعا تاتيدى. سلوۆاكيا ەكى ەلدىڭ ستراتەگيالىق سەرىكتەستىك قاتىناسىن قاستەرلەيدى، ءبىر جۇڭگو پرينسيبىن باتىل اتقارادى، جۇڭگومەن ءوزارا سەنىمدىلىكتى نىعايتىپ، سەلبەستىكتى كۇشەيتىپ، دوستىقتى تەرەڭدەتىپ، سەلبەستىكتىڭ جاڭا سالاسىن كەڭەيتىپ، ەكونوميكا-ساۋدا، جاساندى زەردە، سيفرلى ەكونوميكا، روبوت، جاڭا ەنەرگيا سياقتى سالالاردا اناعۇرلىم كوپ سەلبەستىك جەتىستىكتەرىنە قول جەتكىزىپ، ەكى ەل حالقىنا ءتىپتى دە زور باقىت جاراتۋدى ءۇمىت ەتەدى. جۇڭگو كاسىپورىندارىنىڭ سلوۆاكياعا بارىپ قارجى قوسىپ، سەلبەستىك جاساۋىن قارسى الادى. ەۆروپا وداعىنا مۇشە ەل رەتىندە، سلوۆاكيا ەۆروپا مەن جۇڭگونىڭ سەلبەستىگىن بەلسەنە ىلگەرىلەتىپ، الاۋىزدىقتاردى پىكىرلەسۋ، كەڭەسۋ ارقىلى ۇيلەسىمدى ءبىر جاقتى ەتۋدى قالايدى. سلوۆاكيا جۇڭگونىڭ حالىقارالىق ورنى مەن ىقپالىنا ايرىقشا ءمان بەرەدى جانە ونى القايدى، جۇڭگومەن بىرگە كوپ جاقتىلىققا تاباندى بولىپ، ب م ۇ ەرەجەسىنىڭ ماقساتى مەن حالىقارالىق زاڭدى قورعاپ، ءوڭىردىڭ جانە دۇنيە ءجۇزىنىڭ بەيبىتشىلىگى مەن ورنىقتىلىعىن جەبەۋدى قالايدى. سلوۆاكيا ءتوراعا شي جينپيڭنىڭ 2026 دۇنيە جۇزىلىك جاساندى زەردە جينالىسىندا العا قويعان تانىمى مەن دارىپتەمەسىن بۇكىلدەي قۇپتايدى، جۇڭگومەن تىعىز سايكەسىپ، جاساندى زەردەنى الەمدىك باسقارۋدى كۇشەيتىپ، ونىڭ بۇكىل ادامزاتقا شىنايى باقىت جاراتۋىن جەبەۋدى قالايدى.

 

سول كۇنى تۇستە شي جينپيڭ حالىق سارايىنىڭ التىن ءتۇستى زالىندا پەللەگرينيدى قارسى الۋ قوناعاسىن وتكىزدى.

 

ۋاڭ ي جوعارىداعى قيمىلدارعا قاتىناستى.

 

سول كۇنى تۇستەن كەيىن، سلوۆاكيانىڭ زۇڭتۇڭى پەللەگريني تيان-انمىن الاڭىنا بارىپ، حالىق قاھارماندارى ەسكەرتكىشىنە گۇل شەڭبەر قويدى.