باتا بەرۋدى بىلەمىز بە
0
2017-03-21 16:49:00
|
كەلۋقاينارى:
|
جاۋاپتى رەداكتور :

    استانا. قازاقپارات - ۇلىستىڭ ۇلى كۇنى - ناۋرىز مەيرامى قارساڭىندا باتاگوي اقساقالداردى تابا المايتىنىمىز راس. ال توي- دومالاقتاردا باتانىڭ ورنىنا تىلەك ايتىپ، سوڭىنان «ءاۋمين!» دەگەن ءسوزدىڭ ورنىنا «سول ءۇشىن!» دەپ شاتاسىپ جاتاتىنىمىز تاعى بار.

 

وعان كۇلەمىز دە قويامىز. الايدا ونىڭ استارىندا ۇلكەن پروبلەما - رۋحانيات، ءتىل مەن تاربيە ماسەلەسىنىڭ جاتقانىن اشىق ايتپاساق تا، ىشتەي جاقسى تۇسىنەمىز. قازاقپارات ءتىلشىسى ناۋرىز مەيرامى الدىندا زيالى قاۋىم وكىلدەرىنەن باتانىڭ كەيبىر نۇسقالارىن جازىپ الىپ، قازاقتىڭ وسى ءبىر تاربيەلىك ءمانى بار ءداستۇرىن تاعى ءبىر مارتە ەسكە تۇسىرگەندى ءجون كوردى. ايتا كەتەر جايت، زيالى قاۋىمنىڭ اراسىندا باتانى «ورتاعاسىرلىق اقىل ايتۋ» دەپ سانايتىندار دا كەزدەسەدى.

 

حالىق اۋىز ادەبيەتىن زەرتتەۋشى عالىم، پروفەسسور سەرىك نەگيموۆتىڭ ايتۋىنشا، قازاقتىڭ باتا سوزدەرىندە تابيعات پەن ادامزاتتىڭ بارلىق قۇبىلىستارى قامتىلعان. ءتىپتى، ۇيدە وتىرىپ قالعان قىز نەمەسە ۇيلەنبەي جۇرگەن ساقا جىگىتكە ارنالعان باتا سوزدەرى دە بار. «باتا ادام بالاسىنا كوركەمدىك سەزىم ۇيالاتادى. باتا اسەرلەندىرەدى، قاناتتاندىرادى، تولعاندىرادى، بيىككە جەتەلەيدى، پاراساتتىڭ بيىگىندە بولۋعا ۇندەيدى. تىلدىك ورتانى جاسايدى. سول ارقىلى جاستار ۇلت ءتىلىنىڭ گارمونياسىن، رۋحىن قابىلدايدى. وسىنىڭ بارلىعىن بۇرىنعى اتا- بابلارىمىز بىلگەن. نەگىزى، قاسيەتتى، كوركەم باتا سوزدەردىڭ ادام تاعدىرىنا دا اسەر ەتەتىنىن ۇمىتپاۋ قاجەت»، - دەيدى نەگيموۆ.

 

عالىمنىڭ ويىنشا، قازىرگى كەزدە باتاگوي اقساقالداردىڭ ازايىپ كەتۋىنە كەڭەستىك ساياسات تا ءوز اسەرىن تيگىزدى. «ويتكەنى كەڭەستەر كەزىندە «باتا»، «بي»، «الاشوردا»، «امەڭگەرلىك» دەگەن سوزدەردى ايتقىزعان جوق. بۇل قازاقتىڭ قاسيەتتى بولمىسىنىڭ شارتتارى عوي»، - دەپ اتاپ كورسەتتى سەرىك نەگيموۆ.

 

ال جازۋشى، دراماتۋرگ تولەن ابدىك ادام زامانىنا قاراي تىرشىلىك ەتۋى كەرەك دەپ سانايدى.

 

«قازىرگى ادامنىڭ كوزقاراسىندا وزگەشەلىكتەرى بار. بۇگىنگى ادام ءوز تاعدىرىن ءوزى جاساۋى قاجەت. تىلەكتى تەك قۇدايدان تىلەۋ عانا ەمەس. ول دا كەرەك. ءبىراق بۇگىنگى ادامنىڭ نەگىزگى مىندەتى - ءوز تاعدىرىنا ءوزى قوجا بولۋى، قوعامداعى ورنىن ءوزى انىقتاۋ، ءوز ماسەلەسىن ءوزى شەشۋ. وسىعان ءبىز قول جەتكىزگەندە عانا ازاماتتىق قوعام قۇرا الامىز، ۇلكەن ۇلت بولا الامىز. سوندىقتان نەگىزگى ماسەلە - ادامنىڭ وزىنەن تالاپ ەتۋ، تەك قۇدايدان عانا سۇراي بەرۋ ەمەس. ويتكەنى قۇداي بىردەڭە تاپساڭ عانا ساعان بولىسادى. ايتپەسە، قۇداي كوكتەن ەشتەڭە تاستامايدى. سوندىقتان بۇگىنگى جاعدايدا كوبىنە تىلەك بولۋى كەرەك. تىلەك ومىرگە جاقىن بولۋى كەرەك. جالپى، بۇگىنگى زاماننىڭ ادامى بولۋ كەرەك. مەنىڭشە، ورتاعاسىردا وتىرعانداي اقىل ايتۋدىڭ قاجەتى شامالى قازىر»، - دەدى تولەن ابدىك قازاقپارات تىلشىسىنە بەرگەن سۇحباتىندا.

 

اۆتور: ارمان اسقاروۆ 

 

未标题-1.jpg
未标题-1.jpg
00.jpg
QQ截图20170320103537.jpg
870cf1bf6d2f6d628c1e34a06efaf170.jpg