اقىلىنا كەلگەن اۋىل ازاماتى
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىلبەك | جاڭالانعان ۋاقىت:2017-06-30 16:54:00



    بۇلبۇل احىمەت قىزى 

    قوعام حاۋىپسىزدىك سالاسىندا قىزمەت ىستەگەن وسى ون نەشە جىلعا جۋىق ۋاقىتتان بەرى، تالاي دەلولاردى كەزدەستىردىم سونىڭ ىشىندە اراق دەيتىن الاپاتتىڭ كەسىرىنەن تۋىلعان دەلولار تىم كوپ، ال مەنىڭ بۇل ماقالانى جازۋىما تۇرتكى بولعانى، جاناشىر جانداردىڭ اقىلىنا قۇلاق اسىپ، ءوز ءومىرىن، ۇرپاعىنىڭ بولاشاعىن اراق الاپاتىنان امان ساقتاعان مىنا ءبىر اۋىل ازاماتى ەدى.


    وسىدان بىرنەشە جىل بۇرىن، قىس كەزى بولاتىن، ءتۇن جارىمىندا شىرىلداعان تەلەفون داۋسىمەن شىرت ۇيقىمنان ويانىپ، تىروپكانى كوتەرسەم، قايبار ەسىمدى قىزمەتتەسىم ەكەن. -اپەكە دەرەۋ كەزەكشىلىك ۇيىنە كەلىڭىزشى دەدى ابىرجي سويلەپ.


    -نە بولدى باۋىرىم، نە ءىس تۋىلدى دەگەنىمشە، تەزىرەك كەلە الاسىزبا، قانداي ءىس بولعانىن ءدال قازىر تەلەفوندا ءبىر اۋىز سوزبەن جەتكىزە المايمىن، دەدى دە تروپكانى قويا سالدى.


    سونىمەن اسىعىس كيىنىپ، كەزەكشىلىك بولىمىنە بارسام، كەزەكشى ساقشىلاردىڭ قاسىندا، ءۇستى- باسى بالشىق بالشىق، بەت- اۋزىنىڭ كىر قوجالاعىنان تەك ەكى كوزى عانا جىلتىراعان، ءۇش جاستار شاماسىنداعى ۇل بالا وتىر ەكەن، مەن ونى تاني كەتىپ سەلت ەتتىم، قايبار ورىنىنان تۇرەگەلىپ، اپەكە، ءبىز بۇل بالانى تۇنگى شارلاۋدا جۇرگەندە تاۋىپ الدىق، ءسىز تانيسىزبا؟ دەپ سۇراي جونەلدى، مەن جالما جان، يا تانيمىن، بۇل كەڭسايداعى مۇرالدىڭ بالاسى عوي، بەس كۇننىڭ الدىندا عانا مۇرالدىڭ شىلقا ماس بولىپ، بۇل بالانى جەتەلەپ، كوشە بويىندا جۇرگەنىن كورىپ قالىپ، ەكەۋىنىڭ دە كىرە اقىسىن تولەپ، اۋىلىنا قايتارىپ جىبەرگەن بولاتىنبىز، ەندى قالايشا سەندەردىڭ قاستارىڭدا وتىر، اكەسى قايدا؟ دەپ دەگبىرىم قاشىپ، بالانىڭ قاسىنا جەتىپ باردىم، ءدال سول ساتتەگى، جۇدەپ جاداپ، مۇسەۋرەگەن سابيدىڭ بەينەسى كوز الدىمنان ءالى كۇنگە كەتپەيدى، سودان جارىم اي مولشەرى بۇرىن، ءبىر اۋىلداستان مۇرال كەلىنشەگىنەن اجىراسىپ كەتىپتى، بالاسىن ءوزى باعىپ جۇر ەكەن دەپ ەستىگەنىمدى قايبارلارعا ايتىپ بەردىم، ال ولاردىڭ ايتۋىنشا، بۇل بالانى ءبىر توپ اراقكەشتەردىڭ جانىندا، قوقسىق ۇيىندىلەرىنىڭ اراسىندا توڭىپ جىلاپ وتىرعان جەرىنەن كورىپ، وسىندا الىپ كەلگەن ەكەن، ءبىز بارلىعىمىز، كىشكەنتاي ءسابي اكەسىنەن اداسىپ قالعان بولدى دەپ توپشىلادىق، سونىمەن مەن بالانىڭ باسىنان سيپاپ ،كەلەعوي اينالايىن، اپەكەڭ سەنى كوتەرسىن بولاما، دەپ ەدىم، ول ءسال توساڭسىعانداي بولىپ تۇردى دا ىيىعىما اسىلا كەتتى، جۇرەگىم ەرىكسىز ەلجىرەپ، جانارىما جاس ۇيىرىلدى، قايباردا، باسقا قىزمەتتەستەرىمدە مەنىڭ بۇل بالانى اكەسى تابىلعانشا ۇيىمە اپارىپ قاراي تۇرۋىمدى ءوتىندى، وزىمنىڭ دە قالاۋىم سول ەدى، بىردەن ماقۇلدىق بەردىم دە، اكەسىن تەزىرەك تابۋلارىن تاپسىرىپ، بالانى ۇيىمە الىپ قايتتىم، ۇيگە بارعانسوڭ ەڭ الدىمەن بەتى قولىن جۋىپ، تاماقتاندىردىم، سونداعى ونىڭ تاماق جەگەنىن كورگەن جاننىڭ جۇرەگى ەلجىرەمەي تۇرا الماس، بەيشارا ءسابي نەشە كۇن ءجوندى تاماق جەمەگەن سياقتى، كىشكەنتاي قولدارىن تاماق سالىنعان ىدىستارعا دامىلسىز جۇگىرتىپ، ۇرتىن تولتىرا اسىعىس ءىشكەنى . . . ءبارى ءبارى كوز الدىمدا ... سوسىن ونى سۋعا قۇيىندىرىپ، كىيىمدەرىن جۋىپ، كيىندىرىپ قويدىم، العاش كەلگەندە توساڭسىپ، سويلەمەي جۇرگەن بالا، كوڭىلى كوتەرىلىپ، بىلدىرلاپ سويلەپ، تىراڭداپ قالدى، نەگىزى تۇندە اكە - شەشەسىن ىزدەپ جىلايدى عوي دەپ الاڭداعان ەدىم، بىراق سونداي تىنىش، ءتاتتى ۇيىقتاپ شىقتى، ەرتەسى تاڭەرتەڭ مەنىمەن ەرىپ قىزمەت ورنىما كەلگەندە قىزمەتتەستەرىم اۋەلى ونى تانىماي قالىپتى، بالا بولسادا، كىيىمدەرىن تازالاپ، جۋىندىرىپ قويعانعا قۇلپىرىپ شىعا كەلىپتى دەسىپ بارلىعى قۋانىسىپ قالدى، سونىمەن ءبىر كۇن بولسادا مەنى پانا تۇتقان ءسابي، قايدا بارسام جانىمنان قالماي ەرىپ جۇردى، ەرتەسى، قايبار بالانىڭ اكەسىن تاۋىپ مەكەمەگە الىپ كەلدى، نەشە كۇنگى ۇزىلسسىز ىشىلگەن اراقتىڭ قىزۋى ءالى تولىق تاراماعان ەكەن، اياعىن ارەڭ باسادى، سوسىن بىرنەشە ساعات كەڭسەدە ۇيقتاپ، ماستىعىنان ارەڭ ايىعىپ، سوزگە كەلدى، مەن وعان، بالاسىن كورسەتىپ، نەگە وسىنشاما اراققا سالىنىپ، بالاڭدى قاڭعىرتتىڭ دەپ قاتال سويلەگەن ەدىم، بالاسىنا كوزىنىڭ قىرىمەن ءبىر قاراپ قويىپ، سىزدەر مەنىڭ باسىمداعى قايعىمدى بىلمەيسىزدەر، تاياۋدان بەرى تۋىلعان كوپتەگەن ىستەر جىعىلعانعا جۇدىرىق دەگەندەي، جۇدەپ-جاداعان كوڭىلىمدى ونان ارى بەيمازا قىلىپ، ەڭسەمدى كوتەرتپەي- اق قويدى، ماعان ەندى سەرىك بولاتىن، شەرىمدى تارقاتاتىن وسى اششى سۋدان باسقا نە بار دەيسىزدەر، بالامدى ەرتىپ الىپ، اراق دوستارىممەن باس قوسىپ كوڭىلىمدى كوتەرەمىن، الدىڭعى كۇنى تۇندە، بالامدى سول اراق دوستارىمنىڭ جانىنا وتىرعىزىپ قويىپ، ءشول باساتىن جۇز گىرام ىزدەپ كەتكەنىمدە، ءسىزدەر الىپ كەتىپسىزدەر ەمەسپە، دەپ قايبار ەكەۋىمىزگە كەزەك قىلجيا قارادى، قايبار قاتتى اشۋلانىپ، وعان اقىرىپ جىبەردى، مۇرال العاشقىداي ەمەس، ءسال جۋاسىپ، ويعا شومىپ از وتىردى دا، ماعان قاراپ، ءسوزىن قايتا جالعادى، ساقشى اپەكە، مەنىڭ جۇرەگىم قاتتى جارالى، جۇبايىم جاقىندا عانا اكەلى بالالى ەكەۋىمىزدى تاستاپ، باسقانىڭ ەتەگىنەن ۇستاپ كەتتى،ءسىز ماعان نەسىن رەنجيسىز، اناسىنا كەرەك بولماعان بالا، ماعاندا كەرەك ەمەس، بالامدى كىم العسى كەلسە سوعان بەرە سالامىن، مەنى اراققا ءبىر تويعىزسا بولدى، مەن ءۇشىن ومىردىڭ ەش ءمانى قالمادى دەپ، قاتتى كۇرسىنىپ بارىپ، وكىرىپ جىلاپ جىبەردى، سول ءساتتە، ءسابي جۇگىرىپ اكەسىنىڭ جانىنا جەتىپ بارىپ، قۇشاقتاي الىپ، اكە جىلاماشى، اكە جىلاماشى دەپ اكەسىنىڭ كوز جاسىن سۇرتە بەردى، ال اكەسى بولسا، سورلى قۇلىنىم اي، سەنى ءتىرى جەتىم قىلعان شەشەڭدى كەشىرە المايمىن، اكەڭ ءومىردەن تۇڭىلگەن دەپ ونان ارى ەڭىرەدى، يا، ومىرلىك سەرىگىم بولادى دەپ، سەنىپ قوسىلعان جارىنان سۋىنىپ، سۇيكىمدى بالاسىنان جەرىپ، باسقامەن كەتكەن اقىماق ءارى قاتىگەز ايەلگە مەندە قاتتى ءوشىگىپ تۇرمىن، دەسەدە، سول ءبىر اداسقان اقىلسىز ايەلدىڭ سوڭىنان، اراققا سالىنىپ، ءوز ءومىرىن عانا ەمەس، ۇرپاعىنىڭ دا ءومىرىن قۇردىمعا كەتىرۋگە شاق قالىپ جۇرگەن، مىنا اتپال ازاماتتىڭ قىلىعى ارقاما ايازداي باتىپ، جۇرەگىمە تىكەندەي قادالدى، سونىمەن وعان، ەڭسەڭدى كوتەر باۋرىم، ەسىڭدى جيساڭ ءالى دە كەش ەمەس، وزىڭدى ومىرگە اكەلىپ، قاناتتىعا قاقتىرماي وسىرگەن اتا اناڭنىڭ، ساناڭا ءبىلىم ءنارىن قۇيعان ۇستازدارىڭنىڭ ءۇمىتىن اقتاعانىڭ بىلاي تۇرسىن، جاپ جاس باسىڭمەن ءومىردەن تۇڭىلدىم دەپ، قاي قايداعىنى ويلاپ، اراققا سالىنىپ اقىماق بولعانىڭ جارامايدى، مىنا سۇيكىمدى قۇلىنىڭا كوز سالشى، ونىڭ بولاشاعى جايلى ويلانشى، ايەلىڭ اق نەكەلەرىڭدى اياق استى قىلىپ، باسقامەن كەتكەنىمەن، ءومىر وزىڭدىكى، بولاشاق وزىڭدىكى، سەن تىڭ تىرلىگىڭدى باستاپ، مىنا قۇلىنىڭمەن بىرگە باقىتتى ءومىر وتكىزۋىڭ كەرەك، دەپ جارىم كۇن، بىلگەن كەڭەسىمدى، جاقسى سوزدەرىمدى اياماي، قاتتى دا ، ءتاتتى دە ايتىپ جۇرىپ، ونى اقىلعا كوندىرىپ، اۋزىنان ادام بولام دەگەن ۋادەسىن الىپ، بالاسىن تابىستاپ، جولىنا سالدىم، ءسابي كەتەرىندە، مەنى قۇشاقتاپ ارەڭ ايىرىلدى، مەن ىشتەي، اقىلدى قارعام اي، اكەڭ ماعان بەرگەن ۋادەسىن ورىنداپ، سەنى باقىتتى قىلسا ەكەن دەپ، قول بۇلعادىم.


    سودان جارىم جىل ۋاقىت وتكەننەن كەيىن، الدە ءبىر ساۋدا ورتالىعىنان، مۇرالعا جولىعىپ قالدىم، شىتتاي كيىنىپ الىپتى، جۇزىنەن شاتتىق كۇلكى ەسەدى، اپەكە، ءسىزدىڭ ايتقان اقىل تاربيەڭىز، اتا - انام، ءىنى قارىنداستارىمنىڭ تاربيەسى مىنا باسىما قونىپ، اراق دەگەن الاپاتتان ءبىر جولاتا ايىعىپ، تىڭ تىرلىگىمدى باستاپ كەتتىم، سول ءبىر مەزەتتىك بولسادا اداسقان كەزدەرىمدى ەسىمە الۋدان ۇيالامىن، دەپ كۇلىپ قويىپ، ءسوزىن جالعادى، قازىر جەكە كاسىپپەن شۇعىلدانىپ جاتىرمىن، كىرىسىم دە كۇن ساناپ ارتىپ كەلەدى، بالامدى دا بالالار باقشاسىنا كىرگىزىپ وقىتىپ جاتىرمىن، ول ءالى كۇنگە دەيىن ، اۋداندا ساقشى اپەكەم بار دەپ ماقتانىشپەن ايتىپ جۇرەدى، دەپ، اسا ءبىر ريزاشىلىقپەن ماعان العىسىن جاۋدىرىپ، جۋىق ارادا ۇيلەنبەكشى ەكەنىن، تويىنا ءسوزسىز بارۋىمدى تاپسىرىپ، جولىنا تۇستى..
ال مەن بولسام، يا يا، اداسقاننىڭ ايىبى جوق، قايتىپ ۇيىرىن تاپقان سوڭ دەپ، ءوز ءوزىمە كۇبىرلەپ، ساۋدا ورتالىعىنىڭ شىعار ەسىگىنە قاراي بەتتەدىم ! 

    قىزمەت ورنى: قابا اۋداندىق قوعام حاۋىپسزدىك مەكەمەسى