كوڭىلشەكتىكپەن وزگەنى كولىگىنە وتىرعىزۋشى دا جاۋاپكەرلىك ارقالادى
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىل قادىلبەك ۇلى | جاڭالانعان ۋاقىت:2017-07-28 18:20:00



    جىڭ حۇييان، گو حايلي 

    تاياۋدا، بەيجيڭ قالاسى چاڭپيڭ رايوندىق حالىق سوتى مەكەمەسى قاتىناس شىرعالاڭىنداعى ءبىرقىدىرۋ تيپتىك دەلونى حابارلاندىردى ءارى تەرگەۋشى ادامدارعا ۇنەمى كەزىگەتىن قاتىناس شىرعالاڭىن پارىقتاۋ جونىندە تۇسىنىك جاسادى جانە ەسكەرتۋ بەردى.


كوڭىلشەكتىكپەن وزگەنى كولىگىنە وتىرعىزۋشى دا جاۋاپكەرشىلىك ارقالايدى


    دەلو مىسالى: ۋاڭ حانىم قىزمەتتەسى ليۋ حانىمنىڭ جەكەلىك اۆتوكولىگىنە وتىرىپ، بىرگە ساياحاتقا شىقتى، كولىكتى ليۋ حانىم جالداپ العان شوفەر جاڭ مىرزا جۇرگىزدى. جول ورتادا قاتىناس شىرعالاڭى تۋىلىپ، ۋاڭ حانىم اۋىر جارالانعاندىقتان، حالىق سوتى مەكەمەسىنە ارىز بەردى. حالىق سوتى مەكەمەسى ليۋ حانىم مەن جاڭ مىرزانى ۋاڭ حانىمعا بەرىلەتىن 290 مىڭ يۋان تولەمدى ورتاق تولەۋگە بۇيىردى.


    زاڭدىق تۇسىنىك: كولىك يەسى ليۋ حانىم «ءبىز ساياحاتقا ەرىكتى تۇردە بىرگە شىققانبىز، سوندىقتان ۋاڭ حانىمعا تولەم تولەۋ جاۋاپكەرلىگىن ارقالاۋىم ورىنسىز» دەپ جالتاردى. ال جاڭ مىرزا «مەنى كولىك يەسى جالداپ العان، ءمۇبادا، تولەم تولەۋىمە ءتيىستى بولسا، ونى مەنى جالداعان ليۋ حانىم ۇستىنە الۋى ءتيىس» دەپ ات تونىن الا قاشتى. الايدا بەيجيڭ قالاسى مييۇن اۋداندىق قاتىناس ساقشى ۇلكەن اترەتى «جاڭ مىرزا شىرعالاڭدا بارلىق جاۋاپكەرشىلىكتى، كولىك يەسى ىلىكتەس جاۋاپكەرلىكتى ارقالايدى. سوندىقتان ۋاڭ حانىمنىڭ ارىزى ورىندى، ونىڭ زيانىن كولىك يەسى ليۋ حانىم مەن شوفەر جاڭ مىرزا ورتاق ارقالايدى» دەپ تۇراقتاندىردى.


    ەسكەرتۋ: كولىك يەسى مەن كولىك جۇرگىزۋشى كولىككە وتىرعان ادامنىڭ باس اماندىعىنا شىنايى كەپىلدىك ەتۋى ءتيىس، كوڭىلشەكتىكپەن كولىگىنە وتىرعىزعان ادام شىرعالاڭعا ۇشىراسا، جاۋاپكەرشىلىك ارقالاۋدان سەبەپسىز قاشقالاقتاماي، زاڭ-ەرەجەگە ساي سايكەستى جاۋاپكەرشىلىكتى ۇستىنە الۋى قاجەت. وزگەنىڭ كولىگىنە وتىرعان ادام مۇنان كەنەلگەن تەزدىك جانە قولايلىلىقتى سەزىنۋمەن بىرگە، تۋىلۋى مۇمكىن بولعان ماسەلە مەن زاڭدىق زارداپتى دا بولجاي ءبىلۋى ءتيىس.


موتورسىز كولىكتى جۇرگىزۋدە اعاتتىق وتكىزگەن ادام، ءسوزسىز، جاۋاپكەرشىلىك ارقالايدى


    دەلو مىسالى: ۋاڭ فاميليالى ەلەكترلى ۆەلوسيپەدىنە ايەلى شۇي فاميليالىنى مىنگەستىرىپ جولدان كەسىپ ءوتىپ بارا جاتقانىندا، باي فاميليالى ايداعان جەڭىل اۆتوكولىككە سوعىلۋدان ۋاڭ فاميليالى مەن شۇي فاميليالى جارالاندى، 2 كولىك تە ءبۇلىندى. بەيجيڭ قالاسى چاڭپيڭ رايوندىق حالىق سوتى مەكەمەسى بۇل دەلونى تەكسەرگەننەن كەيىن «تالاپكەر مەن ايىپكەر بىردەي ٪50 تەن جاۋاپكەرشىلىك ارقالايدى» دەپ ۇكىم شىعاردى.


    زاڭدىق تۇسىنىك: «ەلىمىزدىڭ جول قاتىناس حاۋىپسىزدىگى زاڭىنىڭ» 76-تارماعىندا: قاتىناس شىرعالاڭى موتورلى كولىكتەر اراسىندا تۋىلسا، جاۋاپكەرشىلىكتى اعاتتىق وتكىزگەن جاق ارقالايدى؛ اعاتتىق ەكى جاقتان دا وتكەن بولسا، جاۋاپكەرشىلىكتى ءارقايسىسى وتكىزگەن اعاتتىعىنىڭ سالماعىنا قاراي ارقالايدى؛ قاتىناس شىرعالاڭى موتورلى كولىك پەن موتورسىز كولىك جۇرگىزۋشىلەرى، جاياۋلار اراسىندا تۋىلسا، جاۋاپكەرشىلىكتى موتورلى كولىك جاق ارقالايدى؛ ءبىراق موتورسىز كولىك جۇرگىزۋشىنىڭ، جاياۋلاردىڭ جول قاتىناس حاۋىپسىزدىگى جونىندەگى زاڭدارعا، زاڭ-ەرەجەلەرگە قايشىلىق جاساعانىن، موتورلى كولىك جۇرگىزۋشىلەرىنىڭ قاجەتتى جايعاستىرۋ شارالارىن قولدانعانىن دالەلدەيتىن دالەل- سىپاتتار بولسا، موتورلى كولىك جاقتىڭ جاۋاپكەرشىلىگى جەڭىلدەتىلەدى،-دەپ بەلگىلەنگەن. بۇل دەلودا ۋاڭ فاميليالى ادام مىنگەستىرىپ جولدان كەسىپ ءوتىپ، ءوزى اعاتتىق وتكىزگەن، سوندىقتان جەڭىل اۆتوكولىك شوفەرى باي فاميليالى مەن ەلەكترلى ۆەلوسيپەد جۇرگىزگەن ۋاڭ فاميليالى شىرعالاڭنىڭ جاۋاپكەرشىلىگىن تەڭ ارقالايدى.


    ەسكەرتۋ: تاياۋ جىلداردان بەرى، ەلەكترلى ۆەلوسيپەدكە قاتىستى جول قاتىناس حاۋىپسىزدىك جاۋاپكەرشىلىك شىرعالاڭى جىل سايىن كوبەيىپ كەلەدى، ەلەكترلى ۆەلوسيپەد ءوندىرىسىن باسقارۋدى كۇشەيتىپ، قارقىنى وتە تەز، سالماعى وتە اۋىر ەلەكترلى ۆەلوسيپەدتىڭ بازارعا كىرۋىن قاتاڭ تەجەۋ كەرەك؛ ەلەكترلى ۆەلوسيپەدتى جۇرگىزۋشى تولىمدى زاۆود وندىرگەن ۆەلوسيپەدتى ساتىپ الۋى، ارزان قولدى زاتقا جۇگىرمەۋى، سونداي-اق قاتىناس زاڭ-ەرەجەسى جونىندەگى تانىمىن جوعارىلاتىپ، ەلەكترلى ۆەلوسيپەد جۇرگىزۋدى ارناعا ءتۇسىرىپ، قارقىندى قاتاڭ تەجەۋى ءتيىس.


    كولىك توقتاتۋ الاڭىندا اراق ءىشىپ الىپ كولىك شەگىندىرسە، قىلمىستىق جاۋاپكەرشىلىك ارقالايدى


    دەلو مىسالى: باۋ فاميليالى اراق ىشكەننەن كەيىن، بەيجيڭ قالاسى چاڭپيڭ رايونىنداعى ءمالىمبىر كولىك توقتاتۋ الاڭىندا كولىگىن شەگىندىرگەنىندە، يۋە فاميليالىنىڭ جەڭىل اۆتوكولىگىن سوعىپ كەتىپ، كولىككە سىزات تۇسكەن. ولشەۋ ارقىلى باۋ فاميليالىنىڭ ءار 100 ميلليليتر قانىندا 126.1 ميلليگرام سپيرتتىڭ ەكەنى انىقتالدى. حالىق سوتى مەكەمەسى باۋ فاميليالىعا قاماقحانادا ءۇش اي جۇمىس ىستەتۋ ءارى اقشالاي ايىپ سالۋ جازاسىن كەستى.


    زاڭدىق تۇسىنىك: «قاتەرلى كولىك جۇرگىزۋ قىلمىسىنداعى <جولدى> تۇراقتاندىرۋدا جول قاتىناس حاۋىپسىزدىگى زاڭىنىڭ قاتىستى تارماقتارى ولشەم ەتىلەدى، تاس جول، قالا ءىشى جولى جانە مەكەمە-ورىندار قاراستىلىعىنداعى قوعامداعى موتورلى كولىكتەردىڭ قاتىناۋىنا جول قويىلعان جەرلەر، الاڭ، الەۋمەتتىك كولىك توقتاتۋ الاڭى قاتارلى جۇرت ءجۇرىپ- تۇراتىن ورىنداردىڭ ءبارى جول ەسەپتەلەدى». جوعارىدا ايتىلعان ورىنداردا اراق ىشكەننەن كەيىن كولىك جۇرگىزۋ قاتەرلى كولىك جۇرگىزۋ قىلمىسىن قالىپتاستىرادى.


    ەسكەرتۋ: كولىك جۇرگىزۋشىلەر «كولىك جۇرگىزگەندە اراق ىشپەۋ، اراق ىشسە كولىك جۇرگىزبەۋ» ادەتىن قالىپتاستىرىپ، باق سىناۋ پسيحيكاسىنان اۋلاق بولۋى ءتيىس، الەۋمەتتىك سيپاتى ءبىرشاما كۇشتى ەرەكشە وڭىردە، ايتالىق، قوعامداعى كولىك قاتىناۋعا رۇقسات ەتىلگەن تۇرعىندار شاعىن رايونى، جوعارى مەكتەپ اۋلاسى، الەۋمەتتىك كولىك توقتاتۋ الاڭى، اۋىل- قىستاق جولى قاتارلى «جولعا» تاۋەلدى ورىنداردا ەرەكشە ساق بولعانى ءجون.


    اۋدارعان: ساعىنبەك رابات ۇلى  (تورابىمىز ۇسىنىس ەتكەن ءتىلشى)


    التاي گازەتى مەكەمەسى جاڭا مەديا ءبولىمى