ۇرلىق بارىسىندا ءولىم دەلوسىن تۋدىرىپ قاشقان ەر ادام 27 جىلدان كەيىن جەر ورتا جاسقا تاياعاندا زاڭ تورىنا ءتۇستى
كەلۋقاينارى: |جاۋاپتى رەداكتور: | جاڭالانعان ۋاقىت:2017-08-28 13:46:00


    چياۋ چىڭ ي، ياڭ ايجيۇن حابارلايدى. باسقالارمەن استاسقان ول جياڭسۋ ولكەسى يانچىڭ قالاسى فۋنيڭ اۋدانىنداعى ءمالىم ءبىر وتباسىنا ۇرلىققا تۇسەدى، ۇرلىق ىستەپ جاتقاندا ەرلى-زايىپتى ءۇي يەسى كەلىپ قالادى، 31 جاستاعى شيا لوگىن (ادام اتى وزگەرتىپ الىندى) قولىنداعى بولات شىبىقپەن ەرلى-زايىپتىلاردى ۇرىپ ءولتىرىپ قاشىپ كەتەدى، ارادا 27 جىل وتكەننەن كەيىن قولىنا مۇزداي سۋىق كوزىر سالىنعان كەزدە شيا لوگىن 50 دى القىمداپ ۇلگىرگەن بولاتىن. ۇستالعان كەزدە شيا لوگىن: بۇگىن اقىرى ءبىر تىنىش ۇيىقتايتىن بولدىم عوي،- دەگەن.


    ۇرلىق بارىسندا ورناعان ءولىم دەلوسى


     1990-جىلى 16-مامىر تۋىلعان ادام ءولتىرۋ دەلوسى جياڭسۋ ولكەسى يانچىڭ قالاسى فۋنيڭ اۋدانى ءمالىم قىستاعىنىڭ تىنىشتىعىن بۇزادى. سول كەزدە 31 جاستاعى شيا لوگىن ءوش الۋ نيەتىمەن، باسقالارمەن استاسىپ وزىمەن ارادا قايشىلىعى بار جاماعايىن تۋىسى ۋ xx تىڭ ۇيىنە ۇرلىققا تۇسەدى. سىبايلاس ەكەۋى ءۇيدى اقتارىپ جاتقان كەزدە، اياق-استىنان ءۇيدىڭ يەسى ەرلى زايىپتى ۋxx پەن شيا xx ۇرىلاردىڭ ۇستىنەن تۇسەدى. سەن نەعىپ ءجۇرسىڭ؟ ءۇيدىڭ ءىشىن اقتارىستىرىپ نە ىزدەپ ءجۇرسىڭ دەپ ەرلى-زايىپتىلار شيا لوگىندى سۇراقتىڭ استىنان الادى. ىلە-شالا ەكى جاق جۇلقىلاسىپ، سوڭى توبەلەسكە اينالادى. جۇلقىلاسىپ جۇرگەندە شيا لوگىن بەلىنە قىستىرىپ العان بولات شىبىقپەن ۋxx پەن شيا xx تى باسىنا ۇرىپ جاراقاتتاپ ەسىنەن تاندىرادى. شيا لوگىن سىبايلاسىمەن بىرگە تارتىپ العان 300 يۋان اقشانى الىپ، بولات شىبىقتى لاقتىرىپ ناق مايداننان قاشىپ كەتەدى. سول كەزدە ۋxx تىڭ ناق مايداندا جان تاپسىرىپ، ال شيا xx تىڭ بىرنەشە كۇننەن كەيىن اۋىر جاراقاتتان كوز جۇمارىن ويلاپ كورمەگەن ەدى.


ءولىم دەلوسى تۋىلعاننان كەيىن جياڭسۋ ولكەسى يانچىڭ قالاسىنىڭ ساقشى جاعى بۇل دەلوعا وسكەلەڭ ءمان بەرىپ، ناق مايداندى بارلاۋ جانە احۋال يەلەپ تەكسەرۋ جۇرگىزۋ ارقىلى حالىق ساقشىلارى شيا لوگىننىڭ دەلو تۋدىرۋ مۇمكىندىگى بارلىعىن بايقايدى، ءارى جەدەل تۇتقىنداۋعا كىرىسەدى، الايدا سول كەزدەن باستاپ شيا لوگىن دەگەن ادام سول بەتى ءىز-توزسىز عايىپ بولادى.


    قاشىپ شىققان شيا لوگىن ەرلى زايىپتى ۋxx پەن شيا xx تىڭ ارت-ارتىنان قايتىس بولعان حابارىن ەستيدى، ەكى ادامنىڭ قان قارىزى مويىنا ىلىنگەن ونىڭ ۇرەيگە تولى قاشىپ-پىسقان تۇرمىسى باستالادى. ساقشى جاقتىڭ ءوزىن تاۋىپ الۋىنان قورقىپ ەشكىممەن ارالاسپايدى، ءتىپتى ءۇي ىشىندەگىلەرمەن دە حابارلاسىپ كورمەگەن. جاتىن ورىن تابا الماعان كەزدەردە ورمان اراسىنا جاسىرىنىپ، كوپىر استىنا تۇنەگەن، قارىنىن تويعىزۋ ءۇشىن قوقسىق تەرىپ جەگەن. ساقشى جاق تابا الماسىن دەپ شيا لوگىن دەگەن اتىن يۇي شيبەي دەپ وزگەرتىپ، ءوزى جالعىز بيڭتۋان ەگىس الاڭىندا 27 جىل تۇرادى، بەيتۇن قالاشىعىندا ءار كۇنى اۋىل شارۋاشىلىق ماشيناسىمەن زات تاسىپ تۇرمىس كەشىرەدى.


    27 جىلدان بەرى شيا لوگىن ءتۇن بالاسىن ۇرەيمەن وتكىزىپ كەلگەن، تۇسىندە ۇنەمى ەرلى-زايىپتى ۋxx پەن شيا xx تىڭ ءولىپ جاتقانىن، ولاردى ءوزىنىڭ ۇرىپ ولتىرگەنىن كورەدى. قالاي قۇلشىنسادا وسى ءبىر ۇرەيلى تۇستەن ايىعا المايدى، ونىڭ ۇستىنە ول ساقشى ماشيناسىن كورسە نەمەسە ساقشى ماشيناسىنىڭ سەگىنالىن ەستىسە بولدى، ساقشىلار ءوزىن ۇستاعالى كەلە جاتقانداي ۇرەيلەنەتىن. سانسىز تۇندەردە قارا تەر باسىپ ۇرەيلى تۇستەن شوشىپ ويانىپ، كوپ كۇندەردى ۇيقى-كۇلكىسىز ۇرەيمەن اتىرادى، ءارى قالايدان قالاي جاماعايىن تۋىسىما قول كوتەرىپ ۇرىپ ءولتىردى ەكەن دەپ ءوزىنىڭ جازا باسقانىنا قاتتى وكىنەدى...


    قولىنا سالىنعان كوزىر ونىڭ قاشقىندىق تۇرمىسىن اقىرلاستىردى


    2017- جىلى 7-تامىز، التاي قالالىق قوعام حاۋىپسزدىك حالىق ساقشىلارى قاتىستى ءجىپ ۇشىنا يە بولىپ، التاي قالاسىنىڭ ءمالىم اۋىلىنىڭ تۇرعىنى يۇي شيبەيدىڭ 27 جىلدىڭ الدىندا جياڭسۋ ولكەسىنەن ەكى ادام ءولتىرىپ قاشىپ جۇرگەن شيا لوگىن ەكەنىن بايقايدى. ءجىپ ۇشىنا يە بولعاننان كەيىن التاي قالالىق قوعام حاۋىپسىزدىك پارتكومى وسكەلەڭ ءمان بەرىپ، ارناۋلى ادام ورنالاستىرىپ ءجىپ ۇشىنا ىشكەرلەي تەكسەرۋ جۇرگىزەدى، سونىمەن قاتار جياڭسۋ ولكەسى يانچىڭ قالالىق ساقشى جاعىمەن تىعىز قارىم-قاتىناس ورناتادى. يانچىڭ قالالىق ساقشى جاعى شيا لوگىننىڭ بۇرىنعى تۇرعان جەرى ارقىلى وسىعان قاتىستى ينفورماتسيالارعا يە بولادى، كوز الدا التاي قالاسى بەيتۇن قالاشىعى ءمالىم گاز قۇيۋ فۋنكىتىندە اماندىق قورعاۋشى بولىپ ىستەيتىن 53 جاستاعى يۇي شيبەيدى قاشىپ جۇرگەن شيا لوگىن بولۋى مۇمكىن دەپ تۇراقتاندىرادى.


    20 -تامىز، جياڭسۋ ولكەسى يانچىڭ قالالىق قوعام حاۋىپسىزدىك مەكەمەسىنىڭ 3 بارلاۋشىسى التاي قالاسىنا جەتەدى، التاي قالالىق قوعام حاۋىپسىزدىك مەكەمەسى پارتكومنىڭ نۇسقاۋىمەن يۇي شيبەيدى قولعا الۋعا كىرىسەدى.


    21-تامىز ساعات 15 تە، التاي قالالىق قوعام حاۋىپسىزدىك مەكەمەسىنىڭ ساقشىلارى مەن بەيتۇن بولىمشە ساقشى مەكەمەسىنىڭ بارلاۋشىلارى يۇي شيبەي تۇرعان عيماراتتىڭ الدىندا تۇتقىنداۋعا دايىندالادى. ساعات 19 مولشەرىندە ۇيىنە قايتىپ كەلە جاتقان يۇي شيبەيدى عيمارات استىندا تۇرعان حالىق ساقشىلارى تۇتقىندايدى.


    ساقشى جاق سەنى نەلىكتەن قولعا العانىمىزدى بىلەسىڭ بە دەگەندە ول باسىن يزەپ بىلەمىن دەگەن. تەرگەۋ ارقىلى ول ءوزىنىڭ ۇمىتۋعا اينالعان اۋەلگى اتى مەن ادام ءولتىرىپ دەلو تۋدىرۋ بارىسىن تولىق مويىندايدى، ءارى ءوزىنىڭ 27 جىل بويى ۇرەيمەن جۇرگەنىن، قولعا تۇسكەن كۇننەن باستاپ الاڭسىز ۇيىقتايتىندىعىن تاپسىرعان.


    شيا لوگىندى التاي قالاسىنا الىپ قايتۋ بارىسىندا، قالاعا كىرەر اۋىزدا جاڭبىردان كەيىن ۇلكەن كەمپىر قوساق پايدا بولادى، وسى كەزدە جياڭسۋلىق ساقشى شياۋجۋ: وسىنداي ۇلكەن كەمپىر قوساقتى ەكىنشى رەت كورۋىم، العاش بالا كۇنىمدە اۋىلدان كورگەن ەدىم،-دەيدى. وسى كەزدە التاي قالالىق قوعام حاۋىپسىزدىك مەكەمەسىنىڭ بارلاۋشىسى تۇرىپ: ويلاسام بۇل الگى قاستاندىققا ۇشىراعان ەرلى-زايىپتىلاردىڭ ارۋاعى رازى بولىپ، ءبىزدى قۇتتىقتاپ تۇرعانى شىعار،-دەيدى. ال وسى كەزدە شيا لوگىن كوزىن جىپىلىقتاتىپ تەرەزەدەن سىرتقا تەلمىرىپ، نە ويلاپ وتىرعانى بەلگىسىز ەدى... ارينە ونى زاڭنىڭ ءادىل ۇكىمى كۇتىپ تۇرعانى بارىمىزگە ايان. (دەلوداعى ادام اتتارى وزگەرتىلىپ الىنعان)

حانزۋشادان اۋدارعان بۇلبۇل احىمەت قىزى

قىزمەت ورىنى: قابا اۋداندىق قوعام حاۋىپسزدىگى مەكەمەسى