باسقالاردىڭ ۋلى شەگىمدىك شەگۋىنە ءۇيىن بوساتىپ بەرىپ، زاڭ جازاسىنا تارتىلدى
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىلبەك | جاڭالانعان ۋاقىت:2017-09-14 10:45:00


    بۇلبۇل احىمەت قىزى


    ۇزاق جىل جەكە كاسىپپەن شۇعىلدانىپ، نەداۋىر اۋقاتتى ادامدار قاتارىنا قوسىلعان ياسىنجان، ءبىر رەتكى اڭعالدىعىنىڭ كەسىرىنەن، ۋلى شەگىمدىكتىڭ ۋىسىنا تۇسىپ، ناشاقورعا اينالادى دا قايتا سەرپىلە المايدى، سۇيتىپ جۇرگەن كۇندەردىڭ بىرىندە، ول، كورشى اۋداننان وزىن ارنايى ىزدەپ كەلگەن ناشاقور دوسى توقتنياز بەن بىرگە، قالا ورتالىعىنداعى ۇيىنە جاسىرىپ قويعان، ناشانىڭ بارلىعىن شەگىپ تاۋسادى، ەرتەسى، جانەدە ناشا قۇمارلارى ۇستاعان توقتنياز ەكەۋى، وزدەرىنە تانىس جاسىرىن توپتارعا دۇركىن- دۇركىن تەلەفون سوعىپ، ساتىپ الاتىن ناشا ىزدەيدى، سول كۇنى ءتۇس اۋا، ديڭ حۋالان اتتى ناشا شەگەتىن، ءارى ونى ساۋدالاۋمەن شۇعىلداناتىن قىز، جانىنا ۋاڭ حاي دەگەن ناشاقوردى ەرتىپ، ياسىنجانمەن توقتنيازعا جولىعادى دا، ولارعا، ءبىر مۇنشا ناشا الىپ كەلگەنىن، قالتارىس جەر تاۋىپ، بىرلىكتە شەگۋدى ايتادى، بۇعان جەردەن التىن تاپقانداي قۋانعان ياسىنجان، جالما- جان ولاردى وزىنىڭ قالا ماڭىنداعى، كونە تۇراعىنا ەرتىپ اپارىپ، تاعى ءبىر ناشاقور دوسى، چىن فاميليالىنى شاقىرىپ بەسەۋى بىرگە، ديڭ حۋالان اكەلگەن 10 گرام ناشانى شەگىپ، ءماز بولسادى، بۇدان سوڭ ياسىنجان، تاعى ءبىر ناشا شەگەتىن حۋ فاميليالى دوسىنا تەلەفون سوعىپ، شەگەتىن مۇزدى، ياعني ناشانىڭ تاعى ءبىر تۇرىن تاۋىپ اكەلۋدى تاپسىرادى، كوپ وتپەي، حۋ فاميليالى دا، مۇزدى الىپ، ياسىنجاننىڭ ۇيىنە كەلەدى، سونىمەن بارلىعى بىرلىكتە، ياسىنجان دايىنداعان، ەت پالاۋعا تويىپ الىپ، جالعاستى، ناشا جانە مۇز شەگەدى، قاس قارايا ياسىنجان، چىن فاميليالىنىڭ ماشيناسىمەن، ديڭ حۋالانمەن، ۋاڭ حايدى تۇرار جايلارىنا جەتكىزىپ قويادى، بۇعان ريزا بولعان ۋاڭ حاي، ۇيىنەن 50 گىرام ناشا الىپ شىعىپ، ياسىنجانعا بەرەدى، ءسويتىپ، ياسىنجان، توقتنياز، چىن فاميليالى ۇشەۋى، ياسىنجاننىڭ ۇيىندە، جالعاستى ناشا جانە مۇز شەگىپ بولعانسوڭ، ياسىنجان، چىن فاميليالى، حۋ فاميليالى ۇشەۋى، توقتنيازدى اۋىلىنا جەتكىزىپ قويماقشى بولىپ، چىن فاميليالىنىڭ ماشيناسىمەن كەلە جاتقان جولدا، توقتنياز تۇرعان اۋداننىڭ قوعام حاۋپسىزدىگى مەكەمەسىنىڭ، جول قاتىناس حاۋىپسىزدىگىن تەكسەرۋ پونكىتىندەگى ساقشىلار جاعىنان، الىپ جۇرگەن ناشاسى جانە مۇزى بايقالىپ قالىپ، سول جەردىڭ قوعام حاۋىپسىزدىگى مەكەمەسى جاعىنان قولعا الىنادى.


    دەلو اشىلعاننان كەيىن، جەرگىلىكتى حالىق سوتى مەكەمەسى، جاۋاپكەر ياسىنجاننىڭ، مەملەكەت زاڭىن كوزگە ىلمەي، باسقالاردىڭ ۋلى شەگىمدىكتى شەگۋىنە، ءۇيىن بوساتىپ بەرۋ ارەكەتىنەن قالىپتاستىرعان، باسقالاردىڭ ۋلى شەگىمدىك تارتۋىنا ءۇي بوساتىپ بەرۋ قىلمىسى ءۇشىن، 8 ايلىق مەرزىمدى قاماق جازاسى بەرىلىپ، 3000 يۋان اقشالاي ايىپ سالىنسىن دەپ ۇكىم شىعاردى.


    مىنە وسىلايشا، ۋلى شەگىمدىك شەگىپ، ءوزى اراندالعانىمەن قويماي، باسقالارعا ۋلى شەگىمدىكتى شەكپەۋ جايلى اقىل-تاربيە بەرگەننىڭ ورنىنا، ولارعا ۋلى شەگىمدىكتى الاڭسىز شەگەتىن وراي جاراتىپ بەرىپ، اقىلىنان اداسقان ازامات، زاڭ جازاسىنا تارتىلىپ، وزەگىن وكىنىش ورتەدى، سوڭىندا بارشا جاس دوستارعا ايتارىم، ۋلى شەگىمدىك ءومىردى قۇرتادى، ءار كەز، ۋلى شەگىمدىك ساۋداگەرلەرىنىڭ شىرعاسىنا تۇسىپ قالۋدان ساق بولايىق، ال، بارشا اتا- انالار، باۋىر ەت، بالالارىڭىزدىڭ ءجۇرىس-تۇرىسىن قالت جىبەرمەي باقىلاپ، ولارمەن ۇنەمى سىرلاسىپ، ارالاسقان دوس جارانىنىڭ قانداي ادام ەكەنىن تولىق ۇعىسىپ، قوعامداعى كەي ءبىر بۇزاقى توپتاردىڭ، بالالارىڭىزدىڭ اقىل توقتاتپاعان اڭعالدىعىنان پايدالانىپ، ۋلى شەگىمدىكتىڭ قۇربانىنا اينالدىرۋىنان، ءتۇرلى تەرىس جولدارعا تۇسىرۋىنەن ساق بولىڭىزدار دەمەكشىمىن ! (دەلوداعى ادام اتتارى وزگەرتىلىپ الىنعان)


    قىزمەت ورنى: قابا اۋداندىق قوعام حاۋىپسزدىگى مەكەمەسى