بىرگە اراق ىشكەندەر 25 مىڭ يۋاننان تولەم تولەدى
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىل | جاڭالانعان ۋاقىت:2018-04-09 08:50:00

 


گۇيجوۋ ولكەسى زۇن-ي قالاسىنداعى ءمالىم ءبىر سەرىكتەستىكتە قىزمەت ىستەيتىن شياۋ ۋ شاعان كەزىندە قىزمەتتەستەرىمەن بىرگە سىرتتا باس قوسقان كەزىندە، اراق ءىشىپ جارالانىپ جانىنان جۇدا بولادى. وسى ىستەن كەيىن باس قوسۋدا بىرگە بولعان بىرنەشە قىزمەتتەسى سوتقا شاقىرىلىپ، ەڭ سوڭىندا ءولۋشىنىڭ وتباسىنداعىلارعا ءاربىرى 25 مىڭ يۋاننان تولەم تولەدى.

شياۋ ۋ كوزى تىرىسىندە زۇن-ي قالاسىنداعى ءمالىم ءبىر كاسىپورىندا قىزمەت ىستەيتىن. بيىل شاعاننىڭ بەسىنشى كۇنى ول بىرنەشە قىزمەتتەسىمەن ءبىر اسحانادا باس قوسىپ تاماقتانۋعا كەلىسەدى. داستارقان ۇستىندە كوپشىلىك ءبىر-بىرىنە تىلەك تىلەپ دەگەندەيىن، اق اراقتان ەداۋىر سىلتەنەدى.


ءبىر زاماندا شياۋ ۋ تازالىق ۇيىنە بارماق بولادى، اراقتى كوپ سىلتەگەندىكتەن، اياعىن دۇرىستاپ باسا الماي، ەكىنشى قاباتتىڭ باسپالداعىنان دومالاپ، باسى جەرگە ءتيىپ، قان-جوسا بولادى. جاعدايدى كورگەن 6 قىزمەتتەسى ونى دەرەۋ شيپاحاناعا اپارعانىمەن، اۋىر جارالانىپ، قان كوپ كەتكەندىكتەن شياۋ ۋ ماڭگىلىك ۇيقىعا كەتەدى.

باس قوسامىز دەپ جاقسى دوستارىنان ايىرىلعان قىزمەتتەستەرى ەرەن ءىش-قۇستا بولادى. ال شياۋ ۋدىڭ وتباسىنداعىلار توتەنشە قايعىرادى ءارى بىرگە اراق ىشكەن 6 قىزمەتتەسىنىڭ دە جاۋاپكەرشىلىگى بار دەپ قاراپ، تولەم تولەۋدى تالاپ ەتەدى.


ۇعىسۋعا قاراعاندا، شياۋ ۋدىڭ قىزمەتتەستەرىنىڭ باسىم كوبى ادامگەرشىلىك تۇرعىسىنان شياۋ ۋدىڭ وتباسىنا لايىقتى كومەك بەرمەك بولىپتى، ءبىراق بۇل تولەم ەمەس ەدى. ولار داستارقان ۇستىندە ەشكىم دە ءبىرىن-ءبىرى اراققا ونشا زورلاپ قىسامادى، ال شياۋ ۋدىڭ جىعىلۋى بۇكىلدەي جازاتايىم بولعان ءىس دەپ قارادى.


ناۋرىز ايىنىڭ باسىنا دەيىن ەكى جاق بىرلىككە كەلە الماعاندىقتان، شياۋ ۋدىڭ وتباسىنداعىلار حالىق سوتى مەكەمەسىنە ارىز بەرىپ، ولاردان جيىنى 400 مىڭ يۋاننان استام تولەم تولەۋدى تالاپ ەتەدى.


جەرگىلىكتى حالىق سوتى مەكەمەسى دەلونى تەكسەرىپ كورگەننەن كەيىن، ول كەزدە شياۋ ۋ ماس بولعاندىقتان، باسقالارى ونىڭ جالعىز ءوزى قاباتتان ءتۇسۋى قاتەرلى ەكەنىن ەسكەرۋى كەرەك ەدى، الايدا سايكەستى قورعاۋ شاراسىن قولدانباعان. وسى فاكتكە نەگىزدەلگەندە، بىرگە اراق ىشكەندەردەن بەلگىلى دارەجەدە اعاتتىق وتكەن، سول ءۇشىن سايكەستى تولەم جاۋاپكەرشىلىگىن ۇستىنە الۋى كەرەك دەپ قارايدى.


ايتسە دە جازاتايىم بولۋشى ەرەسەك ادام، شاما-شارقىنا قاراپ اراقتان ءوزىن تەجەپ، ارتىق ىشپەسە بولار ەدى. ونىڭ ۇستىنە ارتىق ىشىلگەن اراقتىڭ باسىنا قاتەر توندىرەتىنىن ءبىلىپ تۇرسا دا، ساقتىق شاراسىن قولدانباي، باسىن قاتەرگە بايلاپ، شىرعالاڭعا ۇشىراعان، سوندىقتان ءوزى دە سايكەستى جاۋاپكەرشىلىك ارقالاۋى ءتيىس.


حالىق سوتى مەكەمەسىنىڭ جاراستىرۋى ارقىلى ەڭ سوڭىندا 6 جاۋاپكەر شياۋ ۋدىڭ وتباسىنا بەلگىلى دارەجەدە ەكونوميكالىق تولەم بەرۋگە ماقۇل بولىپ، ءارقايسىسى 25 مىڭ يۋاننان تولەم تولەيتىن بولدى.


ءتىلشىنىڭ ناۋرىزدىڭ 23-كۇنى وسى دەلونى قاراعان ادۆوكاتتان ۇعىسۋىنا قاراعاندا، 6 جاۋاپكەر تولەۋگە ءتيىستى تولەمىن تۇگەلىمەن شياۋ ۋدىڭ وتباسىنداعىلاردىڭ قولىنا تيگىزگەن.(دەرەك كوزى: حالىق گازەتى ۋيچات تەكشەسى)


اۋدارعان: ساعىنبەك رابات ۇلى (تورابىمىز ۇسىنىس ەتكەن ءتىلشى)