وزگەنىڭ اتىن جامىلعان الدامكوس
كەلۋقاينارى:جۇڭگو قازاق راديو تورابى |جاۋاپتى رەداكتور:ايناگۇل | جاڭالانعان ۋاقىت:2018-05-16 10:52:00

 

25 جاستاعى جاڭ فاميليالىمەن 61 جاستاعى لي فاميليالى ساۋدادا جولداس بولاتىن. لي فاميليالى ءبىر رەت سىرلاسۋ بارىسىندا جاڭ فاميليالىعا 29 جاستاعى قىزى لي فاڭنىڭ قازىرگە دەيىن تۇرمىسقا شىقپاعانىن، سوعان بولا قامىعىپ جۇرگەنىن ايتادى. جاڭ فاميليالى مۇنى ەستىگەننەن كەيىن، نەمەرە اعاسى ۋاڭ فاميليالىنىڭ ءمالىم اسكەري بولىمدە ۇشقىش ەكەنىن، لي فاميليالىنىڭ قىزىنا «جەڭگەتاي» بولسا بولاتىندىعىن بىلدىرەدى.


    سونىمەن جاڭ فاميليالى 2016–جىلى 8–ايدا ەشنارسەدەن حابارسىز ۋاڭ فاميليالىنى ەرتىپ لي فاڭنىڭ دۇكەنىنە كەلەدى. جاڭ فاميليالى ەرتەسى لي فاڭعا الدىڭعى كۇنى بىرگە كەلگەن ۋاڭ فاميليالىنىڭ نەمەرە اعاسى ەكەنىن ايتىپ، ەكەۋىن تانىستىرماق بولادى، لي فاڭ دا بۇعان بوگدە نيەت بىلدىرمەيدى ءارى جاڭ فاميليالى جىبەرىپ بەرگەن ۋاڭ فاميليالىنىڭ ءۇنحاتىن قوسىپ الادى.


    ءبىر مەزگىلدەن كەيىن لي فاڭ مەن ۋاڭ فاميليالى ءسوز بايلاسادى. بۇل بارىستا لي فاڭ تالاي رەت ءۇنحاتتا دىبىستى كەلتە حات جانە بەينە كەسكىن ارقىلى سىرلاسۋدى تالاپ ەتسە دە، ۋاڭ فاميليالى اسكەري ءبولىمنىڭ بەلگىلەمەسىندە كەلتە حات ارقىلى سىرلاسۋعا عانا بولاتىندىعىن ايتادى ءارى لي فاڭعا قارىنداسى شياۋ شۋدى، شەشەسى جيڭ فاميليالىنى جانە باستىعىنىڭ ايەلى سۇن فاميليالىنى تانىستىرىپ، ولاردىڭ ءۇنحات ءنومىرىن جىبەرىپ بەرەدى.


    ۋاڭ فاميليالى 2016–جىلى 9–ايدا لي فاڭعا ساپتاسىنىڭ اۋىر جارالانعانىن ايتىپ، وپەراتسيا اقىسى ءۇشىن 8 مىڭ يۋان سۇرايدى. لي فاڭ ويلانباي-اق اقشانى ۋاڭ فاميليالىنىڭ كارتۋچكاسىنا قۇيادى. لي فاڭ كوبىندە ۋاڭ فاميليالىنىڭ جۇزدەسپەيتىندىگىنە كوڭىلى تولماي نەشە رەت ايىرىلىپ كەتپەكشى بولادى. ءبىراق، ءار رەت ايىرىلماقشى بولعاندا شياۋ شۋ، جيڭ فاميليالى جانە سۇن فاميليالى ءۇنحات ارقىلى وعان كەڭەس بەرىپ ەكەۋىن جاراستىرىپ قويادى. جاڭ فاميليالى دا كەيدە لي فاڭعا تەلەفون بەرىپ اقىل ايتاتىن. وسى بارىستا ۋاڭ فاميليالى، شياۋ شۋ، جيڭ فاميليالى، سۇن فاميليالى جانە جاڭ فاميليالى ءتۇرلى سىلتاۋمەن لي فاڭنان 300 مىڭ يۋان الادى.


    لي فاڭ بىلتىر 5–ايدا ۋاڭ فاميليالىنىڭ بانكە كارتۋچكاسىنا اقشا سالعاندا اقشا جوتكەۋ ينفورماتسياسىن اشىپ، تۇتىنۋشى ەسىمىنىڭ جاڭ فاميليالى ەكەنىن بايقايدى ءارى دەرەۋ وعان تەلەفون بەرىپ ارباۋعا تۇسكەنىن سەزىپ، قوعام حاۋىپسىزدىگى مەكەمەسىنە دەلو مالىمدەيدى. جاڭ فاميليالى بىلتىر قولعا تۇسكەنگە دەيىن الداپ العان 330 مىڭ يۋاندى جۇمساپ تاۋىسقان بولاتىن.


    ءۇرىمجى بۇلاقتاۋ رايوندىق حالىق سوت مەكەمەسى 2–ايدىڭ 14–كۇنى بۇل دەلوعا سوت اشىپ، جاڭ فاميليالىعا الدامكوستىك قىلمىسى ءۇشىن مەرزىمدى جەتى جىلدىق قاماق جازاسن بەرىپ، 30 مىڭ يۋان ايىپ سالادى ءارى الداپ العان اقشانى قايتارۋعا بۇيىرادى.


شينجياڭ زاڭ گازەتىنەن الىندى، اۋدارعان: سەرىك سابىر ۇلى