ادام ىستەتۋشى ورىننىڭ جەكەلەر تابىس باجىسىن ۇستاپ قالعانى دۇرىس ەمەس
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2018-06-01 14:58:00


    زاڭ اقىلشىسى ۇيىرمەسىنە: قالامىزداعى ءمالىم مەملەكەت مەنشىگىندەگى كاسىپورىندا ىستەگەنىمە 13 جىل بولدى. وسىدان بۇرىن شىرعالاڭعا ۇشىراپ 3 – دارەجەلى مۇگەدەك بولىپ قالدىم. كاسىپورىن مۇگەدەك كۋالىگىن السام دا ەڭبەكاقىمنان جەكەلەر تابىس باجىسىن تارتىپ جاتىر. جۋىردا ءبىر دوسىمنان مۇگەدەكتەردەن جەكەلەر تابىس باجىسى الىنبايتىندىعىن ەستىپ، جاۋاپتى قىزمەتكەردى ىزدەپ جاعدايدى اڭىس ەتكەنىممەن، ەلەپ-ەسكەرمەدى. كاسىپورىننىڭ ەڭبەكاقىمنان جەكەلەر تابىس باجىسىن تارتۋى دۇرىس پا؟ كەڭەس بەرسەڭىز.  تۇرپاننان گۇلامبار


    گۇلامبار حانىم، جەكەلەر تابىس باجىسى زاڭىنىڭ 5 – تارماعىندا تومەندەگى جاعدايلاردىڭ ءبىرى بايقالسا، بەكىتۋ ارقىلى جەكەلەر تابىس باجىسىن ازايتىپ الۋعا بولادى:


    1. مۇگەدەك، جاسى ەگدە سالت باس قىزمەتكەر مەن توڭكەرىستىك قۇربانداردىڭ وتباسى مۇشەلەرى قول جەتكىزگەن تابىس بولسا؛


    2. اۋىر جاراتىلىستىق اپات سالدارىنان زور زيان تارتسا؛


    3. مەملەكەتتىك كەڭەستىڭ قازىنا تاراۋى باجىنى ازايتىپ الۋدى بەكىتكەن باسقا تابىس بولسا، دەپ بەلگىلەنگەن. قازىنا مينيسترلىگى مەن مەملەكەتتىك باجى باس مەكەمەسىنىڭ مۇگەدەكتەردى جۇمىسقا ورنالاستىرعان كاسىپورىنداردىڭ تابىس باجى تيىمدىلىك ساياساتى جونىندەگى ۇقتىرۋىندا (2009–جىل 70–ءنومىرلى): مۇگەدەكتەردى جۇمىسقا ورنالاستىرعان كاسىپورىندار اينالىم قارجى باجىسىنان تيىمدىلىككە قول جەتكىزەدى. مۇگەدەكتەردى قابىلداعان كاسپورىننىڭ كاسىپورىن تابىس باجىسى مۇگەدەكتەردىڭ ءىس جۇزىندىك ەڭبەكاقىسىن تۇراقتاندىرعاننان كەيىن تارتىلادى. حالىق ىستەرى تاراۋى، ادام كۇشى بايلىعى جانە قوعامدىق قامتاماسىزداندىرۋ تاراۋى جاعىنان مۇگەدەكتىك دارەجەسى تۇراقتانىپ، مۇگەدەكتەر بىرلەستىگىنىڭ كۋالىگىن العان مۇگەدەك جۇمىسشى–قىزمەتكەرلەردىڭ ەڭبەكاقىسى، ەڭبەكاقى تابىسى، ەڭبەك قىزمەت وتەۋ اقى تابىسى، قالاماقى تابىسى سياقتىلاردان الىناتىن جەكەلەر تابىس باجىسى قاراستى ورىنداعى باجىعا جاۋاپتى تاراۋدىڭ بەكىتۋىمەن ازايتىپ الىنادى. ءتۇرلى قوعامدىق قامسىزداندىرۋعا قاتىناسقان مۇگەدەك جۇمىسشى–قىزمەتكەرلەردەن الىناتىن جەكەلەر تابىس باجىسى سول مۇگەدەك جۇمىسشى–قىزمەتكەردىڭ قوعامدىق قامسىزداندىرۋ اقىسى ۇستالعاننان كەيىنگى تۇراقتاندىرىلعان ەڭبەكاقىسىنان ءمالىم سالىستىرما بويىنشا ازايتىپ الىنادى، دەپ بەلگىلەنگەن.


    جاعداي ءسىز اڭىس ەتكەندەگىدەي بولسا، جوعارىداعى بەلگىلەمە بويىنشا، مۇگەدەك جۇمىسشى–قىزمەتكەرلەردىڭ ەڭبەكاقىسىنان الىناتىن جەكەلەر تابىس باجىسى ۇيلەسىمدى سالىستىرمادا ازايتىپ الىنسا بولادى. سوندىقتان ادام ىستەتۋشى ورىننان جەكەلەر تابىس باجىسىن ازايتىپ الۋدى ءوتىنىش ەتسەڭىز بولادى. ەگەر تالابىڭىز تويتارىلسا، قاراستى ورىنداعى باجىعا جاۋاپتى تاراۋعا جاعدايدى اڭىس ەتىپ، مۇددەڭىزدى قورعاۋىڭىزعا بولادى. (گازەتىمىزدىڭ زاڭ اقىلشىسى ۇيىرمەسى)


«شينجياڭ زاڭ گازەتىنەن» اۋدارعان سەرىك سابىر ۇلى