ءتىس شوتىكدەن باستاۋ العان بايلىق
كەلۋقاينارى: |جاۋاپتى رەداكتور: | جاڭالانعان ۋاقىت:2018-06-18 19:40:00


شياۋ يۋە


جياتىڭشينسان جاپونيا شىۋاڭ ءتىس شوتكى سەرىكتەستىگىنىڭ ادەتتەگى قىزمەتكەرى. قاراپايىم قىزمەتكەر بولعاندىعى ءۇشىن جۇمىستان قانشا جاي قايىتقانىمەن، ەرتەسى ۋاعىندا تۇرىپ، سەرىكتەستىككە ۋاعىندا جۇمىسقا كەلۋى ءتيىس.


توسەكتەن تۇرعان سوڭ جياتىڭشينسان بەتى-قولىن شايىپ، ءتىسىن شوتكىلەيدى. قاربالاستانىپ جۇرگەندە ويلاماعان جاعداي تۋىلادى. شوتكىلەگەن تىسىنەن قان شىعىپتى. جياتىڭشينسان ىزاعا بۋىلدى. ءتىس شوتكىلەگەندە ءتىستىڭ قاناۋى بۇدان ىلگەرى تالاي بايقالعان. اشۋلى جياتىڭشينسان بۇرقىراعان بەتى ۇيدەن شىعىپ، ترامۆايعا وتىرىپ سەرىكتەستىككە تارتادى.


كەڭسەگە كەلگەن سوڭ قىزمەتتەستەرىمەن ءتىستىڭ قاناۋى تۋرالى پىكىرلەسەدى. ءتىس شوتكىسىنىڭ قىلىن جاڭالاۋ، ءتىس شوتكىنىڭ سىرتقى فورماسىنا وزگەرىس ەنگىزۋ، شوتكى قىلىنىڭ ورنالاسۋ رەتىن قايتا جوسپارلاۋ قاتارلى وزگەرىس ەنگىزۋ جوبالارىن ورتاعا قويدى.


دەسەدە، جياتىڭ امالياتتان وتكىزۋ ارقىلى جوبانىڭ شىندىققا جاناسىمىن دالەلدەۋگە تىرىسىپ، ماسەلەنى شەشۋدىڭ ناقتى جاۋابىن تابۋعا كىرىسەدى. انىعىندا، ادامدى جالىقتىراتىن ءبىر قىدىرۋ تاجىريبەلەردەن سوڭ، جياتىڭ كوپشىلىكتىڭ نازارىنان قاعىس قالعان مىناداي ءتۇيىندى بايقايدى: لۋپامەن تەكسەرگەندە، ءتىس شوتكىنىڭ قىلىن ماشينامەن تەگىستەپ قىرقۋ بارىسىندا قىلدىڭ ۇشى وتكىر تىك بۇرىشتى ءپىشىن قالىپتاستىرادى ەكەن—ماسەلەنىڭ توركىنى وسىندا جاتسا كەرەك.


ەندىگى شارۋالار جەڭىل بولۋعا ءتيىس. شوتكى قىلىن تەگىستەپ كەسۋ تاسىلىنە وزگەرىس ەنگىزىلىپ، قىلدىڭ ۇشىن مايدالاۋ كەرەك. سونىمەن ماسەلەنى شەشۋگە بولاتىن شىعار؟


قىزمەتتەستەرى جياتىڭنىڭ ويىن قۇپتايدى. كوپ رەتكى تاجىريبەدەن سوڭ جياتىڭ مەن قىزمەتتەستەرى دەن قويا ازىرلەگەن وزگەرىس ەنگىزۋ جوباسىن سەرىكتەستىككە وتكىزەدى. سەرىكتەستىك دەرەۋ قارجى اجىراتىپ، ءتىس شوتكىلەردىڭ قىلىنىڭ ۇشىن مايدالايدى. وزگەرىس ەنگىزىلگەن شىۋاڭ ماركالى ءتىس شوتكى حاريدارلاردىڭ جاقسى باعاسىنا يە بولادى. سەرىكتەستىك پايداعا كەنەلەدى. سەرىكتەستىككە اسا زور ۇلەس قوسقان جياتىڭ قاراپايىم قىزمەتكەردەن مەڭگەرۋشىلىككە تاعايىندالادى. كەيىن، ول وسى سەرىكتەستىكتىڭ باس القاسى بولادى.


جياتىڭ جايىندا اڭگىمەدەن تۇيەرىمىز، كۇندەلىكتى تۇرمىستا سان الۋان ماسەلەلەر جولىققانىمەن تابىسقا جەتۋدىڭ ورايى دا جەتكىلىكتى. ءبىر ادامنىڭ تابىستى بولۋ-بولماۋى ونىڭ تۇرمىستاعى نازىك بۋىنداردى يگەرە بىلگەن-بىلمەگەندىگىنە، جاي قۇبىلىستاردىڭ مانىنە تەرەڭدەي ۇڭىلە العان-الماعانىنا بايلانىستى كەلەدى. نەندەي كۇردەلى ىستەرگە جولىقساڭىزدا، بەلسەندى پوزيتسيا ۇستانىپ، سۇرەڭسىز جاعدايدى وزگەرتۋگە بەل بايلاساڭىز، ۋايىمعا ورىن بەرمەسەڭىز، سوڭىندا قيىندىقتى جەڭەرىڭىز ءشۇباسىز!


ءتۇيىن: ومىردە باقىتتى بولۋ مەن تابىسقا جەتۋ تۇرمىستاعى نازىك بۋىندارعا تىعىز بايلانىستى. جياتىڭ ءتىس شوتكىگە وزگەرىس ەنگىزۋ قاجەتتىلىگىن سەزىپ، ماسەلەنى شەشىم ەتۋدىڭ سايكەستى شاراسىن ويلاپ تاپتى. وسى تەكتەس ەلەۋسىز جاسامپازدىق تۇتاس تاعدىرىڭىزعا اسەر ەتۋى مۇمكىن. قانە، وندا ىسكە كىرىسىڭىز!


اۋدارعان: قۋات جۇماش ۇلى (تورابىمىزدىڭ ۇسىنىس ەتىلگەن ءتىلشىسى)