حاۋىپسىزدىك بەلبەۋىن بايلانىڭىز (قارا ءسوز)
كەلۋقاينارى: |جاۋاپتى رەداكتور: | جاڭالانعان ۋاقىت:2018-12-03 15:38:00


قاپاس اسەيىن ۇلى

ۇشاققا، اۆتوكولىككە وتىرعانىمىزدا«حاۋىپسىزدىك بەلبەۋىن بايلانىپ الىڭىز»دەپ قۋزايدى ءارى بايلاماساڭىز تيەسىلى ايىپ سالاتىن زاڭ-تۇزىمدەرى بار. زاۋدەعالام قاتىناس شىرعالاڭى تۋىلسا، حاۋىپسىزدىك بەلبەۋى ءسىزدىڭ جانىڭىزدى الىپ قالادى. الدا-جالدا اۆتوكولىك شۇعىل تورموز بەرسە حاۋىپسىزدىك بەلبەۋىن بايلانباعان بولساڭىز، باسى-كوزىڭىز جارىلىپ، تۇمسىعىڭىزدىڭ مىلجا-مىلجاسى شىعادى.


ءسىز قوعام سىندى ۇلكەن كولىكتە وتىرسىز. ءومىردىڭ حاۋىپسىزدىك بەلبەۋىن بايلانا بىلۋىڭىز كەرەك. ول بەلبەۋ سىزگە كورىنبەيدى، بىرەۋ جاساپ بەرمەيدى، ءوزىڭىز جاسايسىز. شۇپەرەكتەن سىريسىز با، شەكپەننە سىريسىز با، قايىستان با، جوق، الدە بولاتتان قۇياسىز با، ول ءوز ەركىڭىزدە. ءومىر دە سىزگە حاۋىپسىزدىك بەلبەۋىن بايلانىپ الۋىڭىزدى ۇنەمى ەسكەرتىپ وتىرادى ءارى بايلاماساڭىز تيەسىلى ايىپ سالاتىن جول- جوسىندارى بار. ءومىردىڭ دە شۇعىل تورموز بەرەتىن كەزدەرى بولادى، سول كەزدەردە حاۋىپسىزدىك بەلبەۋىن بايلانباعان بولساڭىز، باسى-كوزىڭىز جارىلىپ، تۇمسىعىڭىزدىڭ مىلجا-مىلجاسى شىعادى. «قايراتىڭا ءادىسىڭدى جولداس ەد، ادىسىڭە اقىلىڭدى جولداس ەد».


ءومىر بەلبەۋى ءسىزدىڭ تاربيەلەنۋىڭىزدى، ءمورال، ادامگەرشىلىگىڭىزدىڭ بولۋىن قاجەت ەتەدى؛ زاڭ- تۇزىم، تىنىش، ىنتىماقتى قوعامدىق ورتاعا سايكەسە ءبىلۋىڭىزدى، قوعام سىندى اينادان ءوزىڭىزدى كۇندە قاراپ تۇرۋىڭىزدى، «بەتى-قولىڭىزدى كۇندە جۋىپ، ساقال-مۇرتىڭىزدى كۇندە باسىپ تۇرۋىڭىزدى»تالاپ ەتەدى. «جاماندى اعالاعانشا، جاقسىنى جاعالا»، «كەزەگەن اياق بوق باسادى»، «وڭ قولىڭ ۇرىس باستاسا، سول قولىڭ اراشاشى بولسىن!»


مىنگەن اتىڭىزدىڭ ومىلدىرىك، قۇيىسقانى بەرىك، ايىلى مىقتى، تاسىرقامايتىن بولۋى، تىزگىنىن قىمتاپ ۇستاپ وتىرعانىڭىز ءجون. «ساقتىقتا قورلىق جوق».


ءسىز وڭ مەن سولىڭىزعا قاراپ، اياعىڭىزدى دۇرىس الىپ جۇرسەڭىز، تۇتاس ءومىر جولىڭىزدا شىرعالاڭعا جولىقپاي امان-ەسەن وتەسىز. ءومىردىڭ ساقتىق بەلبەۋى دەگەنىمىز، مىنە، وسى.