ءومىردىڭ ءار قىرى بار (قارا ءسوز)
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2019-01-28 15:18:00


قاپاس اسەيىن ۇلى

 


ەگەر بەس فوتوگراپ قاتارىنان تۇرىپ ءبىر ادامنىڭ سۋرەتىن تارتسا، بەس ءتۇرلى سۋرەت شىعار ەدى. جانە بەس سۋرەتشى قاتارىنان وتىرىپ سۋرەتىن سالعان بولسا، وندا دا بەس ءتۇرلى سۋرەت شىعار ەدى. ۇيتكەنى ولاردىڭ كورۋ نۇكتەسى ۇقسامايدى. ءبىر ادامنىڭ وڭ جاعىندا تۇرعان ادام ونىڭ وڭ قۇلاعىنىڭ تۇبىندەگى مەڭىن كورەدى، سول جاعىندا تۇرعان ادام ونىڭ مەڭى جوق بەتىن كورەدى. كەلەسى كەزىككەندە ول «اكاۋ، اناۋ ۋاقىتتا كورگەنىمدە قۇلاعىنىڭ تۇبىندە مەڭ جوق سىياقتى ەدى، مىناۋ سول ما، ەمەسپە؟»دەپ ويلايدى. بىرەۋ قايشى تاڭباسى بار بار جىلقىسىن ىزدەپ ءجۇر دەلىك، ول بىرەۋگە كەزىگىپ وسىنداي تاڭباسى بار تورى جىلقىنى كورگەن-كورمەگەندىگىن سۇرايدى. ول«ءبىر قايشى تاڭباسى بار تورى جىلقى كوردىم» دەيدى. جانە كەزىككەن بىرەۋى «ءبىر تورى جىلقىنى كوردىم» دەيدى. ەكەۋى جىلقىنىڭ، ءبىرى، مىنەر جاعىنان، ەندى ءبىرى، قامشىلار جاعىنان كورگەن.


ءبىر ماتەماتيك، ءبىر بيولوگ، ءبىر فيلوسوف ۇشەۋى وتىرسا، شالقاسىنان ءتۇسىپ قالعان ءبىر قوڭىز زورعا وڭالىپ الىپ، ءبىر بەتالىسقا قاراي تەز جورعالاپ كەتىپتى.

وقۋشى:


- قوڭىز نەگە وسى بەتالىسقا قاراي كەتتى؟- دەپ سۇراعان ەكەن

 

ماتەماتيك:


- وسى بەتالىس ونىڭ ىنىنە ەڭ جاقىن بەتالىس.-دەپ جاۋاپ بەرىپتى.

 

بيولوگ:


- ول وسى بەتالىستان ۇرعاشى قوڭىزدىڭ داۋىسىن ەستىپ قالدى.- دەپتى.

 

فيلوسوف:


- بۇل بەتالىس قوڭىزدى تىرشىلىككە مەڭزەيتىن وبيەكتيۆ بولمىس.- دەپ جاۋاپ قايتارىپتى.

ەگەر جاندارىندا تاعى بىرەۋ بار بولسا، ول:


- ە، ول دومالاتاتىن سيىردىڭ جاپاسىن ىزدەپ جۇرگەن شىعار.-دەۋى مۇمكىن.

... ... ... ... ... ...


مەيلى نەنى كورسەدە الدىنعى ون ادام ءبىر عانا ادامدى، سوڭعى ەكەۋى ءبىر عانا جىلقىنى، انا ۇشەۋى ءبىر عانا قوڭىزدى كوردى. سول سىياقتى بارلىق ادامزاتتىڭ كورەتىنى دە ءبىر عانا تىرشىلىك دۇنيەسى.


ءومىر«سەگىز قىرلى، سەكسەن سىرلى»كەلەدى. «سەگىز قىرلى، ءبىر سىرلى»دەپ تە ايتادى. ادامدار ءومىردى ءار قىرىنان كورەدى، باقىلايدى، باعا بەرەدى، تۇسىنەدى، تۇسىندىرەدى. ءومىردى شىنايى تۇسىنگەندە عانا ءومىر زۇرىعىن بويلاپ، ءومىردىڭ ءلاززاتىن تاتا الاتىن بولاسىڭ.