ءبىر كوشەدەگى قۇلىپتاردى جالعىز كىلىتپەن اشۋ نە سۇمدىق!
كەلۋقاينارى:Kazakcnr |جاۋاپتى رەداكتور:Dawil | جاڭالانعان ۋاقىت:2019-05-18 10:57:00


ۇيدەگى زاتتاردى ۇرىنىڭ اكەتۋىنەن ساقتانۋ ءۇشىن قۇلىپ ساتىپ اكەلىپ قۇلىپتاپ بەكىتۋ جالپىلىق قۇبىلىس. دەسەدە، ۇقساماعان قۇلىپتار كەز كەلگەن كىلىتپەن اشىلسا، ءۇيدى قۇلىپتاۋدىڭ نە كەرەگى بار؟


تاياۋدا، چۇڭچيڭ قالاسىندا دۇكەن اشاتىن چىن مىرزا جالعىز كىلتپەن بۇكىل كورشى-قولاڭىنىڭ قۇلپىن اشىپتى. جانىنداعى كورشىلەرىنىڭ ەسىكتەرىنە سالعانى U فورمالى قۇلىپ ەكەن. بۇل نە جاعداي؟


1


چۇڭچيڭ قالاسى شاپيڭبا رايونىنداعى چىن مىرزا ساۋدامەن شۇعىلدانىپ دۇكەن اشاتىن. ونىڭ دۇكەنىن قۇلىپتاۋعا پايدالانعانى U فورمالى قۇلىپ ەدى. چىن مىرزانىڭ ماڭايىندعى كورشىلەر ۇقساماعان ماركاداعى U فورمالى قۇلىپتى ىستەتكەن.


چىن مىرزانىڭ ايتۋىنشا، جانىنداعى دۇكەن قوجايىنى چىن مىرزانى ەسىگىن اشۋعا كومەككە شاقىرىپتى. چىن مىرزا اسىعىستا ءوزىنىڭ كىلتىن اپارىپ كورشىسىنىڭ قۇلپىنا سالسا، ويلاماعان جەردەن قۇلىپتى اشقان.


ەكى ءتۇرلى U فورمالى قۇلىپتىڭ ماركاسى ۇقسامايدى، الايدا جالعىز كىلت ەكى قۇلىپتى اشا الادى. چىن مىرزا سىناپ كورۋ ماقساتىمەن قولىنداعى كىلتپەن تاعى ءبىر كورشىسىنىڭ قۇلپىنا سالسا، ول قۇلىپتى دا دەرەۋ اشقان.


ءماسساعان، جالعىز كىلت ۇقسامايتىن ءۇش تۇرلى ماركاداعى U فورمالى قۇلىپتى اشتى. بۇكىل ساۋدا كوشەسىندە بارلىق ساۋداگەرلەر ەسىگىنە U فورمالى قۇلىپ سالادى. چىن مىرزا كىلتىن قولىنان تاستاماي كورشى دۇكەندەردىڭ قۇلپىن تەگىس سىناپ كورۋدى ويلايدى.


ماڭايداعى 7 دۇكەننىڭ قۇلپىنا سالعاندا، جالپى 8 ءتۇرلى U فورمالى قۇلىپتى چىن مىرزانىڭ جالعىز كىلتى اشقان. ارينە، سول كوشەدەگى U فورمالى قۇلىپتىڭ اشىلۋ سالىستىرماسى 100% ەمەس. ءىشىنارا U فورمالى قۇلىپتار چىن مىرزانىڭ كىلتىنە اشىلماعان.


جالعىز كىلتپەن بۇكىل كوشەدەگى دۇكەن قۇلىپتارىنىڭ دەنى دەرەۋ اشىلعان. چىن مىرزانىڭ بايانداۋىنشا بۇزىلعان قۇلىپتى جوندەۋ تەحنيكاسىنان، قۇلىپتى ەرەكشە شەبەرلىكپەن اشۋ جونىندەگى ماعلۇماتتان بەيحابار ەكەن. قولىنداعى كىلتى دە قاراپايىم كىلت. سوندا جالعىز كىلتپەن اشىلعان قۇلىپتار ساپاسىز قۇلىپ بولعانى ما؟


اشىلىپ كەتكەن قۇلىپتاردىڭ ماركاسى ۇقساماعانىمەن، قۇلىپ وزەگىندەگى قۇرىلىم نەگىزىنەن ۇقساس. سونداي-اق قۇلىپتاردىڭ كىلتى دە قارايلاس.


دۇكەن قوجايىندارىنىڭ ايتۋىنشا، ولار U فورمالى قۇلىپتى ماڭىنداعى شاعىن دۇكەندەردەن نەمەسە مەتال ساۋدالايتىن ماگەزيندەردەن ساتىپ العان ، باعاسى 20-30 يۋان ارالىعىندا.


قۇلىپ ساۋدالاۋشىلار وزدەرىنىڭ قۇلىپتارىنىڭ ساپاسىنا سەنىمدى، جالعىز كىلتپەن ۇقسامايتىن قۇلىپتاردىڭ اشىلاتىنىنا سەنبەيدى. وسىنى ايتىپ تۇرىپ قۇلىپ ساتۋشى حۋاڭ بيكەش ءبىر قۇلىپتىڭ كىلتىن الىپ ەندى ءبىر قۇلىپقا سۇققاندا، وزگە قۇلىپ شارت ەتىپ اشىلعان.


بۇنداي جاعدايدى كورگەن قۇلىپ ساتۋشى سىلەيىپ تۇرىپ قالدى. سونىمەن ول دەرەۋ قۇلىپتى وزىنە ساتقان ساۋداگەرگە حابارلاستى. ۇعىسۋعا قاراعاندا، وسى تەكتەس قۇلىپتاردى وندىرەتىن زاۆودى حىنان ولكەسىنە ورنالاسقان. زاۆود جاۋاپتىسى بۇدان ىلگەرى حاريدارلاردان وسى تەكتەس اڭىستار تۇسكەنىن، زاۆودتىڭ سىرتتان ەنگىزگەن قۇلىپ وزەگى زاپچاسىندا ماسەلە بار بولۋى مۇمكىن ەكەندىگىن بايانداعان.


ونداي بولسا، قۇلىپ وزەگى قايسى زاۆودتان ەنگىزىلگەن؟ بۇنى قۇلىپ ءوندىرۋشى زاۆودتىڭ جاۋاپتىسى جاريا ەتۋدەن باس تارتتى. ونىڭ ايتۋىنشا زاۆود قۇلىپ ءوندىرۋ تەحنيكاسىنا وزگەرىس ەنگىزىپ، بۇرىنعى ساپاسىز قۇلىپ وزەگى زاپچاسىن ەنگىزۋدى كۇشىنەن قالدىرعان. حاريدارلار بۇرىنعى قۇلىپتاردىڭ ساپاسىنان ماسەلە بايقاسا، زاۆود قۇلىپتى تەگىن اۋىستىرۋعا ۋادە بەرەدى.


2


حاۋىپسىز، ساپالى قۇلىپتى قايدان الۋعا بولادى؟


U فورمالى قۇلىپتى نە سەبەپتى باسقا كىلتتتەر وڭاي اشا الادى؟ قاراپايىم حاريدارلار ساپالى قۇلىپتى قالاي پارىقتايدى؟ وسى ماسەلە توڭىرەگىندە ءتىلشى ارناۋلى مامانمەن سۇحباتتاستى.


چىن ميڭحۋا ۇستاز چۇڭچيڭدەگى قۇلىپ ساتاتىن ۇلكەن ساۋدا بازارىنىڭ جوندەۋ بولىمىندە ديرەكتور مىندەتىن اتقارادى. قۇلىپ ساۋداسىندا 16 جىلدىق ىستاجعا يە. چىن ميڭحۋا ۇستاز تىلشىگە بىلاي دەيدى: ادەتتەگى جاعدايدا، قۇلىپ وزەگى A دارەجەلى، B دارەجەلى، C دارەجەلى بولىپ بولىنەدى. بۇندا A دارەجەلى قۇلىپ وزەگىنىڭ باعاسى وتە ارزان. قۇلىپ وزەگىنە پايدالاناتىن سەرىپپە 5 تالدان اسپايدى. سوندىقتان حاۋىپسىزدىگى تىم ناشار.


چىن ميڭحۋا ۇستازدىڭ تۇسىندىرۋىنشە، A دارەجەلى قۇلىپ وزەگىنىڭ ءبىر كىلتپەن اشىلۋ سالسىترماسى وننان ءبىر ۇلەستى ۇستايدى. ياعني ون نەشە قۇلىپتىڭ ىشىندە ۇقساماعان ەكى قۇلىپتى ءبىر كىلتپەن اشۋ مۇمكىندىگى جوعارى.


چىن مىرزا تۇرعان كوشەدە جالعىز كىلتپەن 8 قۇلىپ اشىلعان. نەلىكتەن بۇلاي بولادى؟ چىن ميڭحۋا ۇستازدىڭ تۇجىرىمىنشا، A دارەجەلى قۇلىپ وزەگىنىڭ حاۋىپسىزدىگى تومەن، وعان قوسا كەيبىر زاۆودتار ماتەريال ۇنەمدەپ، بەس تال سەرىپپەنى تولىق ورناتپايدى، ءىشنارا زاۆودتىڭ زاپچاس ءوندىرۋ تەحنيكاسى مەشەۋ، قۇلىپ وزەگىنىڭ دالدىگى ناشار، سوندىقتان قۇلىپتىڭ ساپاسى تومەن.


چىن ميڭحۋا ۇستاز قۇلىپ تاڭداعاندا زاڭدى زاۆودتان جاسالىپ شىققان، B دارەجەلىدەن جوعارى قۇلىپ وزەگى پايدالانىلعان قۇلىپتى ساتىپ الۋدى ەسكەرتەدى.


ولاي بولسا، قۇلىپ وزەگىنىڭ A دارەجەلى نە B دارەجەلى ەكەنىن قالاي پارىقتايمىز؟ قۇلىپتىڭ تۇسىندىرمە قاعازى، سارالاۋ دوكلاتىنان سىرت، قۇلىپتىڭ سىرتقى تۇلعاسىنا قاراۋ كەرەك. بۇدان سىرت، چىن ميڭحۋا ۇستاز مىناداي ءبىر ءىستى دارىپتەيدى—كىلتتىڭ جارىمىن نەمەسە ۇشتەن ءبىر بولەگىن قۇلىپقا سۇققاندا كىلتتى جەڭىپ بۇراپ قۇلىپقا يتەرە ەنگىزۋ قاجەت. وسى كەزدە كىلتتى قۇلىپقا جالعاستى سۇعۋعا بولسا، وندا قۇلىپ وزەگىنىڭ B دارەجەلىدەن جوعارى بولعانى.


تاياۋ جىلدان بەرى اينەك ەسىكتەردىڭ جاپپاي قولدانىسقا تۇسۋىنە بايلانىستى U فورمالى قۇلىپ كوپ ساندى دۇكەن قوجايىندارىنىڭ تالعامىنا اينالدى. بۇكىل مەملەكەت بويىنشا U فورمالى قۇلىپتى وزگە كىلتپەن وڭاي اشىپ، مال-مۇلىك ۇرلاۋ ۋاقيعاسى ورىن العان. وسى ورايدا كوپشىلىككە حاۋىپسىزدىككە نازار اۋدارىپ، ۇيدەگى، دۇكەندەگى قۇلىپتىڭ ساپاسىن تەكسەرىپ، كەزدەيسوق شىعىنعا ۇشىراۋدان ساقتانۋدى ەسكەرتەمىز.


شينحۋا اگەنتتىگى ۋيچات تەكشەسىنەن اۋدارعان:  قۋات جۇماش ۇلى (توابىمىزدىڭ ۇسىنىس ەتىلگەن ءتىلشىسى)