ٴوز حابارىمىز. ليبيا قىزىل جاڭا اي قوعامى 9-ايدىڭ 14-كۇنى بىلاي دەپ حابارلاندىردى: وسى مەملەكەتتىڭ شىعىس بولەگىندەگى تاسقىن اپاتىندا قازا بولعاندار سانى 11 مىڭ ادامنان استى، 20 مىڭ ادامنىڭ دەرەگى ٴالى تابىلعان جوق. دۇنيە دەنساۋلىق ساقتاۋ ۇيىمى داۋىل، تاسقىن اپاتىنا ۇشىراعان ليۆيادا اپاتتان قۇتقارۋعا 9-ايدىڭ 14-كۇنى 2 ميلليون دوللار شۇعىل بوساتتى.

 

قاتىستى حابارلاردا بىلاي دەپ ايتىلدى: حالىقارالىق كوشپەندىلەر ىستەرى ۇيىمىنىڭ حابارىنا قاراعاندا، وسى رەتكى تاسقىن اپاتىندا 100 مىڭ جان سانى بار دەرنا قالاسىندا 35 مىڭ ادام باسپانادان ايىرىلعان. قازىرگى اپاتقا ۇشىراۋ جاعدايىنا قاراتا، دەرنا قالاسىنىڭ باستىعى گەيدي بىلاي دەدى: قالاداعى قۇتقارۋ قوسىندارى اپاتقا ۇشىراعانداردىڭ مۇردەسىن ٴسۇزىپ الۋ قىزمەتىن ورىستەتۋدە، قىرۋار ٴىز-توزسىز كەتكەندەر قيراندىعا، لاي-باتپاققا كومىلىپ قالدى نەمەسە تەڭىزگە اعىپ كەتتى. قازىر وسى قالانىڭ ەلەكتر قۋاتىن قالپىنا كەلتىرۋ قىزمەتى جۇرگىزىلۋدەٴارى تۇرعىنداردىڭ %60 ىنە ەلەكتر جەتكىزىلدى. ليۆيانىڭ ٴارقايسى قالاسىنان كەلگەن ەمدەۋ قوسىندارى دەرنا قالاسىنا جەتىپ، قۇتقارۋ قىزمەتىنە قاتىناسا باستادى. قازىر وسى قالاداعى بارلىق كوپىرلەردى تاسقىن سۋ قيراتىپ، ٴارقايسى كوشەلەر اراسىنداعى قاتىناس ٴۇزىلدى. ليۆيا جاق جەرلىك ۋاقىت بويىنشا 9-ايدىڭ 11-كۇنى حالىقارالىق قوعامدى كومەك بەرۋگە ۇندەگەننەن كەيىن، كوپتەگەن مەملەكەتتەر قۇتقارۋ قوسىندارىن جىبەردى ٴارى كومەك بۇيىمدارىن جەتكىزدى. قازىر ەگيپەت، تۋنيس، اراب بىرىككەن امىرلىگى، كاتار قاتارلى ەلدەردىڭ قۇتقارۋ قوسىنى ليۆياعا جەتتى. بۇدان سىرت، پالەستين، الجيريا جانە يوردانيا قاتارلى ەلدەر دە قۇتقارۋ قوسىنىن جىبەردى نەمەسە ليۆياعا كومەك بۇيىمدار جەتكىزدى. دەرنا قالاسىنىڭ باستىعى بۇدان بۇرىن بۇل قالادا ولگەندەردىڭ سانى 20 مىڭ ادامنان اسۋى مۇمكىن دەگەن بولاتىن.

 

اۋدارعان: قاناتبەك جۇماباي ۇلى