ءوز حابارىمىز. يران زۇڭتۇڭى رايسي وتىرعان تىك ۇشار ايروپلان 5-ايدىڭ 19-كۇنى يراننىڭ باتىس سولتۇستىك بولەگىندەگى شىعىس ازەربايجان ولكەسىنە تۇتقيىل قوندى. ۇعىسۋعا قاراعاندا، وقيعا شىعىس ازەربايجان ولكەسىنىڭ ۋالزاگان رايونىنىڭ ماڭىندا تۋىلعان. يران ىشكى ىستەر مينيسترى 5-ايدىڭ 19-كۇنى بىلاي دەدى: ناشار اۋارايى سەبەبىنەن تىك ۇشار ايروپلان شۇعىل قونعان، قويۋ تۇمان قاتارلى سۇركەيلى اۋارايى قۇتقارۋ قىزمەتىنە توسقىندىق جاسادى. يران ارميا جانە ساقشى جاقتان بارلىق جابدىقتاردى جانە اسكەري كۇشتى ىزدەستىرۋ قىزمەتىنە جۇمىلدىرۋعا تالاپ ەتتى، 40 شۇعىل قۇتقارۋ گرۋپپاسى ۋاقيعا تۋىلعان جەرگە جىبەرىلدى.

 

جەرلىك ۋاقىت 5-ايدىڭ 19-كۇنى كەشتە، يران شىعىس ازەربايجان ولكەلىك توڭكەرىستىك قورعاۋ اترەتىنىڭ قولباسشىسى وقيعا تۋىلعان تىك ۇشار ايروپلاننىڭ سەگىنالىن جانە ايروپلانداعىءبىر قىزمەتكەردىڭ تەلەفون سەگىنالىنىڭ قابىلدانعاندىعىن ايتتى. كەزەكتە زور توپتاعى قۇتقارۋ قىزمەتكەرلەرى سيگنال قابىلدانعان رايونعا باردى . يراننىڭ زۇڭتۇڭى رايسيدىڭ تىك ۇشار ايروپلان اترەتى 3 تىك ۇشار ايروپلاننان قۇرالعان، ولار سول كەزدە حودا افالين اۋدانىنان دابۇليس قالاسىنا مۇناي-حيميا جالپىلىق قۇرىلعىلارىنىڭ سالىنىپ بولۋ سالتىنا قاتىناسۋعا بارا جاتقان. سول كۇنى تاڭەرتەڭ رايسى ازەربايجاننىڭ زۇڭتۇڭى اليەۆپەن بىرگە حودا افالين اۋدانىنىڭ سۋ قويماسى توسپاسىنىڭ سالىنىپ بولۋ سالتىنا قاتىناستى. وسى تىك ۇشار ايروپلاندا يراننىڭ سىرتقى ىستەر مينيسترى ابدۇلاشيان قاتارلى كوپتەگەن جوعارى دارەجەلى ءمانساپتىلار بار.

 

يراننىڭ شىعىس ازەربايجان ولكەسى تۇركيانىڭ شىعىس بولەگىندەگى ۆان ولكەسىمەن ىرگەلەس. يران جاقتىڭ تالابى بويىنشا، تۇركيا ارمياسى 5-ايدىڭ 19-كۇنى كەشتە ۇشقىشسىز ايروپلان جانە تۇندە كورۋ قابىلەتىنە يە قۇتقارۋ تىك ۇشار ايروپلانىن شىعاردى، تۇركيا اپات جانە شۇعىل جاعدايعا توتەپ بەرۋدى باسقارۋ مەكەمەسى يراننىڭ باتىس سولتۇستىك بولەگىندەگى ازەربايجان ولكەسىنە 32 قۇتقارۋ قىزمەتكەرىن جانە 6 قۇتقارۋ اۆتوموبيلىن جىبەرىپ، يران جاقتىڭ قۇتقارۋ قىزمەتىنە كومەكتەستى. 

 تۇركيا زۇڭتۇڭى ەردوعان 5-ايدىڭ 19-كۇنى كەشتە تۇركيا جاق يران زۇڭتۇڭى رايسي وتىرعان شىرعالاڭعا ۇشىراعان تىك ۇشار ايروپلاندى ىزدەستىرۋگە قاجەتتى كومەك بەرۋگە دايىن دەدى. 

 

اۋدارعان: كۇلان ىرىسباي قىزى