ءوز حابارىمىز. يزرايل مەملەكەت قورعانىس ارمياسى جاعى 6-ايدىڭ 12-كۇنى بىلاي دەپ حابارلاندىردى: يزرايل ارمياسىنىڭ جەر بەتى اسكەري بولىمدەرى گازانىڭ وڭتۇستىگىندە جانە ورتا بولەگىندە جالعاستى اسكەري ارەكەت جۇرگىزدى. وتكەن ءبىر كۇندە يزرايل ارمياسى رافا قالاسىنا تاياۋ جەردەگى شايقاستا پالەستين قارۋلى كۇشتەرىنەن ۇيىمداسقان شاعىن قوسىندى جويدى. پالەستين قارۋلى كۇشتەرى 6-ايدىڭ 12-كۇنى رافا قالاسىنىڭ كوپتەگەن جەرلەرىندە يزرايل ارمياسىنىڭ نىسانالارىنا قايتارما سوققى بەردى. حاماسقا قاراستى اسكەري توپ حاسان بريگاداسىنىڭ قارۋلىلارى سول كۇنى رافا قالاسىنداعى سابۋرا بوسقىندار لاگەرىندە يزرايل ارمياسىمەن جاقىن ارالىقتا قيان-كەسكى شايقاستى، سونداي-اق يزرايل ارمياسىنىڭ ەكى تانكىسىن راكەتامەن اتتى.

 

ليۆان ءتاڭىر پارتياسى 6-ايدىڭ 12-كۇنى: يزرايلدىڭ سولتۇستىگىندەگى كوپتەگەن نىسانالارعا شابۋىل جاسادىق دەپ جاريالادى. ال، يزرايل مەديالارى سول كۇنى يزرايىلدىڭ سولتۇستىك بولەگىنە ليۋاننان جيىنى 215 راكەتا اتىلدى دەپ حابارلادى.

حاماستىڭ جوعارى دارەجەلى ءمانساپتىسى وساما حامدان بىلاي دەدى: قازىرگى سوعىس توقتاتۋ كەلىسىمىنەن باس تارتقان جاق يزرايل جاق بولىپ وتىر، كەلىسىمگە وزگەرىس ەنگىزۋ نەگىزىنەن يزرايل ارمياسىنىڭ سوعىستى ماڭگى توقتاتۋ جانە اسكەرىن تۇگەلدەي شەگىندىرۋ ماسەلەسىن اناعۇرلىم ايقىنداۋعا شوعىرلاندى. يزرايل مەديالارى بۇل جونىندە بىلاي دەپ حابارلادى: يزرايل جاق حاماستىڭ سوعىس توقتاتۋ جوباسىنىڭ مازمۇنىنا وزگەرىس ەنگىزۋى حاماستىڭ بۇل جوبادان باس تارتقاندىعىنان دەرەك بەرەدى دەپ قارايدى. كاتاردىڭ باس ءۋازىرى، سىرتقى ىستەر ءۋازىرى مۇحاممەد 6-ايدىڭ 12-كۇنى بىلاي دەدى: قازىر ءار قايسى جاقتار قارسى جاقتان جول بەرۋدى تالاپ ەتىپ، گازادا سوعىستى ماڭگىلىك توقتاتۋ جولىن قاراستىرۋدا.

اۋدارعان: قاناتبەك جۇماباي ۇلى