ٴوز حابارىمىز. حىبەي ولكەسى وسى ايدىڭ 16-كۇنى مىنانى حابارلاندىردى: كەزەكتە، شىجياجۋاڭ، شيڭتاي قالالارىنىڭ 2-كەزەكتى جالپى بەتتىك نۋكلەين قىشقىلىن تەكسەرۋ قىزمەتى تۇگەلدەي تامامدالدى. شىجياجۋاڭ قالاسىندا بايقالعان جۇعىمدالۋشىلاردىڭ كوپ ساندىسى اۋاشالاۋ تۇيىنىندە بولسا، شيڭتاي قالاسىنداعى جۇعىمدالۋشىلار تۇگەلدەي اۋاشالاۋ تۇيىنىنەن بايقالدى، شىجياجۋاڭ قالاسىنىڭ گاۋ چىڭ رايونى مەن شيڭتاي قالاسىنا قاراستى نانگۇڭ قالاسى ٴالى دە ىندەتتى ٴبىرجايلى ەتۋدىڭ ٴتۇيىنى بولۋدا. 

    حىبەي ولكەسىنىڭ ورىنباسار باستىعى ٴشۇي جيانپەي بىلاي دەدى: وسى كەزەكتى تەكسەرۋدە شىجياجۋاڭ قالاسىنان 247 جۇعىمدالۋشى بايقالىپ، ٴبىرىنشى كەزەكتى تەكسەرۋدە بايقالعان 354 ادامعا قاراعاندا ازايعان. جيىنى 8 اۋدان، قالا، رايوننان جۇعىمدالۋشىلار بايقالىپ، ٴبىرىنشى كەزەكتەگى 13 جەرگە قاراعاندا ازايعان، بۇل ٴبىزدىڭ وسى كەزەڭدە قولدانعان قاتاڭ ساقتانۋ-تىزگىندەۋ شارالارىمىزدىڭ ىندەت تارالۋىن تىزگىندەۋدە بەلسەندى رول ساۋلەلەندىرىپ جاتقاندىعىن كورسەتەدى. 

    ٴشۇي جيانپەي بىلاي دەدى: رايونعا-دارەجەگە ٴبولىپ دالمە-ٴدال ساقتانۋ-تىزگىندەۋ پرينسيبى بويىنشا، حىبەي ولكەسى ساقتانۋ-تىزگىندەۋ شارالارىن كەزەڭگە ٴبولىپ تەڭشەيدى. شىجياجۋاڭ قالاسى مەن شيڭتايعا قاراستى نانگۇڭ قالاسى 1-ايدىڭ 19-كۇنىنە دەيىن تۇيىقتالىپ باسقارىلادى، لاڭ فاڭ قالاسىنا قاراستى گۋ-ان اۋدانى 1-ايدىڭ 25-كۇنىنە دەيىن تۇيىقتالىپ باسقارىلادى. شيڭتاي قالاسى قاراماعىنداعى نانگۇڭ قالاسىنان سىرت جەرلەر بۇگىننەن باستاپ قالىپتى ٴوندىرىس-تۇرمىسىن قالپىنا كەلتىردى، لاڭ فاڭ قالاسى قاراماعىنداعى گۋ-ان اۋدانىنان باسقا جەرلەر 1-ايدىڭ 18-كۇنىنە دەيىن جالعاستى تۇيىقتالىپ باسقارىلادى. 

    شىجياجۋاڭ قالاسىنىڭ ورىنباسار باستىعى مىڭ شياڭحۇڭ وسى ايدىڭ 16-كۇنى تانىستىرىپ بىلاي دەدى: كەزەكتەگى ىندەتتەن ساقتانۋ-تىزگىندەۋ قاجەتىنە ساي، شىجياجۋاڭ قالاسىنىڭ تۇرعىندارى 1-ايدىڭ 19-كۇنى ساعات 24 كە دەيىن ۇيلەرىندە جالعاستى ىندەتتەن ساقتانادى. وسى بارىستا قالا تۇرعىندارىنىڭ قالا ىشىندە ارلى-بەرلى جۇرمەيدى، توپتاسپايدى، الەۋمەتتىك رايوندار مەن قىستاقتاردان شىعۋىنا بولمايدى، شىجياجۋاڭ قالاسى قىزمەت وتەۋ شاراسىن اناعۇرلىم كەمەلدەندىرىپ، تۇرعىنداردىڭ قالىپتى تۇرمىسىن قامتاماسىزداندىرادى. حاۋىپتى جانە ورتاشا حاۋىپتى رايوندارداعى بۇكىلدەي تۇيىقتالىپ باسقارىلعان كورپۋستارعا قاراتا تۇرمىستىق بۇيىمدار تۇرعىنداردىڭ ەسىك الدىنا جەتكىزىلەدى؛ حاۋىپ-قاتەرى تومەن رايونداردا تۇرمىستىق بۇيىمدار تۇرعىندار رايونىنىڭ ۇيلەسىمدى ورنىنا جەتكىزىلىپ، تۇرعىندار ٴبىر ۋاقىتقا شوعىرلانباي قاجەتتى بۇيىمدارىن الۋعا ٴناسيحاتتالدى.

اۋدارعان: امانتاي مۇسايىپ ۇلى