حۋاڭ دانيان 1958-جىلى گۋاڭشيدىڭ ناننيڭ قالاسىندا دۇنيەگە كەلگەن، 1978-جىلى ول ۇزدىك ناتيجەمەن چاڭچۇن گەولوگيا ينستيتۋتىنا (قازىرگى جيلين ۋنيۆەرسيتەتىنە) قابىلدانىپ، قولدانىلمالى جەر شارى فيزيكا فاكۋلتەتىندە وقىعان. 1992-جىلى حۋاڭ دانيان انگلياعا بارىپ وقىپ، دوكتورلىق اتاق العان. حۋاڭ دانيان شەتەلگە شىعۋدىڭ الدىندا ساباقتاستارىنا: مەن، ٴسوز جوق، شەتەلدىڭ وزىق تەحنيكاسىن الىپ كەلەمىن،-دەپ سەرت بەرەدى. شەتەلدەگى ون نەشە جىلدا حۋاڭ دانيان وتانعا بەرگەن ۋادەسىن ەشقاشان ۇمىتپادى. 2009-جىلدىڭ سوڭىندا، حۋاڭ دانيان انا مەكتەبى جيلين ۋنيۆەرسيتەتىنىڭ پروفەسسورى بولادى ٴارى جەر شارىن بارلاۋ نىسانىنا قاتىستى باس عالىم بولىپ سايلانادى. 2016-جىلى ول جەتەكشىلىك ەتكەن زەرتتەۋ قوسىنىنىڭ 6 جىل قاجىرلىلىقپەن قامال الۋ ارقىلى قول جەتكىزگەن تابىستارى مەملەكەتتىك عىلىم-تەحنيكادا جاڭالىق اشۋ جەتىستىكتەرى كورمەسىنە ەنگىزىلدى. ەلگە ورالعانىنان كەيىنگى جىلداردا ول زىرىلداۋىق سياقتى توقتاۋسىز جۇمىس ىستەپ، شارشاپ-شالدىعۋدى بىلمەدى. 2016-جىلى حۋاڭ دانيانعا ٴوت جولى راگى دەپ دياگنوز قويىلدى، 2017-جىلى ەمدەۋ ٴونىم بەرمەي، چاڭچۇندە 58 جاسىندا قايتىس بولدى.

    2017-جىلى 9-ايدا ايگىلى بوتانيكا عالىمى، فۋدان ۋنيۆەرسيتەتى اسپيرانتتار ينستيتۋتىنىڭ باستىعى، فۋدان ۋنيۆەرسيتەتى تىرشىلىك عىلىمى ينستيتۋتىنىڭ پروفەسسورى جۇڭ ياڭ قىزمەت كەزىندە كولىك اپاتىنا ۇشىراپ، 53 جاسىندا قايتىس بولدى. جۇڭ ياڭ قايتىس بولعاننان كەيىن ىلگەرىندى-كەيىندى «ٴداۋىر ۇلگىسى»، «مەملەكەتتىك تاڭداۋلى پارتيا مۇشەسى» سياقتى اتاقتارعا يە بولدى.

    چيڭحاي-شيزاڭ ۇستىرتىندە 2000 نان استام ەرەكشە وسىمدىك بار، الايدا، دۇنيە بويىنشا ەڭ ۇلكەن ساپالى تۇقىم بايلىعى قامباسىندا ەلىمىزدىڭ شيزاڭ رايونىنان وسىمدىك تۇقىمى ۇزاق ۋاقىتتان بەرى بولماي كەلگەن ەدى. 2001-جىلى جۇڭ ياڭ چيڭحاي-شيزاڭ ۇستىرتىنە بارىپ، وسىمدىك ۇلگىسىن ىزدەپ، ورگانيزمدەردىڭ بىرتىندەپ دامۋ جولىن قاراستىرادى.

    وقىتۋمەن شۇعىلدانعان 30 جىلدان استام ۋاقىتتا، شيزاڭعا كومەككە بارعان 16 جىلدا، جۇڭ ياڭ ۇيىرمە باستاپ، مىڭنان استام وسىمدىكتىڭ 40 ميلليوننان استام تۇقىمىن جيناپ، شيزاڭ ۋنيۆەرسيتەتىنىڭ حالىقارالىق باسەكەگە قاتىناسۋ قۋاتى بار بوتانيكا زەرتتەۋ قوسىنىن قۇرۋىنا كومەكتەستى. ول ٴوزىن ارمانعا قۇلاش سەرمەگەن «ۇلگىگە» اينالدىردى.

اۋدارعان: گۇلنۇر قابىلقاق قىزى