ٴوز حابارىمىز. مەملەكەتتىك كەڭەستىڭ زۇڭليى لي كىچياڭ 10-ايدىڭ 20-كۇنى مەملەكەتتىك كەڭەستىڭ ۇنەمىلىك ىستەر ٴماجىلىسىن باسقارىپ اشىپ، كۇزگى جيىن-تەرىن جانە كۇزگى، قىسقى تۇقىم سەبۋ قىزمەتىن ويداعىداي ىستەۋ جونىندە ورنالاستىرۋ جاساپ، استىق حاۋىپسىزدىگى مەن زات باعاسىنىڭ ورنىقتىلىعىن قامتاماسىزداندىرۋعا پارمەندى تىرەك ازىرلەۋدى تالاپ ەتتى؛ حالىق تۇرمىسىنا پايدالانىلاتىن ەنەرگيامەن قامداۋعا كەپىلدىك ەتۋ جاعدايى جونىندەگى مالىمەتتى تىڭداپ، بۇقارانىڭ قىس قىرىنان قىسىلماي شىعۋىنا كەپىلدىك ەتۋدى؛ ورتا، شاعىن، ۇساق كاسىپورىنداردىڭ قيىنشىلىعىن شەشۋ جونىندەگى ساياساتتىق قولداۋ تەبىنىن اناعۇرلىم ارتتىرۋدى تالاپ ەتتى. 

    ماجىلىستە مىنالار اتاپ كورسەتىلدى: بيىل كۇزگى استىقتان مول ٴونىم الۋ تۇراقتاندىرىلدى. استىق باعاسى زات باعاسىنىڭ نەگىزى، ەلىمىز تۇرعىندارىنىڭ تۇتىنۋ باعا كورسەتكىشىندەگى ازىق-تۇلىك باعاسىنىڭ سالىستىرماسى جوعارى، استىقتان مول ٴونىم الىنسا زات باعاسىن ورنىقتىرۋعا، اقشانىڭ قۇنسىزدانۋىنان ساقتانۋعا بەرىك نەگىز قالانادى. پارتيا ورتالىق كوميتەتىنىڭ، مەملەكەتتىك كەڭەستىڭ ورنالاستىرۋىنا ساي، تاياۋ مەزگىلدە ەلىمىزدىڭ سولتۇستىك بولەگىندە جاۋىن-شاشىن كوبەيۋىنىڭ كۇزگى جيىن-تەرىن مەن كۇزگى ەگىسكە ٴتيىمسىز ىقپال جاساۋ، اۋىل شارۋاشىلىق ٴوندىرىس قۇرال-جابدىقتارىنىڭ باعاسى اسپانداۋ سياقتى سىن-سايىستارعا بەلسەنە توتەپ بەرىپ، كۇزگى استىقتىڭ جيناۋعا كەلەتىندەرىن تۇگەل جيناپ، كۇزگى، قىسقى ەگىس كولەمىنىڭ نەگىزىنەن ورنىقتى بولۋىنا كۇش سالىپ، كەلەر جىلى جازعى استىقتان مول ٴونىم الۋعا كەپىلدىك ەتۋ كەرەك. مۇندا، بىرىنشىدەن، كۇزگى جيىن-تەرىنگە جەدەل ۇيىمداستىرىپ، كەپتىرۋ، ساقتاۋ جۇمىستارىن ويداعىداي ىستەۋ كەرەك. ەكىنشىدەن، كۇزگى، قىسقى ەگىستى ويداعىداي يگەرۋ. سۋ باسقان اتىزداردا سۋدى جەدەل ىعىستىرۋ. تۇقىم سەبۋ جۇمىسى كەشەۋىلدەتىلگەن اتىزدارعا قاراتا، ەرتە پىساتىن سورتتاردى تاڭداۋ، تۇقىم ٴسىڭىرۋ مولشەرىن ارتتىرۋ، نەگىزگى تىڭايتقىشتى كوبىرەك بەرۋ ارقىلى جاي ەگۋ ىقپالىن تومەندەتۋ كەرەك. ۇشىنشىدەن، اۋىل شارۋاشىلىق ماتەريالدارىمەن قامداۋ جانە وسى ماتەريالدار باعاسى ورنىقتىرىلادى. تۇقىممەن قامداۋ جانە ساپاسىن باقىلاۋ-باسقارۋ كۇشەيتىلەدى. اۋىل شارۋاشىلىق ماتەريالدارى كاسىپورىندارىنىڭ حيميالىق تىڭايتقىش جانە ەگىس دارىلەرىمەن قامداۋىن ارتتىرۋ جەبەلەدى. تورتىنشىدەن، ساياساتتىق قولداۋدى كۇشەيتۋ. اتىزدارداعى سۋدى ىعىستىرۋ، داقىل كەپتىرۋ جۇمىستارىن ەلەكترلى جۇرگىزۋدى، ديزەل مايىمەن قامداۋدى قامتاماسىزداندىرۋ كەرەك. اۋىل شارۋاشىلىق تاراۋلارى قولدا بار قارجىدان ٴبىر تۇتاس ۇتىمدى پايدالانىپ، جەرگىلىكتى ورىنداردىڭ كۇزگى جيىن-تەرىنى مەن كۇزگى، قىسقى تۇقىم سەبۋ جۇمىسىن قولداۋلارى كەرەك. اپاتقا ۇشىراعان جەرلەرگە قاراتا ورتالىق قازىنا اۋىل شارۋاشىلىق اپاتتان قۇتقارۋ قارجىسىن قايتالاي لايىقتى ورنالاستىردى. قازىنا تاراۋلارى كەلەر جىلعى قاتىستى اۋدارىپ تولەۋ جانە اۋىل شارۋاشىلىق ماشينا-جابدىقتارىن ساتىپ الۋ قوسىمشا قاراجاتى سياقتىلاردى الدىن الا بوساتىپ، جەرگىلىكتى ورىنداردىڭ كەش ەگۋ جانە كەپتىرۋ ماشيناسىن ساتىپ الۋىنا قولداۋ كورسەتەدى. 

    ماجىلىستە مىنالار اتاپ كورسەتىلدى: حالىق بۇقاراسىنىڭ، اسىرەسە، اپاتقا ۇشىراعان بۇقارانىڭ قىستان حاۋىپسىز جانە توڭباي وتۋىنە شىنايى كەپىلدىك ەتۋ-پارتيا ورتالىق كوميتەتىنىڭ، مەملەكەتتىك كەڭەستىڭ ايقىن تالابى. مەجەگە قاراعاندا، بيىل قىستا ەلىمىز سولتۇستىك بولەگىنىڭ اۋا تەمپەراتۋراسى بۇرىنعى جىلدارداعى ۇقساس مەزگىلدەگىدەن تومەندەۋ. ماجىلىستە مىنالار ۇيعارىلدى: بىرىنشىدەن، سولتۇستىك بولەكتىڭ، اسىرەسە، شىعىس سولتۇستىك بولەكتىڭ جىلۋمەن قامداۋىنا كەپىلدىك ەتۋ؛ جىلۋمەن قامداۋعا ىستەتىلەتىن كومىر ٴوندىرىسى مەن تاسىمالىن بار كۇشپەن قامتاماسىز ەتۋ؛ كومىر بازارىن بىلىقتىرۋ جايتتەرىنە زاڭ بويىنشا سوققى بەرۋ كەرەك. ەكىنشىدەن، سولتۇستىك بولەكتەگى ٴتۇيىندى جەرلەردىڭ جىلۋمەن قامداۋىنا كەپىلدىك ەتۋ؛ كاسىپورىنداردى گازبەن قامداۋدى ارتتىرۋعا ۇيىمداستىرىپ، گاز بايلىعىن ٴبىر تۇتاس جوسپارلاپ، گازبەن قامداۋدىڭ قاۋىرت كەزەڭىن تەڭشەپ، قامدالۋىن قامتاماسىزداندىرۋ كەرەك. كومىر ىستەتۋگە ەبدەيلى بولسا كومىر جەتكىزىپ، توك ىستەتۋگە قولايلى بولسا توك تاراتۋعا تاباندى بولىپ، بۇقارانى جىلۋمەن قامداۋدى جەر جاعدايىنا قاراي قامتاماسىزداندىرۋ كەرەك. ۇشىنشىدەن، كومىر، توك، مۇناي، تابيعي گاز تاسىمالىن قامتاماسىزداندىرۋ مەحانيزمىنىڭ رولىن تولىق ساۋلەلەندىرىپ، كۇندىك ورنالاستىرۋدى، اپتالىق تەڭەستىرۋدى ويداعىداي ىستەۋ كەرەك. جەرگىلىكتى ورىنداردىڭ جاۋاپكەرلىگىن ناقتىلاندىرىپ، حالىقتىڭ گاز ىستەتۋ جانە پارمەن جىلىنۋ باعاسىنىڭ نەگىزىنەن ورنىقتى بولۋىنا كەپىلدىك ەتۋ كەرەك. 

    ماجىلىستە مىنالار اتاپ كورسەتىلدى: ورتا، شاعىن، ۇساق كاسىپورىندارعا كەپىلدىك ەتۋدىڭ ٴوزى جۇمىستانۋعا كەپىلدىك ەتكەندىك، قامداۋدى ارتتىرۋعا، زات باعاسىن ورنىقتىرۋعا دا ٴتيىمدى. كاسىپورىندارعا كومەكتەسۋ، قيىنشىلىعىن شەشۋ سەرپىنىن باعىتتامالى تۇردە ارتتىرۋ كەرەك.


 اۋدارعان: امانتاي مۇسايىپ ۇلى