ەلىمىزدەگى تۇڭعىش ون مىڭ مەتر تەرەڭدىكتەگى عىلمي بارلاۋ قۇدىعى قازىلدى
ٴوز حابارىمىز. ەلىمىزدەگى تۇڭعىش ون مىڭ مەترلىك عىلمي بارلاۋ قۇدىعى ـ تارىم عىلمي بارلاۋ 1 - قۇدىعى 5-ايدىڭ 30-كۇنى تارىم ويپاتىندا بۇرعىلاندى، جوبالانعان بۇرعىلاۋ تەرەڭدىگى 11 مىڭ 100 مەترگە جەتتى. بۇل ەلىمىزدىڭ جەر شارىنىڭ سىرى اشىلماعان جۇمباق سالاسىنا ىزدەنىس جاساپ، ادامزاتتىڭ تانىم اياسىن كەڭەيتۋدەگى ۇلى باستاماسى. تارىم ويپاتىنىڭ جەر بەتى جىرا - جىلعالار قايشالىسقان، جەر استى تارام-تارام، گەولوگيالىق قۇرىلىمى توتەنشە كۇردەلى، اشۋ قيىندىعى دۇنيە جۇزىندە سيرەك كەزدەسەدى، ەل ىشىندە عانا بار. 10 مىڭ مەتر تەرەڭدىككە كىرۋدە 200 سەلتسي گرادۋستىق جوعارى تەمپەراتۋراعا ٴتۇزۋ، اتموسفەرا قىسىمىنىڭ 1700 ەسەسىندەي جوعارى قىسىمىعا شىداۋ قاتارلى سايىسقا توتەپ بەرۋ كەرەك.
تارىم ويپاتى جەر استى بارلاۋدىڭ توتەنشە تەرەڭ بولۋ جانە ەرەكشە گەولوگيالىق قۇرىلىمى الا كەلگەن قيىنشىلىقتارعا قاراتا، تەرەڭ جەر تارىم عىلمي بارلاۋ 1 - قۇدىعىن قازۋدا ەلىمىز دەربەس زەرتتەپ جاساعان بۇكىل جەر شارىنداعى تۇڭعىش 12 مىڭ مەتر تەرەڭ قۇدىق اۆتوماتتى بۇرعىلاۋ ماشيناسى ىسكە قوسىلدى. سونىمەن بىرگە، 220 سەلتسي گرادۋستىق اسقىن جوعارى تەمپەراتۋراعا ٴتوزىمدى سۇيىقتىق، بەس سالا فورمالى قۇدىق كوزى قۇرىلىمى سياقتى تەحنيكالاردا جاڭالىق اشىپ، تاپقىرلاپ، 10 مىڭ مەترلىك ەرەكشە تەرەڭ قۇدىقتى بۇرعىلاۋدى تەحنيكالىق جاقتان جانە جابدىقپەن قامتاماسىز ەتتى. جۇڭگو مۇناي توبى تارىم مۇناي الابى بولىمشە سەرىكتىگىنىڭ باس تەحنيكا مامانى ۋاڭ چۇنشىڭ بىلاي دەدى: تەرەڭ جەر تارىم عىلمي بارلاۋ 1 ـ قۇدىعىنىڭ باستى ماقساتى 10 مىڭ مەتر دارەجەلى ەرەكشە تەرەڭ قاباتتا گەولوگيالىق، ينجەنەريالىق عىلمي ىزدەنىس ـ زەرتتەۋ جۇرگىزۋ. وسى رەتكى ينجەنەريادا قۇدىق بۇرعىلاۋعا 457 كۇن ۋاقىت كەتەتىندىگى جوسپارلاندى.
تارىم ويپاتىنداعى مۇناي، تابيعي گاز كوبىنەسە 6000 مەتردەن تومەن جەر استىندا ساقتالادى، 8000 مەتردەن تومەنگى مۇناي، تابيعي گاز گەولوگيالىق بايلىعىنىڭ جالپى مولشەرى 9 ميلليارد توننا مۇنايدىڭ بالاماسىنان اسىپ، بۇكىل ەلدەگى اسا تەرەڭ قاباتتاعى بايلىق مولشەرىنىڭ جارىمىنان استامىن ۇستايدى، بارلاۋ بولاشاعى توتەنشە نۇرلى.
اۋدارعان: كۇلان ىرىسباي قىزى
