11-ايدىڭ 16-كۇنىنەن باستاپ حيلۇڭجياڭ ولكەسىنىڭ جيامىس قالاسىندا كەڭ كولەمدە قار جاۋدى. جامىس قالاسىنا قاراستى فۋجين قالاسى قارلى بوراننىڭ ىقپالىنا ۇشىرادى، وسى قالاداعى ٴبىر اۋىل شارۋاشىلىق كاسىپورنىنىڭ قامبا سيىمدىلىعى 5 ميلليون توننا كەلەتىن استىق قامباسىنىڭ ٴىشى-سىرتىنداعى تەمپەراتۋرا پارقى زور بولىپ، قامباداعى استىق جاعدايىن باقىلاۋ-تەكسەرۋ جۇيەسى دەرەۋ ساقتىق سيگنالىن تاراتتى. قامبادا ساقتاۋ ٴبولىمىنىڭ مەڭگەرۋشىسى جاۋ يۇنجياڭ بىلاي دەدى: جۇيەنىڭ اڭىس ەتكەن سەگنالىن تاپسىرىپ العاننان كەيىن، جەلدەتكىشتەن پايدالانىپ اۋا الماستىرىپ، قامبا بولمەلەرىنىڭ تەمپەراتۋراسىن تومەندەتتىك، سونىمەن بىرگە قار تازالاۋ قىزمەتىن جاقسى ىستەپ، قاسات قارلاردىڭ ەرىپ قامباعا قۇيىلۋىنان ساقتاندىق.

 

 فۋجين قالالىق استىق مەكەمەسى باستىعىنىڭ ورىنباسارى دىڭ چيۋشى بىلاي دەپ تانىستىردى: فۋجين قالالىق استىق تاراۋلارى استىق جيناۋ-ساقتاۋ كاسىپورىندارىنا، شارۋا وتباسىلارىنا تەحنيكالىق جەتەكشىلىك ەتىپ، جاۋعان قالىڭ قاردىڭ ىقپالىن مۇمكىندىكتىڭ بارىنشا ازايتتى.

 

 انحۇي ولكەسىنىڭ فانچاڭ قالاسىنداعى ولكە دارەجەلى استىق زاپاس قامباسىندا، استىق ەگەتىن ٴىرى وتباسى ساۋ جيڭجيڭ اكەلگەن ەكى اۆتوموبيلگە تيەلگەن جاي پىساتىن ۇشكىل كۇرىش ٴونىمدەر اۆتوماتتى كۇرىش ۇلگى الۋ ماشيناسى، سۋ قۇرامىن تەز تەكسەرۋ اسپابى سياقتى زەردەلى جابدىقتارمەن بىرجاقتى ەتىلىپ، 80 توننا استىق 3 ساعاتتان استام ۋاقىتتا قامباعا كىرگىزىلدى. 

 

 انحۇي ولكەسى ما-انشان قالاسى داڭتۋ اۋدانى مەملەكەتتىك استىق زاپاس قامباسى مەڭگەرۋشىسىنىڭ ورىنباسارى حۋ جينلياڭ بىلاي دەدى: ٴاربىر قامباعا شىرۋدەن ساقتانۋ الىس ارالىقتى باقىلاۋ-مەڭگەرۋ، ساقتاندىرۋ جۇيەسى ورناتىلىپ، قامبا ىشىندەگى استىقتىڭ تەمپەراتۋراسى مەن ىلعالدىعىن دەر كەزىندە باقىلاپ، زەردەلى اۋا الماستىرىپ، استىق ساپاسىنا كەپىلدىك ەتۋگە بولادى.

 

 كەزەكتە حۋبەي ولكەسى مەملەكەت يەلىگىندەگى 213 استىق قامباسىن ينفورماتسيالاندىرىپ وزگەرتۋ جۇمىسىن ورىنداپ بولدى. بيىل جىل سوڭىنا دەيىن حۋبەي ولكەسى ولكە، قالا، اۋدان سىندى 3 دارەجەلى استىقتى باقىلاۋ-باسقارۋدى ينفورماتسيالاندىرۋدى جاپپاي قامتۋ جاعدايىن جۇزەگە اسىرادى. 

 

اۋدارعان: نازار ٴارىپ ۇلى