ينفورماتسيا اشكەرەلەۋ: mzjubao@cnr.cn

ٴتۇيىندى تۇعىر

ءار كاسىپتى مەڭگەردى، يگىلىگىن ەل تەڭ كوردى

来源:央广网     |责编:努丽霞提|     发布日期: 2019-10-21 09:48


 

عىلىمبەك سۇرلەمدىك جۇگەرى ورعىزۋدا

 

 تورابىمىز ۇسىنىس ەتكەن ءتىلشى ساعىنبەك رابات ۇلى مەن ەرىكتى ءتىلشى لۇي ۋىنتيڭ التايدان حابارلايدى. 10 نەشە جىلدىڭ الدىندا، ول اسكەري قوسىندا 3-دارەجەلى ەڭبەك ءسىڭىرىپ، «تاڭداۋلى جاۋىنگەر» اتاعىن ەنشىلەگەن ەدى. ال بۇگىنگى كۇنى ول قاجىرلىلىقپەن ەڭبەك ەتۋىمەن ءارى جۇرتقا سەنىمدىلىگىمەن كىرىسىن ارتتىرىپ، اۋقاتتانۋدىڭ ءدامىن تاتتى. ءيا، ول كوكتوعاي اۋدانى دۇرە قالاشىعى قىزىلجار قىستاعىنىڭ تۇرعىنى ـــ عىلىمبەك ءپاتىقان ۇلى. «ءبىر ادامنىڭ اۋقاتتانعانى اۋقاتتانۋعا جاتپايدى، كوپشىلىك بىردەي اۋقاتتانعاندا عانا اۋقاتتانعاندىق ەسەپتەلەدى». تاياۋ جىلدان بەرى، ول ماڭىنداعى اۋىلداستارىنىڭ مال باعۋدى بىرگە دامىتۋىنا جەتەكشىلىك ەتىپ، كوپشىلىكتىڭ جاقسى تۇرمىس كەشىرۋىنە مۇمكىندىك جاسادى.  



 تاياۋدا ءتىلشى عىلىمبەككە كورشىسى اكىن شاۋقان ۇلىنىڭ سۇرلەمىن باسىپ جاتقان جەرىنەن كەزىكتى. عىلىمبەك 1987-جىلى ءومىر ەسىگىن اشقان، ونىڭ اكە-شەشەسى ءار تۇلىك مال باعىپ، جۇگەرى ەگىپ دەگەندەي ءبىر وتباسىن اسىراپ كەلگەن-دى. ۇلكەندەردىڭ سول جىلدارى تارتقان جاپا-ماشاقاتى عىلىمبەككە تەرەڭ اسەر ەتىپ، ونىڭ جۇرەك تۇكپىرىنە اتا-انا تاربيەسىن، ءۇمىتىن اقتاۋ مىقتى ورناعان بولاتىن. 

 

 

دۇرە قالاشىعى ۇزاقتى قىستاعىنىڭ تۇرعىنى جىگەربەكتىڭ وتباسىندا سۇرلەم باسىلۋدا

 

 2004-جىلى كۇزدە عىلىمبەك اكەسىنىڭ مال ساتۋ جۇمىسىنا كومەكتەسىپ، العاش ساۋدا ىستەگەندە 1000 يۋاننان استام پايدا تابادى. مال ساۋداسى ارقىلى اقشا تابۋعا بولاتىنىن بايقاعان اكەلى-بالالى ەكەۋى كورشىسىنىڭ جۇك اۆتوموبيلىن ۇزاق ۋاقىت مايعا الىپ، مال ساۋداسىمەن شۇعىلدانۋعا بەل بايلايدى. وتكەن كۇندەردى ەسىنە العاندا عىلىمبەك بىلاي دەدى: «ءبىز ءار قىستاقتان ساتىپ العان مالدى سىرت جەرگە اپارىپ ساتىپ، قايتاردا وتباسى مۇلىكتەرىن الا كەلىپ قاجەت ەتكەن اۋىلداستارعا ساتىپ بەرىپ، ءبىر جىلدا 50 مىڭ يۋاننان استام پايدا تاپتىق».


 

2005-جىلدىڭ ءبىر كۇنى قالاشىقتان اسكەر قابىلداۋ جونىندەگى حاباردى كورگەن عىلىمبەك، ءىنىسى مەن قارىنداسىنىڭ مەكتەپ قۇشاعىندا وقىپ جاتقانىن، وتباسى اۋىرتپالىعىن از دا بولسا جەڭىلدەتۋدى ويلايدى دا، اكە-شەشەسىمەن اقىلداسۋعا دا ۇلگىرمەي، اسكەرگە قابىلداۋ ەرىكتىلىك كەستەسىن تولتىرادى. 

 

 اسكەري قوسىنعا العاش بارعاندا، عىلىمبەك ءتىل بىلمەي قاتتى قينالدى، كوماندير تۇسىرگەن بۇيرىقتى مۇلدە تۇسىنە المادى، سونىمەن ول بوس ۋاقىتىنان پايدالانىپ ساپتاستارىنان كومەك تىلەپ، قۇلشىنا ءتىل ۇيرەنۋگە كىرىستى. عىلىمبەك اسكەري قوسىنداعى ەكى جىلدا باتىل دا ىجداعاتتى بولىپ، جەڭىلىسكە مويىنسال بولماعاندىقتان، ءبىر رەت 3-دارەجەلى ەڭبەك ءسىڭىرىپ، داڭقپەن جۇڭگو كوممۋنيستىك پارتياسىنا مۇشە بولدى ءارى «تاڭداۋلى جاۋىنگەر» اتاعىن دا الدى.

 

 2007-جىلى اسكەري قوسىننان بوساپ قىستاققا قايتىپ كەلگەننەن كەيىن، عىلىمبەك بانكەدەن قارىز اقشا الىپ جۇك اۆتوموبيلىن ساتىپ الىپ، اكەسىمەن بىرگە مال ساۋداسىن جالعاستىرادى، كىرىسى دە قامتاماسىزداندىرىلىپ، تۇرمىس شارت-جاعدايى بارىنشا جاقساردى. 

 

 «اسكەري قوسىننان بوساپ كەلگەن سوڭ، ءوزىمىزدىڭ جەرگىلىكتى ساقشى بولمىشەسىندە 1.5 جىلداي قىزمەت ىستەدىم، كوكتەمدە ەگىن ەگەمىن، بيىل 400 مۋ جەرگە ەگىن سالعانمىن. 2018-جىلى 530 مىڭ يۋانعا سۇرلەم وراتىن ماشينا، سۇرلەم تاسيتىن جاڭا، كونە 3 اۆتوموبيل، بيىل تاعى ءبىر سانچى (كۇرەۋ-قازۋ ماشيناسى) ساتىپ الىپ، كاسىپ كولەمىن كەڭەيتتىم. بۇرىنعى جىلدارى كۇز بەن قىستا نەگىزىنەن مال ساۋداسىمەن شۇعىلدانىپ، ءۇرىمجى، تۇرپان جانە بەيتۇن بازارلارىنا مال اپارىپ ساتاتىنمىن، بىلتىر 3800 باس سيىر ساتتىم. مال ساۋداسىن ىستەۋ بارىسىندا لياۋنيڭ، شاندۇڭ، حىنان ولكەسىندەگى بىرنەشە مال ساۋداگەرىمەن تانىسىپ شەرىكتەسكەن ەدىم، بيىل سولار كولىكتەرىمەن اۋىلعا دەيىن كەلىپ ءدال قازىر مال ساتىپ الۋدا، مەن سولارعا كولىگىممەن جول باستاپ، ەگىنشى-مالشىنىڭ قوراسىنان مال ساتىپ الۋىنا قول ۇشىن بەرەمىن. ولاردىڭ ساتىپ الۋ باعاسى جەرگىلىكتى ورىنداعى مال بازارى باعاسىنان الدە قايدا جوعارى، بۇل مال ساتاتىن ەگىنشى-مالشى قاۋىمىنا توتەنشە ءتيىمدى بولدى. قازىرگى قارقىنعا قاراعاندا، بيىل 8000 باستان ارتىق مال ساتاتىن سياقتىمىن»- دەدى عىلىمبەك قۋانىشتى تۇردە. 



 «ءوز وتباسىڭنىڭ ءال-اۋقاتى جاقسارعاننان كەيىن، اينالاڭداعى اۋىلداستارىڭدى دا سۇيەمەلدەۋىڭ كەرەك. مەنىڭشە، كوپشىلىكتى باستاپ كىرىستى ارتتىرىپ، ءال-اۋقاتىن جاقسارتىپ، كوپشىلىكتىڭ جاقسى تۇرمىس وتكىزۋىنە مۇمكىندىك جاساۋ جاۋاپكەرلىگىم بار دەپ قارايمىن»،- دەيدى عىلىمبەك. سونىمەن ول ءوزى سياقتى دامۋ تىلەگى بار، ءبىراق قولىندا قارجىسى جوق قىستاق تۇرعىندارىن تاۋىپ، ولارعا مال بورداقىلاۋدى ۇيرەتەدى. كورشىسى اكىن سولاردىڭ ءبىرى، ول رەۆماتيزمدىك بۋىن قابىنۋى ناۋقاسىنا شالدىعىپ، اۋىر ەڭبەك ىستەي الماعاندىقتان، تۇرمىسى ءۇپى-ءتاپى ەدى. عىلىمبەك ۇنەمى ونىڭ وتباسىنداعى قاتتى-قايىرىم جۇمىستارىنا كومەكتەسىپ، كۇرىش، ۇن، ازىقتىق ماي سياقتى تۇرمىسقا قاجەتتى بۇيىمداردى الا بارادى، ءتىپتى 2016-جىلى ونىڭ 3000 يۋان وپەراتسيا اقىسىن دا ءوز قالتاسىنان تولەدى.  

 

 «عىلىمبەك وتە ويلامدى ءارى ىسكەر جىگىت، دەنساۋلىعىمنىڭ جاقسى ەمەس ەكەنىن، اۋىر جۇمىس ىستەي المايتىنىمدى ءبىلىپ، ۇنەمى كەلىپ كومەكتەسىپ تۇرادى، اۋەلى مەنىڭ سيىرىمدى دا جوعارى باعادا ساتىپ الدى، قالاي العىس ايتۋدى بىلمەي وتىرمىن»،- دەدى كورشىسى اكىن تەبىرەنىستى كوڭىل كۇيمەن. 



 «تاياۋداعى 2 جىلدا ‹ۇعىسۋ، تيىمدىلىك جاساۋ، توعىستىرۋ› قيمىلى بويىنشا قىستاقتا تۇراتىن قىزمەت اترەتى مەن قىستاق ‹ەكى كوميتەت› القاسى ماعان كوپتەگەن ساياساتتىق قولداۋ كورسەتتى جانە مال ساتۋىما جەتەكشىلىك ەتتى. اسىرەسە، باعىمشىلىق الاڭىن سالۋ بارىسىندا، قىستاقتىڭ ءبىرىنشى شۋجيى، قىزمەت اترەتىنىڭ باستىعى سۇن ۋييۋان مەنى اۋدانداعى قاتىستى تاراۋلارعا ەرتىپ بارىپ، تەكسەرىپ بەكىتۋ راسمياتىن وتەستى، مەن بۇعان قاتتى اسەرلەندىم. الداعى كۇندە بىرنەشە كومەكشى جالداپ، ‹اردا› باعىمشىلىق الاڭىنا جۇمىس ىستەتسەم دەيمىن، ونان سوڭ قىستاقتاعى سيىر، قوي ساتاتىن بىتىراندى وتباسىلارىن بىرىكتىرىپ، ساياسات ارقىلى ەگىنشىلىك رايونىندا مال شارۋاشىلىعىن ويداعىداي دامىتىپ، اۋىلداستاردى اۋقاتتانۋ جولىنا باستايمىن»،- دەپ كۇلدى عىلىمبەك ءوزىنىڭ الداعى جوسپار-جوباسىنىڭ شەتىن شىعارىپ. 

 

 

中央广播电视总台 央广网 版权所有