ينفورماتسيا اشكەرەلەۋ: mzjubao@cnr.cn

ٴتۇيىندى تۇعىر

ەلەكتروندىق ونىمدەر اۋىل بالالارىنىڭ دا ساناسىن سالعىرتتاندىردى

来源:央广网     |责编:达吾力别克|     发布日期: 2019-12-01 17:21

 ەلەكتروندىق ونىمدەر اۋىل بالالارىنىڭ دا ساناسىن سالعىرتتاندىردى

اۋىل - قىستاقتاعى بالالار ءالى دە سۋدا مالتاپ، اعاشقا ورمەلەپ، بالاقتى ءتۇرىپ تاستاپ شالپىلداتىپ سۋ كەشىپ ويناپ ءجۇر مە؟ جوق! ولار قازىر قول تەلەفونعا تەسىلىپ، ويىن - تاماشانى قول تەلەفوننان ىزدەۋدە. ماسەلەن، قىزىقتى مازمۇندار، تىكە تاراتۋ باعدارلامالارى، ساۋعا ۇسىنۋ قيمىلدارى سياقتى مازمۇندارى ىنتىعا كورۋدە. ەڭ جاڭا تەكسەرۋ ناتيجەسىنە قاراعاندا، اۋىل - قىستاقتاعى بالالاردىڭ ەلەكتروندىق ونىمدەردى پايدالانۋ ۋاقىتى، قالاداعى بالالاردان الدە قايدا جوعارى بولعان. بالا تاربيەسىنىڭ كەمشىل بولۋى، ساباقتان سىرتقى تۇرمىسىنىڭ  ءبىر سارىندى بولۋى سياقتى سەبەپتەردەن، اۋىل - قىستاقتاعى كوپتەگەن بالالار ەلەكتروندىق ونىمدەرگە بوي ۇرىپ، الىستى كورە الماۋ، دەنساۋلىعى السىرەۋ، رۋحاني جاقتان جابىرقاۋ، جالعىزسىراۋ، قۇن كوزقاراسىنىڭ بىلىعۋى سياقتى كوپ  ءتۇرلى ماسەلەلەرگە ءدۇپ كەلدى.

 

ەلەكتروندىق ونىمدەر اۋىل – قىستاق بالالارىنىڭ تۇرمىسىن «جاۋلاپ» الدى

 

ىمىرت ۇيىرىلگەندە، نيڭشيانىڭ ءمالىم قالاشىعىنداعى تىپ -تىنىش مادەنيەت الاڭىنان بالالاردىڭ «ۇر، سوق، قىر» دەپ شاتتانا ايعايلاعان داۋىستارى  ءالسىن - ءالى قۇلاققا شالىنادى. ۇيگە قايتقاننان كەيىن قول تەلەفوندارىنىڭ  ءمۇسادىرالانۋىنان قورقاتىن، باستاۋىش مەكتەپ 6 - جىلدىعىنىڭ وقۋشىسى باي شياۋباۋ (جاناما اتى) مەن ونىڭ كىشكەنتاي سەرىكتەرى بىرگە الاڭنىڭ ورتاسىندا ءيىن تىرەسە وتىرىپ، قول تەلەفوندارىنىڭ زاريادى تاۋسىلعانشا، ءار كۇنى ەلەكتروندىق ويىننىڭ قىزىعىنا باتادى. «مەن جۇلدىزشا جالتىلداۋ ورنىندامىن،  ءار رەت جەڭگەندە بەينە ساباقتان 90  ءنومىر العانداي شاتتانامىن»،- دەيدى باي شياۋباۋ ەلىرە ءتۇسىپ. ول ەمتيحاننان ۇنەمى تومەن ءنومىر الاتىندىقتان، ۇستازىنان كوپ سوگىس ەستيدى. الايدا ونىڭ قول تەلەفوندا «شايقاسۋ» ويىنىن ويناعانىنا 3 جىلدان استى، ول وسى «شايقاسۋ» ويىنى دەگەندە ىشكەن اسىن جەرگە قويادى.

قازىر توراپ پەن ەلەكتروندىق ونىمدەر قول جەتىمدى ونىمگە اينالدى. گۋاڭدۇڭ چاۋجوۋ اۋىل - قىستاق باستاۋىش مەكتەبىنىڭ باستىعى چىن جينشان: «مەكتەبىمىزدە 30 پروتسەنتكە جۋىق جوعارى جىلدىق وقۋشىلارىنىڭ بارلىعىندا قول تەلەفون بار»،- دەدى. باتىس بولەكتەگى ءمالىم ءبىر اۋىل - قىستاقتا ورتا مەكتەپتىڭ وقۋ – اعارتۋ ىستەرىنە باعىتتامالى كومەكتەسىپ جاتقان حۋو كىحان: «مەكتەبىمىزدىڭ ورنالاسقان جەرى مەملەكەت دارەجەلى كەدەي اۋدان بولعانىمەن، الايدا كلاستاعى وقۋشىلاردىڭ تەڭ جارىمىنا جۋىعى قول تەلەفون وينايدى، ولاردىڭ ىشىندە اتا – اناسىنا بىلدىرمەي تەلەفون ساتىپ العاندارى دا بار. مەكتەپ وقۋشىلاردىڭ مەكتەپتە قول تەلەفون ويناۋىنا قاتاڭ تيىم سالادى. الايدا ولار جۇما كۇنى مەكتەپ قاقپاسىنان شىعىسىمەن، قول تەلەفوندارىن قولىنان تۇسىرمەيدى»،- دەدى.

 

اۋىل - قىستاق بالالارى جونىنەن العاندا، ەلەكتروندىق ونىمدەر ولاردىڭ دەمالىس ۋاقىتىنىڭ ءريتىمىن بۇزىپ، كورۋ قۋاتىن تومەندەتىپ، دەنە ساپاسىن ناشارلاتتى. وقۋ - اعارتۋ مينيسترلىگى بىلتىر بىلاي دەپ اتاپ كورسەتتى: اۋىل - قىستاق وقۋشىلارىنىڭ كورۋ قۋاتى ناشارلاۋىنىڭ ارتۋ قارقىنى قالادان اسىپ كەتتى. جۇڭگو بالالار ورتالىعى مەن قوعامدىق عىلىم قۇجاتتارى باسپاسىنىڭ بيىل 8 - ايدا جاريالاعان، «جۇڭگو بالالارىنىڭ دامۋ مالىمەتى ( 2019 ) — بالالاردىڭ مەكتەپتەن سىرتقى تۇرمىس جاعدايى» دەگەن مالىمەتىندە كورسەتىلۋىنشە، اۋىل - قىستاقتاعى بالالاردىڭ كۇندەلىكتى ەلەكتروندىق ونىمدەرىن پايدالانۋ ۋاقىتى ( 108.18 مينۋت) قالاداعى بالالاردان كورنەكتى جوعارى بولعان (88.40 مينۋت).

 

-مەن  ءار رەت جاۋاپتى كلاسىمنىڭ قاسىنان وتكەن سايىن، ساباق ۋاقىتىندا قول تەلەفوندى جاسىرىن وينايتىن بالالاردى ۇنەمى بايقايمىن. ەگەر وقۋشىنىڭ كورۋ قۋاتىنىڭ پارىقى زور بولسا،  ءسوزجوق، جاتىن بولمەسىندە كورپەنىڭ ىشىندە جاسىرىن قول تەلەفون ويناۋدان پايدا بولعاندىعىن اڭعارتادى ـ دەدى نيڭشيا يىنچۋان اۋىل ـ قىستاق ورتالاۋ مەكتەبى 3 ـ كلاسىنىڭ جەتەكشىسى فان چيچىڭ.

ءمۇبادا، ەلەكتروندىق ونىمدەر شەكتەن تىس «جاۋلاسا»، كوپتەگەن اۋىل - قىستاق بالالارىنىڭ تۇرمىسى بەينە «قاپاسقا قامالعانداي» كۇيگە تۇسەدى. چىن جينشان: اۋىل ـ قىستاقتاعى بالالار ۇزاق ۋاقىت بويى سۇرەڭسىز، مەيىرىمسىز ەلەكتروندىق ونىمدەرمەن اينالىسسا، تىعىرىققا وڭاي تىرەلەدى. ولار  ءۇنحات، كوكەكپەن (QQ) اڭگىمەلەسۋدى ۇناتادى. سىرتتاي قاراعاندا قوعامدىق قارىم ـ قاتىناس اياسى كەڭ بولعانىمەن، رەال ومىردە توتەنشە جالعىزسىرايدى، بەتپە ـ بەت سويلەسۋ قابىلەتى تومەندەيدى جانە ۇيىمشىلدىق رۋحى كەمشىل بولادى.

 

ولار قول تەلەفونسىز ءومىر سۇرە المايتىنداي كۇي كەشۋدە. ۇيدە «حانماي» (喊麦) ، ويىن ويناۋ سياقتىلارعا بەرىلگەندە، قول تەلەفونىنىڭ ەكرانى بىت – شىت بولسادا، ولار  ءوزىن تەجەي المايدى، ءتىپتى ەش نارسەنى كاپەرىنە دە المايدى.  لياۋنيڭنىڭ ءمالىم ءبىر اۋىل - قىستاعىنداعى اتا – انالاردىڭ ءبىرى _ حۋاڭ ×× تى ەرەكشە الاڭداتاتىنى، دوستار شەڭبەرىندە تارالعان، ءمالىم ءبىر اتا – انانىڭ بالاسىنىڭ قول تەلەفونىن قاتتى اشۋلانىپ شاعىپ تاستاعاننان كەيىن، بالاسىنىڭ عيماراتتان سەكىرىپ ءوزىن جازىم ەتۋى سىندى تراگەدياعا تاپ بولعاندىعى جونىندەگى جايت ەدى. ول مىنەزى قۇبىلمالى مەزگىلدە تۇرعان ۇلىن باسقارا المادى، باسقارۋعا دا باتىلدىق ەتە المادى. بالاسى كوپ وتپەي قوعامعا شىعۋ الدىندا تۇر، ءبىراق بالاسىنىڭ ەشقانداي مۇرات، ماقساتىنىڭ جوقتىعى ونى قاتتى الاڭداتا باستادى.

سونداي- اق، اۋىل - قىستاق بالالارىنىڭ توراپ ينفورماتسياسىن مەڭگەرۋ قابىلەتى ءبىرشاما ءالسىز، ءىس - ارەكەتى جۇيەسىز بولۋ، قۇن كوزقاراسىنىڭ بىلىعۋى سياقتى ماسەلەلەر دە  ءجيى - ءجيى بەلەڭ بەرۋدە. فان چيچىڭ: «كەيبىرەۋلەرى توراپ تىلىنە ەلىكتەپ  بىلاپىت سوزدەردى ايتادى. كەيبىرەۋى تەلەفون ويىندارىنداعى ۇرىس – كەرىستى  ءىس جۇزىندىك «سىڭار ەزۋلىككە» نەمەسە توبەلەسكە اينالدىرادى. بىرەۋلەرى تاعى توراپ جۇلدىزدارىنىڭ شاش ۇلگىسى، كيىنىسىنە ەلىكتەپ، مەكتەپ كيىمدەرىنە ورنەك سالىپ، شولاق سىم كيىپ مەكتەپكە بارىپ، ءوزىن كەلىستى، كەلبەتتى كورسەتۋگە بوي ۇرادى»،- دەدى.

 

ەلەكتروندىق ونىمدەر ۇيدەگى قاراۋسىز قالعان بالالاردىڭ ومىرلىك جان سەرىگىنە اينالدى

 

قالاداعى بالالاردىڭ ءوز اۋەسىنەن قاراي تاربيەلەۋ كلاسى، جازدىق لاگەر، سەيىل - سەرۋەن قۇرۋ تۇرلەرى  بولۋ سياقتىلارمەن سالىستىرعاندا، اۋىل - قىستاقتاعى بالالاردىڭ ساباقتان كەيىنگى قيمىلى كەمشىل، تۇرمىسى  ءدام - تاتۋسىز بولعاندىقتان، تەك قولىنداعى قول تەلەفونعا تەسىلىپ، جاڭالىقتاردان تۇرلىشە اسەر الادى.

«مەن جەرگىلىكتى الەۋمەتتىك اۋماقتاعى ەڭ مىقتى «گۋان يۇي» ، بابا MVP (ەڭ ۇزدىك ساڭلاق) دى ويناۋدا تابىسقا جەتتىم»،- دەيدى نيڭشيانىڭ ءمالىم ءبىر اۋىل - قىستاق ورتالاۋ مەكتەبى 2 - جىلدىعىنىڭ 15 جاستاعى وقۋشىسى ما شياۋجى (جاناما اتى). ونىڭ اينالاسىنداعى ساباقتاستارىنىڭ  ءبارى وسى ويىندى وينايدى. وسى ويىندى  ءتىپتى دە جاقسى ويناۋ  ءۇشىن، ول قول تەلەفوننىڭ ءۇنحات قاپشىعىنداعى اقشاسىن تۇگەلدەي قاھارماندار تۇلعاسىن ساتىپ الۋعا جۇمسايدى ەكەن.

 

«قول تەلەفون ويناماي نە وينايمىز» دەگەن  ءسوز، قازىرگى اۋىل - قىستاق بالالارىنىڭ «ماتەلىنە» جانە اتا – انالارىنا ءسوز قايتاراتىن «رۋحاني جاقتان ءسۇرىندىرۋ سۇراقتارىنىڭ بىرىنە» اينالدى. اۋىل - قىستاقتارداعى ۇيدە قاراۋسىز قالعان بالالار جونىنەن العاندا، ەلەكتروندىق ونىمدەر ولاردىڭ ومىرلىك جان سەرىگىنە اينالدى.

 

ءتىلشى كوپتەگەن اۋىل - قىستاق بالالارىنىڭ اتا - انالارى سىرتتا جۇمىس ىستەپ، 10 نەشە كۇندە نەمەسە جارىم ايدا،  ءتىپتى بىرنەشە ايدا ارەڭ  ءبىر رەت ۇيىنە قايتاتىندىعىن، بالالاردىڭ اتا – اجەسىنىڭ تەك ولاردىڭ تۇرمىس قاجەتىنەن ارەڭ شىعىپ، ولارعا سۇيىسپەنشىلىك، قامقورلىق ىستەۋ جاعىنان ويداعىداي كومەكتەسە المايتىندىعىن بايقادى. سوندىقتان، ۋاقىت ۇزارعان سايىن بالالاردىڭ تانىم دەڭگەيى تومەندەپ، جالعىزسىراۋ سەزىمى كۇشىپ، جورامال الەمنەن وزىنە جۇبانىش تابۋعا اۋەستەنە تۇسكەندىگىن دە اڭعاردى.

 

بالالارى ۇيدە قاراۋسىز قالعان كۇننىڭ وزىندە دە، اتا - انالارى اقشا تاۋىپ وتباسىن اسىراۋمەن ابىگەر بولىپ، بالالارىنىڭ سۇيىسپەنشىلىگى مەن قوسالقى قاجەتىنە  ءمان بەرە المايدى. لياۋنيڭنىڭ جينجوۋ قالاسىنداعى پارنيك ەگىمشىلىگىمەن شۇعىلداناتىن وتباسىنداعى جاڭ فاميليالى،  ءوزىنىڭ جىل بويى اتىزدا قاربالاس ەكەنىن، ۇيگە قايتقاندا بالاسىنىڭ ۇنەمى ۇيىقتاپ قالاتىنىن، اكەلى - بالالى ەكەۋىنىڭ بارىس - كەلىسى وتە از ەكەنىن ايتتى.

 

مەكتەپتىڭ باقىلاپ – باسقارۋ قىزمەتىنىڭ دارمەنسىز بولۋ جايتى، اۋىل - قىستاق بالالارىنىڭ ەلەكتروندى ونىمدەرگە قۇمارتۋىنىڭ تاعى  ءبىر سەبەبى بولدى. اۋىل - قىستاقتارداعى ورتا - باستاۋىش مەكتەپتەردىڭ بارلىعى وقۋشىلاردىڭ مەكتەپتە قول تەلەفون ويناۋىنا رۇقسات ەتپەگەنىمەن، وقۋشىلار مەكتەپ قاقپاسىنان شىققاندا نەمەسە وقىتۋشىنىڭ باقىلاۋ اياسىنان تىسقارى شىققان كەزدە، ەكىنىڭ بىرىندە «مەڭگەرۋسىز قالادى». يىنچۋان قالاسى 16 - ورتا مەكتەپ ساياسي وقۋ - اعارتۋ باسقارماسىنىڭ مەڭگەرۋشىسى مين شىڭسۋ: «مەكتەبىمىزدە وقۋشىلار تۇستە نەگىزىنەن ۇيىقتامايدى، ۇل وقۋشىلار كوبىندە قول تەلەفون ويىنىن وينايدى، ال قىز وقۋشىلار توراپتا اڭگىمەلەسەدى»،- دەدى.

فان چيچىڭ تىلشىگە: «ءىشىنارا مەكتەپتەر وقۋشىلاردىڭ قول تەلەفون الىپ جۇرۋىنە قاتاڭ تيىم سالادى،  ءبىراق بايقاعان كۇندە دە ءمۇسادىرالاي المايدى، ويتكەنى سىرت جەرلەردە جۇمىس ىستەيتىن كەيبىر اتا - انالار قول تەلەفون ارقىلى بالالارىمەن بايلانىس جاساپ، ولارعا تەلەفون ارقىلى تۇرمىس قاراجاتىن جىبەرىپ بەرەدى. كەيبىر ويىندار دا بازارعا سالۋشى ساۋدا ورىندارى نەمەسە قىسقا كەسكىن تەكشەلەرى ‹جاستار مەن ورەندەر ۇلگىسىن› قۇرعانىمەن، ءبىراق كوپتەگەن ورتا - باستاۋىش مەكتەپ وقۋشىلارى اكە - شەشەسىنىڭ ەسەپ  ءنومىرىن تىركەپ وينايدى، سونىمەن تەجەۋ رولى اتقارىلماي كەلەدى»،- دەدى.

 

وقۋ - اعارتۋ سالاسىنداعى قايراتكەرلەر: قازىر كوپتەگەن قالالارداعى اتا - انالار ەلەكتروندىق ونىمدەردى شەكتەن تىس پايدالانۋدىڭ زيانىن تانىپ جەتتى، ال اۋىل - قىستاقتاعى اتا - انالاردىڭ ساناسى تومەن بولعاندىقتان، بۇعان  ءالى دە ءمان بەرمەدى. كەيبىر اتا – انالار  ءوزىنىڭ جۇمىس ىستەۋىنە، ەركىن قيمىل جاساۋىنا قولايلى بولۋ  ءۇشىن، كەيدە ادەيى قول تەلەفونمەن «بالاسىن الداۋسىراتتى»، سوندىقتان بالالارى كىشكەنتايىنان قول تەلەفونعا يەك سۇيەپ الدى؛ ال كەيبىر اتا - انالار ويىن ويناۋدى بالاسىنا تاپسىرما ورىنداتاتىن سيلىق رەتىندە قاراپ، بالاسىنىڭ شالاعايلىق ىستەيتىن ناشار ادەتتى وڭاي قالىپتاستىرۋىنا مۇمكىندىك جاراتىپ بەرگەندىگىن اتاپ كورسەتتى.

 

وتباسى مەن مەكتەپ اۋىل - قىستاق بالالارىن بىرلەسىپ «قۇتقارۋى» كەرەك

اتا - انا بالانىڭ ەسەيىپ – ەرجەتۋىندەگى  ءبىرىنشى جاۋاپتى ادام، باقىلاۋ - باسقارۋدا تۇلعالىق جاۋاپكەرشىلىكتى  ءتىپتى دە ويداعىداي اتقارۋ − اۋىل - قىستاقتاعى اتا - انالاردىڭ جەڭىل - جەلپى قاراۋعا بولمايتىن جاۋاپكەرشىلىگى سانالادى. نەگىزگى ساتىداعى ءىشىنارا وقىتۋشىلار اۋىل - قىستاقتاعى اتا - انالاردىڭ بالالارىنا قول تەلەفون ساتىپ الىپ بەرۋىن قۋاتتامايدى، ويتكەنى بالانىڭ  ءوزىن - ءوزى مەڭگەرۋى قيىن، سوندىقتان اتا – انالار بالاسىنا تەلەفون ۇستاتپاعانى ءجون.

 

بۇرىن وقۋ - اعارتۋ سالاسىندا قىزمەت ىستەگەن ستۋدەنت انا مىڭ يىڭيىڭ قاتارلىلار: «اتا - انالار وزدەرى ونەگە بولىپ، ‹بالام  ءالى كىشكەنە، ويناسا دا وقاسى جوق› دەيتىن سىڭار جاقتىلى كوزقاراستى تاستاپ، بالامەن مۇمكىندىكتىڭ بارىنشا كوبىرەك سىرلاسىپ، ولارعا جاقسى سەرىك بولۋى كەرەك» دەپ قارادى.

 

سونداي- اق، اۋىل - قالاشىقتاردى ساپانى جوعارىلاتۋ سياقتى قيمىلداردى ورىستەتۋگە شابىتتاندىرىپ، اۋىل - قىستاقتاعى بالالاردىڭ ساباقتان سىرتقى تۇرمىسىن بايىتىپ، جاڭا قىزىعۋ تۇيىندەرىن جەتىلدىرۋ ارقىلى ولاردىڭ نازارىن قول تەلەفوننان باسقاعا اۋدارۋ كەرەك. چىن جينشان مىنانى ۇسىنىس ەتتى: كەزەكتە، جاڭاشا اۋىل - قىستاق قۇرىلىسىنا كوپتەگەن دەنە تاربيە نەگىزدىك قۇرىلعىلارى قوسىلدى، بۇل بالالاردى دەنە تاربيە قيمىلى مەن سىرتقا شىعىپ قيمىل جاساۋعا ۇيىمداستىرۋعا ءتيىمدى ءارى بالالاردىڭ ويىنعا اۋەستىك قاسيەتىنە ۇيلەسەدى. وسىلاي ىستەگەندە عانا بالالاردىڭ دەنە شىنىقتىرۋىن جۇزەگە اسىرىپ، ولاردى قول تەلەفونعا يەك سۇيەۋدەن ساقتاۋعا بولادى.

شىنىن قۋعاندا، ەلەكتروندىق ونىمدەر تىم قورقىنىشتى بۇيىم ەمەس. ءىشىنارا ەلەكتروندىق تەكشەلەر مەن ەلەكتروندىق قۇرالدار، قالا مەن اۋىلداعى بالالاردىڭ وقۋ - اعارتۋ بايلىعى پارىقىن ازايتۋدىڭ  ءونىمدى تۇتقاسى. يىنچۋان قالاسى شيڭچيڭ رايونى يۋەياحۋ حۇيزۋ مەكتەبىنىڭ باستىعى ۋ جينحۋ: «ەلەكتروندىق ونىمدەردىڭ كەرى اسەرىنە بولا، قاراپايىم تاسىلمەن قارا-ءدۇرسىن باس تارتۋعا بولمايدى. اۋىل - قىستاقتاعى بالالار توراپقا شىعىپ  ءبىلىم ۇيرەنۋگە،  ءبىلىمىن تولىقتىرۋعا مۇقتاج. ولاردا تەك حاۋىپسىز پايدالاناتىن ەلەكتروندىق ونىمدەر مەن ينتەرنەت ورتاسى عانا كەمشىل، ال بۇل  ءتۇيىندى اۋىل - قىستاق مەكتەپتەرىنىڭ ينفورماتسيالانعان قاتتى بولشەك قۇرىلعىلارىن جوعارىلاتۋ ارقىلى قاناعاتتاندىرۋعا بولادى. مىسالى، جوعارى مەكتەپتەردە ەلەكتروندى كىتاپ وقۋ  ءۇيىنىڭ قۇرىلعاندىعى سياقتى، اۋىل - قىستاقتاعى بالالارعا دا ‹اقاۋسىز› توراپقا شىعۋ ورتاسىن جاراتىپ بەرە الساق، ولار وزدەرى ماتەريال كورىپ، ينتەرنەتتىڭ دامۋ ەرەكشەلىگىنەن دۇرىس يگىلىكتەنە الادى»،- دەدى. 

    中央广播电视总台 央广网 版权所有

    ەلەكتروندىق ونىمدەر اۋىل بالالارىنىڭ دا ساناسىن سالعىرتتاندىردى

    اۋىل - قىستاقتاعى بالالار ءالى دە سۋدا مالتاپ، اعاشقا ورمەلەپ، بالاقتى ءتۇرىپ تاستاپ شالپىلداتىپ سۋ كەشىپ ويناپ ءجۇر مە؟ جوق! ولار قازىر قول تەلەفونعا تەسىلىپ، ويىن - تاماشانى قول تەلەفوننان ىزدەۋدە. ماسەلەن، قىزىقتى مازمۇندار، تىكە تاراتۋ باعدارلامالارى، ساۋعا ۇسىنۋ قيمىلدارى سياقتى مازمۇندارى ىنتىعا كورۋدە.