ينفورماتسيا اشكەرەلەۋ: mzjubao@cnr.cn

ٴتۇيىندى تۇعىر

جان جاراڭنىڭ شيپاگەرى ءوزىڭسىڭ سەن، جارىعىم

来源:央广网     |责编:达吾力别克|     发布日期: 2019-12-14 18:57

 

كەي شاقتاردا،

 مىناداي ىستەرگە جولىعىپ جاتۋىمىز ابدەن: قىزمەتتە انادان-مىنادان قاعاجۋ كورىپ، ءدال سول ساتتە جانىڭدى جارالاي قويماسا دا، كۇندەر وتە كەلە جىلىستاپ جينالىپ، جىلبىسپالاپ جابىسىپ، قاراداي سەزىكتەنىپ، ۇركەك اتتاي سەكەم الىپ تۇراتىن كۇي قالىپتاسۋى مۇمكىن؛

 

تۇرمىستا كەيدە بۇرالاڭدىققا جولىققانىڭدا، ەت قىزىۋىندا سەزىلمەگەنىمەن، تىرلىكتىڭ ۇساق-تۇيەك كۇيبەڭى اياعىڭا ورالعى بولا بەرسە، جانىڭدى قاجىتىپ، جىگەرىڭدى قۇم قىلۋى مۇمكىن؛

 

ونىمەن ءتۇس شايىسىپ قالساڭ، ارالارىڭداعى رەنىش بىرەر رەتتە شاربى بۇلتتاي تاراپ كەتكەنىمەن، قايتالانا بەرسە، سۇيىسپەنشىلىكتىڭ تۋىرلىعىن جەلگە ۇشىرماي قويمايدى.

ادام تابيعاتى تىم قىزىق. كەيدە، ساتسىزدىككە جولىقساڭ، جاقىنىڭ جانىڭنان جىراقتاسا، كەي ىستەر كوڭىلىڭنىڭ استاڭ-كەستەڭىن شىعارسا دا، قايرات كورسەتىپ، بولماس ىسكە بولاتتاي بەرىك بولىپ جاتاسىڭ. ال كەيدە، اياق استىنان كۇيرەۋىك جانعا اينالىپ، قىزمەتتەسىڭنىڭ ءبىر اۋىز ءسوزىن اۋىر الىپ، اۆتوبۋستا بىرەۋ بايقاماي اياعىڭدى باسىپ كەتسە، تۇلان تۇتىپ، شالعان تەلەفونىڭدى ءسوزىڭنىڭ اياعىن توسپاي، ۇزە سالسا، ءتاپ-ءتاۋىر جابىعىپ قالاسىڭ. وسىنداي جاعدايدا: «ياپىراۋ، بۇگىن ماعان نە جەتكەن؟» دەپ ويلاپ كوردىڭ بە؟

 

وت الىپ، قوپاعا تۇسە قويارداي جاعداي، كوڭىل كۇيىڭنىڭ اپتەر-تاپتەرىن شىعاراتىن جۇمىس بولماعان ەدى، الايدا كوڭىل كوگىڭە قاباعىن قارسى تۇيگەن قارا بۇلت ءۇيىرىلىپ الدى. مىنە وسىندايدا، بۇعان سەبەپ بولعان ادامدى نەمەسە جۇمىستى ءبىر جاققا قايىرا تۇرىپ، ءوزىڭدى ءوزىڭ تەرگەي جونەلمەي، جان دۇنيەڭدى ءوزىڭنىڭ ىستىق قۇشاعىڭا بەرىپ كور، جۇدىرىقتاي جۇرەگىڭە تەلىپ كور. بۇل ارينە قولىڭنان كەلەدى.

باسقالاردىڭ نازارىندا،

ءار كۇنگى جۇمىس ٷشىن تيتىقتاپ، تۇرمىس ٷشىن ولەرمەندەنىپ جۇرگەندەيمىن. الايدا مەندە تاۋسىلماس جىگەر، قاجىماس قايرات بار. بوس ۋاقىتىم شىعا قالدى بولدى، كىتاپ وقيمىن، ومىردەن تۇيگەندەرىمدى جازىپ-سىزامىن. مەنى بىلەتىندەر: «توپان سۋ توبىعىنان كەلمەي جايراڭداپ، الاتاۋ اشاسىنان كەلمەي تايراڭداپ جۇرەدى» دەپ قارايتىنىن دا ابدەن بىلەمىن.

 

دەسە دە، «مىسىقتىڭ كىمنىڭ ەتىن جەگەنى وزىنە ءمالىم» دەگەندەي، مەندە دە كوڭىل كۇي بۇزىلىپ، سۇلكىنىم تۇسەتىن كەزدەر بار. مۇنداي جاعدايدا، ىشتەي كىجىنىپ، انادان بۇتاق، مىنادان تىكەن ىزدەپ وتىرماي، جان تىنىشتىعىن باستى ورىنعا قويىپ، قولىما كىتاپ الامىن، مۋزيكا تىڭدايمىن نەمەسە اق تەر، قارا تەر بولىپ، دەنە شىنىقتىرۋعا وتەمىن. سوندا ءبارى ەستەن كوتەرىلىپ كەتە بارادى ەكەن.

جاندى ەلتەتىن مۋزيكا تىڭداپ، باۋراپ الاتىن كينو كورىپ دەگەندەي، كوڭىلىڭنىڭ استاڭ-كەستەڭىن شىعاراتىن اساۋ ويلاردى الىسقا ايداپ، جانىڭدى جەگى قۇرتتاي جەيتىن كوڭىلسىزدىكتەردىڭ كوزىن جويىپ، نالا-مۇڭعا جۇرەگىڭنىڭ جاعاسىن ۇرعىلايتىن وراي بەرمەي، باسپالاپ كەلگەن تۇماندى ويلاردىڭ توز-توزىن شىعارىپ جىبەرۋگە تالپىنىس جاساپ، شارا تابا الساڭ، جەگەنىڭ ءدامدى، ۇيقىڭ ءتاتتى بولادى ەكەن. 

 

كوڭىلدى تۇرمىستىڭ كىلتى قاي-قاشان دا ءوز قولىڭدا. جان جۇيەڭە قارا تۇمان قاپتاپ، قارا قۇلىپ سالىنسا، وزىڭدەگى سىرلى كىلتپەن «سىرت» ەتكىزىپ اش تا، ءىشىن كۇمبىرلى كۇي، ءتاتتى اۋەن، جاعىمدى مۋزيكا، كوڭىلدى اڭگىمەلەرمەن تولتىرا قوي. شۋلاپ-شۇرقىراپ شاتتىق كەلگەندە، كوگەرىپ وتىرعان كوڭىلسىزدىكتىڭ قاراسىن باتىرماعانىن كورەيىن، بالەم!

 

باسىمىزدىڭ دىمى كەپپەگەن سول ءبىر كەزدەردە، اكە-شەشەمىزگە تىك كەلىپ، ولاردىڭ ۇرىسقانىن اۋىر الىپ، دوسىمىزبەن سوزگە كەلىسىپ قالساق، تومسىرايىپ، اشۋ-ىزانى استار ەتكەن كۇيمەن كۇندەرىمىزدى كوڭىلسىز، تۇندەرىمىزدى سۇرەڭسىز وتكىزگەن شاقتارىمىز بولعان شىعار. ەندى مىنە ەسەيدىك، ەس جيدىق، كوپ نارسەنى كوڭىلگە تۇيدىك، كوڭىل كۇيىمىزدى ءونىمدى تەڭشەپ، جان جارامىزدى ءوزىمىز ەمدەپ جازاتىن جاسقا دا جەتتىك.

ىسجۇزىندە،

كوڭىل اسپانى شايداي اشىق جۇرەتىن ەشكىم جوق. ءاربىر جەكە بۇرالاڭ تىرلىكتەگى بەلگىلى مەرزىمدە، جولىققان ءتۇرلى شارۋالار مەن جاعدايلارعا ساي، جانى جابىرقاپ، تورىعۋ، مەزى بولۋ سياقتى كۇيلەردى باستان كەشىرەدى. ءدال سول ساتتە كىمدە-كىم بولسا دا، نازالانىپ، كوڭىل ايدىنىنا اساۋ تولقىن پايدا بولۋى تابيعي. سول ءبىر بۇرالاڭ جولدى باسىپ ءوتىپ، سول كوڭىلسىز شاقتارعا قوشتاسقان سوڭ، ارتىڭا قايىرىلا قاراساڭ، وسىنىڭ ءبارى تۇرمىستىڭ سان-ساناقسىز سىناعى، جەلەمىك تۇرسا بولدى جەلىپ-جورتىپ كەتە باراتىن ءبىر ۋىس بۇلت ەكەنىن سەزەسىڭ.

 

شاتتىعى مەن مۇڭى، جاتتىعى مەن شۇڭقىرى،جەڭىسى مەن ساتسىزدىگى، پايداسى مەن زيانى ەگىز بولعان ءومىر ناعىز تىرلىك ەمەس پە!؟ الىس ساپارعا شىققاندا، ماڭىندا قىلتانى، كوركەم كورىنىسى جوق ءبىر سىدىرعى ءتۇزۋ جولدىڭ ەسىڭدە قالمايتىنى سياقتى، بىردە كۇلىپ، بىردە تۇرىپ، بىردە قۇلاپ، بىردە جىلاپ كەلە جاتۋدىڭ ءوزى سول تىرلىككە كورىنىس سيلاپ، ەستەمە قالتىرىپ، ءمان-ماعىنا ارنايدى. 

سوڭعى ايالداماعا جەتۋ مەرزىمى بەلگىسىز تىرلىك ساپارىنداعى ميحنات پەن بۇرالاڭدار سەن، ءسوزسىز، باسىپ وتۋگە ءتيىستى جولىڭ، ول سەنىڭ جىگەرىڭدى جانىپ، ءومىر تاجىريبەڭدى مولايتادى.

 

«ات سۇرىنبەي جەر تانىماس، ەر سۇرىنبەي ەل تانىماس» دەگەن، تىرلىك تەڭىزىنىڭ كوگىلدىر ايدىنىندا كولبەڭدەپ بارا جاتقانىڭدا، اساۋ تولقىن، بوران-شاشىن، قۇز-قيالارعا جولىقپاساڭ، جەلكەندى قالاي جايۋدى قايدان ۇيرەنەر ەدىڭ. وتكىنشى ءومىر ساپارىنىڭ كاپيتانى ارينە ءوزىڭسىڭ.

 

قۇلاشىڭدى قانشا جايساڭ دا، قولىڭ جەتپەيتىن، «وزىمە تاۋەلدى بولسا» دەپ جۇرگەنىڭدە ايىرىلىپ قالعان دۇنيەلەرىڭە بولا باس قاتىرىپ، ويىڭدى بولمە، قازىرگى قولدا باردىڭ قادىرىنە جەتە بىلسەڭ، وزىڭە دە، وزگەگە دە كوڭىلدىلىك سيلاي الاسىڭ.

 

ءار كۇندى ىستىق ىقىلاسپەن وتكىزىپ، ءار قادامدى نىق باسىپ، ەرتەڭگى كۇننىڭ شۇلەن شۇعىلاسىنا شومىلۋعا قام جاساۋ ەستى ادامنىڭ حارەكەتى.

 

ەرتەڭگى كۇنىم كوڭىلدى بولسىن دەسەڭ، اۋىزىڭا اشتى بۇرىش تۇسسە، دەرەۋ كامپيت سور؛ اشتى بۇرىش ءتىلىڭدى قۋىرماسىن، كوڭىلسىزدىك جانىڭدى سۋىرماسىن؛ جانىڭا سالماق تۇسسە، قولىڭا كىتاپ ال، مۋزيكا تىڭدا، سەيىلدە؛ شاتتىق پەن باقىت ورالادى پەيىلگە؛ شارشاعان بولساڭ، جاستىققا جانتاي.

 

مىنانى ەسىڭە بەرىك ساقتا: شالقىپ وتىرعان شاعىڭدا ۋادە ۇستاتىپ، قايعىرعان كەزڭدە جاۋاپ بەرىپ، اشۋلانعان مەزەتتە كەسىم جاساما.

 

بىلەمىن، سەنىڭ قينالىپ جۇرگەنىڭ راس، الايدا جان جاراڭدى ءوزىڭ ەمدەپ جاز، جان جاراڭنىڭ شيپاگەرى ءوزىڭسىڭ سەن، جارىعىم!

 

    中央广播电视总台 央广网 版权所有

    جان جاراڭنىڭ شيپاگەرى ءوزىڭسىڭ سەن، جارىعىم

    بىلەمىن، سەنىڭ قينالىپ جۇرگەنىڭ راس، الايدا جان جاراڭدى ءوزىڭ ەمدەپ جاز، جان جاراڭنىڭ شيپاگەرى ءوزىڭسىڭ سەن، جارىعىم!