ينفورماتسيا اشكەرەلەۋ: mzjubao@cnr.cn

ٴتۇيىندى تۇعىر

باسشى كادرلار ەسىنە، شىرىكتەسۋدىڭ جاڭا تۇرىنەن ابايلاڭىزدار

来源:央广网     |责编:达吾力别克|     发布日期: 2020-09-16 09:57

باسشى كادرلار ابايلاڭىزدار، بۇل ارەكەت شىرىكتەسۋدىڭ جاڭا ءتۇرى بولىپ تابىلادى

بانكەدەن 3 ميلليون يۋان اقشانى قارىزعا العان سوڭ، باسقا بىرەۋگە وتكەرمەلەپ قارىزعا بەرە سالسا بولعانى، 1 ميلليون يۋاننىڭ ۇستىندە پايدا تابادى. «جارىم ايلىق سۇقپات» جۋرنالىنىڭ ءتىلشىسى جۋىقتا تىلشىلىك ىستەۋ بارىسىندا، قارىز اقشانى جوعارى وسىممەن وتكەرمەلەۋ قىلمىسى دەيتىن وسى ءبىر فينانس سالاسىنداعى قىلمىستىق ىستەرگە ساياتىن قىلمىس اتى جۋىق جىلداردان بەرى قولعا تۇسكەن كادرلاردىڭ شىرىكتەسۋ دەلوسىندا ءجيى اۋىزعا الىنىپ كەلە جاتقاندىعىن بايقادى. كەيبىر ۇكىمەت قىزمەتكەرى بانكەدەن امانات-قارىز الۋ تولىمدىلىعى بار بولۋداي كاسىپ قولايلىعىنان نەمەسە باسشىلىق ورنى ارقىلى قالىپتاسقان قولايلىلىقتان پايدالانىپ، بانكەدەن قارىز اقشا الىپ، نەشە ەسە وسىممەن باسقالارعا قارىز بەرىپ، ارادان ىرعىن پايدا تاۋىپ وتىرعان. مۇنداي ارەكەت توتەنشە جاسىرىن ىستەلەتىندىكتەن، اشكەرەلەنگەن دەلولار جالپى دەلونىڭ ءبىر پۇشپاعىنا دا تۇرمايدى، الىپ مۇز تاۋدىڭ كىشكەنتاي ءبىر بۇرىشى دەرلىك. قازىر تەرەڭ تەڭىز استىنا بوي تاسالاعان وسى ءبىر «مۇز تاۋعا» نازار اۋدارۋ ـ كەزەك كۇتتىرمەيتىن كەلەلى ءىس بولىپ وتىر.

 

5 ليلىق وسىممەن قارىزعا الىپ، 2 تيىن 5 ليلىق وسىممەن قارىزعا بەرەدى

«500 مىڭ يۋان قارجى قوسسا، مۇنان كەلەتىن ءوسىم 300 مىڭ يۋان بولادى. وزىمەن ىلىگى بار مەكەمە-ورىنداردا جەكەلىك قازىنا باسقارۋمەن شۇعىلدانادى، ءىس جۇزىندە قىزمەت قولايلىعىنان پايدالانىپ قارىز اقشانى جوعارى وسىممەن وتكەرمەلەيدى». 2018-جىلى 4-ايدا، نيڭشيا دانباۋ توبىنىڭ بۇرىنعى باس القاسى تۋ گوجۇن قولعا ءتۇسىپ تەكسەرىلگەن بولاتىن. ءتارتىپ تەكسەرۋ كوميتەتى تەكسەرگەن كەزدە، ول ءوزىنىڭ قارىز اقشانى جوعارى وسىممەن وتكەرمەلەگەن قىلمىستى ارەكەتىن ىرىقتىلىقپەن مويىندادى. بۇرىن ۇزاق ۋاقىتتار بويىنا بانكەدە باسشىلىق مىندەت وتەگەن تۋ گوجۇننىڭ بارماق باستى، كوز قىستىمەن قاتىستى مەكەمە-ورىن تاۋىپ، «قازىنا باسقارۋمەن شۇعىلدانۋىنا» اسا تاماشا وراي بارداي كورىنەتىن. الايدا، «جارىم ايلىق سۇقپات جۋرنالىنىڭ» ءتىلشىسى تىلشىلىك بارىسىندا، وسى تاسىلمەن داۋلەت جيناپ جۇرگەندەر تەك «وزەن جاعالاعاننىڭ وزەگى تالماس» دەگەندەي، قارجىمەن قاتىسى بار فينانس سالاسىنىڭ كادرلارى عانا ەمەس ەكەندىگىن بايقادى. 

 

ەجەلدەن قوعام حاۋىپسىزدىگى سالاسىندا قىزمەت اتقارىپ كەلە جاتقان نيڭشيا حۇيزۋ اۆتونوميالى رايوندىق قوعام حاۋىپسىزدىگى مەڭگەرمەسىنىڭ ورىنباسار باستىعى جيا فىنچياڭ دا قارىز اقشانى جوعارى وسىممەن وتكەرمەلەۋدى بايۋدىڭ تاپتىرماس تاسىلىنە ايلاندىرىپ العان ادام. سوت مەكەمەسى مىنانى تۇراقتاندىردى: جيا فىڭچياڭ پايدا تابۋدى كوزدە ۇستاپ، دوسى ارقىلى ءۇي اشەكەيلەۋ توقتامىن جالعاننان جاساۋ تاسىلىمەن بانكەدەن 3 ميلليون يۋان قارىز اقشا العان. قارىز اقشانىڭ ايلىق ءوسىمى 5 لي ەكەن. قارىز اقشا قولىنا تيگەن سوڭ، جيا فىنچياڭ الگى 3 ميلليون يۋاندى ايىنا 2 فىن 5 ليلىق وسىممەن ءبىر شاعىن سومالى امانات-قارىز سەرىكتەستىگىنە وتكەرمەلەپ قارىزعا بەرەدى. نەشە رەتكى جالعاستىرىپ قارىز الۋ-قارىز بەرۋدەن سوڭ، جيا فىنچياڭنىڭ تاپقان پايداسى 1 ميلليون يۋاننان اسقان.

 

قولعا الىنعان ءبىر كادر ءتارتىپ تەكسەرۋ كوميتەتى تەكسەرگەن كەزدەگى مويىنداماسىندا، ماڭىنداعى باسقا باسشى كادرلاردىڭ ىقپالىنا ۇشىراۋدان بارىپ «امانات-قارىز ساۋداسىمەن» اينالىسقاندىعىن ايتقان بولاتىن. «باسشى كادرلاردىڭ ءبىر-بىرىنە ىقپال ەتۋى» ـ ۇكىمەت قىزمەتكەرلەرىنىڭ اراسىندا قارىز اقشانى جوعارى وسىممەن وتكەرمەلەۋ ءىسى جالعىز-جارىم ادامنىڭ عانا ءىسى ەمەس ەكەندىگىن كورسەتەدى. «جارىم ايلىق سۇقپات» جۋرنالىنىڭ ءتىلشىسى جۇڭگو كەسىمناما تورابى جاريالاعان ۇكىم قاعازدارىنا تالداۋ جاساي كەلە، جۋىق جىلداردان بەرى گۋاڭشي، نيڭشيا، جىجياڭ، يۇننان قاتارلى ءبىر سىپىرا جەردە دەرلىك باسشى كادرلار قارىز اقشانى جوعارى وسىممەن وتكەرمەلەۋ ىسىنەن سوتتالعان دەلولار جارىققا شىققاندىعىن راستادى.

 

ەلىمىزدىڭ قىلمىستىق ىستەر زاڭىنىڭ 175-تارماعىندا بىلاي دەپ بەلگىلەنگەن: «قارىز اقشانى وتكەرمەلەۋ ارقىلى پايدا تابۋدى ماقسات ەتىپ، فينانس قۇرىلىمدارىنىڭ امانات-قارىز قارجىسىن الداپ الىپ، باسقالارعا جوعارى وسىممەن وتكەرمەلەگەن، زاڭعا قايشى تابىس سوماسى ءبىر شاما كوپ بولعاندارعا 3 جىلدان تومەن مەرزىمدى قاماق جازاسى نەمەسە قولدا ۇستاپ تۇرۋ جازاسى بەرىلەدى ءارى زاڭسىز تاپقان پايداسىنىڭ 1 ەسەسىنەن جوعارى، 5 ەسەسىنەن تومەن ايىپ سالىنادى؛ تابىس سوماسى وتە كوپ بولعاندارعا 3 جىلدان جوعارى، 7 جىلدان تومەن مەرزىمدى قاماق جازاسى بەرىلەدى ءارى زاڭسىز تاپقان پايداسىنىڭ 1 ەسەسىنەن جوعارى، 5 ەسەسىنەن تومەن ايىپ سالىنادى». كوردىڭىز بە، قارىز اقشانى جوعارى وسىممەن وتكەرمەلەۋدىڭ ءوزى قىلمىستىق ارەكەت، كىسىنى ءتىپتى دە تۇرشىكتىرەتىنى ـ كەيبىر باسشى كادرلار وسى ارقىلى ءبىر-بىرىنە پايدا جەتكىزەدى ەكەن.

 

 

تىلەكتەرى توعىسىپ، امپەي-جامپەي بولۋ

 

قارىز اقشانى جوعارى وسىممەن وتكەرمەلەۋ دەگەنىمىز بانكەنىڭ اقشاسى ارقىلى اقشا ءوندىرىپ الۋ، ءوز جانىنان تيىن شىعارماي، بانكەنىڭ اقشاسىمەن ىرعىنعا كەنەلۋ عوي. الايدا، قاراپايىم حالىق بۇقاراسى ءۇشىن الىپ ايتقاندا، بۇل مۇلدە قول جەتپەيتىن قيىن جۇمىس. قاراپايىم بۇقارانىڭ بانكەدەن قارىز اقشا الۋى اسا قيىن، ولارعا تيەتىن قارىز سومانىڭ سانى دا شەكتى عانا، ونىڭ ۇستىنە كەپىل قويۋ، باسقالار كەپىل بولۋ سياقتى كۇردەلى ءتارتىبى بار. قارىز اقشانى الا العان كۇندە دە ءوسىمى جوعارى. ەندى ءبىر جاقتان الىپ ايتقاندا، قاراپايىم بۇقارانىڭ قولىندا قارجىسى بار بولسا دا، باسقالارعا نەمەسە شاعىن سومالى امانات-قارىز سەرىكتەستىكتەرىنە قارىزعا بەرۋدەن جۇرەكسىنەدى. جوعارى ءوسىمدى قارىزدى زاڭ قورعامايتىندىقتان، اقشانىڭ ءوسىمى تۇگىل وزىنە زار بولامىن با دەپ قورقادى. ونداي بولسا، ۇكىمەت قىزمەتكەرلەرى قالايشا قارىز اقشانى دا وپ-وڭاي الا الادى، باسقالارعا وتكەرمەلەپ قارىز بەرۋدەن دە نەلىكتەن قورىقپايدى؟

 

«جارىم ايلىق سۇقپات» جۋرنالىنىڭ ءتىلشىسى تىلشىلىك بارىسىندا، ۇكىمەت قىزمەتكەرلەرىنىڭ قارىز الۋ سەنىمدىلىك تولىمدىلىعىنا يە بولۋ سەبەپتەرى دەرلىك ۇقساس بولا بەرمەيتىندىگىن ۇعىستى. ادەتتەگى ۇكىمەت قىزمەتكەرلەرى جونىنەن ايتقاندا، بانكەدەن تومەن وسىممەن قوماقتى قارىز اقشا الۋ ءۇشىن، ءوزىنىڭ تۇراقتى كىرىسىن جانە تاماشا سەنىمدىلىگىن كولدەنەڭ تارتادى نەمەسە ءۇي-مۇلىك سياقتى نارسەلەرىن كەپىلگە قويۋعا سۇيەنەدى. نيڭشيانىڭ يىنچۋان قالاسى شيشيا رايونىنىڭ بۇرىنعى باستىعى لي ۋيگو قارىز اقشانى جوعارى وسىممەن وتكەرمەلەگەندە، وزىنە تيەسەلى بولعان ءبىر قانشا تاۋار ءۇي مەن دۇكەندى كەپىلگە قويۋ ارقىلى بانكەدەن قارىز العان.

 

«جارىم ايلىق سۇقپات» جۋرنالىنىڭ ءتىلشىسى ءبىر بانكەدەن ۇعىسۋىنشا، تەك مەملەكەت قىزمەتكەرى بولسا بولعانى، قولفون App ى ارقىلى-اق ءوسىمى ۇقساس مەزگىلدەگى امانات-قارىز ونىمدەرىنىڭ بارلىعىنان تومەن بولعان كەپىلسىز قارىز اقشاعا قول جەتكىزۋگە بولادى ەكەن. تاعى ءبىر بانكەدە امانات-قارىز قىزمەتكەرى مىنالاردى ايتتى: مەملەكەت قىزمەتكەرلەرى قارىز اقشا السا، ايلىق ءوسىمىن 8 ليگە دەيىن تومەندەتۋگە بولادى، ال، ۇقساس مەزگىلدەگى مەملەكەت قىزمەتكەرى ەمەس كىسىلەرگە بەرىلەتىن قارىز اقشانىڭ ايلىق ءوسىمى 1 فىن 2 لي اينالاسىندا.

 

باسشىلىق ورىندا وتىرعان مەملەكەت قىزمەتكەرلەرى جونىنەن ايتقاندا، بانكەنىڭ قارىز اقشاسىنا وپ-وڭاي قول جەتكىزە الۋىنداعى ەڭ ۇلكەن فاكتور ـ باسشىلىق ورىنداعى ۇقىعىنىڭ ىقپالىنان پايدالانۋ. جيا فىنچياڭ دەلوسىن الىپ قارار بولساق، «جارىم ايلىق سۇقپات جۋرنالى ءتىلشىسىنىڭ ۇعىسۋىنشا، سول جەردەگى ءبىر بانكەنىڭ باستىعى باستىقتارعا جاعاتسۋ ءۇشىن، ءوزى ىرىقتىلىقپەن جيا فىنچياڭعا قارىز اقشا بەرىپ تۇرعىسى كەلەتىندىگىن، جيا فىنچياڭ ونى وتكەرمەلەپ باسقالارعا قارىز بەرۋىنە بولاتىندىعىن ورتاعا قويعان».

 

ەلىمىزدىڭ فينانسقا قاتىستى زاڭ-ەرەجەلەرىنە نەگىزدەلگەندە، قارىز اقشا تاراتۋعا جۇمسالاتىن امانات-قارىز قارجىسىنان قارىز الۋدى ءوتىنىش ەتۋشى ادام قارىز اقشانىڭ ىستەتىلۋ ورنى زاڭدى ما، ەمەسپە، قايتارۋ قابىلەتى بار ما، جوق پا قاتارلى ماسەلەلەردى اشىق بايانداۋى كەرەك. سوندىقتان، باسشى كادرلاردىڭ  قارىز اقشانى جوعارى وسىممەن وتكەرمەلەۋ دەلولارىندا، قارىزعا العان اقشانىڭ قايدا جۇمسالاتىندىعىن جالعاننان ويدىرۋ دا ايلانىپ وتۋگە كەلمەيتىن ءتارتىپ. باسشى كادرلاردىڭ ساۋدا ىستەرىمەن شۇعىلدانۋىنا، كاسىپورىن قۇرۋىنا بولمايتىندىقتان، جالعاننان ءۇي اشەكەيلەۋ توقتامىن جاساۋ نەمەسە ءۇي ساتىپ الۋ توقتامىن جاساۋ دەگەندەر كوپتەگەن باسشى كادر بانكەدەن قارىز اقشا الار كەزدە ويلاپ تاپقان «قارىز اقشانىڭ جۇمسالاتىن ورنى» ەكەن.

 

جىجياڭ ولكەسى تايجوۋ قالاسى جياۋجياڭ رايوندىق حالىق سوتى مەكەمەسىنىڭ بۇرىنعى ورىنباسار باستىعى ۋاڭ پىڭشياڭنىڭ قارىز اقشانى زاڭسىز وتكەرمەلەۋ دەلوسىندا، ۋاڭ پىڭشياڭ ايەلىنىڭ اتىنداعى ءۇيدى اشەكەيلەتەمىز دەگەن جەلەۋمەن جالعان ءۇي اشەكەيلەۋ توقتامىن جاساپ، بانكەدەن 2 ميلليون يۋان قارىز اقشا ءوتىنىش ەتىپ الىپ، باسقالارعا جوعارى وسىممەن وتكەرمەلەگەن. 

 

«جارىم ايلىق سۇقپات» جۋرنالىنىڭ ءتىلشىسى تالداۋ جاساي كەلە، باسشى كادرلاردىڭ قارىز اقشانى جوعارى وسىممەن وتكەرمەلەۋ دەلولارىندا، قارىزدى باسقاعا وتكەرمەلەگەننەن كەيىنگى جىلدىق ءوسىمى نەگىزىنەن %30 - %40 كە جەتەتىندىگىن بايقادى. ءوسىمى وسىنشاما جوعارى قارىز اقشانى الۋعا قوجايىندار نەلىكتەن سونشا پەيىلدى بولادى؟ نيڭشيا قوعامدىق عىلىمدار اكادەمياسى قوعامدىق عىلىمداردى، زاڭ عىلىمدارىن زەرتتەۋ ورنىنىڭ زەرتتەرمەنى لي باۋپيڭنىڭ ايتۋىنشا، كاسىپورىن قوجايىندارىنىڭ باسشى كادرلاردان جوعارى ءوسىمدى قارىز اقشا الۋىنداعى سەبەپ ـ شىنىندا قارجى اينالىمى سۇرانىسى بار بولۋدان سىرت، ەڭ ماڭىزدىسى، ولار سول ورايدا باسشىلارمەن قارىم-قاتىناس ورناتادى، مۇنى ءتۇرى وزگەرگەن پايدا جاتكىزۋ دەۋگە ابدەن بولادى.

 

بۇل قازىنا باسقارۋعا جاتپايدى! ۇكىمەت قىزمەتكەرلەرىنىڭ قارىز اقشانى وتكەرمەلەۋ ءىسىن قاتاڭ باسقارۋ كەرەك

جۇڭگو ءتارتىپ تەكسەرۋ، باقىلاۋ-تەكسەرۋ ينستيتۋتىنىڭ بۇرىنعى ورىنباسار باستىعى، شىرىكتەسۋگە ءتۇزىم ارقىلى قارسى تۇرۋ مامانى لي يۇڭجۇڭنىڭ قاراۋىنشا، قارىز اقشانى جوعارى وسىممەن وتكەرمەلەۋ ـ شىرىكتەسۋدىڭ ءبىر ءتۇرى بولىپ سانالادى. قالىپتى فينانس تارتىبىندە بازار شەشۋشى رول اتقارادى، الايدا، قولىندا ۇقىعى بارلار كىرىسكەن سوڭ-اق ، قارىز اقشا بايلىعى ءبولىنىسنىڭ ادىلەتسىزدىگىن كەلتىرىپ شىعارادى دا، ءاسىلى قارىز اقشا الۋ ساياساتىنا لايىق كەلەتىن كاسىپورىندار قارىز اقشا الا الماي، شارۋاشىلىق ساياساتىنا لايىق كەلمەيتىن نەمەسە تيجارات حاۋىپ-قاتەرى جوعارى كاسىپورىندار قارىز اقشاعا وپ-وڭاي قول جەتكىزەدى، بۇل ـ فينانس ءتارتىبىن اۋىر دارەجەدە بۇلدىرەتىن جايت.

 

ماماندار مىنانى ۇسىنىس ەتتى: ۇكىمەت قىزمەتكەرلەرىنىڭ قارىز اقشانى جوعارى وسىممەن وتكەرمەلەۋگە قاتىناسۋىن جونگە سالۋدا، فينانسقا بولعان باقىلاپ-باسقارۋدى كەمەلدەندىرۋ، زاڭمەن باسقارۋ تاربيەسىن جۇرگىزۋ، فينانس رەفورماسىن تەرەڭدەتۋ قاتارلى جاقتاردان كىرىسۋ كەرەك. 

 

كەيبىر قارىز اقشانى جوعارى وسىممەن وتكەرمەلەۋ دەلولارىندا، باسشى كادرلار ءوز اتىنداعى ءۇيدى اشەكەيلەتەمىن دەگەن جەلەۋمەن نەشە رەت بانكەدەن قوماقتى قارىز اقشا العان، قيت ەتسە بولعانى نەشە ميلليونداپ الىپ جاتقان «ءۇي اشەكەيلەۋگە جۇمسالاتىن قارىز اقشا» قالىپتى ءۇي اشەكەيلەۋ قاجەتتىلىگىنەن الدە قايدا اسىپ كەتكەندىگى مەن مۇندالاپ كورىنىپ تۇرسا دا، تايعا باسقان تاڭباداي بادىرايىپ تۇرعان وسى ورەسكەلدىكتى بايقاماعاندىعىنان، فينانس قۇرىلىمدارى ۇكىمەت قىزمەتكەرلەرىنە ساياتىن قارىز اقشانىڭ ىستەتىلۋ ورنىنا بولعان باسقارۋدا ۇلكەن اعاتتىق كەتىرىپ وتىرعاندىعىن كورە الامىز. لي باۋپيڭ بىلاي دەيدى: فينانس باقىلاپ-باسقارۋ تاراۋلارى ءار قايسى فينانس قۇرىلىمدارىنىڭ ۇكىمەت قىزمەتكەرلەرىنە قارىز اقشا بەرۋ ىسىنە بولعان باقىلاپ-باسقارۋدى كۇشەيتىپ، فينانس قۇرىلىمدارىن جاۋاپكەرشىلىگىن تىڭىعىلىقتى اتقارۋعا قۋزاپ، ۇكىمەت قىزمەتكەرلەرىنىڭ قارىز اقشانى نەگە جۇمسايتىندىعىن قاتاڭ تەكسەرىپ، قارىز اقشانى جوعارى وسىممەن وتكەرمەلەۋ ءىسىنىڭ قارجى قاينارىن سوناۋ باسىنان باستاپ تيۋ كەرەك. 

 

كەيبىر ۇكىمەت قىزمەتكەرى سوت تەرگەۋى بولعانعا دەيىن ءوزىنىڭ بانكەدەن قارىز اقشا الىپ، باسقالارعا وتكەرمەلەگەنىن ءبىر ءتۇرلى قازىنا باسقارۋ دەپ اتاۋدان، بەكەر تۇرعان قارجىدان ۇيلەسىمدى پايدالانۋ، بۇل قىلمىسقا جاتپايدى دەۋدەن تانبادى. بۇرىن كوپتەگەن قارىز اقشانى جوعارى وسىممەن وتكەرمەلەۋ دەلوسىنا جوقشى بولعان ادۆوكاتتىڭ ايتۋىنشا، قارىز اقشانى جوعارى وسىممەن وتكەرمەلەپ، پايداعا بەلشەسىنەن باتۋداي زاڭسىز ارەكەت توتەنشە جاسىرىن بولادى ەكەن دە، قازىرگە دەيىن اشكەرەلەنگەندەرى الىپ مۇز تاۋدىڭ تەك ءبىر بۇرىشىنداي عانا دەرلىك ەكەن. مۇنداي فينانس ءتارتىبىن اۋىر دارەجەدە بۇلدىرەتىن قىلمىستىق ءىستى كوپتەگەن ادام قازىنا باسقارۋ دەپ مايموڭكەلەيتىن بولعان. سوندىقتان، قازىرگە دەيىن تەكسەرىپ انىقتالعان تيپتىك دەلولار ارقىلى قالىڭ ۇكىمەت قىزمەتكەرىنە زاڭمەن باسقارۋ تاربيەسىن جۇرگىزىپ، ولاردى زاڭدى بىلەتىن، زاڭدى تۇسىنەتىن، زاڭنان قورقاتىن ەتۋ كەرەك. 

 

لي يۇڭجۇڭنىڭ قاراۋىنشا، اقشا قاجەت ەتىپ وتىرعان كىسلەر قارىز اقشاعا قولى جەتپەي، ال، اقشاعا زارۋشىلىگى جوق كىسىلەر قارىز اقشانى وپ-وڭاي عانا الاتىن بولعان. مىنە مۇنان ەلىمىز فينانس رەفورماسىن جالعاستى تەرەڭدەتىپ، ورتاشا، شاعىن كاسىپورىنداردىڭ قارجى قۇراۋى قيىن بولۋ، قارجى قۇراۋى قىمباتقا ءتۇسۋ سىندى قازىرگى كۇيىن شىن مانىندە وزگەرتۋى كەرەك ەكەندىگىن كورەمىز. مىنە بۇل قارىز اقشانى جوعارى وسىممەن وتكەرمەلەۋ ماسەلەسىن ءۇزىلدى-كەسىلدى شەشەتىن ەڭ ءونىمدى شارا بولماق!

 

اۋدارعان: نۇرگۇل قۇمارقان قىزى

 

    中央广播电视总台 央广网 版权所有

    باسشى كادرلار ەسىنە، شىرىكتەسۋدىڭ جاڭا تۇرىنەن ابايلاڭىزدار

    باسشى كادرلار ابايلاڭىزدار، بۇل ارەكەت شىرىكتەسۋدىڭ جاڭا ءتۇرى بولىپ تابىلادى