كوپتەگەن ناۋقاستىڭ نۋكلەين قىشقىلىن كوپ رەت تەكسەرگەننەن كەيىن بارىپ بولىمدى بولىپ شىقتى، ۆيرۋس اككى بولعانى ما؟

شىجياجۋاڭ قالاسىندا ءبىر ناۋقاستىڭ نۋكلەين قىشقىلىن 6-رەت تەكسەرگەندە عانا بولىمدى بولعان، لياۋنيڭ ولكەسىندە ءبىر ناۋقاستىڭ نۋكلەين قىشقىلىن 11-رەت تەكسەرگەندە عانا بولىمدى بولىپ شىققان.....

 

1-ايدىڭ 15-كۇنى، 31 ولكە مالىمدەگەن جەرگىلىكتى ورىندا جاڭا تيپتى ايدارشا ۆيرۋسپەن جۇعىمدالعان وكپە قابىنۋ ىندەتىنە شالدىقتى دەپ دياگنوز قويىلعان 115 ناۋقاس تىڭنان قوسىلدى، مۇنىڭ ىشىندە حىبەي ولكەسىنەن 90 ناۋقاس مالىمدەلىپ، تىڭنان قوسىلعان جەرگىلىكتى ورىنداعى دياگنوز قويىلعان ناۋقاس ءۇرتىس 4 كۇن بويى جۇزدەن استى.

 

قازىرگە دەيىن حىبەي ولكەسىندە جاڭا تيپتى ايدارشا ۆيرۋسپەن جۇعىمدالدى دەپ دياگنوز قويىلعان ناۋقاس مولشەرى جوعارى دەڭگەيگە كوتەرىلۋدە، بۇل ولكەنىڭ ءىشىنارا وڭىرلەرىندە كوپ رەت جاپپاي نۋكلەين قىشقىلىن تەكسەرۋ قىزمەتى ورىستەتىلدى.

 

جۋىقتا، حىبەي ۇكىمەت جاعى جاريالاعان جاڭا تيپتى ايدارشا ۆيرۋسپەن جۇعىمدالدى دەپ دياگنوز قويىلعان ناۋقاستاردىڭ انىق ينفورماتسيالارىن رەتتەپ، ءتىلشى مۇنىڭ ىشىندە كوپ رەت نۋكلەين قىشقىلىن تەكسەرگەننەن كەيىن عانا بولىمدى بولاتىندىعىنا نازار اۋداردى.

 

كوپتەگەن توراپتاس بىلاي دەپ كۇدىكتەندى: نۋكلەين قىشقىلىنان كادىك شىقتى ما، الدە ۆيرۋس اككى مە؟

ەمدەۋ قىزمەتكەرلەرى «نۋكلەين قىشقىلىنان ۇلگى الاتىن جىلجىمالى كولىكتە» قالا تۇرعىندارىنىڭ جۇتقىنشاعىنان ءسۇرتىندى ۇلگى الۋدا.

 

كوپتەگەن ناۋقاس نۋكلەين قىشقىلىن تەكسەرتكەن كەزىندە بولىمسىز بولىپ شىققان 

 

جاڭا تيپتى ايدارشا ۆيرۋسپەن جۇعىمدالعان وكپە قابىنۋ ىندەتى جارىققا شىققاننان بەرى، «نۋكلەين قىشقىلىن تەكسەرۋ» جۇرتتىڭ ءبارى بىلەتىن ۇعىمعا اينالدى.

 

نۋكلەين قىشقىلىن تەكسەرۋ نەگىزىنەن مۇرىن قۋىسى ءسۇرتىندىسى، جۇتقىنشاق ءسۇرتىندىسى، قاقىرىق سياقتى ۇلگىلەردىڭ ىشىندە جاڭا تيپتى ايدارشا ۆيرۋس نۋكلەين قىشقىلى بار-جوقتىعىن تەكسەرەدى، تەكسەرۋ ناتيجەسىنىڭ بولىمدى بولۋى جاڭا تيپتى ايدارشا ۆيرۋسپەن جۇعىمدالۋعا ۋاكىلدىك ەتەدى. كاسىپتىك تۇرعىدان الىپ ايتقاندا، نۋكلەين قىشقىلى ارقىلى جاڭا تيپتى ايدارشا ۆيرۋسپەن جۇعىمدالعانداردى تەكسەرۋ «ەرتە بايقاۋ» مەن «ەرتە دياگنوز قويۋدى» جۇزەگە اسىرۋدىڭ ەڭ ماڭىزدى ءتاسىلى جانە شاراسى دەپ قارالۋدا.

 

دەسە دە، جۋىقتان بەرى، كوپ ساندى جەردىڭ ىندەت جاعدايىنا قاتىستى حابارلارىندا، «دياگنوز قويىلعان ناۋقاستىڭ كوپ رەت نۋكلەين قىشقىلىن تەكسەرگەندە تۇگەلدەي بولىمسىز بولىپ شىققان» حابارلار كوپ كەزدەستى.

 

مىسالى، ءتىلشى 1-ايدىڭ 14-كۇنى ساعات 0 دەن 24 كە دەيىن، شىجياجۋاڭ قالاسىندا تىڭنان قوسىلعان جاڭا تيپتى ايدارشا ۆيرۋسپەن جۇعىمدالعان وكپە قابىنۋ ىندەتىنە شالدىقتى دەپ دياگنوز قويىلعان 84 ناۋقاستىڭ 56 سىنىڭ نۋكلەين قىشقىلىن تەكسەرگەندە الدىندا بولىمسىز بولعان، ال ارتىنان بولىمدى بولىپ وزگەرگەن. 

 

مۇنىڭ ىشىندە «دياگنوزى تۇراقتانعان 51-ناۋقاستىڭ»1-ايدىڭ 3-، 5-، 7-، 9-، 11-، 12-كۇندەرى 6 رەتكى نۋكلەين قىشقىلىن تەكسەرۋ ناتيجەسى تۇگەلدەي بولىمسىز بولعان؛ 1-ايدىڭ 13-كۇنى نۋكلەين قىشقىلىن تەكسەرگەندە عانا بولىمدى بولعان. 

 

«دياگنوزى تۇراقتانعان 12-ناۋقاستىڭ» 1-ايدىڭ 3-، 4-، 6-، 9-، 11- كۇندەرى 5 رەتكى نۋكلەين قىشقىلىن تەكسەرۋ ناتيجەسى تۇگەلدەي بولىمسىز بولعان؛ الايدا، 1-ايدىڭ 12-كۇنى جۇتقىنشاعىنان ءسۇرتىندى الىنىپ، 1-ايدىڭ 13-كۇنى نۋكلەين قىشقىلىن تەكسەرگەندە بولىمدى بولعان؛ 1-ايدىڭ 14-كۇنى ناۋقاستىڭ دياگنوزى تولىق تۇراقتانعان. 

 

وسىعان ۇقساس، 1-ايدىڭ 14-كۇنى ساعات 0 دەن 24 كە دەيىن، شيڭتاي قالاسىندا تىڭنان قوسىلعان 6 ناۋقاستىڭ ىشىندە دە نۋكلەين قىشقىلىن تەكسەرگەن كەزدە 2 ناۋقاستىڭ نۋكلەين قىشقىلىن تەكسەرۋ ناتيجەسى بولىمسىز بولعان.

 

مۇنىڭ ىشىندە، «دياگنوزى تۇراقتانعان 6-ناۋقاستىڭ» 1-ايدىڭ 4-، 5-، 7-، 10-كۇندەرى 4 رەتكى نۋكلەين قىشقىلىن تەكسەرۋ ناتيجەسى تۇگەلدەي بولىمسىز بولعان. 1-ايدىڭ 14-كۇنگى نۋكلەين قىشقىلىن تەكسەرۋ ناتيجەسى عانا بولىمدى بولعان.

 

1-ايدىڭ 15-كۇنى ساعات 0 دەن 24 كە دەيىن، شىجياجۋاڭ قالاسىندا جاڭا تيپتى ايدارشا ۆيرۋسپەن جۇعىمدالعان وكپە قابىنۋ ىندەتىنە شالدىقتى دەپ دياگنوز قويىلعان 83 ناۋقاس تىڭنان قوسىلدى، مۇنىڭ ىشىندە تەك 14 ناۋقاستىڭ نۋكلەين قىشقىلىن ءبىر رەت تەكسەرگەندە بولىمدى بولعان، قالعاندارى كوپ رەت نۋكلەين قىشقىلىن تەكسەرگەننەن كەيىن بارىپ انىقتالعان؛ سول كۇنى شيڭتاي قالاسىندا جاڭا تيپتى ايدارشا ۆيرۋسپەن جۇعىمدالعان وكپە قابىنۋ ىندەتىنە شالدىقتى دەپ دياگنوز قويىلعان 7 ناۋقاستىڭ تەك بىرەۋى عانا ءبىر رەت نۋكلەين قىشقىلىن تەكسەرگەن كەزدە بولىمدى بولعان.

 حىبەي ولكەسى گۋ-ان اۋدانىنىڭ تۇرعىندارى جاپپاي نۋكلەين قىشقىلىن تەكسەرتۋدە.

 

نەلىكتەن تەكسەرە المايدى؟

 

ءىس جۇزىندە، كوپ رەت نۋكلەين قىشقىلىن تەكسەرۋ ارقىلى عانا بولىمدى بولۋ قۇبىلىسى تەك حىبەي ولكەسىندە عانا تۋىلمادى. مۇنداي جاعداي وسىدان بۇرىن دا كوپ رەت جارىققا شىققان.

 

بىرنەشە كۇننىڭ الدىندا، «شىجياجۋاڭ قالاسىندا بىرەۋدىڭ نۋكلەين قىشقىلىن 6 رەت تەكسەرگەندە عانا بولىمدى بولدى» دەگەن حابار توراپتا قىزعىن تىنتۋگە ءتۇستى.

 

لياۋنيڭ ولكەسىندە 1-ايدىڭ 4-كۇنى، داليان قالاسىنىڭ ىندەتتەن ساقتانۋ جانە ونى تىزگىندەۋ جونىندەگى اقپارات جاريالاۋ ماجىلىسىندە، داليان قالالىق حالىق ىستەرى مەكەمەسىنىڭ باستىعى تاڭ ي دە بىلاي دەگەن ەدى: كەيبىر ناۋقاستىڭ نۋكلەين قىشقىلىن 11-رەت تەكسەرگەندە عانا بولىمدى بولدى، كەيبىر رايوندا 6-رەت تەكسەرگەندە بولىمدى بولعان جاعداي بار كورىنەدى.

 

ەندەشە، نۋكلەين قىشقىلىن تەكسەرۋ ناتيجەسىنە قانداي جاعداي ىقپال جاسايدى؟

 

— قازىر نۋكلەين قىشقىلىن تەكسەرۋدى %100 دۇرىس بولادى دەپ ايتۋدىڭ مۇمكىن ەمەستىگى ءبىرشاما ايقىن بولدى. ۋحاندى قامتىعان كوپ جەردە وسىدان بۇرىن دا وسىنداي جاعداي جارىققا شىققان،- دەدى بەيجيڭ ۋنيۆەرسيتەتى 1-شيپاحاناسىنىڭ اعا شيپاگەرى ۋاڭ گۋاڭفا، جۇڭگو اقپارات تورابى ءتىلشىسىنىڭ سۇحباتىن قابىلداعاندا.

 

تەكسەرۋگە ىقپال جاسايتىن فاكتور مىنا بىرنەشە ءتۇيىندى قامتيدى: ناۋقاس شىعارعان ۋ قويۋلىعىنىڭ قويۋ، سۇيىقتىعى، ۇلگى الۋ ساپاسى، سىناعىش ءدارى قورابىنىڭ ساپاسى، سونداي-اق تاجىريبەحاناداعى جۇمىس ءتارتىبى.

 

ۋاڭ گۋاڭفا بىلاي دەپ قارادى: نازاريالىق جاقتان قاراعاندا، كوپتەگەن فاكتوردىڭ ىشىندە تەكسەرۋ ناتيجەسى نەگىزىنەن ناۋقاس شىعارعان ۋ قويۋلىعىنىڭ ىقپالىنا ۇشىرايدى. ناۋقاس ۋدى كوپ شىعارسا، تەكسەرىپ شىعۋعا بولادى، ۋدى از شىعارسا، تەكسەرۋ مۇمكىن ەمەس.

 

وسى اپتادا، شىجياجۋاڭ قالالىق اۋرۋدى تىزگىندەۋ ورتالىعى ميكرو ورگانيزمدەردى تەكسەرۋ ورنىنىڭ باستىعى گاۋ ۋيلي اقپارات قۇرالدارىنىڭ تىلشىلىگىن قابىلداعاندا دا وسى قۇبىلىستى تىلگە تيەك ەتكەن ەدى.

 

ول مۇنداي قۇبىلىستىڭ تۋىلۋ سەبەبى ءبىرشاما كوپ ەكەنىن، ەڭ باستىسى، تىنىس جولىندا ءبولىنىپ شىققان ۋدىڭ مولشەرىنىڭ كوپ-ازدىعى دەپ ءتۇسىندىردى. جوعارى ىقتيمالدىعى سول ناۋقاستىڭ ءار رەتكى تىنىس جولىندا ءبولىنىپ شىققان ۋ مولشەرى وتە از بولادى، سوندىقتان ونى تەكسەرۋ وڭايعا تۇسپەيدى.

حىبەي ولكەسى شىجياجۋاڭ قالاسىنىڭ چاڭجيۋحۋايۋان شاعىن رايونىندا، ەمدەۋ قىزمەتكەرلەرى ۇلگى الۋعا دايىندالۋدا.

 

 

نۋكلەين قىشقىلىن تەكسەرۋ ءالى دە «التىن ولشەم»

 

ەندەشە، ناۋقاستىڭ ۋدى از شىعارۋ سەبەبى نە؟

 

ۋاڭ گۋاڭفا تىلشىگە بۇل اۋرۋ اياق الىسىمەن قاتىستى ەكەنىن ايتتى. نۋكلەين قىشقىلىن كوپ رەتكى تەكسەرۋ ارقىلى عانا بولىمدى بولادى، ونىڭ زور ىقتيمالدىعى ۇقساماعان ناۋقاستىڭ ۋ شىعارۋ ۋاقىتىنىڭ ۇقساماستىعىنان بولادى.

 

ول: ەندى عانا تىعىز جاناسقان سوڭ نۋكلەين قىشقىلىن تەكسەرگەندە بولىمسىز بولىپ شىعۋى مۇمكىن. قازىر ءبىز يەلەگەن جاعداي جۇعىمدالۋ جاسىرىن مەزگىلىنىڭ ەڭ سوڭعى ءبىر، ەكى كۇنىندە عانا بولىمدى بولىپ شىعادى. ال ءاربىر ناۋقاستىڭ جاسىرىن مەزگىلى ۇقسامايدى، سوندىقتان ۆيرۋستى انىقتاۋ ۋاقىتى دا ۇقساس بولمايدى،- دەدى. 

 

جۇڭگو اۋرۋدى تىزگىندەۋ ورتالىعىنىڭ ورىنباسار مەڭگەرۋشىسى فىڭ زىجيان وسىدان بۇرىن تىلشىلىكتى قابىلداعاندا دا وسى قۇبىلىستى تىلگە تيەك ەتكەن ەدى.

 

ول: جۇعىمدالۋشى نەمەسە ناۋقاس اشىق جۇعىمدالۋدان ۆيرۋس شىعارعانعا دەيىن ۋىتتى ايدايدى ەكەن، بۇل كاسىپتىك جاقتان «كۇشتى جاسىرىن مەزگىلى» دەپ اتالادى، ال، اۋرۋ بەلگىسى جوق جۇعىمدالۋشىلاردىڭ ۋ شىعارۋى كاسىپتىك جاقتان «الدىڭعى جاسىرىن مەزگىلى» دەپ اتالادى، مۇنى تاجىريبەحانادا تەكسەرىپ ساراپتاۋدىڭ «تەرەزەلىك مەزگىلى» دەۋگە دە بولادى. تەرەزەلىك مەزگىلىندە، كوپ رەت تەكسەرگەندە دە بولىمدى بولىپ شىعۋى ەكىتالاي، ءبىراق الدىڭعى جاسىرىن مەزگىلدىڭ سوڭىندا بولىمدى بولىپ شىعادى، بۇل قۇبىلىستى تۇسىنۋگە ابدەن بولادى،- دەپ ءتۇسىندىردى. 

حىبەي ولكەسى شىجياجۋاڭ قالاسى چاڭجيۋحۋايۋان شاعىن رايونىندا، ەمدەۋ قىزمەتكەرلەرى ۇلگى الۋعا دايىندالۋدا. 

 

بەيجيڭ شيەحى شيپاحاناسى ينفەكسيا ىشكى اۋرۋلار ءبولىمىنىڭ ورىنباسار مەڭگەرۋشىسى ساۋ ۋي مىنانى اتاپ كورسەتتى: قازىرگى زەرتتەۋلەر جاڭا تيپتى ايدارشا ۆيرۋستىڭ جۇتقىنشاقتا قايتا جاسالۋ جانە ءبولىپ شىعارۋداعى ەڭ جاندى ۋاقىتى كلينيكالىق اۋرۋ بەلگىلەرىنىڭ الدى-ارتىندا ەكەندىگىن دالەلدەدى، وسى كەزدە جۇتقىنشاقتان ۇلگى الىپ نۋكلەين قىشقىلىن تەكسەرگەندە بولىمدى بولۋ مۇمكىندىگى ەڭ جوعارى بولادى. ءبىراق بۇل كەزەڭ ونداي كەڭ ەمەس.

 

جوعارىدا ايتىلعانداي، ەگەر نۋكلەين قىشقىلىن تەكسەرگەندە، ناۋقاستىڭ ۋ شىعارۋ مولشەرى از بولسا، تەكسەرۋ ناتيجەسى بولىمسىز بولۋى مۇمكىن. سوندىقتان قايتالاي كوپ اينالىپ تەكسەرۋ ءتىپتى دە قاجەتتى.

 

بەيجيڭ ۋنيۆەرسيتەتى 1-شيپاحانا جۇقپالى اۋرۋلار ءبولىمىنىڭ مەڭگەرۋشىسى ۋاڭ گۇيچياڭ بىلاي دەدى: بۇل احۋالداردىڭ ءبارى قالىپتى جاعداي، كوپشىلىكتىڭ الاڭداۋىنىڭ ەش قاجەتى جوق.

 

وسىدان بۇرىن دا ماماندار ۇقساماعان ورىنداردا نۋكلەين قىشقىلىن تەكسەرۋدىڭ بولىمدى بولۋ ناتيجەسى ءالى دە ۆيرۋسپەن جۇعىمدالۋىنا دياگنوز قويۋدىڭ «التىن ولشەمى» ەكەندىگىن ايقىن بىلدىرگەن.

 

ءتىلشى 1-ايدىڭ 14-كۇنى ساعات 20 عا دەيىن، شىجياجۋاڭ قالاسىندا 2-كەزەكتى جاپپاي نۋكلەين قىشقىلىن تەكسەرۋ اياقتالعاندىعىنا؛ 1-ايدىڭ 15-كۇنى شىجياجۋاڭ قالاسى گاۋچىڭ رايونىندا 4-رەتكى جاپپاي نۋكلەين قىشقىلىن تەكسەرۋ ورىستەتىلگەنىنە؛ بۇدان سىرت، 1-ايدىڭ 15-كۇنىنەن باستاپ شىجياجۋاڭ قالاسىنىڭ پوچتالىق جەدەل جەتكىزۋ جانە بۇيىرتقان تاماقتى تەز جەتكىزۋ كاسىبىمەن شۇعىلدانۋشىلار ءار 72 ساعاتتا ءبىر رەت جاپپاي نۋكلەين قىشقىلىن تەكسەرتكەنىنە (حاۋىپ-قاتەرى ورتا، جوعارى رايوندار مۇنىڭ سىرتىندا) نازار اۋداردى. 

 

اۋدارعان: ساعىنبەك رابات ۇلى 

来源：中国新闻网

监制、审稿：叶力夏提

 

编辑：古丽美热