13 ـ كەزەكتى مەملەكەتتىك حالىق قۇرىلتايىنىڭ 4-ٴماجىلىسى بەيجيڭدە اشىلدى، شي جينپيڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار ٴتوراعالار مىنبەسىنەن ورىن الدى، لي كىچياڭ ۇكىمەت قىزمەتىنەن بايانداما جاسادى، لي جانشۋ ٴماجىلىستى باسقاردى، «14-بەسجىلدىق» جوسپار جانە 2035-جىلعا دەيىنگى ۇزاق بولاشاقتىق نىسانا پروگرامما جوباسى قاراپ تەكسەرىلدى، مەملەكەتتىك حالىق قۇرىلتايىنىڭ ۇيىمدىق زاڭىنا وزگەرىس ەنگىزۋ جوباسى جانە ٴىس قاراۋ ەرەجەسىنە وزگەرىس ەنگىزۋ جوباسى تىڭدالدى، شياڭگاڭ ەرەكشە اكىمشىلىك رايونىنىڭ سايلام ٴتۇزىمىن كەمەلدەندىرۋ جونىندەگى قاۋلى جوباعا جاسالعان تۇسىنىك تىڭدالدى  

كوكتەم ايىندا كورىكتەنە تۇسكەن بەيجيڭ قالاسى وسكەلەڭ ومىرشەڭ بەينەگە ەنگەن. 13-كەزەكتى مەملەكەتتىك حالىق قۇرىلتايىنىڭ 4-ءماجىلىسى بۇگىن تۇستەن بۇرىن حالىق سارايىندا اشىلدى. مەملەكەتتىك حالىق قۇرىلتايىنىڭ 3000 عا جۋىق ۋاكىلى حالىقتىڭ ماڭىزدى تاپسىرماسىن ارقالاپ قۇرىلتايعا قاتىناسىپ، نەگىزگى زاڭ مەن زاڭداردا بەرىلگەن قاسيەتتى بورىشتارىن مۇقيات وتەۋگە بەلسەنە كىرىستى. 

حالىق سارايىنىڭ 10 مىڭ ادامدىق ۇلكەن زالى ايبىندى دا دۋماندى بەينەگە شومدى، ٴتوراعالار مىنبەسىنىڭ شىمىلدىعىنىڭ ٴدال ورتاسىنداعى مەملەكەت گەربى نارت قىزىل تۋدىڭ الاۋىمەن ٴتىپتى دە نۇرلانا جارقىرايدى. ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى لي جانشۋ ءماجىلىستى باسقاردى. ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى ۋاڭ چىن، ساۋ جيانميڭ، جاڭ چۇنشيان، شىن يۋەيۋە، جي بيڭشۋان، ەركىن يمىرباقى، ۋان ىشياڭ، چىن جۋ، ۋاڭ دۇڭميڭ، بايماچىلين، ديڭ جۇڭلي، حاۋ ميڭجين، ساي دافىڭ، ۋ ۋيحۋا، ياڭ جىن-ۋ ءتوراعالار مىنبەسىنىڭ اتقارۋشى ءتوراعالار ورنىنا وتىردى. 

شي جينپيڭ، لي كىچياڭ، ۋاڭ ياڭ، ۋاڭ حۋنيڭ، جاۋ لىجي، حان جىڭ، ۋاڭ چيشان جانە ءماجىلىس ءتوراعالار القاسىنىڭ قۇرامىنداعىلار ءتوراعالار مىنبەسىنەن ورىن الدى. 

13-كەزەكتى مەملەكەتتىك حالىق قۇرىلتايىنىڭ 4-ماجىلىسىنە قاتىناسۋعا ءتيىستى ۋاكىل 2953 ادام. 3-ايدىڭ 5 ـ كۇنى تۇستەن بۇرىنعى ماجىلىسكە 2900 ادام قاتىناستى، 53 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى. 

تۇستەن بۇرىن ساعات 9 دا لي جانشۋ جۇڭحۋا حالىق رەسپۋبليكاسى 13-كەزەكتى مەملەكەتتىك حالىق قۇرىلتايى 4 ـ ٴماجىلىسىنىڭ اشىلعاندىعىن جاريالادى. 

زالداعىلار تەگىس ورىندارىنان تۇرىپ، مەملەكەت گيمىنىن اسقاقتاتا شىرقادى.

ٴماجىلىستىڭ كۇن تارتىبىنە ساي، مەملەكەتتىك كەڭەستىڭ زۇڭليى لي كىچياڭ مەملەكەتتىك كەڭەس اتىنان ماجىلىسكە ۇكىمەت قىزمەتىنەن بايانداما جاسادى. بايانداما مىناداي ٴۇش بولىمگە بولىنەدى: ٴبىرىنشى، 2020 ـ جىلعى قىزمەتتەرگە شولۋ؛ ەكىنشى، «13-بەسجىلدىق» مەزگىلىندەگى دامۋ جەتىستىكتەرى جانە «14-بەسجىلدىق» مەزگىلىندەگى باستى نىسانا-مىندەتتەر؛ ٴۇشىنشى، 2021-جىلعى ٴتۇيىندى قىزمەتتەر.

لي كىچياڭ باياندامادا مىنالاردى انىق ايتتى: وتكەن ٴبىر جىل جاڭا جۇڭگو تاريحىندا ەرەكشە ٴبىر جىل بولدى. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، بۇكىل ەلدەگى ٴار ۇلت حالقى قايسارلىقپەن كۇرەس جاساپ، جۇقپالى اۋرۋدان ساقتانۋ-تىزگىندەۋدە كەلەلى ستراتەگيالىق تابىسقا قول جەتكىزدى، دۇنيە جۇزىندەگى نەگىزگى ەكونوميكالىق تۇلعالاردىڭ ىشىندە تەك ەلىمىز عانا ەكونوميكالىق ارتۋدى جۇزەگە اسىردى، كەدەيلىكتەن قۇتىلدىرۋدان قامال الۋ شايقاسىندا جالپى بەتتىك جەڭىسكە، جالپى بەتتىك دوڭگەلەك داۋلەتتى قوعام ورناتۋدىڭ شەشۋشى جەڭىسىنە جەتۋدە شەشۋشى تابىستارعا قول جەتتى، حالىق رازى بولاتىن، دۇنيە ٴجۇزى كوز تىككەن، تاريح بەتىنەن ورىن الارلىقتاي تاماشا ناتيجە جاراتىلدى. 

لي كىچياڭ باياندامادا پارتيا ورتالىق كوميتەتىنىڭ ٴبىر جىلدان بەرگى شەشىمدەرى مەن ورنالاستىرۋلارىن دايەكتىلەندىرىپ، جۇقپالى اۋرۋدان ساقتانۋ-تىزگىندەۋ جانە ەكونوميكالىق، قوعامدىق دامۋدى ٴبىرتۇتاس جوسپارلاپ ىلگەرىلەتۋ احۋالىن مىناداي 7 جاقتان قورىتىندىلادى: بازار نەگىزگى تۇلعالاردىڭ شۇعىل قاجەتىن توڭىرەكتەي وتىرىپ ماكرولىق ساياسات بەلگىلەندى جانە اتقارىلدى؛ ەكونوميكانىڭ نەگىزگى جاعدايى ورنىقتىرىلدى؛ جۇمىستاندىرۋ الدىمەن ورنىقتىرىلىپ، حالىق تۇرمىسى كەپىلدەندىرىلدى، حالىقتىڭ تۇرمىسى شىنايى قامتاماسىزداندىرىلدى؛ ٴۇش ۇلكەن قامال الۋ شايقاسى باتىل، ويداعىداي جۇرگىزىلىپ، باستى نىسانا-مىندەتتەر ۋاعىندا ورىندالدى؛ رەفورما جاساپ، ەسىك اشۋ تاباندىلىقپەن ىلگەرىلەتىلىپ، دامۋ ومىرشەڭدىگى مەن ىشكى قوزعاۋشى كۇشى ونان ارى كۇشەيتىلدى؛ عىلىم-تەحنيكادا جاڭالىق جاراتۋ زور كۇشپەن ىلگەرىلەتىلىپ، كاسىپتىڭ ارتۋ فورماسىنا بۇرىلىس جاساپ ساپاسىن جوعارىلاتۋ قادامى تەزدەتىلدى؛ جاڭاشا قالا- قالاشىقتانۋ مەن اۋىل-قىستاقتى كوركەيتۋ ىلگەرىلەتىلىپ، قالا مەن اۋىلدىڭ وڭىرلىك دامۋى ۇزدىكسىز ساپالاندى؛ اكىمشىلىكتى زاڭ بويىنشا جۇرگىزۋ جانە قوعامدىق قۇرىلىس كۇشەيتىلىپ، قوعامدىق جاراسىمدىلىق پەن ورنىقتىلىق ساقتالدى.

وتكەن 5 جىلدا ەلىمىزدىڭ ەكونوميكالىق، قوعامدىق دامۋىندا تىڭ تاريحي تابىستارعا قول جەتتى. «13-بەسجىلدىق» كەزىندەگى دامۋ تابىسىن ەسكە العاننان كەيىن، لي كىچياڭ باياندامادا بىلاي دەپ انىق ايتتى: «14-بەسجىلدىق» مەزگىل- جالپى بەتتىك سوتسياليستىك وسىزاماندانعان مەملەكەت قۇرۋدىڭ جاڭا جورىعىنىڭ العاشقى بەس جىلى. «ج ك پ ورتالىق كوميتەتىنىڭ حالىق شارۋاشىلىعى مەن قوعامدىق دامۋدىڭ 14-بەسجىلدىق جوسپارى جانە 2035-جىلعا دەيىنگى ۇزاق بولاشاقتىق دامۋ نىساناسىن بەلگىلەۋ جونىندەگى ۇسىنىسىنا» ساي، مەملەكەتتىك كەڭەس «حالىق شارۋاشىلىعى مەن قوعامدىق دامۋدىڭ 14-بەسجىلدىق جوسپارىن جانە 2035-جىلعا دەيىنگى ۇزاق بولاشاقتىق دامۋ نىسانا پروگرامما جوباسىن» جاسادى. پروگرامما جوباسىندا شي جينپيڭنىڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، «14-بەسجىلدىق» جوسپار مەزگىلىندەگى ەكونوميكالىق، قوعامدىق دامۋدىڭ باستى نىسانالارى مەن كەلەلى مىندەتتەرى ناقتىلاندىرىلدى، مۇنىڭ تولىق نۇسقاسى ٴماجىلىستىڭ قاراپ تەكسەرۋىنە تاپسىرىلدى. 

لي كىچياڭ باياندامادا مىنالاردى انىق ايتتى: پروگرامما جوباسىنا ساي، دامۋ ساپاسى مەن ونىمدىلىگى كۇش سالا جوعارىلاتىلىپ، ەكونوميكانىڭ باياندى، اقاۋسىز دامۋى جالعاستىرىلادى. ەكونوميكالىق اينالىم ۇيلەسىمدى ارالىقتا ساقتالادى، ٴار جىلى جاعدايعا قاراي ەكونوميكالىق ارتۋدىڭ مەجەلى نىساناسى العا قويىلادى، جالپى قىزمەتكەرلەردىڭ ەڭبەك ونىمدىلىگىنىڭ ارتۋى ىشكى ٴوندىرىستىڭ جالپى ٴونىم قۇنىنىڭ ارتۋىنان جوعارىلاتىلادى، قالا-قالاشىقتاردا تەكسەرىپ انىقتالعان كاسىپسىزدىك مولشەرى %5.5 شاماسىندا تىزگىندەلەدى، زات باعاسى دەڭگەيى جالپى جاقتان ورنىقتى ساقتالادى. جاڭالىق جاراتۋ ارقىلى دامۋعا دەم بەرۋگە تاباندى بولىپ، وسىزامانعى كاسىپ جۇيەسى جەدەل دامىتىلادى. مىعىم قۋاتتى ەل ٴىشى بازارى قالىپتاستىرىلىپ، جاڭا دامۋ جاعدايى جاراتىلادى. اۋىل ـ قىستاقتى كوركەيتۋ جالپى بەتتىك ىلگەرىلەتىلىپ، جاڭاشا قالا ـ قالاشىقتاندىرۋ ستراتەگياسى كەمەلدەندىرىلەدى. وڭىرلىك ەكونوميكانىڭ ورنالاسۋى ساپالاندىرىلىپ، وڭىرلەردىڭ سايكەستى دامۋى جەبەلەدى. رەفورما جاساپ، ەسىك اشۋ جالپى بەتتىك تەرەڭدەتىلىپ، دامۋدىڭ قوزعاۋشى كۇشى مەن ومىرشەڭدىك كۇشى ۇزدىكسىز ارتتىرىلادى. جاسىل دامۋ ىلگەرىلەتىپ، ادام مەن تابيعاتتىڭ جاراسىمدى قاتار ٴومىر ٴسۇرۋى جەبەلەدى. حالىقتىڭ ىرىسى ۇزدىكسىز ارتتىرىلىپ، ورتاق اۋقاتتانۋ تىڭعىلىقتى ىلگەرىلەتىلەدى. دامۋ جانە حاۋىپسىزدىك ٴبىر تۇتاس جوسپارلانىپ، اناعۇرلىم جوعارى دەڭگەيدەگى الاڭسىز جۇڭگو قۇرىلادى.

لي كىچياڭ باياندامادا بىلاي دەپ اتاپ كورسەتتى: 2021-جىلعى دامۋدىڭ باستى مەجەلى نىسانالارى مىنالار: ىشكى ٴوندىرىستىڭ جالپى ٴونىم قۇنىن %6 تەن استام ارتتىرۋ؛ قالا-قالاشىقتاردا جاڭادان 11 ميلليوننان استام ادامدى كاسىپتەندىرىپ، قالا-قالاشىقتاردا تەكسەرىپ انىقتالعان كاسىپسىزدىك مولشەرىن %5. 5 شاماسىندا ۇستاۋ؛ تۇرعىنداردىڭ تۇتىنۋ باعاسىنىڭ جوعارىلاۋ مولشەرىن %3 شاماسىندا مەڭگەرۋ؛ يمپورت-ەكسپورت مولشەرىن ورنىقتى جوعارىلاتىپ، حالىقارالىق كىرىس-شىعىستى نەگىزىنەن تەڭەستىرۋ؛ تۇرعىنداردىڭ كىرىسىن ورنىقتى ارتتىرۋ؛ ەكولوگيالىق ورتا ساپاسىن ونان ارى جاقسارتىپ، بىرلىك ىشكى ٴوندىرىستىڭ جالپى قۇنىنداعى ەنەرگيانى سارىپ ەتۋ مولشەرىن %3 شاماسىندا تومەندەتىپ، باستى لاس زاتتاردىڭ شىعارىلۋ مولشەرىن ۇزدىكسىز ازايتۋ؛ استىق ٴونىمىن ٴبىر تريلليون 300 ميلليارد جىڭنان اسىرۋعا كەپىلدىك ەتۋ. 

لي كىچياڭ باياندامادا مىنارلاردى ورتاعا قويدى: 2021-جىلى مىناداي سەگىز جاقتاعى قىزمەتتى ٴتۇيىندى تۇردە ويداعىداي ىستەۋ كەرەك: ماكرولىق ساياساتتىڭ ۇلاسپالىلىعىن، ورنىقتىلىعىن، باياندىلىعىن ساقتاپ، ەكونوميكالىق اينالىمنىڭ ۇيلەسىمدى ارالىقتا بولۋىن جەبەۋ؛ ٴتۇيىندى سالالار رەفورماسىن ىشكەرلەي جەبەپ، بازار تۇلعالارىنىڭ ومىرشەڭدىك كۇشىن اناعۇرلىم تاسقىنداتۋ؛ جاڭالىق اشۋعا سۇيەنىپ، ناقتى ەكونوميكانىڭ جوعارى ساپالى دامۋىن ىلگەرلەتىپ، جاڭا قوزعاۋشى كۇشتى جەتىلدىرۋ جانە زورايتۋ؛ ىشكى سۇرانىمدى ۇلعايتۋ سىندى ستراتەگيالىق نەگىزگە تاباندى بولىپ، ىشكى بازاردىڭ كومەسكى كۇشىن تولىق اشۋ؛ اۋىل-قىستاقتى گۇلدەندىرۋ ستراتەگياسىن جالپى بەتتىك جولعا قويىپ، اۋىل شارۋاشىلىعى كاسىبىنىڭ ورنىقتى دامۋى مەن شارۋالاردىڭ كىرىسىن ارتتىرۋدى ىلگەرلەتۋ؛ جوعارى دەڭگەيدە سىرتقا ەسىك اشۋدى جۇزەگە اسىرىپ، سىرتقى ساۋدا مەن شەتەل قارجىسىنىڭ ساپاسىن ورنىقتى جوعارىلاتۋ؛ لاستانۋدان ساقتانۋ مەن ەكولوگيالىق قۇرىلىستى كۇشەيتىپ، ورتا ساپاسىن ۇزدىكسىز جاقسارتۋ؛ حالىقتى شىنايى باقىتقا كەنەلتىپ، قوعامدىق قۇرىلىس ورەسىن ۇزدىكسىز جوعارىلاتۋ كەرەك. 

باياندامادا لي كىچياڭ ۇكىمەتتىڭ وزىندىك قۇرىلىسىن، ۇلت، ٴدىن جانە مۇھاجىرلار قىزمەتىن، مەملەكەت قورعانىسى مەن ارميا قۇرىلىسىن، شياڭگاڭ مەن اۋمىننىڭ دامۋىن جانە ەكى جاعالاۋ قاتىناسىن، سونداي-اق ەلىمىزدىڭ ديپلوماتيالىق ساياساتىن كۇشەيتۋ جونىندە بايىمداۋ جاسادى. 

لي كىچياڭ سوڭىندا بىلاي دەدى: مىندەت اۋىر، سوندىقتان قايراتتانا العا ۇمتىلۋ ٴتىپتى دە قاجەت. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، جۇڭگوشا سوتسياليزم ۇلى تۋىن بيىك ۇستاپ، شي جينپيڭنىڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتىپ، ٴبىر نيەتپەن سەلبەسىپ، ٴورىس اشا العا ىلگەرىلەپ، تۇتاس جىلدىق نىسانا-مىندەتتەردى قۇلشىنا ورىنداپ، جۇڭگو كوممۋنيستىك پارتياسىنىڭ 100 جىلدىعىن ۇزدىك ناتيجەلەرمەن قۇتتىقتاپ، ەلىمىزدى باي، قۇدىرەتتى، دەموكراتيالى، وركەنيەتتى، جاراسىمدى، كورىكتى سوتسياليستىك وسىزاماندانعان قۇدىرەتتى ەل ەتىپ قۇرىپ شىعۋ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا قاجىماي-تالماي كۇرەس جاساۋ كەرەك! 

ٴماجىلىستىڭ كەڭەس تارتىبىنە ساي، ٴماجىلىس حالىق شارۋاشىلىعى مەن قوعامدىق دامۋدىڭ 14-بەسجىلدىق جوسپارى مەن 2035-جىلعا دەيىنگى ۇزاق بولاشاقتىق نىسانا پروگرامما جوباسىن، مەملەكەتتىك كەڭەستىڭ 2020-جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ احۋالى جانە 2021-جىلعى حالىق شارۋاشىلىعى مەن قوعامدىق دامۋ جوسپار جوباسى جونىندەگى بايانداماسىن، سونداي-اق 2021-جىلعى حالىق شارۋاشىلىعى مەن قوعامدىق دامۋ جوسپار جوباسىن، مەملەكەتتىك كەڭەستىڭ 2020-جىلعى ورتالىق پەن جەرگىلىكتى ورىنداردىڭ مەجە ەسەبىنىڭ اتقارىلۋ احۋالى جانە 2021-جىلعى ورتالىق پەن جەرگىلىكتى ورىنداردىڭ مەجە ەسەپ جوباسى جونىندەگى بايانداماسىن، سونداي-اق 2021-جىلعى ورتالىق پەن جەرگىلىكتى ورىنداردىڭ مەجە ەسەپ جوباسىن قارادى. 

مەملەكەتتىك حالىق قۇرىلتايى تۇراقتى كوميتەتىنىڭ تاپسىرۋىمەن مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى ۋاڭ چىن مەملەكەتتىك حالىق قۇرىلتايىنىڭ ۇيىمدىق زاڭىنا وزگەرىس ەنگىزۋ جوباسى جونىندەگى تۇسىنىكتى، مەملەكەتتىك حالىق قۇرىلتايىنىڭ ٴىس قاراۋ ەرەجەسىنە وزگەرىس ەنگىزۋ جوباسى جونىندەگى تۇسىنىكتى، مەملەكەتتىك حالىق قۇرىلتايىنىڭ شياڭگاڭ ەرەكشە اكىمشىلىك رايونىنىڭ سايلام ٴتۇزىمىن كەمەلدەندىرۋ جونىندەگى قاۋلى جوباعا جەكە-جەكە تۇسىنىك جاسادى. 

مەملەكەتتىك حالىق قۇرىلتايىنىڭ ۇيىمدىق زاڭىنا وزگەرىس ەنگىزۋ جوباسى جونىندەگى تۇسىندىرمەسىندە بىلاي دەپ اتاپ كورسەتىلدى: مەملەكەتتىك حالىق قۇرىلتايىنىڭ ۇيىمدىق زاڭى مەملەكەتتىك حالىق قۇرىلتايى مەن ونىڭ تۇراقتى كوميتەتىنىڭ ۇيىمدىق ٴتۇزىمى مەن قىزمەت ٴتۇزىمى جونىندەگى نەگىزگى زاڭ. پارتيانىڭ 18-قۇرىلتايىنان بەرى باس شۋجي شي جينپيڭ حالىق قۇرىلتايى تۇزىمىندە تاباندى بولۋ جانە ونى كەمەلدەندىرۋ، سوتسياليستىك دەموكراتيالىق ساياسيدى دامىتۋ جونىندە جەلىلەس ماڭىزدى ءسوز سويلەدى. باس شۋجي شي جينپيڭنىڭ حالىق قۇرىلتايى تۇزىمىنە تاباندى بولۋ جانە ونى كەمەلدەندىرۋ جونىندەگى ماڭىزدى يدەياسى مەن شي جينپيڭنىڭ زاڭمەن باسقارۋ يدەياسىن دايەكتىلەندىرىپ، پارتيا ورتالىق كوميتەتىنىڭ كەلەلى شەشىمدەرى مەن ورنالاستىرۋلارىن تياناقتاندىرۋدا امالياتتىق تاجىريبەلەردى مۇقيات قورىتىندىلاپ، مەملەكەتتىك حالىق قۇرىلتايىنىڭ ۇيىمدىق زاڭىنا وزگەرىس ەنگىزىپ، مەملەكەتتىك حالىق قۇرىلتايى جانە ونىڭ تۇراقتى كوميتەتىنىڭ ۇيىمدىق ٴتۇزىمى مەن قىزمەت ٴتۇزىمىن ونان ارى كەمەلدەندىرۋ قاجەت. جوبا جالپى 37 تارماقتان قۇرالادى، باستى وزگەرىس ەنگىزىلگەن مازمۇندار مىنالاردى قامتيدى: «جالپى ەرەجە» تاراۋى قوسىلدى؛ مەملەكەتتىك حالىق قۇرىلتايىنىڭ ٴتوراعالار القاسى مەن مەملەكەتتىك حالىق قۇرىلتايى تۇراقتى كوميتەتى كوميتەت باستىقتارى ٴماجىلىسىنىڭ مىندەت ۇقىعىنا قاتىستى بەلگىلەمەلەر كەمەلدەندىرىلدى؛ مەملەكەتتىك حالىق قۇرىلتايى ارناۋلى كوميسسيالارىنىڭ قاتىستى بەلگىلەمەلەرى كەمەلدەندىرىلدى؛ باقىلاۋ-تەكسەرۋ ٴتۇزىلىسى رەفورماسىنىڭ قاجەتىنە سايكەسىپ، قاتىستى مازمۇندار كوبەيتىلدى؛ مەملەكەتتىك حالىق قۇرىلتايى تۇراقتى كوميتەتىنىڭ كادرلاردى مىندەتكە تاعايىنداۋ، مىندەتىنەن قالدىرۋ ۇقىعى اقاۋسىزداندىرىلدى؛ ۋاكىلدەر قىزمەتىن كۇشەيتۋگە، ۋاكىلدەرمەن بايلانىستى قويۋلاتۋعا قاتىستى مازمۇندار تولىقتالدى.

مەملەكەتتىك حالىق قۇرىلتايىنىڭ ٴىس قاراۋ ەرەجەسىنە وزگەرىس ەنگىزۋ جوباسى جونىندەگى تۇسىندىرمەسىندە بىلاي دەپ اتاپ كورسەتىلدى: مەملەكەتتىك حالىق قۇرىلتايىنىڭ ٴىس قاراۋ ەرەجەسى-مەملەكەتتىك حالىق قۇرىلتايىنىڭ ٴماجىلىس ٴتۇزىمى مەن قىزمەت ٴتارتىبى جونىندەگى نەگىزگى زاڭ. مەملەكەتتىك حالىق قۇرىلتايىنىڭ ٴىس قاراۋ ەرەجەسىنە وزگەرىس ەنگىزۋ-پارتيانىڭ باسشىلىعىنا جالپى بەتتىك تاباندى بولۋدىڭ، مەملەكەتتىك حالىق قۇرىلتايىنىڭ ساياسي قۇرىلىسىن كۇشەيتۋدىڭ ماڭىزدى شاراسى، جالپى بارىستاعى دەموكراتياعا تاباندى بولۋدىڭ، حالىقتىڭ وزىنە-ٴوزى قوجايىن بولۋىنا كەپىلدىك ەتۋدىڭ جانە ونى دامىتۋدىڭ تۇزىمدىك كەپىلى، امالياتتىق تاجىريبەلەردى ىشكەرىلەي قورىتىندىلاۋدىڭ، حالىق قۇرىلتايى تۇزىمىنە تاباندى بولۋدىڭ، سونداي-اق ونى كەمەلدەندىرۋدىڭ وبيەكتيۆ تالابى، پارتيا مەن مەملەكەتتىڭ قۇرىلىم رەفورماسىن تەرەڭدەتۋدىڭ، مەملەكەتتى باسقارۋ جۇيەسى مەن باسقارۋ قابىلەتىن وسىزامانداندىرۋدى ىلگەرىلەتۋدىڭ رەال قاجەتى. جوبا جالپى 35 تارماقتان قۇرالعان بولىپ، باستى وزگەرىس ەنگىزۋ مازمۇنى مىنالار: ٴماجىلىس اشۋعا قاتىستى دايىندىق قىزمەتتەردى ايقىنداۋ؛ ٴماجىلىس ٴتارتىبىن قاتايتۋ؛ ٴماجىلىس ٴتارتىبىن لايىقتى ىقشامداپ، ٴىس قاراۋ ساپاسى مەن ونىمدىلىگىن جوعارىلاتۋ؛ ٴماجىلىستىڭ جاريالىلىعى مەن ينفورماتسيالاندىرۋ قۇرىلىسىن كۇشەيتۋ؛ زاڭ جوباسى سياقتى كەڭەس جوبالارىن قاراۋ ٴتارتىبىن كەمەلدەندىرۋ؛ جوبا پروگرامماسىن تەكسەرىپ بەكىتۋ جانە رەتتەۋ ٴتارتىبىن ارناعا ٴتۇسىرۋ؛ قۇرىلتاي ماقۇلداعان ىستەردى جاريالاۋ ٴتارتىبىن اقاۋسىزداندىرۋ جانە كەمەلدەندىرۋ. 

مەملەكەتتىك حالىق قۇرىلتايىنىڭ شياڭگاڭ ەرەكشە اكىمشىلىك رايونىنىڭ سايلام ٴتۇزىمىن كەمەلدەندىرۋ جونىندەگى قاۋلى جوبا تۇسىندىرمەسىندە بىلاي دەپ اتاپ كورسەتىلدى: شياڭگاڭ ەرەكشە اكىمشىلىك رايونى اتقارعان سايلام ٴتۇزىمى اكىمدى سايلاۋ ٴادىسى مەن زاڭ شىعارۋ كوميتەتىن جارىققا شىعارۋ ٴادىسىن قامتيدى، شياڭگاڭ ەرەكشە اكىمشىلىك رايونى ساياسي ٴتۇزىلىسىنىڭ ماڭىزدى قۇرامداس بولەگى. شياڭگاڭ قوعامىندا جارىققا شىققان كەيبىر بىلىقپالىقتار شياڭگاڭنىڭ قازىرگى سايلام ٴتۇزىمى مەحانيزمىندە كورنەكتى ساڭىلاۋلار مەن جەتەرسىزدىكتەر ساقتالعاندىعىن كورسەتتى، ٴسوز جوق، قاجەتتى شارالار قولدانىپ، شياڭگاڭنىڭ سايلام ٴتۇزىمىن كەمەلدەندىرىپ، ٴتۇزىم-مەحانيزم جاقتارىندا ورىن تەۋىپ وتىرعان كومەسكى قاتەرلەر مەن حاۋىپ-قاتەرلەردىڭ الدىن الىپ، وتانشىلداردى نەگىزگى تۇلعا ەتكەن ”شياڭگاڭدى شياڭگاڭدىقتار باسقارۋعا“ شىنايى كەپىلدىك ەتۋ كەرەك. شياڭگاڭنىڭ سايلام ٴتۇزىمىن كەمەلدەندىرۋدىڭ جالپى وي جەلىسى مىناداي: شياڭگاڭ ەرەكشە اكىمشىلىك رايونى سايلام كوميتەتىن قايتا قۇرۋدى جانە ۇقىق كولەمىن ارتتىرۋدى وزەك ەتىپ، جالپى تۇلعالىق ٴتۇزىم جوباسىن جاساۋ، سايلام كوميتەتى كولەمىن، ۇيىمداسۋىن جانە جارىققا شىعۋ ٴادىسىن تەڭشەۋ، ساپالىلاندىرۋ. سايلام كوميتەتى جالعاستى تۇردە اكىم سايلاۋ ۇقىعىنا يە ٴارى سايلام كوميتەتىنە ٴبىرشاما زور سالىستىرماداعى زاڭ شىعارۋ كوميتەتى مۇشەلەرىن سايلاۋ جانە زاڭ شىعارۋ كوميتەتى مۇشەلەرىنىڭ بارلىق كانديداتىن كورسەتۋگە تىكەلەي قاتىناسۋ سىندى جاڭا فۋنكتسيا بەرىلەدى. سايلام كوميتەتى ارقىلى شياڭگاڭ قوعامىنىڭ بىركەلكى، ٴتارتىپتى ساياسي قاتىسۋى جانە اناعۇرلىم كەڭ ۋاكىلدىك سيپاتى كەڭەيتىلەدى. قاتىستى سايلاۋ فاكتورلارىنا لايىقتى تەڭشەۋ جۇرگىزىلەدى. سونىمەن بىرگە، جالپى بارىستاعى تولىمدىلىعىن تەكسەرۋ مەحانيزمى ورناتىلادى، وسىدان بارىپ شياڭگاڭنىڭ ٴىس جۇزىندىك جاعدايىنا ۇيلەسەتىن، شياڭگاڭ ەرەكشەلىگىنە يە جاڭا دەموكراتيالىق سايلام ٴتۇزىمى قالىپتاساتىن بولادى. ورتالىق پەن مەملەكەتتىڭ قاتىستى تاراۋلارى مۇقيات زەرتتەۋ جۇرگىزىپ، قاتىستى جاقتارمەن پىكىرلەسكەننەن كەيىن، «ۇيعارىمدى زاڭعا وزگەرىس ەنگىزۋمەن ۇشتاستىرۋ» ٴتاسىلىن قولدانىپ، قادامعا ٴبولىپ ىلگەرىلەتۋدى جانە ورىنداۋدى ورتاعا قويدى. ٴبىرىنشى قادامدا مەملەكەتتىك حالىق قۇرىلتايى نەگىزگى زاڭعا جانە شياڭگاڭنىڭ نەگىزدىك زاڭىنا، شياڭگاڭنىڭ مەملەكەت حاۋىپسىزدىگى زاڭىنداعى قاتىستى بەلگىلەمەلەرگە ساي، شياڭگاڭ ەرەكشە اكىمشىلىك رايونىنىڭ سايلام ٴتۇزىمىن كەمەلدەندىرۋ جونىندە قاۋلى شىعارىپ، شياڭگاڭ ەرەكشە اكىمشىلىك رايونىنىڭ سايلام تۇزىمىنە بويسۇنۋعا ٴتيىستى نەگىزگى پرينسيپتەردىڭ جانە وزگەرىس ەنگىزىپ كەمەلدەندىرۋگە ٴتيىستى وزەكتى فاكتورلاردىڭ مازمۇنىن ايقىندادى ٴارى مەملەكەتتىك حالىق قۇرىلتايىنىڭ تۇراقتى كوميتەتىنە وسى ۇيعارىمعا ساي شياڭگاڭ نەگىزدىك زاڭىنىڭ قوسىمشا 1- حۇجاتى مەن قوسىمشا 2-حۇجاتىن وزگەرتۋگە ۇقىق بەردى. ەكىنشى قادامدا مەملەكەتتىك حالىق قۇرىلتايى تۇراقتى كوميتەتى نەگىزگى زاڭعا، شياڭگاڭنىڭ نەگىزدىك زاڭىنا، شياڭگاڭ مەملەكەت حاۋىپسىزدىگى زاڭىنا جانە مەملەكەتتىك حالىق قۇرىلتايىنىڭ قاتىستى قاۋلىلارىنا ساي، شياڭگاڭ نەگىزدىك زاڭىنىڭ قوسىمشا 1-حۇجاتى بولعان «شياڭگاڭ ەرەكشە اكىمشىلىك رايونىنىڭ اكىمىن سايلاۋ ٴادىسىن» جانە قوسىمشا 2-حۇجاتى بولعان «شياڭگاڭ ەرەكشە اكىمشىلىك رايونى زاڭ شىعارۋ كوميتەتىن جارىققا شىعارۋ ٴادىسى مەن داۋىسقا سالۋ تارتىبىنە» وزگەرىس ەنگىزەدى، وزگەرىس ەنگىزىلگەننەن كەيىنگى قوسىمشا 1-حۇجات پەن قوسىمشا 2-حۇجاتتا شياڭگاڭ ەرەكشە اكىمشىلىك رايونىندا اتقارىلاتىن جاڭا دەموكراتيالىق سايلام تۇزىمىنە ايقىن بەلگىلەمەلەر قويىلادى. 

ٴتوراعالار مىنبەسىنەن ورىن العانداردان تاعى: ديڭ شۋەشياڭ، ليۋ حى، شۇي چيلياڭ، سۇن چۇنلان، لي شي، لي چياڭ، لي حۇڭجۇڭ، ياڭ جيەچى، ياڭ شياۋدۋ، جاڭ يوۋشيا، چىن شي، چىن چۋانگو، چىن مين ـ ىر، حۋ چۇنحۋا، گو شىڭكۇن، حۋاڭ كۇنميڭ، ساي چي، يوۋ چۋان قاتارلىلار بار. 

شياڭگاڭ ەرەكشە اكىمشىلىك رايونىنىڭ اكىمى لينجىڭ يۋە ـ ى، اۋمىن ەرەكشە اكىمشىلىك رايونىنىڭ اكىمى حى يچىڭ ماجىلىسكە سىرتتاي قاتىناستى ٴارى ٴتوراعالار مىنبەسىنەن ورىن الدى. 

ساياسي كەڭەس مەملەكەتتىك 13-كەزەكتى كوميتەتىنىڭ 4-ماجىلىسىنە قاتىناسىپ جاتقان ساياسي كەڭەس مۇشەلەرى وسى ماجىلىسكە سىرتتاي قاتىناستى. 

ورتالىق پەن مەملەكەت ورگاندارىنىڭ قاتىستى تاراۋلارىنىڭ، ازاتتىق ارميانىڭ قاتىستى ورىندارىنىڭ، حالىقتىق ۇيىمداردىڭ قاتىستى جاۋاپتىلارى ماجىلىسكە سىرتتاي قاتىناستى نەمەسە سىرتتاي تىڭدادى. 

شەتەلدىڭ جۇڭگوداعى ەلشىلەرى ٴماجىلىستى سىرتتاي تىڭدادى. 

来源：中央广播电视总台

微信制作：阿依娜