التىن تاۋدا تۇعىرى، التىن تاڭدا عۇمىرى 

پارتيا قۇرىلعاندىعىنىڭ 100 جىلدىعى بايلانىسىمەن ورتالىق راديو-تەلەۆيزيا باس ستانسياسى قازاق راديوسىنىڭ ٴتىلشىسى سەرىك راقىم ۇلىنىڭ قادىرمەندى ەل اعاسى قادىس ٴجانابىل ۇلىمەن وتكىزىلگەن «التىنتاۋدا تۇعىرى، التىن تاڭدا عۇمىرى» اتتى سۇحپاتى

您的浏览器不支持 audio标签

سەرىك راقىم ۇلى:   قادىرمەندى قادىس ٴجانابىل ۇلى اقساقال سالەمەتسىزبە؟ بۇگىن وزىڭىزبەن اڭگىمە دۇكەن قۇرۋ باقىتىنا يە بولعانىما قۋانشتامىن. ٴسىزدىڭ ۇزاق جىل نەگىزگى ساتىدا قىزمەت ىستەگەن، باسشىلىق ونەردىڭ قىرى مەن سىرىنا ابدەن توسەلگەن، كەۋدەسى التىن ساندىق، كونەنىڭ كوزى، زامانا كوشىنىڭ ۇدىرە العا تارتۋىنىڭ ناقتى كۋاگەرى ەكەنىڭىزدى كوپتەن بىلەمىز. مۇنىڭ دالەلى رەتىندە اعاجاي التاي ساحاراسىندا تابانى كۇرەكتەي 41 جىل قاجىرلى ەڭبەك ەتىپ، قىرپۋلى قۇلشىنستارىڭىزدىڭ ارقاسىندا، حالىقتىڭ قالاۋلى باسشىسىنا اينالىپ، بيكتەن- بيككە قانات قاققانىڭىزدى اۋىز تولتىرىپ ايتۋعا بولادى. وزىڭىزگە بەلگىلى كەزەكتە بايتاق وتان الابىندا ٴدانشپان جۇڭگو كوممۋنيستىك پارتياسى قۇرىلعاندىعىنىڭ عاسىرلىق تويىن جەڭىس – جەمىستەرىمىزبەن قارسى الۋدىڭ دايىندىق جۇمىستاردى ەدەل-جەدەل جۇرگىزىلۋدە. وسى ورايدا وزىڭىزدەي ومىردەن تۇيگەنى مول، اسا قادىرلى ابىز قارتىمىزدىڭ قاي تۇستارى، قانداي اسقاق ويدىڭ جەتەگىندە پارتياعا مۇشە بولعانىن، اۋەلگى ماقسات پەن بورشتى ناقتى قىزمەت بارسىندا قالاي شەبەر قابىستىرىپ اتقارعانىن بىلگىمىز كەلەدى؟

قادىس ٴجانابىل ۇلى: جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن ٴوزىمنىڭ ۇيرەنۋ اسەرىم مەن كەشىرمەلەرىم ارقىلى ەسكە الامىن. مەنىڭ جاستىق شاعىمنان باستاپ ٴوسىپ-جەتىلۋ وقۋ، ۇيرەنۋ، تاربيەلەنۋ بارىسىم، ودان قوعامعا ارالاسىپ ٴار سالادا قىزمەت ىستەۋ تاريحىم، بۇگىنگى 85 جاسقا شىققان قارت كادر اتانعان ٴومىر ساپارىمنىڭ تۇتاس بارىسى جۇڭگو كوممۋنيستىك پارتياسىنىڭ ىستىق مەيىرى مەن اياۋلى الاقانىنىڭ ماپەلەۋىندە بولعاندىعى ماڭگى ەسىمنەن شىقپايدى. التاي ايماعى بويىنشا 1-رەت اۋىل-قىستاقتان كوممۋنيستىك جاستار ياچەيكاسىن قۇرۋ التاي اۋدانى 3-رايونىندا، ياعىني قازىرگى التاي قالاسى الاعاق اۋىلدىعىندا جۇرگىزىلگەندە 1954-جىلى 12-ايدىڭ 14-كۇنى ورتالاۋ مەكتەپتى بىتىرگەن كەزىمدە، داڭقپەن جۇڭگو كوممۋنيستىك جاستار وداعىنا مۇشە بولدىم. بانكەنىڭ كادرى بولىپ قىزمەتكە شىققاننان كەيىن، ەرلى-زايىپتى سۇڭ جۇڭسى مەن حۋاڭ ۋىنجىڭ ماعان ۇستاز بولىپ كاسىپتىك جاقتان تاربيەلەدى. 1957-جىلى 10-ايدىڭ 6-كۇنى ماپاقاي، ۋي شاۋي قاتارلى ەكى ادامنىڭ تانىستىرۋىمەن جۇڭگو كوممۋنيستىك پارتياسىنا سەرت بەرىپ داڭقپەن مۇشە بولىپ قابىلداندىم. مەن 64 جىلدىق ستاجى بار پارتيا مۇشەسىمىن. 

توڭكەرىستىك قىزمەتكە قاتىناسقاننان باستاپ پارتيانىڭ از ساندى ۇلت كادرلارىن جەتىلدىرۋ قامقورلىعىنىڭ ارقاسىندا التاي ايماقتىق كادرلار مەكتەبىنەن بانكە بۇعالتىرلىق كاسىبىن، شينجياڭ ۇيعۇر اۆتونوميالى رايوندىق قازىنا-ەكونوميكا شۋەيۋانىنان فينانس كاسىبىن وقۋدان تىس، ايماقتىق، رايوندىق جانە ورتالىق پارتيا مەكتەپتەرىنەن ٴبىلىم تولىقتاۋ ورايىنا يە بولدىم. بۇل مەنىڭ پارتياعا ىلەسىپ حالىق ٴۇشىن قىزمەت ىستەۋ سەنىمىمدى نىعايتا ٴتۇستى. سونىمەن بىرگە پارتيالىق شىنىعۋىمدى كۇشەيتىپ، مايدانىم بەرىك، تۋىم ايقىن، اتى-زاتىنا ساي پارتيا مۇشەسى بولۋداي باعدارىمنىڭ ىرگەتاسىن بەكەمدەدى.

پارتيانىڭ باۋلۋى، ٴار ۇلت حالقىنىڭ قولداۋىندا، مەن 48 جىلدىق قىزمەت ىستەگەن تاريحىمدا حالىق بانكەسىنىڭ ەسەپشىسى، بۇعالتىر، ٴبولىم باستىعى، ايماقتىق حالىق بانكەسىنىڭ ورىنباسار باستىعى، بۋىرشىن اۋداندىق پارتكومنىڭ شۋجيى، التاي ايماقتىق پارتكومنىڭ ورىنباسار شۋجيى، ايماقتىق اكىمشىلىك مەكەمەسىنىڭ ٴۋاليى، شينجياڭ ۇيعۇر اۆتونوميالى رايوندىق حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى قاتارلى مىندەتتەردى تىرىسشاڭدىلىقپەن ٴوز شامامشا اتقاردىم. التاي ايماعىندا قىزمەت ىستەگەن 41 جىلدا، ايماقتىڭ ٴتۇرلى سالاداعى قىزمەتتەرىنە تەر توگىپ، رەفورما جۇرگىزىپ، ەسىك اشۋ، ەكونوميكانى دامىتۋ، حالىق تۇرمىسىن جاقسارتۋ قاتارلى جاقتارعا ٴوز ۇلەسىمدى قوستىم. مەن مەملەكەتتىك 13-كەزەكتى پارتيا قۇرىلتايىنىڭ ۋاكىلى، مەملەكەتتىك 8-كەزەكتى حالىق قۇرىلتايىنىڭ ۋاكىلى، ج،ك،پ شينجياڭ ۇيعۇر اۆتونوميالى رايوندىق 3-، 4-كەزەكتى قۇرىلتايىنىڭ ۋاكىلى، رايوندىق 5-، 6-، 7-، 8-، 9- كەزەكتى حالىق قۇرىلتايلارىنىڭ ۋاكىلى، ىلە قازاق اۆتونوميالى وبلىسىنىڭ 7-، 8-، 9- كەزەكتى حالىق قۇرىلتايلارىنىڭ ۋاكىلى بولدىم. حالىقتىڭ ارمان-تىلەگىن، پىكىر-تالاپتارىن جوعارىعا جەتكىزۋدە كوپىرلىك، دانەكەرلىك رول اتقاردىم. ال ارتىما قاراپ وتكەن ىستەرگە وي جۇگىرتسەم، حالىققا ىستەپ بەرگەن جۇمىستارىما قاراعاندا، پارتيانىڭ، حالىقتىڭ تالابىنا جەتكىزىپ ىستەي الماعان، قابىلەتىم، ويىم تايازدىق كورسەتكەن اتتەگەن-ايلار از ەمەس، ٴوزىمدى حالىققا قاشاندا قارىزدار اداممىن دەپ تۇسىنەمىن. ەگەر حالىق مىنا ىستەگەن ٴىسى جاقسى، انا سويلەگەن ٴسوزى دۇرىس بولعان دەپ قاراسا، ول پارتياعا ىلەسىپ، ماۋزىدۇڭ، دىڭ شياۋپيڭ قاتارلى كوسەمدەردىڭ تالىمدەرىنەن قۋات الىپ، پارتيانىڭ شۇعىلالى تاريحىن ۇيرەنۋدەن، شينجياڭنىڭ، التايدىڭ توڭكەرىسى مەن قۇرىلىسى، رەفورماسى مەن دامۋى جانە قوعامنىڭ باياندى تىنىشتىعى ٴۇشىن تەر توككەن الدىڭعى اعا بۋىندارعا ەلىكتەۋدەن، ۇقساپ باعۋدان بولدى دەپ قارايمىن. مەنىڭ ٴبىر عانا كوڭىل توقتىعىم بار، ول − پارتياعا ىلەستىم، سوتسياليزىم جولىندا تاباندى بولدىم، وتانىمدى حالىقتى ٴسۇيدىم، ۇلتتار ارا ىنتىماقتى، تاتۋلىقتى قورعادىم، پاك بولۋدى بويتۇمار ەتتىم، ۇيىمنان، حالىقتان ۇيالاتىن ٴىس ىستەمەگەندىگىم بولدى. مەنىڭ ٴومىر قورتىندىم: جۇڭگو كوممۋنيستىك پارتياسى بولماسا، مەنىڭ بۇگىنگى باقىتتى كۇندەرىمدە بولماس ەدى.

سەرىك راقىم ۇلى:  كەشەگىنى ايتپاي بۇگىنگى ەسكە تۇسپەيدى دەگەندەي، حالىقتىڭ ەڭسە كوتەرۋدەن - كەرەمەتتەر جاراتۋعا دەيىنگى تاريحىنا قايرىلا قاراپ، پارتيا تاريحىن ۇيرەنۋ ‐ وتكەننەن ٴنار قابىلداپ، سانانى سەرگەك ۇستاۋدىڭ اسا قاجەتتى تاربيە ساباعى. ەندەشە، پارتيانىڭ باۋلۋىندا ەسەيگەن از ۇلت كادرى رەتىندە پارتيامىزدىڭ كەشەگى كەشەندى تاريحىنا از-كەم ايالداساڭىز؟ 

قادىس ٴجانابىل ۇلى: باس شۋجي شي جينپيڭ بىلاي دەپ اتاپ كورسەتتى: پارتيامىزدىڭ 100 جىلدىعى-اۋەلگى ماقساتتى امالياتتا ايگىلەۋدى مۇرات ەتكەن 100 جىل، قاجىرلىلىقپەن شارۋاشىلىق قۇرىپ، نەگىز قالاپ، شارۋاشىلىقتى شالقىتقان 100 جىل، شۇعىلالى ناتيجە جاراتىپ، بولاشاققا داڭعىل جول اشقان 100 جىل. مەن جۇڭگو كوممۋنيستىك پارتياسىنىڭ كەشەگى تاريحى، جاپالى دا تاپقىرلىققا تولى، ەڭبەكشى حالىق ەڭسە كوتەرگەن تاريح، بۇگىنگى تاريحى دۇنيەنى جالت قاراتقان كەرەمەتتەر جاراتقان تاريح، ەرتەڭگى تاريحى وسى زاماندانۋدى بەتكە العان، قۇدىرەتتى ەل قۇراتىن، نۇرلى بولاشاققا جەتەلەيتىن تاريح دەپ تۇسىنەمىن. 

وتكەنگى تاريحقا كوز جىبەرسەك، پارتيامىز بۇكىل ەلدەگى ٴار ۇلت حالقىنا باسشىلىق ەتىپ، يمپەرياليزىمگە، فەوداليزمگە، بيۋروكرات كاپيتاليزمگە قارسى ۇزاق ۋاقىتتىق توڭكەرىستىك كۇرەس جۇرگىزۋ ارقىلى جاڭا دەموكراتيالىق توڭكەرىستىڭ جەڭىسىنە قول جەتكىزىپ، فەوداليزمنەن، شەت ەلدىڭ كەلەمەجدەۋىنەن، ەل ىشىندەگى كەرتارتپا كۇشتەردىڭ حالىقتى ەزۋىنەن، حالىقتى كەدەي، مەشەۋ حالدەن قۇتقارىپ، باي-باقىتتى تۇرمىسقا جەتكىزۋدىڭ جولىن ماركسيزمنەن، كوممۋنيستىك پارتيا جارناماسىنان تاپتى. 1921-جىلى جۇڭگو كوممۋنيستىك پارتياسى قۇرىلعاننان كەيىن، جۇڭگونىڭ جاڭا دەموكراتيالىق توڭكەرىسى دۇرىس جولعا ٴتۇستى. توراعا ماۋ زىدۇڭدى ۇيتقى ەتكەن پارتيا ورتالىعىنىڭ دۇرىس جولعا باستاۋىندا، 28 جىلدىق جاپالى كۇرەستى جوۋ ىنلاي، جۋ دى، ليۋ شاۋچي، دىڭ شياۋپيڭ قاتارلى پارتيا مەن ارميانىڭ ساقا باسشىلارى جانە ولارعا قولداۋشى بولعان اعا بۋىندار مەن ميلليونداعان قۇرباندار تاباندىلىقپەن قاندى توڭكەرىس جۇرگىزۋ ارقىلى ٴتوراعا ماۋزىدۇڭنىڭ «مىلتىقتان اكميات تۋادى»، «ۇشقىننان جالىن قاۋلايدى»، «اۋىل-قىستاق ارقىلى قالانى قورشاۋعا الۋ»، «پارتيزاندىق سوعىس جۇرگىزۋ» قاتارلى اسكەري ستراتەگيالىق يدەياسىنىڭ جەتەكشىلىگىندە، ۇزاق جورىقتى، جاپون شاپقىنشىلارىنا قارسى سوعىستى، ازاتتىق سوعىستى باستان كەشىرىپ، 1949-جىلى 10-ايدىڭ 1-كۇنى جۇڭحۋا حالىق رەسپۋبليكاسىن قۇردى. سول كۇننەن باستاپ، شينجياڭداعى ٴار ۇلت حالقىن ٴوز ىشىنە العان جۇڭگو حالىقى سوتسياليزم جولىنا ٴتۇسىپ، ەڭسە كوتەردى. سودان باستاپ 2011-جىلعا دەيىنگى، پارتيامىزدىڭ 90 جىلدىق تاريحىندا، امەريكاعا قارسى تۇرىپ چاۋشيانعا كومەكتەسۋ سوعىسىنىڭ جەڭىسىنە قول جەتكىزىپ، سوتسياليستىك وزگەرتۋ، سوتسياليستىك قۇرىلىس جۇرگىزۋ، تاجىريبەلەردى قورتىندىلاپ، يدەيانى ازات ەتىپ، شىندىقتى ٴىس جۇزىنەن ىزدەۋ، ەكونوميكالىق قۇرىلىستى وزەك ەتىپ، رەفورما جاساپ، ەسىك اشۋ، جالپىلىق مەنشىك نەگىزىندەگى كوپ ٴتۇرلى شارۋاشىلىقتى قاتار دامىتۋ، ەڭبەگىنە قاراي ٴبولىس جۇرگىزۋ، بازار ەكونوميكاسىن دامىتۋ قاتارلى جۇڭگوشا سوتسياليزم جولىمەن ٴجۇرىپ، حالىقتى اۋقاتتاندىرۋ، مەملەكەتتى كۇشەيتۋ جاپالى كۇرەسىن ماۋ زىدۇڭ يدەياسى، دىڭ شياۋپيڭ نازارياسى، «ۇشكە ۋاكىلدىك ەتۋ» ماڭىزدى يدەياسى، عىلمي دامۋ كوزقاراسىنىڭ دۇرىس جەتەكشىلىگىندە تابىستى ناتيجەلەر مەن تاماشا تاجىريبەلەر بارلىققا كەلدى. 

سەرىك راقىم ۇلى: قادىس اعا جوعاردا پارتيامىزدىڭ وتكەن تاريحىنا از- كەم ايال جاسادىق، ەندەشە مىناۋ باي – باقىتتى زاماندا پارتيامىزدىڭ بۇگىنگى باعىت- باعدارى جونىندەگى پايمىڭىزبەن تۇسىنگىڭىزدى اسىرەسە مۇنى ٴوزىڭىز كۋا بولعان شينجياڭنىڭ بۇگىنگى دامۋشىلىقتارىمەن بىرلەستىرە وتىرىپ اڭگىمەلەسەڭىز ؟

قادىس ٴجانابىل ۇلى: پارتيامىزدىڭ 18-قۇرىلتايىنان باستالعان بۇگىنگى 10 جىلدا، شي جينپيڭنىڭ جاڭا ٴداۋىر جۇڭگوشا سوتسياليزم يدەياسىنىڭ جەتەكشىلىگىندە، رەفورما جاساپ، ەسىك اشۋدى جالپى بەتتىك تەرەڭدەتۋ، «ٴبىر بەلدەۋ، ٴبىرجول»، ياعىني «جىبەك جولى ەكونوميكالىق بەلدەۋى» ىستىراتەگيالىق سەلبەستىك سەرىكتەستىگىن قۇرۋ جانە دامىتۋ، شىرىكتەسۋگە باتىل قارسى تۇرۋ، پارتيانى قاتاڭ باسقارۋ، ەل باسقارۋدىڭ زاڭىن، ٴتارتىپ-ەرەجەلەرىن كەمەلدەندىرۋ، ٴونىمدى دە، ۇتىمدى شارا قولدانىپ، جاڭا تيپتى ايدارشا ۆيرۋستىڭ تارالۋىن تەجەۋدە جانە ودان ساقتانۋدا دۇنيەگە ۇلگى كورسەتۋ، ادامزاتتىڭ تاعدىرلاس ورتاق تۇلعاسىن قۇرۋ، عىلىم-تەحنيكانى، ارميانى، مەملەكەت قورعانىسىن قۇدىرەتتەندىرۋمەن بىرگە قوعامداعى ەكونوميكانى نەگىز ەتكەن بارلىق سالانى كەمەلدەندىرۋ، كۇشەيتۋ، حالىقتى كەدەيلىكتەن ارىلتۋ، ٴبىرىنشى 100 جىلدىقتىڭ نىساناسى بولعان دوڭگەلەك داۋلەتتى قوعام قۇرۋ قاتارلى سالالاردىڭ بارلىعىندا جۇڭگوداعى ٴار ۇلت حالقىن قۋانىشقا بولەگەن تاريحتا بولماعان كەرەمەتتەر بارلىققا كەلدى. بۇگىنگى شينجياڭ باس شۋجي شي جينپيڭدى ۇيتقى ەتكەن پارتيا ورتالىق كوميتەتىنىڭ شينجياڭ قىزمەتى جونىندەگى 3-رەتكى اڭگىمە ماجىلىسىندە ورتاعا قويعان: شينجياڭدى زاڭمەن جونگە سالۋ، شينجياڭدى ىنتىماقتاسا ورنىقتىرۋ، شينجياڭدى مادەنيەتپەن نارلەندىرۋ، حالىقتى بايىتىپ شينجياڭدى گۇلدەندىرۋ، شينجياڭدى باياندى كوركەيتۋ دەگەن شينجياڭدى جونگە سالۋ جالپى جوباسىنىڭ ناقتىلى، ٴونىمدى، ىشكەرلەي تياناقتانۋىنىڭ ناتيجەسىندە، شينجياڭنىڭ قوعامى ورنىقتى، ەكونوميكاسى دامىعان، ٴار ۇلت حالىقى تاتۋ-ٴتاتتى، باقىتتى تۇرمىسقا قولى جەتكەن، كەدەيلىكتەن ارىلىپ، ورتاق اۋقاتتانۋعا، ورتاق گۇلدەنىپ دامۋعا قاراي بەت العان تاماشا جاعداي بارلىققا كەلدى.

باس شۋجي شي جينپيڭدى ۇيتقى ەتكەن پارتيا ورتالىق كوميتەتىمەن وسكەلەڭ ٴبىر اۋىزدىلىقتى ساقتاپ، ساپ تۇزەپ، «4 تانىمدى» كۇشەيتىپ، «4 سەنىمدى» بەكەمدەپ، «ەكىنى قورعاۋدى» باتىل ورىنداۋ بارلىق پارتيا مۇشەلەرى مەن جۇڭگوداعى بارلىق حالىقتىڭ ورتاق بورىشى دەپ بىلەمىن. مەن شي جينپيڭنىڭ 18-قۇرىلتايدان بەرگى سويلەگەن جەلىلەس سوزدەرىن كوڭىل قويىپ ۇيرەنەتىن ادەت قالىپتاستىرعان ەدىم. 2021-جىلى 1-ايدىڭ 1-كۇنىنەن باستاپ «ەل باسقارۋ جونىندەگى» 2 تومىنىڭ قازاقشا اۋدارما نۇسقاسىن ٴار كۇنى راديودا 20 مينۋتتان وقىلاتىن پروگرامماسىن كىتاپقا قاراپ ىلەسە تىڭداپ، ۇيرەندىم. وسىدان كەيىن، ٴتوراعا شي جينپيڭنىڭ ماڭىزدى سوزدەرى مەن بايىمداۋلارىنىڭ ماڭىزدىلىعىنا بولعان تانىمىم ٴتىپتى تەرەڭدەدى. كوزقاراسىنىڭ كەڭدىگى، يدەياسىنىڭ تەرەڭدىگى، جاڭا داۋىردەگى مەملەكەتتىڭ ٴىشى جانە حالىقاراداعى كۇردەلى جاعدايدى ٴتۇسىنۋ كورەگەندىگى، تاريحي تاجىريبە-ساباقتاردى قورىتىندىلاۋ قابىلەتى، بالا كەزىنەن باستاپ ۇيرەنۋ جانە حالىق ٴۇشىن ىستەۋ رۋحى، تەكتى توڭكەرىستىك سەميا تاريحى مەنى ەرەكشە قىزىقتىردى ٴارى تاڭ قالدىردى. 

مەنىڭ كوزقاراسىم: شي جينپيڭنىڭ جاڭا ٴداۋىر جۇڭگوشا سوتسياليزم يدەياسى − ماركسيزىم-لەنينيزىمنىڭ، ماۋ زىدۇڭ يدەياسىنىڭ، دىڭ شياۋپيڭ نازارياسىنىڭ، «ۇشكە ۋاكىلدىك ەتۋ» ماڭىزدى يدەياسىنىڭ، عىلمي دامۋ كوزقاراسىنىڭ جالعاستىرىلۋى جانە دامىتىلۋى. ونىڭ ماڭىزى تەرەڭ، نازاريالىق نەگىزى كۇشتى، جەتەكشىلىك رولى امالياتتا دالەلدەنگەن، حالىقتىڭ تىلەگىن بەينەلەيتىن، حالىق جۇرەگىنەن تەرەڭ ورىن العان بۇكىلدەي دۇرىس عىلىمي تۇجىرىم. پارتيامىزدىڭ 18-قۇرىلتايىنان بەرگى ەلىمىزدىڭ دۇنيەنى جالت قاراتقان ۇشان-تەڭىز تابىستارىنىڭ ناقتىلى امالياتى مىنانى ٴتۇسىندىردى: شي جينپيڭ ٴتوراعا جاڭا داۋىردە، دۇنيەنىڭ باستى تاقىرىبى بولعان بەيبىتشىلىك پەن دامۋعا، حالقاراداعى قيان-كەسكى، كۇردەلى دە، شيلەنىسكەن باسەكەلى جاعدايعا عىلىمي بولجاۋ جاساپ، تەڭدىك، بەيبىتشىلىك، دامۋ، ورتاق پايدا جەتكىزۋ قاتارلى ادامزاتتىڭ ورتاق تاعدىرى نەگىزىندەگى جۇڭگو جوباسىن جاسامپازدىقپەن ورتاعا قويىپ، دۇنيە ەلدەرىنىڭ القاۋى مەن قۇرمەتىنە بولەنىپ، مەملەكەتتى جونگە سالۋدىڭ ۇلگىسىنە اينالدى. مەن شي جينپيڭنىڭ جاڭا ٴداۋىر جۇڭگوشا سوتسياليزم يدەياسى − ماركسيزىمنىڭ نەگىزگى قاعيداسىن زامانىمىزداعى جۇڭگونىڭ امالياتىمەن عانا ەمەس، بۇكىل دۇنيەنىڭ امالياتى مەن دامۋ تالابىنا شەبەرلىكپەن ۇشتاستىرىلعان جاڭا داۋىردەگى دامىعان ماركسيزىم، ٴارى باس شۋجي شي جينپيڭدى پارتيا ورتالىعى مەن بۇكىل پارتيامىزدىڭ ۇيتقىسى، جۇڭگو حالقىنىڭ ۇلى كوسەمى دەپ تۇسىنەمىن.

سەرىك راقىم ۇلى: جوعاردا پارتيامىزدىڭ وتكەنى مەن بۇگىنىن ٴتول كەشىرمەلەرىڭىزبەن قابىستىرىپ وتە تارتىمدى اڭگىمەلەدىڭىز. ەندى وزىڭىزدەي كوپتى كورگەن تۇعىرلى تۇلعانىڭ بولاشاق جونىندەگى تولعاقتى تولعانىسىن تىڭداپ كورسەك؟

قادىس ٴجانابىل ۇلى: وتانىمىزدىڭ ەرتەڭگى بولاشاعى ۇمىتكە تولى بولاشاق. شي جينپيڭ جاڭا داۋىردەگى جۇڭگوشا سوتسياليزم يدەياسىنىڭ پارمەندى جەتەكشىلىگىندە 14-بەسجىلدىق جوسپاردان باستالعان ەكىنشى 100 جىلدىق كۇرەس نىساناسىنىڭ سوڭعى 30 جىلىندا 2035-جىلعا دەيىنگى 15 جىلدا ەلىمىزدى جاپپاي وسىزاماندانعان سوتسياليستىك مەملەكەت ەتىپ قۇرىپ شىعۋ نىساناسى بولسا، 2050-جىلعا دەيىنگى 15 جىلدا ەلىمىزدى باي، قۇدىرەتتى، دەموكراتيالى، وركەنيەتتى، جاراسىمدى سوتسياليستىك وسىزاماندانعان مەملەكەت ەتىپ قۇرىپ، جۇڭگو حالقى مەن جۇڭحۋا ۇلتىن اناعۇرلىم باقىتتى، يگىلىكتى تۇرمىسقا كەنەلتەمىز دەگەن نىسانا بەلگىلەدى. بۇل جۇڭگوداعى 56 ۇلتتى ٴبىر جاعادان باس، ٴبىر جەڭنەن قول شىعارىپ، نۇرلى بولاشاققا ۇمىتپەن قاراپ العا باسۋ جىگەرىن سومدايتىن، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىراتىن ۇزاق جورىعىمىز بولىپ تابىلادى. 

پارتيامىزدىڭ شۇعىلالى تايحىن ۇيرەنگەن سايىن، مەنىڭ پارتيالىلىعىم بارعان سايىن شىڭدالا تۇسەدى. ۇلى، داڭقتى، دۇرىس جۇڭگو كوممۋنيستىك پارتيسىنىڭ مۇشەسى بولۋ−مەنىڭ ماقتانىشىم.

سەرىك راقىم ۇلى: قادىرمەندى قادىس ٴجانابىل ۇلى اقساقال سەكسەننىڭ زەڭگىرىنە شىققان شاعىڭىزدا ارنايى ۋاقىت ٴبولىپ، سۇحپات بەرگەنىڭىزگە كوپتەن كوپ راحىمەت، سىزگە مىقتى دەنساۋلىق، ۇزاق عۇمىر تىلەيمىز! 

来源：中央广播电视总台

记者：赛力克

微信制作：古丽美热