قۇرمەتتى تىڭدارمان قاۋىم، بۇگىن 4-ايدىڭ 20-كۇنى سەيسەنبى، اۋەلى ەل ٴىشى جانە حالىقارالىق حابارلار توپتاماسىن تىڭدايسىزدار، سوڭىنان حالىقارالىق قولامتالى تۇيىنگە قۇلاق تۇرىڭىزدەر.

您的浏览器不支持 audio标签

※سىرتقى ىستەر مينيسترلىگىنىڭ مالىمدەمەشىسى جاپونيا مەن ا ق ش باسشىلارىنىڭ جۇڭگوعا قاتىستى مالىمدەمەسىنىڭ مازمۇنىنا قاراتا 4-ايدىڭ 19-كۇنى بىلاي دەدى: جاپونيا مەن ا ق ش كىسىلىك ۇقىق ماسەلەسىن جەلەۋ ەتىپ، باسقا ەلدەردى قارالاپ، باسقا ەلدىڭ ورنىقتىلىعىن ٴبۇلدىرىپ، وزگە ەلدەردىڭ دامۋىن شاۋجايلاماقشى، بۇعان جۇڭگو حالقى دا، دۇنيە ٴجۇزى حالقى دا قوسىلمايدى. 

※مەملەكەتتىك دامۋ جانە رەفورما كوميتەتى 4-ايدىڭ 19-كۇنى بىلاي دەدى: ناپوسقا قوندىرىلماعان 100 ميلليون ادامدى قالاعا قونىستاندىرۋ نىساناسى ٴساتتى ورىندالدى. 2020-جىلدىڭ سوڭىندا تۇراقتى جان سانىنىڭ قالا-قالاشىقتانۋ مولشەرى %60 تەن اسىرىلىپ، نوپوستاعى تۇرعىنداردىڭ قالا-قالاشىقتانۋ مولشەرى %45.4 كە جوعارىلاتىلادى. 

※وقۋ-اعارتۋ مينيسترلىگى تاياۋدا ۇقتىرۋ تاراتىپ، ورتا، باستاۋىش مەكتەپ وقۋلىقتارىندا قوسىمشا ماتەريالدار جونىندەگى جالعانىم، ەكى ولشەمدى كود سياقتى ينفورماتسيالاردى جارنامالاۋعا بولمايدى،-دەدى. 

※وقۋ-اعارتۋ مينيسترلىگى تاياۋدا وقىتۋشىلاردىڭ كاسىپتىك ارەكەتىنىڭ 10 ءتۇرلى ولشەمىنە قايشى 8 تيپتىك ماسەلەنى اشىق جاريالادى. 

※حىبەي ولكەلىك ۇكىمەت 4-ايدىڭ 19-كۇنى شىجياجۋاڭ، حاندان، شينجي قاتارلى جەرلەردىڭ بەلگىلەمەگە قايشىلىق جاساپ، جاڭا ايدارشا ۆيرۋس ۆاكسيناسىن ەگۋ اقىسىن الۋ ماسەلەسىن ٴبىر جاقتى ەتۋ ناتيجەسىن حابارلاندىردى، ٴارى قاتىستى قاراجاتتاردىڭ قايتارىلعاندىعىن، سونىمەن بىرگە باقىلاۋ تەبىنىن ارتتىرىپ، وسى تەكتەس قۇبىلىستاردىڭ قايتالاي تۋىلۋىنان ساقتاناتىندىعىن ايتتى. 

※«بەيجيڭ ۋنيۆەرسيتەتى 3-شيپاحاناسى وسپە ىشكى اۋرۋلار شيپاگەرىنىڭ وسپە اۋرۋىن ەمدەۋدەگى قۇپيالىقتى اڭىس ەتۋ» ۋاقيعاسىنا قاراتا، مەملەكەتتىك دەنساۋلىق ساقتاۋ، سالاماتتىق كوميتەتى 4-ايدىڭ 19-كۇنى حابارلاندىرۋ شىعارىپ، تەكسەرۋ جۇرگىزىپ، زاڭ-ەرەجە بويىنشا قاتاڭ ءبىر جاقتى ەتكەندىگىن ايتتى. 

※مەملەكەتتىك عارىش مەكەمەسى 2021-جىلعى «جۇڭگو عارىش كۇنىنىڭ» باستالۋ سالتى 4-ايدىڭ 24-كۇنى وتكىزىلەتىندىگىن جاريالادى. سول كەزدە ەلىمىزدەگى تۇڭعىش مارىس كولىگىنىڭ اتى جاريالانادى. 

※ونەركاسىپ جانە ينفورماتسيالاندىرۋ مينيسترلىگىنىڭ جاۋاپتىسى بىلاي دەدى: ەلىمىز دۇنيە ٴجۇزى بويىنشا ەڭ كولەمدى ينفورماتسيا حابارلاسۋ تورابىن قۇردى، كەزەكتە 5G قولفون تەرمينالىنىڭ جالعانۋ سانى 260 ميلليونعا جەتتى. بيىل ورتا، شاعىن كاسىپورىنداردىڭ كەڭ ايالى تورابى مەن ارناۋلى جەلىسىنىڭ ورتاشا اقىسى تاعى دا %10 تومەندەيدى.

※ورتالىق ٴتارتىپ تەكسەرۋ كوميتەتى، مەملەكەتتىك باقىلاۋ-تەكسەرۋ كوميتەتىنىڭ حابارىنا قاراعاندا، مەملەكەتتىك دامۋ بانكەسىنىڭ بۇرىنعى اينالىم باس باقىلاۋشىسى جاڭ ماۋلۇڭ تارتىپكە، زاڭعا اۋىر قايشىلىق جاساعان دەگەن كۇمانمەن قازىر ٴتارتىپ تەكسەرۋى مەن باقىلاۋ-تەكسەرۋدى قابىلداۋدا. 

※ساۋدا مينيسترلىگى، قوعام حاۋىپسىزدىگى مينيسترلىگى قاتارلى 3 تاراۋ تاياۋدا شارا بەلگىلەپ، وتكەرمەلى اۆتوكولىكتەردى باسقا جەردە ساۋدالاۋدى ولكە اتتاپ ٴبىتىرۋدى جەدەلدەتتى. 

※4-ايدىڭ 18-كۇنى موڭعۇليادا جايىلىمعاٴورت كەتتى، ىلە-شالا ٴورت ەلىمىزدىڭ ىشكى موڭعۇل اۆتونوميالى رايونى شيلينعول ايماعىنداعى جۇڭگو-موڭعۇليا شەكاراسىنىڭ ماڭىنا تۇتاستى. 4-ايدىڭ 19-كۇنىنە دەيىن ەلىمىز شەكاراسىنا جاقىن ٴورت تۇگەلدەي ٴوشىرىلدى، موڭعۇليا شەكاراسى ىشىندە دە ٴورت ٴوشىرىلدى.

※ورتالىق اۋا رايى ستانسياسىنىڭ مەجەسىنشە، 4-ايدىڭ 20-كۇنى ساعات 20عا دەيىن شينجياڭنىڭ سولتۇستىگىندە، شيزاڭنىڭ شىعىس مەن سولتۇستىگىندە، چيڭحايدىڭ شىعىسىندا ازىراق نەمەسە ورتاشا قار جاۋادى؛ باتىس سولتۇستىكتىڭ شىعىس وڭتۇستىگى، حۋاڭحى-حۋايحى وزەنىنىڭ باتىسى، چاڭجياڭنىڭ وڭتۇستىگىنىڭ باتىسى، باتىس وڭتۇستىك رايوننىڭ شىعىسى، وڭتۇستىك جۇڭگونىڭ سولتۇستىگى مەن باتىسى قاتارلى جەرلەردە ورتاشا جاڭبىر جاۋادى. 

※چەحتىڭ رەسەيدىڭ چەحتەگى باس ەلشىلىگىنىڭ قىزمەتكەرلەرىن قۋىپ شىعاتىندىعىن جاريالاۋىنا مەڭزەس، رەسەي سىرتقى ىستەر مينيسترلىگى 4-ايدىڭ 18-كۇنى حابارلاندىرۋ شىعارىپ، چەحتىڭ 20 دەپلوماتىن قۋىپ شىعاتىنىن جاريالادى. 

※رەسەي قورعانىس مينيسترلىگىنىڭ حابارىنا قاراعاندا، جەرگىلىكتى ۋاقىت 4-ايدىڭ 19-كۇنى رەسەي ارمياسى سولتۇستىك ۇيەك رايونىندا كەڭ كولەمدى اسكەري مانەۆر وتكىزگەن. 

※جاپونيا قازىنا مينيسترلىگى 4-ايدىڭ 19-كۇنى جاريالاعان ساندى مالىمەتتە كورسەتىلۋىنشە، جاڭا تيپتى ايدارشا ۆيرۋس ىندەتىنىڭ ىقپالىنان جاپونيانىڭ 2020 قازىنا جىلىندا ەكسپورت سوماسى وتكەن قازىنا جىلىنان %8.4 تومەندەگەن. 

※جۇڭگو جەر سىلكىنىسىن باقىلاۋ ستانسياسى تورابىنىڭ باقىلاۋىنا قاراعاندا، 4-ايدىڭ 20-كۇنى ساعات 7 دەن 58 مينۋت وتكەندە يندونەزيانىڭ سۋماترا ارالىنىڭ باتىس تەڭىز ايدىنىندا 5.9 بال جەر سىلكىنىپ، سىلكىنىس تەرەڭدىگى 10 كيلومەترگە جەتكەن. 

您的浏览器不支持 audio标签

ديپلومات قۋالاۋدان تۋىنداعان حالىقاراداعى قاتپارلى قاقتىعىس

ا ق ش پەن رەسەيدىڭ ٴبىر-بىرىنىڭ ديپلوماتتارىن قۋالاۋ جانە قاتىستى ادامدارعا جازا قولدانۋ ارەكەتى حالىقاراداعى قاتپارلى قاقتىعىستاردى كومەسكىدەن كورنەۋگە الىپ شىقتى، وسىدان ىلە-شالا پولشا مەن چەح ٴدۇلدارازدىق دۇرمەككە قوسانجارلاي قوسىلىپ رەسەي ديپلوماتتارىن قۋدى، ال رەسەي بۇعان عازاپتانا قارسى تۇردى؛ ۋكراينا مەن رەسەي اراسىندا دا ەلدەر ارا ەگەس قوزدادى. 

وسىنداي ديپلومات قۋالاۋ دەرەكتەرىنەن رەسەي مەن ا ق ش-ەۆروپا اراسىنداعى ايقاستىڭ اسقىنىپ بارا جاتقانىن، ەكى جاق اراسنداعى ەرەگەستىڭ ۋكراينانىڭ شىعىسىنداعى شىرىقتى بۇزعان شىرما-شاتۋ ۋاقيعالاردى مۇرىندىق ەتە مۇزداعان جاراعا تۇزداعان شارا دەگەندەي بايقاسۋدان شايقاسۋعا وتە باستاعاندىعىن كورۋگە بولادى. ايقاستىڭ اساباسى بولعان ا ق ش وسى ايدىڭ 15-كۇنى رەسەيدىڭ 10 ديپلوماتىن قۋىپ شىقتى جانە رەسەيگە زور كولەمدە جازا قولدانعان، ىلە-شالا رەسەي دە سوقتىققانعا سويىل قايتارىپ، ا ق ش ديپلوماتتارىن قۋىپ سالعان جاعدايدا، ەۋروپادان ەلەۋرەي قوزعالعان چەح پەن پولشانىڭ ايقاسقا ايقاي قوسۋى رەسەي مەن باتىستىقتاردىڭ ايقاسىندا وتقا ماي قۇيعانمەن بىردەي ەكەندىگى ايتپاسا دا تۇسىنىكتى بولدى. 

پولشانىڭ ساياسي ساراپشىلاردى بىلاي دەپ انىق ايتتى: ناتوعا مۇشە ەل رەتىندە پولشا ەڭ الدىمەن سەكىرىپ شىعىپ، ا ق ش-تىڭ سويىلىن سوقتى. مۇنداعى ماقسات- بايدەن ۇكىمەتىنە جارامساقتانىپ، پولشا- ا ق ش وداقتاستىق قاتىناسىن قورعاۋ بەكىمىن كورسەتۋ جانە ا ق ش پەن رەسەيدىڭ ايقاسىندا پولشانىڭ ماڭىزدى رول اتقاراتىندىعىن اڭعارتۋ بولىپ تابىلادى. 

ورتاعا ويقاستاپ شىعىپ، وتقا ماي قۇيۋشىلاردىڭ ٴبىرى بولعان چەح مەملەكەتىنىڭ ەل ىشىندە الپاۋىتتاردىڭ ايقاسىنا ارالاسپاۋدى دارىپتەۋشىلەر از ەمەس. ٴبىر ٴبولىم ادامدار چەح پەن رەسەيدىڭ داۋىن ەۆروپا وداعىنىڭ جانە ناتونىڭ تالقىسىنا سالۋدى دارىپتەسە، ٴبىر ٴبولىم ادامدار رەسەيمەن اراداعى قايشىلىقتى شيەلەنىستىرە بەرۋ چەحتىڭ ماي وكشەسىنە شەگە قاققانمەن بىردەي بولىپ، ولەتىن بالا بەيتكە قاراي قاشادى دەگەن اياعىن قۇشتىرادى دەپ الاڭداۋدا.

ٴۇپ ەتكەن جەل تۇرسا ٴدۇر ەتىپ وت شىققالى تۇرعان جاعدايدا، ۋكراينانىڭ شىعىسى دونباس رايونىنداعى دومبىققان جارانىڭ اۋىزىن تىرناۋشىلار رەسەيدىڭ ۋكراينامەن شەگارالاسقان وڭىرگە اسكەر توپتاۋى ەۋروپانىڭ حاۋىپسىزدىگىنە قاتەر ٴتوندىردى دەگەن دابىرا تۋعىزىپ، قولامتاعا كومىلگەن شوقتى جەل ۇرلەگەندەي جەلىكپە جاعدايدى اسقىندىرۋعا جانتالاسۋدا.

ساراپشىلار مىنانى انىق ايتتى: وسىنداي جاعدايدا كەيبىر باتىس ەلدەرى رەسەيدىڭ سىرتقى ىستەر ٴمانساپتىلارىن قۋىپ شىعۋ ارقىلى ناتونىڭ رەسەيگە ىنتىماقتاسا قارسى تۇرۋ بەكىمىن ايگىلەۋدى ماقسات ەتىپ وتىر، سونىمەن بىرگە دايىندىق جۇمىستارى ىستەلىپ جاتقان رەسەيدىڭ ۋكراينا-گەرمانيا-فرانسيا ەلدەرىنىڭ «نورمانديا ۇلگىسىندەگى» باسشىلار باس قوسۋىندا جانە بولاشاقتا وتكىزىلۋى مۇمكىن بولعان ا ق ش-رەسەي پرەزيدەنتتەر كەزدەسۋىندە ىرىقتى ورىنعا شىعىپ، رەسەيدى ۋكراينا ماسەلەسىندە جول بەرۋگە ماجبۇرلەۋدى كوزدەپ وتىر. 

رەسەيدىڭ ساياسي باقىلاۋشىسى ستاريكوۆ بىلاي دەدى: قازىر دونباس رايونىنىڭ جاعدايى توتەنشە اۋىر، ا ق ش قاتارلى ەلدەردىڭ جەلىكتىرۋىندە جەڭىن ٴتۇرىپ، بىلەگىن سىبانا تۇسكەن ۋكراينا اسكەري جاقتىڭ ارەكەت قولدانۋعا باتىلى بارۋ مۇمكىندىگىن جوققا شىعارمايمىز. 

انگليانىڭ اقىل-پاراسات قويماسى حالىقارالىق ستراتەگيانى زەرتتەۋ ورنىنىڭ اعا زەرتتەۋشىسى نەجەر گۋد دەۆيس قاقتىعىستىڭ اسقىنۋ مۇمكىندىگى راسىندا ٴومىر ٴسۇرىپ وتىر دەپ قارايتىندىعىن اڭعارتتى. ول سونىمەن بىرگە بىلاي دەپ اتاپ اشىق ايتتى: قازىر مەيلى ا ق ش پەن ەۆروپا وداعى اراسىندا بولسىن، الدە ەۆروپا وداعىنىڭ ىشكى بولەگىندە بولسىن، رەسەي جونىندە بىرلىككە كەلگەن ساياسات قالىپتاسىپ ۇلگىرگەن جوق. مىسالى، ا ق ش پەن انگليا رەسەي ارمياسىنىڭ ارەكەتىنە ەرەكشە كوڭىل بولەتىندىگىن ٴبىلدىردى، ال گەرمانيا مەن فرانسيانىڭ قاتىستى مالىمدەمەلەرىندە اۋەندەرى سالىستىرمالى تۇردە باسەڭدەدى. ا ق ش پەن كەيبىر شىعىس ەۆروپا ەلدەرى ەۆروپانىڭ رەسەيگە ەنەرگيامەن قامداۋ جاعىندا يەك سۇيەگىشتىگى ارتۋدان الاڭداپ، «بەيشي-2» تابيعي گاز قۇبىرى نىسانىنا قارسى تۇردى، ال گەرمانيا وسى ەكونوميكالىق نىساندى ساياسي ماسەلەمەن شاتاستىرماۋدى دارىپتەدى.

ەۆروپا ەلدەرىنىڭ اقىلماندارى ورتاعا قويعان وسى ايدىڭ 15-كۇنى جايالانعان «سەلبەستىك حاۋىپسىزدىك دارىپتەمەسىندە» بىلاي دەپ اشىق ايتىلدى: ەۆروپا ەلدەرىندە قازىر قارسىلاستىق قاتايىپ، قاتەر كۇن سايىن ارتۋدا. ەۆروپانىڭ حاۋىپسىزدىك مۇددەسىن قورعاۋ ٴۇشىن، مەملەكەتتەر ارا ٴبىرىن-ٴبىرى قۇرمەتتەۋى، ٴمان-ماعىنالى سۇحپات وتكىزۋ اۋاداي قاجەت بولىپ وتىر. 

来源：中央广播电视总台

播音：巴拉潘、古丽娜尔

微信制作：古丽美热