ءجۇز ءبولىمدى شاعىن قۇجاتتى فيلم ‐ قىزىل ارحيۆ

قۇربان بولعان ىنىلەرىنىڭ سەگىز بالاسىن پىڭ دىحۋاي قالاي تاربيەلەدى؟

ەلۋدى ەڭسەرگەن پىڭ دىحۋايدىڭ قاسىندا ٴبىر توپ بالا پايدا بولادى. بىلىكتىگە جاقىن بولساڭ دا «پايداكوستىكتەن» اۋلاق بولۋ وسى وتباسىنىڭ جۇرتتان وزگەشە سالتى ەدى.

1950-جىلى 2-ايدا باتىس تەرىستىكتە اسكەري رايوننىڭ قولباسشىسى بولعان پىڭ دىحۋاي ج ك پ ورتالىق كوميتەتى ۇيىمداستىرۋ ٴبولىمىنىڭ بەيجيڭنەن جولداعان تەلەگرامماسىن تاپسىرىپ الادى. تەلەگراممادا بالالاردىڭ وقۋ ماسەلەسى دەپ نەبارى جەتى اۋىز ٴسوز جازىلعان بولاتىن.

[ورتالىق ۇيىمداستىرۋ ٴبولىمىنىڭ پىڭ دىحۋايعا نەمەرە ۇل-قىزدارىنىڭ وقۋ ماسەلەسى تۋرالى جولداعان تەلەگرامماسىنان الىندى]

‐ پىڭ دىحۋاي جولداس، ٴسىزدىڭ نەمەرە ۇل-قىزدارىڭىز مەيكۇي، حۇيباڭ، حىلان، يۇيلان، جىڭشياڭ بەسەۋى بەيجيڭگە كەلدى. ولار ٴسىزدىڭ قاسىڭىزعا بارىپ وقي ما الدە بەيجيڭدە وقي ما، بۇعان قالاي قارايسىز، جاۋابىڭىزدى كۇتەمىز.

تەلەگراممادا ايتىلاتىن وسى وقۋ جاسىنداعى بالالاردىڭ بارلىعى پىڭ دىحۋايدىڭ ەكى ٴىنىسىنىڭ بالالارى بولاتىن.

1940-جىلى پىڭ دىحۋاي تەرىستىك جۇڭگودا ٴجۇز تۋاندىق ٴىرى شايقاسقا قولباسشىلىق ەتىپ، جاپون قاراقشىلارىمەن ايقاسىپ جاتقاندا گومينداڭ كەرتارتپاشىلارى پىڭ دىحۋايدىڭ اۋىلى حۋنان شياڭتاندا ونىڭ تۋىس-تۋعاندارىنا ۋلى شەڭگەلىن سالادى. ٴبىركۇنى تۇندە ەكىنشى ٴىنىسى پىڭ رۇڭحۋا ۇيىندە قاستاندىققا ۇشىراپ، ۇلكەن ٴىنىسى پىڭ جينحۋا تۇتقىندالىپ، بىرنەشە كۇننەن كەيىن ايانىشتى تۇردە ولتىرىلەدى. پىڭ جينحۋادان ٴبىر ۇل ٴبىر قىز، پىڭ رۇڭحۋادان التى بالا قالادى. پىڭ دىحۋايدىڭ ٴوز كىندىگىنەن بالا جوق ەدى، ول ىنىلەرىنەن قالعان نەمەرە ۇل-قىزدارىنا باۋىر ەتى بالاسىنداي مەيىرىممەن قارايتىن. ٴبىراق بىرنەشە كۇننەن كەيىن ورتالىق ۇيىمداستىرۋ بولىمىنە جولداعان جاۋاپ تەلەگرامماسىندا پىڭ دىحۋايدىڭ بىلاي جاۋاپ ايتارىن ەشكىم كۇتپەگەن ەدى.

[پىڭ دىحۋايدىڭ نەمەرە ۇل-قىزدارىن ورنالاستىرۋ ماسەلەسى تۋرالى ورتالىق ۇيىمداستىرۋ بولىمىنە جولداعان تەلەگرامماسىنان الىندى]

‐ ورتالىق ۇيىمداستىرۋ ٴبولىمى، نەمەرە ۇل-قىزدارىمدى سول جەرگە جاقىن مەكتەپتەردىڭ بىرىنە وقۋعا بەرىڭىزدەر، جەتەلى ۇرپاقتى اۋىلىنا قايتىپ ەگىن سالۋعا ٴماجبۇرلەمەڭىزدەر، سىزدەردى اۋرەلەدىم.

قىسقا عانا سوزدەردەن پىڭ دىحۋايدىڭ ٴارقانداي ەرەكشە قامقورلىق جاساۋدى تالاپ ەتپەگەنىن كورۋگە بولادى. ەرەكشەلەنبەۋ وسى قاتال اتانىڭ نەمەرەلەرىنە وتكەن العاشقى ساباعى ەدى. سودان بىرنەشە ايدان كەيىن پىڭ دىحۋاي بەيجيڭدە نەمەرە ۇل-قىزدارىمەن قاۋىشىپ، وسى ٴبىر توپتىق سۋرەتكە تۇسەدى. ەلۋدى ەڭسەرگەن پىڭ دىحۋاي ىنىلەرىنەن قالعان بالالاردى ٴوز بالاسىنداي كورىپ، ولارمەن تىڭنان وتباسىن قالىپتاستىرادى.

1955-جىلى جۇڭگو حالىق ازاتتىق ارمياسى اسكەري اتاق ٴتۇزىمىن اتقارادى. سول جىلى 11-ايدىڭ باسىندا جۇڭگو حالىق ازاتتىق ارمياسى اسكەري ىستەر ينجەنەريا شۋەيۋانىنا وقۋعا كەلگەن كۋرسانتتار تۇگەل اسكەري شەن تاعىپ قۋانىپ قالادى. ٴبىراق پىڭ دىحۋايدىڭ نەمەرە ۇلى پىڭ چيچاۋ جابىرقاۋلى ەدى. ويتكەنى وعان جۇڭۋي اسكەري شەنى بەرىلگەن بولاتىن. وزىمەن قىزمەت كەشىرمەسى بىردەي باسقا جولداستارعا قاراعاندا ونىڭ شەنى ٴبىر دارەجە تومەن ەدى.

اتاسى پىڭ دىحۋاي ٴوزىنىڭ شەنىن تومەندەتكەنىن بىلگەننەن كەيىن پىڭ چيچاۋ بۇلقان-تالقان بولىپ اشۋلانادى. ال پىڭ دىحۋاي بولسا نەمەرەسىنە مۇنىڭ سەبەبىن بايىپتىلىقپەن تۇسىندىرەدى.

[پىڭ دىحۋاي نەمەرە ۇلى پىڭ چيچاۋعا جازعان حاتتان الىندى]

‐ چيچاۋ، سەن پىڭ اۋلەتىنىڭ مۇشەسىسىڭ، سوندىقتان پىڭ اۋلەتىنىڭ وتباسى سالتىنا بويسۇنۋىڭ كەرەك، ٴارقانداي ۋاقىتتا پاك، ادال، تۋراشىل بولۋىڭ ٴتيىس. توڭكەرىس جولىندا قۇربان بولعان بوزداقتاردى ويلاشى، سوندا يىعىڭداعى بارماقتاي شەنىڭنىڭ كوپ ٴيا از بولعانى ٴۇشىن وسىلاي مازاڭ كەتە مە؟ ەل اۋزىندا بال ۇستاعان بارماعىن جالايدى دەگەن ناقىل بار ەمەس پە، ٴبىراق مەنىڭ قاسىمدا بولادى ەكەنسىڭ، وندا بۇل جوسىندى وزگەرتۋىڭ كەرەك، قايتا بىلىكتىگە ارقالانىپ پايدا قۋما دەگىم كەلەدى. بالكىم بۇل ٴسوزىمنىڭ توركىنىن قازىرشە تۇسىنبەسسىڭ، ٴبىراق ۋاقىت وتە كەلە اتاڭنىڭ ايتقاندارى تەككە ەمەس ەكەنىن اڭعاراتىن بولاسىڭ.

چيچاۋ اسكەري شەن العان جىلى مەملەكەت پەن ارمياداعى كادرلارعا ەڭبەكاقى ٴتۇزىمى اتقارىلادى. بۇرىننان بەرى قامداۋ تۇزىمىنەن يگىلىكتەنىپ كەلە جاتقان كادرلار بالالارىنىڭ وقۋ قاراجاتىن ەندى وتباسى تولەيتىن بولادى. ٴبىراق مەملەكەتتىڭ بەلگىلەمەسى بويىنشا، قۇرباندار پەرزەنتتەرىنىڭ وقۋ قاراجاتىن مەملەكەت كوتەرەتىن. سول كەزدە بەيجيڭ پەداگوگيكا داشۋەسىنە قاراستى قىزدار ورتا مەكتەبىندە وقيتىن نەمەرە قىزى پىڭگاڭ ۇيگە ورالعاندا مەكتەپ باسشىسى قۇرباندار وتباسىنا جازعان تۇسىنىكتەمە حاتتى الا كەلەدى. پىڭ دىحۋاي بۇدان حابار تاپقاننان كەيىن مەكتەپكە بىلاي دەپ حات جازادى:

‐ وقۋ-قاراجاتىن مەملەكەت ەمەس، مەن ٴوزىم تولەيمىن.

پىڭ دىحۋاي ٴتۇسىندىرىپ بىلاي دەيدى:

‐ قازىر مەملەكەتتىڭ قيىنشىلىعى اۋىر، اقشا جۇمسايتىن جەرلەر وتە كوپ، ٴبىز ازدا بولسا مەملەكەتتىڭ جۇگىن جەڭىلدەتۋگە ٴتيىسپىز.

وسىدان باستاپ ول نەمەرە بالالارىنىڭ وقۋ-قاراجاتىن ولار داشۋەگە تۇسكەنشە ٴوزى تولەيدى.

وسىلايشا پىڭ دىحۋايدىڭ ىقپالىمەن نەمەرە ۇل-قىزدارى تارتىپكە قاتاڭ بويسۇنىپ، ەرەكشەلەنبەيدى، مەملەكەتكە الاقان جايمايدى. 1958-جىلى پىڭ دىحۋاي شي-انعا قىزمەت تەكسەرە بارعاندا شي-ان اسكەري بايلانىس ينجەنەريا شۋەيۋانىندا قىز وقۋشىلاردىڭ بار ەكەنىن كورىپ، كەلگەن سوڭ پىڭگاڭعا بىلاي دەيدى:

‐ ساعان ارمياعا قاتىناسۋعا مۇمكىندىك تۋدى، ەمتيحانعا قاتىناس.

پىڭگاڭ بولسا مۇنى ەستي سالىپ بىلاي دەيدى:

‐ مەن ەمتيحان تاپسىرىپ وتسەم وقيمىن، وتپەسەم وقىمايمىن، ٴسىزدى قولقالاپ وڭاي جول تابۋدى قالامايمىن.

كەيىن پىڭگاڭ ارمياعا قاتىناسىپ، شاۋجياڭ دارەجەلى اسكەري قىزمەتكەر بولادى. ول تۋراشىل دا باتىل بولىپ، جۇمىستى ادال ىستەپ، پىڭ دىحۋايدىڭ ٴوزى مەن باۋىر-سىڭىلىلەرىنە ايتقان تاربيەسىن ەشقاشان جادىنان شىعارمايدى.

[پىڭ دىحۋاي نەمەرە ۇلى پىڭ چيچاۋعا جازعان حاتتان الىندى]

‐ يدەيادا، قىزمەتتە وزىڭە جوعارى تالاپ قويىپ، سوعان ۇمتىل، ۇنەمى پارىقتاردى ىزدە، سويتسەڭ ٴوزىڭنىڭ باسقالاردان كەم جەرلەرىڭدى بايقايسىڭ، وندايدا كىشپەيىل بولىپ ۇيرەنسەڭ ۇزدىكسىز العاباساسىڭ. تۇرمىستا ولشەمىڭ تومەن بولسىن، اسىرەسە 500 ميلليوننان اساتىن ديقان جۇرتشىلىعىنا قارا، وستىسەڭ قاناعات ەتەسىڭ. ٴسۇيتىپ بىرگە قۇلشىناسىڭ.

پىڭ دىحۋاي مىنە وسى ۇلكەن وتباسىندا بالالاردى ەرەكشە جولمەن ماپەلەپ وسىرەدى، ولارعا ادامنىڭ بارلىعى تەڭ ەكەنىن، ەرەكشە ۇقىققا ۇمتىلماۋدىڭ ٴجونىن بالا كەزىنەن ٴتۇسىندىرىپ  ەرجەتكىزەدى. تۋراشىل دا ادال بولۋ، ەرەكشەلەنبەۋ سىندى «پىڭ شاڭىراعىنىڭ سالتى» كۇنى بۇگىنگە دەيىن جىرلانىپ كەلەدى.

来源：央视新闻

视频制作：赛里克江，海纳尔

微信制作：古丽美热

تومەندەگى 阅读原文 جالعانىمىن باسىپ حاباردىڭ تۇنىق كەسكىندى نۇسقاسىن كورىڭىزدەر