ينفورماتسيا اشكەرەلەۋ: mzjubao@cnr.cn

ٴتۇيىندى تۇعىر

ەڭبەكاقى ءوسىرۋدىڭ جەتەكشى شەگى جاريالاندى

来源:央广网     |责编:古丽美热·霍孜汗|     发布日期: 2021-09-13 08:35

ەڭبەكاقى ءوسىرۋدىڭ جەتەكشى شەگى جاريالاندى

كوپتەگەن جەرلەر 2021-جىلعى كاسىپورىنداردىڭ ەڭبەكاقى جەتەكشى شەگىن جاريالادى

جۋىقتا سانشي ولكەسى ەڭبەكاقىنىڭ جەتەكشى شەگىن جاريالادى، تولىقسىز ساناققا قاراعاندا، بيىل جىل باسىنان بەرى سانشي، شاندۇڭ، جياڭشي، شانشي، تيانجين قاتارلى 7 ولكە، اۆتونوميالى رايون، توتە قاراستى قالا 2021-جىلعى كاسىپورىنداردىڭ ەڭبەكاقى جەتەكشى شەگىن جاريالاعان. مۇندا نازار اۋدارۋعا تاتيتىن ءبىر ءىس ـ كوپتەگەن جەر ەڭبەكاقى جوعارعى شەگىن بەلگىلەمەگەن.

 

كاسىپورىنداردىڭ ەڭبەكاقى جەتەكشى شەگى ءتۇزىمى دەگەنىمىز ۇكىمەتتىڭ سول جىلعى ەكونوميكالىق دامۋدى تىزگىندەۋ نىساناسىنا ساي، كاسىپورىندارعا باعىتتاپ جاريالايتىن جىلدىق ەڭبەكاقىنى ءوسىرۋ ورەسى جونىندەگى ۇسىنىسى. ول ولشەمدى شەك، جوعارعى شەك (ساقتىق شەگى دەپ تە اتالادى) جانە تومەنگى شەكتەن قۇرالادى. وندا ماجبۇرلەپ تەجەۋ كۇشى بولمايدى، الايدا، كاسىپورىندار جۇمىسشى-قىزمەتشىلەرمەن ەڭبەكاقى تۋرالى كوللەكتيۆ كەڭەس وتكىزگەندە، سونداي-اق، كاسىپورىندار ەڭبەكاقىنىڭ ءوسۋ ورەسىن تۇراقتاندىرعاندا ونى پايدالانۋ نەگىزى ەتۋگە بولادى.

 

1

كوپتەگەن جەرلەر كاسىپورىنداردىڭ ەڭبەكاقى جەتەكشى شەگىن جاريالادى

 

جۋىقتا سانشي ولكەسى 2021-جىلعى كاسىپورىنداردىڭ ەڭبەكاقى جەتەكشى شەگىن جاريالادى، ولشەمدى شەگى %8، جوعارعى شەگى %12، تومەنگى شەگى %4 ەكەن. ەڭبەكاقى جەتەكشى شەگى سانشي ولكەسىندەگى بارلىق كاسىپورىندا قىزمەت ىستەپ جاتقان جۇمىسشى-قىزمەتشىنىڭ ەڭبەكاقى بولىسىنە قولدانىلاتىن بولىپ، جۇمىسشى-قىزمەتشىلەردىڭ ەڭبەكاقىسىن ۇيلەسىمدى وسىرۋگە جەتەكشىلىك ەتەدى.

 

ال، جياڭشي ولكەسى مىنانى ايقىن بەلگىلەدى: 2021-جىلعى كاسىپورىنداردىڭ ەڭبەكاقىسىن ءوسىرۋدىڭ ولشەمدى شەگى %8؛ كاسىپورىنداردىڭ ەڭبەكاقىسىن ءوسىرۋدىڭ تومەنگى شەگى %3؛ كاسىپورىنداردىڭ ەڭبەكاقىسىن وسىرۋگە جوعارعى شەك قويىلمايدى.

 

شاندۇڭ ولكەسى 2021-جىلعى كاسىپورىن جۇمىسشى-قىزمەتشىلەرىنىڭ اقشالاي ەڭبەكاقىسىن ءوسىرۋدىڭ ولشەمدى شەگى %7 بولادى دەپ بەلگىلەدى. مەملەكەتتىك كەڭەستىڭ جانە ولكەلىك ۇكىمەتتىڭ مەملەكەت مەنشىگىندەگى كاسىپورىنداردىڭ ەڭبەكاقىسىن بەلگىلەۋ مەحانيزمىنە رەفورما جاساۋ جونىندەگى تالابىنا ساي، كاسىپورىنداردىڭ ەڭبەكاقى جەتەكشى شەگىنىڭ نەگىزگى سانى 2020-جىلى بۇكىل ەلدەگى قالا-قالاشىقتارداعى جەكەشە ەمەس ورىنداردا جۇمىستانعانداردىڭ ورتاشا ەڭبەكاقىسى 97 مىڭ 379 يۋان بولادى دەپ بەلگىلەندى؛ كاسىپورىن جۇمىسشى-قىزمەتشىلەرىنىڭ اقشالاي ەڭبەكاقىسىن وسىرۋگە جوعارعى شەك جانە تومەنگى شەك جاريالانبايدى.

 

شانشي ولكەلىك ادام كۇشى بايلىعى جانە قوعامدىق قامتاماسىزداندىرۋ مەڭگەرمەسى 2021-جىلعى كاسىپورىنداردىڭ ەڭبەكاقى جەتەكشى شەگىن جاريالاپ، كاسىپورىندارداعى جۇمىسشى-قىزمەتشىلەردىڭ اقشالاي ەڭبەكاقىسىن ءوسىرۋدىڭ ولشەمدى شەگى %7.5، تومەنگى شەگى %3.5 بولادى، ولكەدەگى ءتۇرلى كاسىپورىنداردىڭ جۇمىس ورنىنداعى جۇمىسشى-قىزمەتكەرلەردىڭ ەڭبەكاقى بولىسىنە قولدانىلادى دەپ ايقىن بەلگىلەدى.

 

تيانجين قالالىق ادام كۇشى بايلىعى جانە قوعامدىق قامتاماسىزداندىرۋ مەكەمەسى 2021-جىلعى بۇكىل قالاداعى كاسىپورىنداردىڭ ەڭبەكاقى جەتەكشى شەگىن جاريالاپ، ولشەمدى شەگى %7، تومەنگى شەگى %3 بولادى دەدى. ءوندىرىس-تيجارات جاعدايى ءبىرشاما جاقسى كاسىپورىندار بۇكىل قالاداعى كاسىپورىنداردىڭ ەڭبەكاقى جەتەكشى شەگىنىڭ ولشەمدى شەگىن توڭىرەكتەي وتىرىپ، جۇمىسشى-قىزمەتشىلەردىڭ ورتاشا ەڭبەكاقىسىنىڭ ءوسۋ مولشەرىن بەلگىلەسە بولادى؛ ەڭبەك كۇنىنىڭ وزىندىك قۇن قىسىمى ءبىرشاما اۋىر بولعان كاسىپورىندار تولەۋ قۋاتى جار بەرگەن جاعدايدا بۇكىل قالاداعى كاسىپورىنداردىڭ ەڭبەكاقى جەتەكشى شەگىنىڭ تومەنگى شەگىنەن تومەن بولماۋ شارتى استىندا جۇمىسشى-قىزمەتشىلەردىڭ ورتاشا ەڭبەكاقىسىنىڭ ءوسۋ مولشەرىن بەلگىلەسە بولادى.

 

شيزاڭ جاريالاعان 2021-جىلعى كاسىپورىنداردىڭ ەڭبەكاقى جەتەكشى شەگى جوباسىندا، تۇتاس رايونداعى كاسىپورىنداردىڭ 2021-جىلعى ەڭبەكاقى جەتەكشى شەگىنىڭ ولشەمدى شەگى %7، تومەنگى شەگى %3 بولادى دەپ ايقىن بەلگىلەندى.

 

شينجياڭ گازەتىنىڭ حابارىنا قاراعاندا، اۆتونوميالى رايون 2021-جىلعى كاسىپورىنداردىڭ ەڭبەكاقى جەتەكشى شەگىن بەلگىلەگەن جانە جاريالاعان. اۆتونوميالى رايونىمىزداعى كاسىپورىنداردىڭ ەڭبەكاقىسىن ءوسىرۋدىڭ ولشەمدى شەگى جۇمىسشى-قىزمەتشىلەردىڭ اقشالاي ورتاشا ەڭبەكاقىسىن %5 ءوسىرۋ ەكەن، ال ەڭبەكاقى ءوسىرۋدىڭ جوعارعى شەگى %6.5، تومەنگى شەگى %1.5 بولعان.

 

مۇندا نازار اۋدارۋعا تاتيتىن ءبىر جايت، «حالىقتىڭ ىرىسىن ارتتىرىپ، بىرلىكتە اۋقاتتانۋدى تىڭعىلىقتى ىلگەرىلەتۋ كەرەك» دەگەندى ارقاۋ ەتە وتىرىپ، كەيبىر ولكەلەر كاسىپورىنداردىڭ ەڭبەكاقى جەتەكشى شەگىن تۇراقتاندىرۋدا قوعامنان پىكىر العان. جيلين ولكەلىك ادام كۇشى بايلىعى جانە قوعامدىق قامتاماسىزداندىرۋ مەڭگەرمەسى جۋىقتا جاريالاعان 2021-جىلعى كاسىپورىنداردىڭ ەڭبەكاقى جەتەكشى شەگى جونىندەگى ۇقتىرۋدا (پىكىر الۋ نۇسقاسى)، ولشەمدى شەگى %6، جوعارعى شەگى %8، تومەنگى شەگى %3.5 بولادى دەپ جوبالانعان.

 

2

ەڭبەكاقى جەتەكشى شەگىن تەڭشەۋ جۇمىسكەرلەرگە قالاي ىقپال جاسايدى؟

 

ەڭبەكاقى جەتەكشى شەگىن تەڭشەۋ قانداي ىقپال تۋدىرادى؟ جۇڭگو بانكەسى ادۆوكاد باسقارماسىنىڭ جوعارى دارەجەلى سەرىكتەسۋشىسى ياڭ باۋچۋان تىلشىگە بىلاي دەدى: ۇكىمەت ەڭبەكاقى جەتەكشى شەگىن اتقارۋ ارقىلى ەڭبەكاقى جالپى مولشەرى مەن ەڭبەكاقى دەڭگەيىنىڭ ارتۋ جاعدايىن باقىلاۋىنا بولادى، ەڭبەكاقىنىڭ ارتۋى مەن ەكونوميكالىق ونىمدىلىكتىڭ ارتۋىن سايكەستىرىپ وتىرادى، ۇكىمەتتىڭ ماكرولىق تىزگىندەۋ نىساناسىن جۇزەگە اسىرۋىنا ءتيىمدى.

 

ياڭ باۋچۋان تاعى بىلاي دەيدى: ەڭبەكاقى جەتەكشى شەگى ءتۇزىمىن سىناق رەتىندە اتقارۋ، ەڭبەكاقى ءوسىرۋدىڭ ساقتىق شەگىن (جوعارعى شەگىن) بەلگىلەۋ ارقىلى مونوپوليالىق كاسىپورىنداردىڭ نەمەسە كەيبىر سالالاردىڭ ەڭبەكاقى ورەسىنىڭ تىم جوعارى بولۋ، تىم تەز قارقىنمەن ءوسۋ جايتىن باسەڭدەتۋگە بولادى. بۇل جۇمىسكەرلەردىڭ كىرىمىندەگى پارىقتىڭ تىم زور بولۋ ماسەلەسىن ازايتۋعا، ەڭبەك كۇشتەردىڭ ۇيلەسىمدى اعىلۋىنا جەتەكشىلىك ەتۋگە ءتيىمدى. مۇنان تىس، ەڭبەكاقى جەتەكشى شەگى ەڭبەكاقى داۋ-شارىن ءبىر جاقتىلى ەتۋدەگى نەگىز بولىپ تابىلادى.

مەملەكەتتىك ساناق مەكەمەسىنىڭ ساندى مالىمەتىندە كورسەتىلۋىنشە، 2020-جىلى بۇكىل ەل بويىنشا قالا-قالاشىقتارداعى جەكەشە ەمەس ورىنداردا جۇمىستانعانداردىڭ جىلدىق ورتاشا ەڭبەكاقىسى 97 مىڭ 379 يۋان بولىپ، وتكەن جىلداعىدان اتامالى ارتۋ سالىستىرماسى %7.6 بولعان، ارتۋ قارقىنى وتكەن جىلداعىدان %2.2 تومەندەگەن، باعا فاكتورىن شىعارىپ تاستاعاندا، ءىس جۇزىندە %5.2 ارتقان؛ قالا-قالاشىقتارداعى جەكەشە ورىنداردا جۇمىستانعانداردىڭ جىلدىق ورتاشا ەڭبەكاقىسى 57 مىڭ 727 يۋان بولىپ، وتكەن جىلداعىدان %7.7 ارتقان، ارتۋ قارقىنى وتكەن جىلداعىدان %0.4 تومەندەگەن، باعا فاكتورىن شىعارىپ تاستاعاندا، ءىس جۇزىندە %5.3 ارتقان.

 

كوپتەگەن جۇمىسكەر «ەڭبەكاقى جەتەكشى شەگى جوعارىلاتىلعان ەكەن، وندا ايلىق وسە مە» دەگەن ماسەلەگە كوڭىل ءبولىپ وتىر. بۇل ماسەلەگە ياڭ باۋچۋان بىلايشا جاۋاپ بەرەدى: ەڭبەكاقى جەتەكشى شەگى كاسىپورىندارعا جۇمىسكەرلەردىڭ ەڭبەكاقىسىن ءوسىرۋ تۋرالى تىكەلەي تالاپ قويا الماعانىمەن، كاسىپورىنداردىڭ ەڭبەكاقى جەتەكشى شەگى مەملەكەت پەن ۇكىمەت بەلگىلەگەن ەڭ تومەنگى ەڭبەكاقى ولشەمىنىڭ پايدالانۋ نەگىزدەرىنىڭ ءبىرى، ەڭبەكاقى جەتەكشى شەگىنىڭ جوعارىلاۋى بەلگىلى دارەجەدەن ايتقاندا ەڭ تومەنگى ەڭبەكاقىنىڭ جوعارىلاۋىن كەلتىرىپ شىعارۋى مۇمكىن. ال، ەڭ تومەنگى ەڭبەكاقىنىڭ جوعارىلاۋى تومەن كىرىستى قاۋىمنىڭ كىرىسىن ارتتىرۋعا، زاڭدىق ۇقىق-مۇددەسىن قامتاماسىزداندىرۋعا ءتيىمدى. سونىمەن بىرگە، تەڭسىز بولعان كىرىس پارقىن ازايتۋ ارقىلى، قوعام ورنىقتىلىعىن قورعاۋعا ءتيىمدى.

 

وڭتۇستىك جۇڭگو پەداگوگيكا ۋنيۆەرسيتەتى ساياسي جانە الەۋمەتتىك باسقارۋ ينستيتۋتىنىڭ پروفەسسورى سۇن جۇڭۋي تىلشىگە بىلاي دەدى: «ەڭبەكاقى جەتەكشىلىك شەگى پايدالانۋ قۇنىنا يە، الايدا، مۇنى كاسىپورىن قابىلداي ما، جوق، مۇندا باستىسى كاسىپورىندار ءوزىنىڭ تيجارات جاعدايىنا، ەڭبەكاقى اۋىرتپالىعىن كوتەرۋ قابىلەتىنە، كاسىپ سالاسىنىڭ ورتاشا ورەسىنە، سونداي-اق، ىشكى ەڭبەكاقى تۇزىمىنە نەگىزدەلە وتىرىپ، ەڭبەكاقىعا تەڭشەۋ جۇرگىزەدى».

 

اۋدارعان: نۇرگۇل قۇمارقان قىزى

来源:新华网

 

 

编辑、制作:古丽美热

: , 。 视频 小程序 赞 ,轻点两下取消赞 在看 ,轻点两下取消在看

中央广播电视总台 央广网 版权所有

ەڭبەكاقى ءوسىرۋدىڭ جەتەكشى شەگى جاريالاندى

كوپتەگەن جەرلەر كاسىپورىنداردىڭ ەڭبەكاقى جەتەكشى شەگىن جاريالادى