قوعام حاۋىپسىزدىگى مينيسترلىگى رەسمي ۇقتىرۋ جاريالادى، الداعى 10 كۇندە شينجياڭ قاتىناس ساقشىلارى مىنا ءبىر جايتتى قاتاڭ تەكسەرەدى، بارلىق ادام ءبىلىپ السىن، جالعاپ تاراتىپ قويىڭىزدار

مەرەكە تاياپ قالدى، قوعام حاۋىپسىزدىگى مينيسترلىگى قاتىناس باسقارۋ مەكەمەسى اراق ءىشىپ كولىك جۇرگىزۋ، ماس بولىپ كولىك جۇرگىزۋ جايتىن شوعىرلى تۇردە جونگە سالادى. 

قوعام حاۋىپسىزدىگى مينيسترلىگى قاتىناس باسقارۋ مەكەمەسى تاياۋدا بۇكىل ەلدەگى قوعام حاۋىپسىزدىگى قاتىناس باسقارۋ تاراۋلارىنا اراق ءىشىپ كولىك جۇرگىزۋ، ماس بولىپ كولىك جۇرگىزۋ جايتىن شوعىرلى تۇردە وڭاۋ قيمىلىن ورىستەتۋ تۋرالى ورنالاستىرۋ جاسادى. 9-ايدىڭ 13-كۇنىنەن باستاپ، بۇكىل ەلدەگى قاتىناس ساقشىلارى 10 كۇنگە جالعاساتىن اراق ءىشىپ كولىك جۇرگىزۋ، ماس بولىپ كولىك جۇرگىزۋ جايتىنە قاراتا زاڭ اتقارۋ مەن تىكە حابارلاۋدى بىرلەستىرىپ جۇرگىزىپ، زاڭ اتقارا ءجۇرىپ ۇگىت جاساپ، شوفەرلارعا اراق ءىشىپ كولىك جۇرگىزۋ جايتىنە قارسى تۇرۋ تۋرالى ەسكەرتۋ جاساپ، جول حاۋىپسىزدىگىندەگى حاۋىپ-قاتەردى بەلەڭ بەرگەن كەزىندە-اق الاستاپ، بۇقارانىڭ مەرەكە كەزىندەگى ءجۇرىس-تۇرىس حاۋىپسىزدىگىنە كەپىلدىك ەتەدى. 

تاياۋدان بەرى كوپتەگەن جەردە شوفەرلار اراق ءىشىپ كولىك جۇرگىزگەندىكتەن قاتىناس شىرعالاڭى تۋىلىپ، كوپتەگەن ادام جانىنان جۇدا بولدى نەمەسە جارالاندى.

9-ايدىڭ 2-كۇنى، انحۇي ولكەسى بىڭبۋ قالاسى گۋجىن اۋدانىندا تۇراتىن جاڭ فاميليالى شوفەر ماس بولىپ كولىك جۇرگىزىپ، كولىكتى ايداعان بەتى جول جاعاسىندا تۇرعان ادامدار توبىنا كىرىپ كەتەدى دە، 2 ادامنىڭ ولىمىنە سەبەپشى بولادى، 21 ادام جارالانادى. 

9-ايدىڭ 6-كۇنى، لياۋنيڭ ولكەسى لياۋياڭ قالاسىنا قاراستى دىڭتا قالاسىندا تۇراتىن گۋو فاميليالى شوفەر ماس بولىپ كولىك جۇرگىزىپ، جول ورتاسىنداعى قوس سارى سىزىقتان باسا كوكتەي ءوتىپ ەلەكترلى ءۇش دوڭگەلەكتى موتوسيكلگە سوعىلىپ، ەلەكترلى موتوسيكلدە وتىرعان 3 ادامنىڭ ولىمىنە سەبەپشى بولادى.

«حاۋىپسىزدىك قامتاماسىزداندىرىلعاندا عانا، باس قوسۋدان اۋىز اشۋعا بولادى». قوعام حاۋىپسىزدىگى مينيسترلىگى قاتىناس باسقارۋ مەكەمەسى قاتىناس ىستەرىنە قاتىناسۋشىلارعا مىنانى ەسكەرتەدى: جازالاۋ ماقسات ەمەس، حاۋىپسىزدىك ءبىرىنشى، اراق ىشكەن سوڭ كولىك جۇرگىزۋگە قاتاڭ تيىم سالىنادى! شوفەرلەر اراق ىشكەن سوڭ، ونىڭ قاسىنداعى دوس-جاران، تۋىس-تۋعاندارى كولىك جۇرگىزبەۋ تۋرالى ناسيحات ايتۋى كەرەك. ساپارعا شىققاندا زاڭعا بويسىنىپ، حاۋىپسىز دە جاراسىمدى جول قاتىناس ورتاسىن بىرلىكتە جاراتايىق!

ال، مۇندا ءبىزدىڭ دە ايتارىمىز، اراق ءىشىپ كولىك جۇرگىزۋ جايتىن تەكسەرسە دە، تەكسەرمەسە دە، «كولىك جۇرگىزگەندە اراق ىشپەۋ، اراق ىشكەن سوڭ كولىك جۇرگىزبەۋدى» داعدىعا اينالدىرۋىمىز، ارەكەت ولشەمىنە اينالدىرۋىمىز كەرەك. استە ءوز باسىڭىز ارقىلى زاڭدى سىناپ كورۋگە ۇرىنباڭىز!

اراق ءىشىپ كولىك جۇرگىزۋدىڭ وزىندىك قۇنى قانشاعا تۇراتىنىن بىلەسىز بە، تومەندە ءبىر-بىرلەپ ايتىپ بەرەيىن:

زاڭدىق وزىندىك قۇنى

شىرعالاڭ تۋدىرسا: قاتىناس شىرعالاڭىن تۋدىرۋ قىلمىسىن قالىپتاستىرعاندارعا 3 جىلدان تومەن مەرزىمدى قاماق جازاسى نەمەسە قولدا ىستەتۋ جازاسى بەرىلەدى؛ شىرعالاڭ تۋدىرىپ قاشىپ كەتكەندەرگە نەمەسە باسقا دا جيرەنىشتى ىستەرى بارلارعا 3 جىلدان جوعارى، 7 جىلدان تومەن مەرزىمدى قاماق جازاسى بەرىلەدى؛ قاشىپ كەتۋ سەبەبىنەن ادام ولسە، 7 جىلدان جوعارى مەرزىمدى قاماق جازاسىنا كەسىلەدى.

ال، شىرعالاڭ تۋىلماعان كۇندە دە، بۇل حاۋىپتى كولىك جۇرگىزۋ قىلمىسىنا جاتادى. قىلمىستىق ىستەر زاڭىنىڭ 133-تارماعىندا بىلاي دەپ بەلگىلەنگەن: ماس بولىپ كولىك جۇرگىزگەندەرگە قولدا ىستەتۋ جازاسى بەرىلەدى، وعان قوسا اقشالاي ايىپ سالىنادى. 2-رەت اراق ءىشىپ كولىك جۇرگىزسە نەمەسە ماس بولىپ كولىك جۇرگىزسە، شىرعالاڭ تۋدىرماسا دا، باس بوستاندىعىنان ايىرىلادى، ەڭ جوعارى بولعاندا 15 كۇن اكىمشىلىك جاقتان قاماي تۇرۋ جازاسىنا كەسىلەدى نەمەسە ەڭ جوعارى بولعاندا 6 اي قولدا ىستەتۋ سىندى قىلمىستىق ىستەر جازاسىنا كەسىلەدى.

مىنانى دا تولىقتاي كەتەيىك: «جۇڭحۋا حالىق رەسپۋبليكاسى جول قاتىناس حاۋىپسىزدىگى زاڭىنىڭ» 91-تارماعىندا بىلاي دەپ بەلگىلەنگەن: 

1. اراق ءىشىپ العان سوڭ موتورلى كولىك جۇرگىزسە

 شوفەرلىك كۋالىگى ۇستاپ قالىنادى + اقشالاي ايىپ سالىنادى.

تاعى ءبىر رەت اراق ءىشىپ كولىك جۇرگىزسە: قاماي تۇرىلادى + شوفەرلىك كۋالىگى كۇشىنەن قالدىرىلادى + اقشالاي ايىپ سالىنادى.

2. ماس بولىپ موتورلى كولىك جۇرگىزسە

ماستىعىنان ايىققانشا تەجەمدە بولادى + شوفەرلىك كۋالىگى كۇشىنەن قالدىرىلادى + قىلمىستىق ىستەر جاۋاپكەرشىلىگى قۋزاسىتىرىلادى + 5 جىل نەمەسە 10 جىل ىشىندە شوفەرلىك كۋالىك الۋعا ەمتيقان بەرۋىنە بولمايدى.

3. اراق ءىشىپ كولىك جۇرگىزۋدەن، ماس بولىپ كولىك جۇرگىزۋدەن اۋىر قاتىناس شىرعالاڭىن تۋدىرسا

ءىسى قىلمىسقا تولسا، قىلمىستىق ىستەر جاۋاپكەرشىلىگىن ارقالايدى + شوفەرلىك كۋالىگى كۇشىنەن قالدىرىلادى + ءومىر بويى شوفەرلىك كۋالىك الۋعا ەمتيقان بەرۋىنە بولمايدى.

ەكونوميكالىق وزىندىك قۇنى     

1. قامسىزداندىرۋدان تولەم بەرىلمەيدى؛

2. ەمدەۋ قاراجاتىن ءوزى كوتەرەدى؛

3. وراسان زور تولەمگە جىعىلادى.

قىزمەت ورنىنداعى وزىندىك قۇنى

پارتيا مۇشەلەرىنە پارتيا ىشىندە شارا كورىلەدى، اۋىر بولعاندارىن پارتيادان شىعارادى.

ۇكىمەت قىزمەتكەرلەرىنە اكىمشىلىك جازا بەرىلەدى، اۋىر بولعانداردى قىزمەتتەن ايدايدى.

ال، باسقالاي وزىندىك قۇنىن ايتار بولساق، سەنىمدىلىكتەن ايىرىلۋ، رۋحاني سوققىعا ۇشىراۋ، وتباسىنا كەلەتىن ويران سياقتىلاردى ءوزىڭىز ەسەپتەي بەرىڭىز.

اۋدارعان: نۇرگۇل قۇمارقان قىزى

来源：央视新闻

微信制作：阿依娜