كوپتىڭ الدىندا بالانى ۇرىپ، ياناتتاۋ بۇدان بىلاي زاڭعا قايشى ارەكەت سانالادى

«زاڭ بويىنشا بالا تاربيەلەۋ» ءداۋىرى باستالعاننان كەيىن، كوپتىڭ الدىندا بالانى ۇرىپ-سوققاندار بارما؟ بەيجيڭ گازەتى كليەنتىنىڭ حابارىنا قاراعاندا، 1-ايدىڭ 12-كۇنى ساعات 7 دەن 50 مينۋت وتكەندە، ءبىر ايەل بەيجيڭ مەتروسىنىڭ 7-جەلىسىندە بالاسىن شاپالاقتاپ ۇرعان، سونداي ـ اق بالانى جۇرت الدىندا تىزەرلەتىپ وتىرعىزىپ قويىپ، مەتروداعى جۇرگىنشىلەردىڭ نازارىن اۋدارعان. 

ءبىر جەلىدەگى جۇرگىنشىنىڭ اڭىسىنا قاراعاندا، بۇل ايەل قولىمەن بالاسىنىڭ باسىنا ۇرىپ، باس كيىمىن جەرگە تۇسىرىپ جىبەرگەن، الايدا بالاسى باس كيىمىن الىپ كيۋگەدە باتىلدىق ەتە الماعان، ىلە - شالا شەشەسى بالاسىنىڭ قولىنداعى قولفوندى جۇلىپ الىپ، بالانى ساباعان. وسىدان كەيىن ەكەۋى باسقا ۆاگونعا بارىپ، بالاسىن جەرگە تىزەرلەتىپ وتىرعىزىپ قويعان. بەكەتكە جەتكەننەن كەيىن، بۇل ايەل ەكى قولىن قالتاسىنا سالىپ كەتە بارعان، بالا سومكەسىن جيناستىرىپ، سومكەسىن ارقالاپ العاننان كەيىن ونى قۋا جونەلگەن ...

كوپتىڭ الدىندا بالانى ۇرىپ ـ سوعۋ، ياناتتاۋ ەجەلدەن بالا تاربيەسىندەگى جات قىلىق سانالادى. بۇل بالانىڭ مۇشكىل بەينەسىنەن قاراعاندا، مۇنداي «مامىلە» تۇڭعىش رەت بولماۋى مۇمكىن. جەتى-سەگىز جاستاعى بالا ءسىرا قانداي قاتەلىك وتكىزىپ، كوپتىڭ الدىندا قورلاۋعا ۇشىرايدى؟ اتا-اناسى بالاسىنا كوڭىل بولمەيمە؟ ەگەر مۇنداي «نامىس تاربيەسىن» ۇنەمى جۇرگىزەتىن بولساق، وندا بالانىڭ جۇرەگىنە جارا سالعاندىق بولمايما؟ سول كەزدە ۆاگوندا بىرەۋ بۇل ايەلگە بالانى دۇرىس جولمەن تاربيەلەۋگە ءناسيحاتتايدى، ال بۇل ايەل كەرىسىنشە: «بالا وزىمدىكى، مەن نە ىستەسەم دە ءوزىم بىلەمىن» دەيدى. وسىنشاما دورەكى مىنەزبەن قايتىپ تولىمدى اتا ـ انا بولۋعا بولادى؟ اۆتور كەيبىر اتا - انالاردىڭ بالاسىن ياناتتاعانىن، ءتىپتى مەكتەپ قاقپاسىنىڭ الدىندا ۇرىپ - سوققانىن سان رەت كورگەن. بالانىڭ دا ار - نامىسى بولادى، بالانىڭ ار - نامىسىن بەتالدى اياق استى ەتۋ ەكى ءتۇرلى زارداپ تۋدىرادى: ءبىرى، اتا - اناسىنىڭ بۇنداي قىلىعىنا ءتۇزىپ تۇرا الماي قارسىلىق كورسەتىپ، اتا - انا مەن بالانىڭ قاتىناسى اۋىر دارەجەدە بۇلىنەدى؛ ەندى ءبىرى، بالا اشۋعا بۋلىعىپ، ءۇن - ءتۇنسىز جۇرە بەرەدى، قاراماققا تىنىشتىق ورناعانىمەن، ءىس جۇزىندە بالا ءوزىن قوراش سانايدى، ءتىپتى بالانىڭ قوعامدىق قارىم - قاتىناستان الاڭداۋى مەن قوعامدىق قارىم - قاتىناستان جالتارۋ ارەكەتىن تۋدىرادى. 

مەترودا جۇرت الدىندا جۇگىندىرىپ، قاتەلىگىن مويىنداتۋ قاتە تاربيە ءتاسىلى بولىپ قانا قالماستان، زاڭعا قايشى ارەكەت سانالادى. 2022-جىلى 1-ايدىڭ 1-كۇنى «جۇڭحۋا حالىق رەسپۋبليكاسىنىڭ وتباسى تاربيەسىن جەبەۋ زاڭى» رەسمي اتقارىلا باستادى، وتباسى تاربيەسى «وتباسى شارۋاسىنان» «مەملەكەت ءىسى» دارەجەسىنە كوتەرىلدى، اتا ـ انالار «زاڭ بويىنشا بالا تاربيەلەۋ» داۋىرىنە قادام تاستادى. وسى زاڭنىڭ 5 - تارماعىندا وتباسى تاربيەسىندە ازامات جاسىنا تولماعانداردىڭ ادامدىق ار - نامىسىنا قۇرمەت ەتىپ، ازامات جاسىنا تولماعانداردىڭ زاڭدى ۇقىق - مۇددەسىن قامتاماسىزداندىرۋ ايقىن ورتاعا قويىلدى. بالانىڭ ار-نامىسىن ماحرۇم ەتۋ تاسىلىمەن تاربيە جۇرگىزەتىن اتا - انالارعا زاڭ بويىنشا ەسكەرتۋ جاساپ، ولاردى عىلمي ءادىس كوزقاراسى بويىنشا بالا تاربيەلەۋگە قۋزادى. 

وتباسى تاربيەسى- تاربيەنىڭ باستاماسى، اتا ـ انا بالانىڭ تۇڭعىش ۇستازى، بالا اتا - انانىڭ جەكە مال-مۇلكى ەمەس، «زاڭ بويىنشا بالا باعۋ» داۋىرىندە اتا - انانىڭ عىلمي تاربيەسى بالاعا شابىت، شاتتىق سيلاپ، وتباسىن مەيىرىمدى جان ۇياعا اينالدىرادى. 

اۋدارعان: مۇقامادي ءشارىپ ۇلى 

来源：中国青年报

编辑、制作：阿依娜