قادىرمەندى قاۋىم «1-مامىر» حالىقارالىق ەڭبەكشىلەر مەرەكەسى مەرەيلى بولىسىن! «ەڭبەك ادامنىڭ ەكىنشى—اناسى»، «ەڭبەك — داۋلەتىڭ، بەدەلىڭ، ساۋلەتىڭ»، « ەر ايناسى—ەڭبەگى»، « ەڭبەك − بارلىق باقىتتىڭ باستاۋ كوزى». بۇگىنگى تاڭدا باياشاتتى قوعامىنىڭ گۇلزار باعىندا ءار كاسىپتە قىزمەت ورنىن قۇلاي ءسۇيىپ، كاسىبىن قاستەرلەپ، ادال ەڭبەگىمەن، اششى ەڭبەكتىڭ ءتاتتى  جەمىسىن كورىپ جاتقان ىزگى جاندار ەڭبەكتەرىڭىز جەمىستى، ىرىستى بولعاي! سونىمەن قابات تالماي قۇلشىنىپ، بيىكتەرگە قاراي قۇلاشتى كەڭ جايىپ، تىڭ سوقپاقپەن سونى ورىسكە بەت العان قاجىماس-قايسار جانداردىڭ ىزدەنىسكە تولى ەڭبەك جولى كەيىنگى بۋىنعا جۇعىستى بولسىن دەگەن مەرەكەلىك سالەم جولدايمىز.

 

ەڭبەك ەڭ داڭقتى، ەڭبەك ەڭ ارداقتى، ەڭبەك ەڭ ۇلى، ەڭبەك ەڭ كوركەم. بۇگىنگى تولاعاي تابىستارىمىز نەشە ۇرپاق اعا بۋىندار مەن قاراپايىم قىزمەت ورنىندا ءۇن-تۇنسىز قىزمەت ىستەگەن ەڭبەكشىلەر قاۋىمىنىڭ قوس قولىنا سۇيەنىپ، ەڭبەكتى قىزۋ ءسۇيىپ، قالتقىسىز ءوزىن ارناۋداي كۇرەسكەرلىك رۋحىنان تۋىنداعان سۇبەلى ەڭبەك جەمىسى سانالادى. سوندىقتان مۇنى باعامداي ءبىلۋىمىز، داڭقتى ەڭبەكتى ارداقتاي ءبىلۋىمىز اسا قاجەتتى. « قۇلشىنعانعا قۇت قونار» دەگەندەي،   جاڭا زاماننىڭ جارقىن تاڭىندا، جالىندى جىگەرمەن جالىقپاي قۇلىشىنعان كۇرەسكەرلەردىڭ ماڭداي تەرى ءار دارەجەلى پارتيا، ۇكىمەت ورىندارى تاراپىنان ءادىل باعالانىپ، ەڭبەك ەرلەرى كوپتەپ جارىققا شىعىپ، شوق جۇلدىزدار جارقىرادى.

 

«ادام-ادامىنان ءتالىم الادى، اعاش – اعاشتان ماۋە الادى» دەگەندەي، كەزەكتە ءبىز قاراپايىم قىزمەت ورنىندا، تاباندىلىقپەن جۇمىس ىستەپ، ءوز قاتارىنىڭ الدى بولىپ، مەملەكەتتىڭ ەڭبەك ەرى، مەملەكەتتىك وزات قىزمەتكەر سىندى داڭققا يە بولىپ، پارتيا مەن حالىق تاپسىرعان  قاسيەتتى مىندەتتى ابىرويمەن اتقاراعان ءبىر قانشا  كۇرەسكەرلەرىمىزدىڭ جاپالى ەڭبەگى مەن  ىزدەنىس جولدارىنان سىر شەرتۋدى ءجون سانادىق.

 

  قىزىعۋشىلىق عىلىمنىڭ اتاسى — جاڭاگۇل

  اسەن قىزى

اۋرۋعا اراشاشى، جارالىعا جاناشىر بولىپ، اق حالاتتىلار اراسىنان اعالاپ العا شىققان، بابادان قالعان باعزى ونەردىڭ سارقىتىن ساناسىنا ءسىڭىرىپ، زامانا تالابىنا ساي، مول تاجىريبەلىك سىناقتاردان وتكىزىپ، نازاريا مەن امالياتتى ياعني، كلينيكالىق سىناقتى شەبەر توعىستىرىپ، جاڭا عاسىرعا جالعاعان جاڭاگۇل اسەن قىزى العاشىندا ىلە مەديتسينا مەكتەبىنىڭ تۋىت كاسىبىنەن وقىپ، كەيىننەن قىزىعۋشىلىق نەگىزىندە جانە ۇيىمىنىڭ ۇيعارىمى بويىنشا، ىلە قازاق اۆتونوميالى وبلىسى جۇڭگوشا ەمدەۋ شيپاحاناسى قازاق ەمشىلىگى سۇيەك بولىمىندە وتاشىلىق دەيتىن ولقى ورىندى تولتىرىپ، ناۋقاستار ءۇشىن ءوزىن قالتقىسىز ارناپ، سىنىق سالۋدىڭ ءداستۇرلى تاسىلدەرىنە جاڭالىق ەنگىزىپ، كلينيكالىق ەمدەۋدە «جالعاعىش تالقان»، «ماناۋ قويمالجىڭى» سىندى قازاق شيپاگەرلىك دارىلەرىن سىناق رەتىندە جاساپ، كۇردەلى سىنىقتاردى ەمدەۋدە كورنەكتى تابىستارعا جەتىپ، ۇزاق جىلدىق زەرتتەۋ تاجىريبەسىنە سۇيەنىپ تاپقىرلاعان«CNZ5100800423» ءنومىرلى «سىنىقتىڭ سىىرتىنان جاعىلاتىن ءدارىسى»مەملەكەتتىك پاتەنت ۇقىعىن الدى. جاڭا ءداۋىر جارقىن ورتادا عيبراتتى عۇمىر  كەشكەن جاڭاگۇلدىڭ شەككەن جاپا، توككەن تەرىن پارتيا ۇكىمەت ورىندارى دەركەزىندە باعامداي ءبىلىپ، سىباعالى سيلىق، مارتەبەلى ماراپاتتاردان قاعىس قالدىرمادى. وبلىس، ولكە دارەجەلى سيلىقتاردى قويا تۇرىپ، مەملەكەتتىك ماراپاتتارىن عانا ايتار بولساق.1997-جىلى مەملەكەتتىك «1-مامىر ەڭبەك ەرى» 2000-جىلى مەملەكەتتىك «عاسىر اتتاعان ايگىلى شيپاگەر»، 2005-جىلى «مەملەكەتتىك ۇلتتار ىنتىماعىنىڭ ۇلگىسى» بولىپ سيلانعان. 2009-جىلى جۇڭگوداعى ىزگى جاندار قاتارىنان ورىن العان، 2015-جىلى«مەملەكەتتىك ۇزدىك قىزمەتكەر»، 2017-جىلى «مەملەكەتتىك ون ۇزدىك ەڭ سۇيىكتى شيپاگەر»، 2019-جىلى «مەملەكەتتىك 8-ناۋرىز وزات قىزىلتۋشى» قاتارلى داڭق وردەندەرىمەن ماراپاتتالدى. سۇحبات بارسىندا اپايمىز «مەنىڭ بۇگىنگى تابىسىم بارلىق باسشى-جولداستارمەن قىزمەتتەستەرىمە ورتاق. قۋانشىم بۇكىل شينجياڭداعى، ىلە وبلىسىنداعى ءار ۇلت باۋىرلاستارىنا، قالا بەردى شيپاحانامىزعا ءتان!»،-دەپ اعىنان اقتارىلدى.

 

 

 

 

 

 

 

 

 

 

 

 

 

 

 

 

قىزمەتتەستەرىڭ ايتۋىنشا، جاڭاگۇلدىڭ بويىنداعى  تاعى ءبىر ەلدەن ەرەن ارتىقشىلىعى – اۋرۋعا دەگەن جاناشىرلىعى، كىشپەيىل مىنەزى، باۋىرمالدىعى، كوڭىلگە مەدەۋ جىلى ءسوزى. قانداي ءبىر بەيتانىس ادامعا سوزبەن مەيىر سيلاپ، جۇرەككە جىگەر بەرىپ، كۇدىگىن ۇمىتكە جالعاپ، ناۋقاستاردىڭ سايكەسۋىن سۇراناتىن. ول قىزمەت بارىسىندا باسقادا قىزمەتتەستەرى مەن شاكىرتتەرىنە ۇنەمى اۋرۋعا جىلى قاباق تانىتىپ، ادام اعزاسىنداعى ءار ءبىر جاسۋشالارعا دەيىن قاجەتتى دارۋمەندى، شيپاشاقتاعى ءدارى-دارمەكتىڭ قۇرامىن، دوزاسىن ءبىر – بىرلەپ تۇسىندىرگەندە، اۋرۋدىڭ ساۋىعۋعا دەگەن سەنىمى ارتىپ، ەمدەۋگە جاقسى سايكەسەدى دەگەندى قۇلاق قاعىس ەتىپ وتىراتىندىعىن تالاي مارتە تىلگە تيەك ەتتى. سونىمەن بىرگە  ەلىمىزدىڭ ىندەتپەن بولعان كۇرەستە بۇكىل دۇنيەگە ۇلگى بولىپ وتىرعانىن، حالىقتىڭ مۇددەسىن بارىنە جوعارى ورىنعا قويىپ، اۋرۋمەن ايقاسىپ جاتقان  اق حالاتتى ىزگى جانداردىڭ ەڭبەگىنىڭ ەسەلى ەكەنىن، مەرەكە بايلانىسىمەن ولارعا دۇعاي سالەم جولدايتىنىن اڭعارتتى.

تاباندىلىق تابىس كىلتى — شولپان

 ارىنقازى قىزى

پارتيانىڭ حالىقتى اۋقاتتاندىرۋ ساياساتىنىڭ كومەگىندە، ول اس سۋ كاسىبىمەن اينالىسىپ، وتباسىلىق تاعامجاي اشىپ، ۇلتتىق ەرەكشەلىككە يە تاعامداردى اسىرەسە، بوگەنايى بولەك «قوجان ساۋميانىن» ازىرلەپ، ونى ساۋدانى باسقارۋ تاراۋلارىنىڭ تىركەۋىنە وتكىزىپ، ماركا الىپ قوبىقسارى موڭعۇل اۆتونوميالى اۋدانى بايانوبا اۋىلىنداعى الىس جاقىنعا اتى تانىس اۋقاتتانۋ شەبەرىنە اينالدى. قىستاق تۇرعىندارى شولپاننىڭ ەڭبەگىن تىلگە تيەك ەتكەندە باس بارماعىن كورسەتىپ القايدى. ول ءوزى اۋقاتتانۋمەن بىرگە اۋىلداستارىندا ەسىنەن شىعارماي، كەدەي وتباسىلاردىڭ ءۇي سالۋىنا، قىستاقتاعى ەڭ تومەنگى تۇرمىسى قامتاماسىزداندىرىلاتىن وتباسىلارىنا شاماسىنىڭ كەلىسىنشە كومەكتەسىپ، كوپشىل كوبەگەن مىنەزىمەن توڭىرەگىنە ۇلگى بولا ءبىلدى، ول سۇحبات بارسىندا «مەن كوممۋنيستىك پارتيا مۇشەسىمىن، اۋىلداستاردىڭ بىرەر ءىس ىستەۋىنە كومەكتەسۋ مەنىڭ بورىشىم» دەدى.

 

ۋحانداعى جۇقپالى اۋرۋدان ساقتانۋ-تىزگىندەۋ كەزىندە، شولپان الدىڭعى شەپكە 5مىڭ يۋان ناق اقشا جىلۋ اتاۋمەن بىرگە،    بايانوبا اۋىلىندا حالىقتىڭ دەنساۋلىعىن ساقتاۋ جولىندا كۇندى-تۇنگە جالعاپ جاپاكەشتىكپەن قىزمەت ىستەپ جاتقان نەگىزگى ساتى كادرلارىنا جانە حالىق ساقشىلارىنا كومەكتەسۋدى بورىشىم دەپ ساناپ، ۇيىمعا تىلەگىن ءبىلدىرىپ، قاتىستى بەكىتۋلەردەن وتكەنىنەن كەيىن ايعا جۋىق ۋاقىت توڭىرەگىندەگى تەكسەرۋ ورىندارىنداعى جانە نەگىزگى ساتىداعى كادرلارعا تەگىن تاماق جاساپ، جەتكىزىپ بەرىپ وتىرعان.

 

شولپان قاراپايىم قىزمەت ورنىندا وزىنە تيەسىلى كاسىبىمەن عانا اينالىسىپ، جەر كوكتى ءدۇر سىلكىندىرگەن ىزگى ىستەردى ىستەمەگەنىمەن، ول بەينە ەڭبەكشىل بال اراسى سياقتى قيىنشىلىقتان، جاپادان، شارشاپ شالدىعۋدان قورىقپاي، قاجىرلىلىقپەن ەڭبەك ەتىپ، ءۇن ءتۇنسىز ۇلەس قوسىپ، وتباسىنا دەگەن جاۋاپكەرشىلىگى مەن كوممۋنيستەرگە ءتان ادالدىقتى قاراپايىم جانداردىڭ كوكىرەگىنە تەرەڭ ۇيالاتتى.

بۇقارا پارتيانىڭ ابزال ساياساتىنا

 ءدان ريزا — جەڭىس سولتان ۇلى

جەڭىس سولتان ۇلى قۇمىل ايماعى اراتۇرىك اۋدانى نارىنكىر قازاق اۋىلى حالىق قۇرىلتايىنىڭ ۋاكىلى بولىپ سايلانعان 20 نەشە جىلدان بەرى نەگىزگى ساتىنىڭ اۋانىن، پارتيا مەن ۇكىمەت ورىندارىنا دالمە –ءدال جەتكىزىپ، التىن كوپىرلىك رول اتقارىپ، پارتيا مەن مەملەكەتتىڭ ءتۇرلى ءتيىمدى  ساياساتتارىن اۋىلداستارعا بەلسەنە ۇگىتتەدى؛ ول ءوز جانىنان  ەداۋىر قوماقتى قارجى شىعارىپ، 20 نەشە اۋىلداستىڭ قيىنشىلىق قىسپاعىنان قۇتىلۋىنا، قيىن وتكەلدەن وتۋىنە كومەكتەسىپ، قاراپايىم ىزگى ىستەر ارقىلى ساحارا پەرزەنتتەرىنىڭ پارتيانىڭ سوزىنە قۇلاق اسىپ، پارتياعا ىلەسۋىنە تاماشا جول كورسەتتى. ول ءوزى اۋقاتتانعاندا اۋىلداستارىن ءبىر سات ەسىنەن شىعارمادى.

 

 

 

 

 

 

 

 

 

 

 

 

 

 

 

 

 2016-جىلى ىرىقتىلىقپەن اراتۇرىك اۋدانىنان ىلە قازاق اۆتونوميالى وبلىسىنا بارىپ، ءوزىنىڭ نەشە ون جىلدىق مال شارۋاشىلىق جانە باعىمشىلىقپەن شۇعىلدانۋ تاجىريبەسىنە سۇيەنىپ، ۇكىمەتتىڭ كەدەيلەردى سۇيەمەلدەۋ، مال ساتىپ الۋ سياقتى قىزمەتتەرىنە قولقابىس ەتىپ، كەدەيلىكتەن قۇتىلدىرۋدان قامال الىپ، بىرگە اۋقاتتانۋعا باستاماشى بولدى. ول سۇحبات بارسىندا، بۇگىنگى كۇنى پارتيامىزدىڭ ابزال ساياساتىنىڭ ارقاسىندا قالا مەن اۋىل اراسىنداعى پارىق ازايىپ، اۋىلدىڭ بەت-بەينەسىنە جارقىن وزگەرىستەر جارىققا شىعىپ، پارتيانىڭ ءتۇرلى ءتيىمدى ساياساتتارىنا حالىق بۇقاراسىنىڭ ءدان ريزا ەكەنىن اڭعارتتى. الداعى جەردە دە بەرەكە-بىرلىكتە بولىپ، ءبىر جاعادان باس، ءبىر جەڭىنەن قول شىعارىپ، بايتاق وتان الابىنداعى 56 ۇلتتىڭ ءبىر سەميانىڭ بالاسىنداي، بەس ساۋساقتىڭ سالاسىنداي ىنتىماعى  جاراسا بەرسە ەكەن دەگەن تىلەگىن ءبىلدىردى.

ورمان قورعاۋ

 ماڭگىلىك بورىشىم — الماسبەك راشيت ۇلى

التاي تاۋى ورمانىندا جابايى حايۋاناتتار مەن وسىمدىكتەر بايلىعى مول. شينجياڭ ۇيعۇر اۆتونوميالى رايونى التاي تاۋى مەملەكەت مەنشىگىندەگى ورمان باسقارۋ مەكەمەسى التاي بولىمشە مەكەمەسى باسقارۋ قورعاۋ پۋنكتىنىڭ جاۋاپتىسى الماسبەك راشيت ۇلى  30 جىلدىڭ الدىندا ورمان الاڭىنا كەلىپ، اكەسىنىڭ قىزمەتىن جالعاستىرىپ، كۇنى بۇگىنگە دەيىن ورماندى ورتتەن ساقتاۋ، جابايى حايۋاناتتار مەن وسىمدىكتەر بايلىعىن قورعاۋ مىندەتىن ابىرويمەن ارقالاپ كەلەدى.

 

 

 

 

 

 

 

 

 

 

 

 

 

 

 

 

ول قاجىماس جىگەرمەن ورماندى قورعاپ، ورتتەن ساقتانۋدىڭ ءبىرىنشى شەبىنە تەرەڭ تامىر تارتىپ، ورماندى ءوڭىردىڭ جاراتىلىستىق ەكولوگياسىن قاجىماي تالماي قورعاپ، ءۇن ءتۇنسىز ۇلەس قوسۋ ارقىلى مەملەكەتتىك باس جۇمىسشى ۇيىمى  جاعىنان ۇلگىلى قىزمەتكەرى، مەملەكەتتىك تاڭداۋلى ورمان قورعاۋشى، اۆتونوميالى رايوندىق ەڭبەك وزاتى، مەملەكەتتىك ەڭبەك ەرى سياقتى داڭقتى اتاقتارعا يە بولدى.

 

«بۇل تاۋ ورمانى مەنىڭ جانىمنان دا ماڭىزدى! » دەيدى الماسبەك. ۇزاق جىلدار بويى ورمان قورعاۋدىڭ الدىڭعى شەبىندە قىزمەت ىستەپ، جۇمىسىنا تەرەڭ ماحاببات ورناتقان الماسبەكتەي  كۇرەسكەر جانداردىڭ قاجىرلى قۇلشىنستىڭ ارقاسىندا، تاۋى جاسىل، وزەنى تۇنىق التاي تاۋ ورمانىنىڭ تابيعاتى ويداعىداي قورعالىپ، جاسىل جەلەك جامىلىپ، التايدىڭ ەكولوگيالىق ورتاسى بارعان سايىن جاقساردى.

بۇل ومىردە ەڭبەگىنىڭ ەل كادەسىنە جاراعانىن سەزىنۋدەن ارتىق باقىت بولماس. جوعارداعى سۇحباتتاستارىمىز قاراپايىم قىزمەت ورنىندا قاجىرلىقپەن قۇلشىنىپ، اششى ەڭبەكتىڭ ءتاتتى جەمىسىن كورىپ، «ەڭبەگىمەن ەر سۇلۋ، ەگىنىمەن جەر سۇلۋ» ەكەنىن وزدەرىنىڭ ءتول كەشىرمەلەرى ارقىلى دالەلدەپ كورسەتتى.

 

ەندەشە جاڭا داۋىردەگى جارقىن كۇرەسكەرلەرىمىزگە دە تولاعاي تابىس، مول باقىت تىلەيمىز، ءار قاشان ەڭبەكتەرىڭىز جانا بەرگەي! ءار سالا، ءار شەپتە مىنە وسىنداي ەلەۋلى ەڭبەكتەرىمىز ارقىلى پارتيا 20-قۇرىلتايىنىڭ جەڭىسپەن اشىلۋىن بىرلىكتە قارسى الايىق!