«پاسپورت ءبىتىرۋدى توقتاتادى ەكەن، جاسىل كارتچكانىڭ بۇرىشىن قيادى» دەگەن راس پا؟ مەملەكەتتىك كوشپەندىلەردى باسقارۋ مەكەمەسى: مۇنىڭ بارلىعى جالعان حابار،ـ دەدى

حالىق تورابىنىڭ 5-ايدىڭ 13-كۇنى بەيجيڭنەن بەرگەن حابارى: تاياۋدا شەتەلدەگى كەي مەديالاردا ەلىمىز «پاسپورت ءبىتىرۋدى توقتاتتى، جاسىل كارتچكانىڭ بۇرىشىن قيىپ، ادامداردىڭ شەتەلگە شىعۋىنا تيىم سالدى» دەگەن حابار جارىققا شىقتى. ءتىلشى مەملەكەتتىك كوشپەندىلەردى باسقارۋ مەكەمەسىنەن مىنالاردى ۇعىستى: وسى تەكتەس حابارلار تۇگەل شەكارادان كىرىپ-شىعۋ ساياساتتارىمىزدى بۇرمالاپ، جالا جاپقان حابارلار بولىپ، ىندەتتەن ساقتانۋ-تىزگىندەۋدىڭ ۇدايىلانعان شارت-جاعدايىنداعى شەكارادان كىرىپ-شىعۋدى باسقارۋدىڭ زاڭ بويىنشا، دالمە-ءدال، ءونىمدى شارالارىنا كەدەرگىلىك جاساۋدى ماقسات ەتەدى.

ءتىلشى تاعى مىنالاردى ۇعىستى: جاڭا تيپتى ايدارشا ۆيرۋسپەن جۇعىمدالعان وكپە قابىنۋ ىندەتى تارالعاننان بەرى، مەملەكەتتىك كوشپەندىلەردى باسقارۋ قۇرىلىمدارى «ىندەتتىڭ شەتەلدەن ەنۋى مەن ەل ىشىندە قايتا قوزۋىنان ساقتانۋداي» باس ستراتەگيانى بۇلجىتپاي دايەكتى تياناقتاندىرىپ، شەكارادان كىرىپ شىعۋدى قاتاڭ، مىقتى ۇستاۋ ساياساتىن اتقاردى. مەملەكەتتىك كوشپەندىلەردى باسقارۋ مەكەمەسىنىڭ اقپارات مالىمدەمەشىسى تىلشىلىك قابىلداعاندا بىلاي دەدى: قالىڭ حالىق بۇقاراسى مۇنى تولىق ءتۇسىنىپ، بەلسەنە ءۇن قوستى. قاجەتتى، شۇعىل بولماعان جاعدايدا شەكارادان شىقپاۋدى سانالى تۇردە جۇزەگە اسىرىپ، شەكارادان شىعىپ ىندەت جۇقتىرىپ، شەكارادان كىرگەندە ىندەت الا كەلۋ حاۋىپ-قاتەرىن ءونىمدى تۇردە تومەندەتتى. جەر-جەردەگى ءار دارەجەلى كوشپەندىلەردى باسقارۋ قۇرىلىمدارى ىندەتتەن ساقتانۋ-تىزگىندەۋ مەن ەكونوميكالىق، قوعامدىق دامۋدى جوعارى ونىمدىلىكپەن ءبىر تۇتاس جوسپارلاۋ تالابى بويىنشا، ىندەتتەن ساقتانۋ-تىزگىندەۋ حاۋىپسىزدىگىنە تاباندى بولۋ نەگىزىندە، شەكارادان كىرىپ-شىعۋدى باسقارۋ شارالارىن ۇزدىكسىز ساپالىلاندىردى؛ شەتەلگە شىعىپ جۇمىس ىستەۋ، ءوندىرىستى قالپىنا كەلتىرۋ، ساۋدا-ساتتىقپەن اينالىسۋ، عىلمي زەرتتەۋمەن شۇعىلدانۋ، وقۋعا ءتۇسۋ سياقتى قاجەتتى قيمىلدارمەن شەتەلگە شىعاتىنداردىڭ، سونداي-اق، ەمدەلۋ، سالماقتى ناۋقاستارعا قارايلاسۋ سياقتى ادامگەرشىلىككە ساياتىن شۇعىل جۇمىس قاجەتى بار ادامداردىڭ پاسپورتىن دەر كەزىندە تەكسەرىپ بەكىتىپ، شەتەلگە شىعۋ راسمياتىن وتەپ، قالىپتى ءوندىرىس، تۇرمىس، ۇيرەنۋ سياقتى سەبەپتەرمەن شەكارادان كىرىپ-شىعاتىندارعا جەتكىزەتىن ىقپالىن بارىنشا ازايتتى؛ شەتەلگە شىعىپ ىندەتتەن ساقتانۋعا، ىندەتپەن شايقاس جاساۋعا ات سالىساتىن، اپاتتان قۇتقارۋ بۇيىمدارىن جانە جاڭا، ءتىرى اۋىل شارۋاشىلىق ونىمدەرىن تاسىمالدايتىن ادامدار مەن قاتىناس قۇرالدارىنىڭ پاسپورتىن شۇعىل ءبىتىرىپ، كەدەننەن وتۋدە قولايلىلىق جاراتىپ، قامداۋ تىزبەگى مەن كاسىپ تىزبەگىنىڭ حاۋىپسىزدىگى مەن ورنىقتىلىعىنا كەپىلدىك ەتتى. 

شەتەلدەگى مەديالار جاريالاعان ەلىمىز «پاسپورت ءبىتىرۋدى توقتاتتى، جاسىل كارتچكانىڭ بۇرىشىن قيىپ، ادامداردىڭ شەتەلگە شىعۋىنا تيىم سالدى» دەگەن جالعان حابارعا قاراتا، مەملەكەتتىك كوشپەندىلەردى باسقارۋ مەكەمەسىنىڭ اقپارات مالىمدەمەشىسى مىنالاردى ەسكەرتتى: شەكارادان كىرىپ-شىعۋشىلاردىڭ وسەك-اياڭعا سەنبەي، شەكارادان كىرىپ-شىعۋدا ماسەلەگە جولىقسا، سول جەردەگى شەكارادان كىرىپ-شىعۋدى باسقارۋ تاراۋلارىنىڭ قىزمەت وتەۋ تەرەزەلەرىنەن، مەملەكەتتىك كوشپەندىلەردى باسقارۋ مەكەمەسىنىڭ اكىمشىلىك ىستەر توراپ بەكەتى، ءۇنحات، ميكرو بلوگ قاتارلىلارداعى اكىمشىلىك ىستەر جاڭا مەديا تەكشەلەرىنەن نەمەسە «12367» 24 ساعات قىزمەت وتەيتىن ىستىق لەنيالى تەلەفونعا تەلەفون شالۋ ارقىلى قاتىستى ساياساتتاردى ۇعىسىپ، دۇرىس ينفورماتسيالارعا يە بولۋىن ءۇمىت ەتەمىز.

مۇنان تىس، مەملەكەتتىك كوشپەندىلەردى باسقارۋ مەكەمەسىنىڭ اقپارات مالىمدەمەشىسى مىنالاردى ايتتى: قازىر بۇكىل جەر شارىندا ىندەت ءالى دە كەڭ تارالۋدا، قازىرشە اياقتايتىن ءتۇرى جوق، سوندىقتان، ىندەت جاعدايىنىڭ دامۋىندا ءالى دە اسا زور تۇراقسىزدىق بار، شەتەلگە شىعىپ ىندەت جۇقتىرىپ الۋ حاۋىپ-قاتەرى ءبىرشاما زور. شەكارا ىشىندەگىلەردىڭ اسا قاجەت بولماعان، اسا شۇعىل بولماعان جاعدايدا شەكارادان شىقپاۋعا تاباندى بولىپ، جەكە باسىنىڭ دەنساۋلىعىنا، حاۋىپسىزدىگىنە شىنايى كەپىلدىك ەتۋى، ىندەتتەن ساقتانۋ، ىندەتكە قارسى تۇرۋدا وڭايلىقپەن قولعا كەلمەگەن كەلەلى ستراتەگيالىق جەتىستىكتەردى بىرگە قورعاۋى ءالى دە تىم قاجەتتى.

اۋدارعان: نۇرگۇل قۇمارقان قىزى

来源：人民网

编辑，制作：阿依娜