قىزمەتكە شىعاتىنداردىڭ دەنساۋلىعىن تەكسەرگەندە، B تيپتى باۋىر قابىنۋىن تەكسەرۋگە، جۇكتىلىكتى تەكسەرۋگە بولمايدى

قىزمەت ىزدەپ ءار قايسى مەكەمەنىڭ تابالدىرىعىن توزدىرىپ جۇرگەنىڭىزدە، مەكەمەلەردىڭ قاي-قايسىسى دا دەنساۋلىق تەكسەرتۋىڭىزدى تالاپ ەتەتىندىگىن بايقايسىز. سوسىن قايتا-قايتا شيپاحاناعا شاپقىلاپ، دۇركىن-دۇركىن قان الدىرىپ، قالتاڭىزدى دا قاعىپ بەرەسىز. دەنساۋلىق تەكسەرتۋ تۇرلەرىنىڭ ىشىىندە، ءتىپتى، كوكىرەك ءبولىمىن رەنتىگەنگە الۋ سياقتىلار دا كەزىگەدى. ءدال وسىنداي قايتالامالى تەكسەرۋلەر كىسنى مەزى ەتىپ، باسىڭىزدى قاتىرادى.

جۋىقتا مەملەكەتتىك كەڭەس كەڭسەسى «جوعارى مەكتەپ بىتىرگەن وقۋشىلار سياقتى جاستاردىڭ جۇمىستانۋ، شارۋاشىلىق قۇرۋ قىزمەتىن ونان ارى ويداعىداي ىستەۋ تۋرالى ۇقتىرۋدى» باسىپ تاراتتى (تومەندە قىسقارتىپ «ۇقتىرۋ» دەلىنەدى).

«ۇقتىرۋدا» قىزمەتكە شىعۋدا دەنساۋلىق تەكسەرتۋ ىسىنە قاتىستى كوپتەگەن تالاپتار ايقىندالدى. بىرلىكتە كورەلىك:

«ۇقتىرۋ» ادام ىستەتۋشى ورىنداردىڭ دەنساۋلىق تەكسەرتۋ تۇرلەرىن قىزمەت ورنىنا قاراي لايىقتى تۇراقتاندىرۋىنا جەتەكشىلىك ەتەدى.

زاڭعا، بەلگىلەمەگە قايشى تۇردە B تيپتى باۋىر قابىنۋىن تەكسەرۋ، جۇكتىلىكتى تەكسەرۋ سياقتى دەنساۋلىق تەكسەرۋ تۇرلەرىن ورىستەتۋگە بولمايدى.

سىرتقى اۋرۋلار بولىمىنە تەكسەرىلۋ، ىشكى اۋرۋلار بولىمىنە تەكسەرىلۋ، كوكىرەك ءبولىمىن رەنتىگەنگە سالۋ سياقتى نەگىزگى دەنساۋلىق تەكسەرۋ تۇرلەرىندە، جوعارى مەكتەپ بىتىرگەن وقۋشىلار 6 اي ىشىندە بەلگىلەمەگە ۇيلەسەتىن ەمدەۋ قۇرىلىمدارىندا دەنساۋلىق تەكسەرتكەن بولسا، ادام سىتەتۋشى ورىندار سول تەكسەرۋ ناتيجەسىن مويىنداۋى كەرەك، پرينسيپتىك جاقتان قايتالاي دەنساۋلىق تەكسەرتۋىن تالاپ ەتۋگە بولمايدى، ال، زاڭ-ەرەجەلەردە ايىرىم بەلگىلەمە بارلارى سول بەلگىلەمە بويىنشا اتقارىلادى.

ادام ىستەتۋشى ورىنداردا نەمەسە جوعارى مەكتەپ بىتىرگەن وقۋشىلاردا دەنساۋلىق تەكسەرتۋ ناتيجەسىنە قاراتا كۇمان تۋىلسا، قايتا تەكسەرۋدى، تولىقتاپ تەكسەرۋدى تالاپ ەتۋىنە بولادى. ال، جوعارى مەكتەپتەر مەكتەپ ءبىتىرۋ دەنساۋلىق تەكسەرۋىن ۇيىمداستىرمايدى.

ىلگەرىدە مەديالار جوعارى مەكتەپ بىتىرگەن وقۋشىلاردىڭ قايتا-قايتا دەنساۋلىق تەكسەرتۋدەي كەلەڭسىزدىككە ۇشىراعاندىعىن كوپ حابارلادى. مەكتەپ بىتىرگەن ءبىر وقۋشى قىسقا عانا 3 اي ىشىندە 4 رەت دەنساۋلىق تەكسەرتكەن، بارىنەن دە سوراقىسى كوكىرەك ءبولىمىن 4 رەت رەنتىگەنگە الدىرعان. ول بۇل ءىستىڭ دەنساۋلىعىنا ىقپال ەتۋىنەن الاڭدايدى ەكەن. قايتا-قايتا دەنساۋلىق تەكسەرتە بەرۋ مەكتەپ بىتىرگەن وقۋشىلاردىڭ قىرۋار قاراجاتى مەن كۇش-قۋاتىن ىسىراپ ەتۋمەن قويماي، ولاردىڭ دەنساۋلىعىن دا بۇلدىرەدى.

ال، تاعى ءبىر ءبولىم قىزمەتكە شىعۋ دەنساۋلىق تەكسەرتۋىندە تەكسەرىلەتىن تۇرلەر وتە كوپ ءارى تىم ءجونسىز، ونىڭ ۇستىنە، قوعامنان كەلگەندەردى كەمسىتۋ كۇمانىن دا جوققا شىعارۋعا بولمايدى. كەي ادام ىستەتۋشى ورىندار B تيپتى باۋىر قابىنۋىن تەكسەرۋ، جۇكتىلىكتى تەكسەرۋ سياقتىلاردى ءالى دە دەنساۋلىق تەكسەرتۋ تۇرلەرىنە ەنگىزىپ، ولارعا ءادىل بولماعان مامىلە جاساپ وتىر. 

شىندىعىنا جۇگىنسەك، كوپتەگەن قىزمەتكە شىعۋ دەنساۋلىق تەكسەرتۋىن ورنالاستىرۋدا، ادام ىستەتۋشى ورىندار قىزمەت ىزدەۋشىلەرگە ءتيىستى قامقورلىق كورسەتۋدىڭ ورنىنا، ولارعا ساقتانا قارايتىن سياقتى.

ۇقتىرۋدىڭ باسقا دا ماڭىزدى تۇيىندەرىن بىلايشا جيناقتاپ قويدىق:

وقۋ تاۋىسۋ جىلى ىشىندەگى جوعارى مەكتەپ بىتىرگەن وقۋشىلاردى جۇمىسقا قابىلداعان ءارى 1 جىلدان ارتىق ەڭبەك توقتامىنا قول قويعان ورتا، شاعىن، ۇساق كاسىپورىندارعا، ءبىر رەتتىك جۇمىسقا ورنالاستىرۋ قوسىمشا قاراجاتى بەرىلەدى، ساياساتتىڭ اتقارىلۋ مەرزىم شەگى 2022-جىلى 12-ايدىڭ 31-كۇنىنە دەيىن.

وقۋ تاۋىسۋ جىلى مەن مەكتەپتەن قول ۇزگەن 2 جىل ىشىندە جۇمىستانا الماعان جوعارى مەكتەپ بىتىرگەن وقۋشىلار يكەمدى كاسىپتەنسە، بەلگىلەمە بويىنشا قوعامدىق قامسىزداندىرۋ قوسىمشا قاراجاتىنان يگىلىكتەنەدى.

ىندەتتىڭ ىقپالىنا اۋىر دارەجەدە ۇشىراعان رايوندار 2022-جىلى 12-ايدىڭ 31-كۇنىنەن بۇرىن، ورتا-باستاۋىش مەكتەپ، بالالار باقشاسى، ورتا دارەجەلى كاسىپتىك مەكتەپ قاتارلىلاردىڭ وقىتۋشىلىق تولىمدىلىعىن تۇراقتاندىرۋدا، «الدىمەن قىزمەتكە شىعىپ، سوڭىنان كۋالىك الۋعا ەمتيقان بەرۋ» كەزەڭدىك شاراسىن اتقارۋىنا بولادى.

ەڭبەك قابىلەتى جانە جۇمىسقا ورنالاسۋ تىلەگى بار كەدەيلىكتەن قۇتىلدىرىلاتىن وتباسىلارىنداعى، ەڭ تومەنگى تۇرمىسى قامتاماسىزداندىرىلاتىن وتباسىلارىنداعى جانە بىردە-ءبىر ادامى جۇمىسقا ورنالاسپاعان وتباسىلارىنداعى جوعارى مەكتەپ بىتىرگەن وقۋشىلار، سونداي-اق، مۇگەدەك وقۋشىلار، ۇزاق ۋاقىت جۇمىسسىز جۇرگەن جوعارى مەكتەپ بىتىرگەن وقۋشىلار جۇمىستانۋعا كومەكتەسۋدىڭ ءتۇيىندى وبيەكتى ەتىلىپ، «ءبىر ادامعا ءبىر ارحيۆ تۇرعىزۋ»، «ءبىر ادامعا ءبىر شارا اتقارۋ» بويىنشا دالمە-ءدال قىزمەت وتەلىپ، ءاربىر ادامدى كەمىندە 3 تە 5 ءتۇرلى باعىتتامالى قىزمەت ورنى ينفورماتسياسىمەن قامدايدى.

بازار ارناسى ارقىلى جۇمىستانۋى شىنىندا قيىنعا سوققان قيىنشىلىعى بار جوعارى مەكتەپ بىتىرگەن وقۋشىلار الەۋمەتتىك يگىلىك سيپاتىنداعى قىزمەت ورىندارى ارقىلى ەڭ تومەنگى شەكتەن تۇسىرمەي ورنالاستىرىلادى.

مەملەكەتتىڭ وقۋعا كومەك قارىز اقشاسىن كەشىكتىرىپ قايتارۋ، ءوسىمىن ازايتۋ، كەشىرىم ەتۋ قاتارلى قولداۋ شارالارى اتقارىلادى، ۋاقىتى ۇزارتىلعان مەزگىلدە قاباتتاما ءوسىم ەسەپتەلمەيدى، ايىپ ءوسىم الىنبايدى، قارىز اقشانى قايتارۋ ۋاقىتى اسىپ كەتۋ قاتارىنا جاتقىزىلمايدى.

جەلىدەگى جۇمىسسىزداردى تىزىمدەۋ، قىزمەت ىزدەۋ شاعىن باعدارلاماسى، نەگىزگى ساتىدا تەكسەرىپ اداقتاۋ سياقتى ارنالار ارقىلى، جۇمىستانۋ تىلەگى بار، مەكتەپتەن قول ۇزگەن ءارى ءالى جۇمىستانا الماعان جوعارى مەكتەپ بىتىرگەن وقۋشىلارمەن تۇگەل بايلانىس جاساپ، اقىسىز تۇردە ءاربىر ادامدى ءبىر رەت كاسىپتىك جەتەكشىلىك ەتۋ، 3 رەت قىزمەت ورنىن تانىستىرۋ، ءبىر رەت كاسىپتىك كۋرستان وتكىزۋ نەمەسە جۇمىستانۋ پراكتيكاسى ورايىن بەرۋ سياقتىلارمەن قامدايدى.

2023-جىلدان باستاپ، «مەملەكەت بويىنشا ادەتتەگى جوعارى مەكتەپ تولىق كۋرس، ارناۋلى كۋرس بىتىرگەن وقۋشىلاردىڭ كاسىپتەنۋگە تىزىمدەلۋ كۋالىگى» مەن «مەملەكەت بويىنشا اسپيرانتتاردى كاسىپتەندىرۋگە تىزىمدەلۋ كۋالىگى» تاراتىلمايدى (تومەندە جالپىلاي كاسىپتەنۋگە تىزىمدەلۋ كۋالىگى دەلىنەدى)، كاسىپتەنۋگە تىزىمدەلۋ كۋالىگىن تولىقتاپ ءبىتىرۋ، جاڭعىرتىپ جاساۋ كۇشىنەن قالدىرىلادى. كاسىپتەنۋگە تىزىمدەلۋ كۋالىگى ەندىگارى جوعارى مەكتەپ تاۋىسقان وقۋشىلاردى جۇمىسقا قابىلداۋ، نوپوسقا قوندىرۋ، ارحيۆىن قابىلداۋ، جەتكىزۋ سياقتى راسمياتتارىن وتەۋدەگى قاجەتتى ماتەريال ەتىلمەيدى.

جوعارى مەكتەپ بىتىرگەن وقۋشىلاردىڭ توراپتا توقتامعا قول قويۋ جۇيەسىن اقاۋسىزداندىرىپ، ىندەتتىڭ ىقپالىنا ۇشىراعان رايوندارداعى ادام ىستەتۋشى ورىندار مەن جوعارى مەكتەپ بىتىرگەن وقۋشىلاردى توراپتا توقتامعا قول قويىسۋعا شابىتتاندىرۋ كەرەك. مەكتەپتەن كەشەۋىلدەپ اتتانعان بيىل مەكتەپ بىترەتىن وقۋشىلاردىڭ قىزمەتكە قاتىناسۋعا تىزىمدەلۋ، ارحيۆىن جولداۋ، نوپوسىن قوندىرۋ ۋاقىت شەگىن سايكەستى تۇردە ۇزارتۋ كەرەك.

2023-جىلدان باستاپ، وقۋ-اعارتۋ تاراۋلارى جوعارى مەكتەپ بىتىرگەن وقۋشىلاردىڭ بارار جەرىن تىزىمدەۋ ءتۇزىمىن اتقارىپ، جوعارى مەكتەپ بىتىرگەن وقۋشىلاردىڭ مەكتەپتەن قول ءۇزۋ راسمياتىن وتەۋدەگى قاجەتتى بۋىنداردىڭ ءبىرى ەتەدى.

1 ميلليون كاسىپتەنۋ پراكتيكاسى جۇمىس ورنىن جيناۋ جوسپارىن اتقارىپ، كاسىپورىندار مەن ءىس ورىندارى، قوعامدىق ۇيىمدار، ۇكىمەت قارجى قوسقان نىساندار، عىلمي زەرتتەۋ نىساندارى سياقتىلاردىڭ پراكتيكا ورىندارىن قۇرۋىن قولداپ، بەلگىلەمە بويىنشا جۇمىستانۋعا پراكتيكا جاساۋ قوسىمشا قاراجاتى بەرىلەدى.

اۋدارعان: نۇرگۇل قۇمارقان قىزى

来源：央视网

编辑，制作：阿依娜