وتتىقتى قازان تاعامجايى «قايتا وڭدەلگەن ماي» جاساپ ساتقاندىقتان، 14 ميلليون يۋاننان استام ايىپ سالىنىپ، قوجايىنى 10 جىلدىق مەرزىمدى قاماق جازاسىنا كەسىلدى

202 2-جىلى 8-ايدىڭ 10-كۇنى تۇستەن بۇرىن، سىچۋان ولكەسى يا-ان قالاسى شىميان اۋداندىق حالىق سوت مەكەمەسى اشىق سوت اشىپ، وسى اۋدانداعى ءمالىم ءبىر وتتىقتى قازان تاعامجايىنىڭ قوجايىنى مەن قىزمەتكەرلەرى ۋلى، زياندى ازىق-تۇلىك ءوندىرۋ، ساتۋ قىلمىسىن وتكىزدى دەپ ايىپتالعان، قىلمىستىق ىستەرگە ازاماتتىق ىستەر الەۋمەتتىك يگىلىك ارىز شاعىمى قوسارلانعان دەلوعا ۇكىم شىعاردى. 

بۇل دەلو يا-ان كولەمىندەگى، حالىق بۇقاراسىنىڭ ازىق-تۇلىك حاۋىپسىزدىگىن قورعاۋ، ازىق-تۇلىك حاۋىپسىزدىگىنە زالال جەتكىزەتىن قىلمىستىق ىستەر قىلمىستارىن جازالاۋ بارىسىندا، 10 ميلليون يۋان دارەجەلى جازالاۋ سيپاتىندىق تولەم سوماسىنا ۇكىم ەتىلگەن تۇڭعىش دەلو بولدى. 

وزىندىك قۇندى تومەندەتۋ ءۇشىن، قوجايىن قىزمەتكەرلەردى «قايتا وڭدەلگەن ماي» جاساۋعا ايداپ سالعان

2015-جىلى 8-ايدان باستاپ، شىميان اۋدانىنداعى ءمالىم وتتىقتى قازان تاعامجايىن تيجارات ەتۋشى يۇي فاميليالى تيجاراتتىڭ وزىندىك قۇنىن تومەندەتۋ، وتتىقتى قازاننىڭ ءدامىن تىل ۇيىرەتىن ەتىپ جاساۋ ءۇشىن، تاعامجاي داياشىلارى حى فاميليالى، پىڭ فاميليالى قاتارلىلاردى قاريدارلار تاماقتانىپ بولعان سوڭ ىدىستا قالعان كەرەكسىز مايلاردى (جايشىلىقتا «جۋىندى ماي تۇنباسى» نەمەسە «قايتا جيناپ الىنعان ماي» دەلىنەدى) مانەرلەپ، وتتىقتى قازان سورپاسىنا قۇياتىن ماي ەتىپ جاساۋعا ورنالاستىرعان ءارى مۇنى قاريدارلاردىڭ تاماعىنا ىستەتكەن.

2022-جىلى 1-ايدىڭ 13-كۇنى، قوعام حاۋىپسىزدىگى حالىق ساقشىلارى دەرەكتى تاپسىرىپ العان سوڭ، يۇي قوجايىنمەن تەلەفوندا بايلانىس جاساپ، وعان تەكسەرۋدى قابىلداۋدى ايتتى. ول تەرگەۋگە الىنعان سوڭ، تاعامجاي قىزمەتكەرلەرىن «قايتا وڭدەلگەن ماي» جاساۋعا ايداپ سالعان جانە ونى تاعامجايعا كەلىپ تاماقتانعان قاريدارلاردىڭ تۇتىنۋىنا ىستەتكەن قىلمىس فاكتىلەرىن قاز قالپىندا باياندادى. تەكسەرۋ ارقىلى، دەلو تۋىلعان كەزگە دەيىن، بۇل وتتىقتى قازان تاعامجايىنىڭ دەلوعا ساياتىن «قايتا وڭدەلگەن ماي» ساتقان سوماسى 1 ميلليون 477 مىڭ 941 يۋان 62 تيىن بولعاندىعى انىقتالدى.

دەلونى قاراۋ بارىسىندا، شىميان اۋداندىق حالىق پروكۋراتۋراسى قوسىمشا ازاماتتىق ىستەر الەۋمەتتىك يگىلىك ارىز-شاعىمىن بەرىپ، وتتىقتى قازان تاعامجايىنىڭ تيجاراتشىسى يۇي فاميليالىدان 14 ميلليون 779 مىڭ 416 يۋان 20 تيىندىق جازا سيپاتىندىق تولەم سوماسىن تولەۋدى جانە قالا دارەجەلى مەديادا اشىق كەشىرىم سۇراۋىن تالاپ ەتتى. 

ازىق-تۇلىك حاۋىپسىزدىگىن زاڭنىڭ اتىمەن قورعادى

شىميان اۋداندىق حالىق سوت مەكەمەسى بۇل دەلونى قاراعان سوڭ، 2022-جىلى 8-ايدىڭ 10-كۇنى، قىلمىستىق ىستەرگە قوسارلانعان ازاماتتىق ىستەر ۇكىمىن دە شىعاردى.

قىلمىستىق ىستەر بويىنشا جازالاۋ جاعىندا: قوجايىن يۇي فاميليالى، داياشىلار پىڭ فاميليالى، حى فاميليالى قاتارلى 3 ايىپكەر ۋلى، زياندى ازىق-تۇلىك ءوندىرۋ، ساتۋ قىلمىسىن وتكىزگەندىكتەن، جەكە-جەكە 10 جىلدىق، 5 جىلدىق، 2 جىلدىق مەرزىمدى قاماق جازاسىنا ۇكىم ەتىلىپ، قىلمىستان تاپقان بارلىق تابىسى قايتارىپ الىنادى، وعان قوسا 3 ميلليون 600 مىڭ يۋان، 100 مىڭ يۋان، 50 مىڭ يۋان ايىپ سالىنادى، وسى 3 ادامنىڭ ازىق-تۇلىك وندىرۋىنە، تيجارات ەتۋىنە جانە قاتىستى باسقارۋ قىزمەتىمەن شۇعىلدانۋىنا ءومىر بويى تيىم سالىنادى. 

قوسارلانعان ازاماتتىق ىستەر الەۋمەتتىك يگىلىك ارىز-شاعىمى جاعىندا: وتتىقتى قازان تاعامجايىن تيجارات ەتىپ وتىرعان يۇي فاميليالى 14 ميلليون 779 مىڭ 416 يۋان 20 تيىن جازا سيپاتىندىق تولەم سوماسىن تولەۋگە ءارى قالا دارەجەلى جانە ونان جوعارى مەديالاردا قوعامداعى بۇقارادان اشىق كەشىرىم سۇراۋعا ۇكىم ەتىلدى.

اس ادامنىڭ ارقاۋى بولسا، ازىق-تۇلىكتە حاۋىپسزدىك ماڭداي الدى ورىنعا قويىلادى

ازىق-تۇلىك حاۋىپسىزدىگى حالىق بۇقاراسىنىڭ دەنساۋلىعى مەن باس اماندىعىنا سايادى. مۇندا تەك قىلمىس وتكىزۋ ماسەلەسى عانا ەمەس، ونان دا ماڭىزدىسى، بۇل ەڭ كوكەيتەستى حالىق تۇرمىسى ماسەلەسى. ازىق-تۇلىك ماماندارى بىلاي دەپ اتاپ كورسەتتى: وتتىقتى قازان تاعامجايىنىڭ قوجايىنى قايتالاي مانەرلەپ ىستەتىپ وتىرعان «جۋىندى ماي تۇنباسىنىڭ» قۇرامىنداعى ماي قىشقىلى سياقتى قورەكتىك زاتتار الدەقاشان ىدىراپ تۇگەگەن، ال، فەنولدار، كەتوندار سياقتى راكقا شالدىقتىرعىش ورگانيكالىق قوسىلىستار شۇعىل ارتقان بولىپ، ادام دەنساۋلىعىنا اۋىر زايان تۋدىرادى.

وسى دەلونى ىستەگەن سوتشى بىلاي دەپ اتاپ كورسەتتى: «ەڭ جوعارى حالىق سوت مەكەمەسى، ەڭ جوعارى حالىق پروكۋراتۋراسى، قوعام حاۋىپسىزدىگى مينيسترلىگى قاتارلىلاردىڭ جۋىندى ماي تۇنباسى قىلمىستىق ارەكەتتەرىن زاڭ بويىنشا قاتاڭ جازالاۋ جونىندەگى ۇقتىرۋىنداعى» بەلگىلەمەلەرگە نەگىزدەلگەندە، «جۋىندى ماي تۇنباسى» («قايتا وڭدەلگەن ماي» دەپ تە اتالادى) قىلمىسى دەپ اسحاناداعى قوقىر-قوقسىقتار، كەرەكسىز ماي، ءتۇرلى ەت جانە ەت ونىمدەرىن مانەرلەۋدەن قالعان جاراقسىز زاتتار سياقتى ازىق-تۇلىككە جاتپايتىن شيكىزاتتاردان «ازىقتىق ماي» ءوندىرۋ، مانەرلەۋ ارەكەتى، سونداي-اق، «جۋىندى ماي تۇنباسىنان» وندىرىلگەن، مانەرلەنگەن ماي ەكەندىگىن انىق بىلە تۇرا، ازىقتىق ماي رەتىندە ساتۋ ارەكەتى ايتىلادى. سوندىقتان، ۋلى، زياندى ازىق-تۇلىكتەردى ءوندىرۋ، ساتۋ قىلمىسى ەرەكشە ناتيجەنىڭ تۋىلۋىن تالاپ ەتپەيدى، ارەكەت جاساۋشى ءوزى وندىرگەن نەمەسە مانەرلەگەن ازىق-تۇلىكتەرگە ۋلى، زياندى، ازىق-تۇلىككە جاتپايتىن شيكىزات قوسسا نەمەسە ۋلى، زياندى، ازىق-تۇلىككە جاتپايتىن شيكىزاتتان وندىرىلگەن ازىق-تۇلىك ەكەندىگىن انىق بىلە تۇرىپ ساتسا بولعانى، بۇل قىلمىس قالىپتاسادى.

وتتىقتى قازان تاعامجايىنىڭ «قايتا وڭدەلگەن ماي» ىستەتۋ ارەكەتى تۇتىنۋشىلاردىڭ ۇقىعىنا اۋىر دارەجەدە قول سۇعۋ ارەكەتىن قالىپتاستىرادى ءارى قوعامدىق جالپىلىق مۇددەگە دە اۋىر زيان جەتكىزەدى. سوندىقتان، سايكەستى قىلمىستىق ىستەر جاۋاپكەرشىلىگىن ارقالاۋمەن بىرگە، قاتىستى ازاماتتىق ىستەر جاۋاپكەرشىلىگىن دە ارقالاۋى ءتيىس. «قايتا وڭدەلگەن ماي» جاساپ ساتىپ پايدا تابۋ دەلوسى تۋرالى ايتساق، «جۇڭحۋا حالىق رەسپۋبليكاسىنىڭ ازىق-تۇلىك حاۋىپسىزدىگى زاڭىنىڭ» 148-تارماعىنداعى بەلگىلەمەلەرگە نەگىزدەلگەندە، ازاماتتىق ىستەر الەۋمەتتىك يگىلىك ارىز-شاعىمىن قوسارلاي بەرۋشى جاق قاتىستى ادامداردان ولاردىڭ ءوزى وندىرگەن جانە ساتقان «قايتا وڭدەلگەن ماي» باعاسىنىڭ 10 ەسەسىندەي جازالاۋ سيپاتىندىق تولەم سوماسىن تولەۋدى تالاپ ەتۋىنە بولادى. مىنە بۇل وسى دەلودا يۇي فاميليالىنى 14 ميلليون 700 مىڭ يۋاننان استام جازا سيپاتىندىق تولەم سوماسىن تولەۋگە ۇكىم ەتۋدەگى زاڭدىق نەگىز بولىپ تابىلادى. 

اۋدارعان: نۇرگۇل قۇمارقان قىزى

来源： 中国新闻社

微信制作：阿依娜