11-ايدىڭ 25-كۇنى ٴتۇن ورتاسىندا، ٴۇرىمجى قالالىق حالىق ۇكىمەتىنىڭ اقپارات كەڭسەسى اقپارات جاريالاۋ ٴماجىلىسن اشىپ، 11-ايدىڭ 24-كۇنگى ٴورت اپاتىنا قاتىستى ىستەرگە تۇسىنىك جاساپ، ٴورت اپاتى تۋىلعان شاعىن رايون ىندەت قاتەرى تومەن رايون با، جوق؟ ٴورت كەتكەن تۇرعىندار عيماراتىنىڭ باس ساۋعالاۋ جولى تەمىر سىممەن بايلانعانى شىن با، جالعان؟ دەگەن سياقتى قوعام كوڭىل بولگەن ماسەلەلەر جونىندە اڭىس ٴبىلدىردى. ٴۇرىمجى قالاسىنىڭ قالا باستىعى مامەتيمىن قادىر قالالىق ۇكىمەت اتىنان قايتىس بولعاندارعا قايعىلى ازا ٴبىلدىرىپ، قازا بولعانداردىڭ وتباسىنداعىلاردان، جارالانعانداردان جانە ولاردىڭ وتباسىنداعىلاردان شىنايى حال سۇراپ، بۇكىل قالا تۇرعىندارىنان كەشىرىم سۇرادى.

ٴۇرىمجى قالاسى تيانشان رايونىنىڭ رايون باستىعى حاميت مامەتيمىن ٴورت اپاتى تۋىلعاننان كەيىن، ەمدەۋ تاراۋلارى ەڭ وزىق ەمدەۋ قاينارىنان پايدالانىپ، قۇتقارۋ-ەمدەۋ جۇمىستارىن جۇرگىزىپ، ٴاربىر جارالانۋشىعا ەمدەۋ جوباسىن جاساعاندىعىن، قازىر، جارالانعانداردىڭ جاعدايى ورنىقتى، ومىرلەرىنە حاۋىپ جوق ەكەندىگىن، جەرگىلىكتى ۇكىمەت تاراۋلارى تۇرعىنداردى ورنالاستىرۋ، جاعداي ۇعىسىپ كومەك بەرۋ، پسيحولوگيالىق جاقتان كوڭىل-كۇيىن ورنىقتىرۋ قاتارلى جۇمىستاردى جالپى بەتتىك ويداعىداي ىستەگەندىگىن ايتتى. 

توراپتا تارالعانداي ٴورت كەتكەن عيماراتتىڭ باس ساۋعالاۋ جولى تەمىر سىممەن بايلاپ تاستالعان با، جوق دەگەن سياقتى ماسەلەلەر جونىندە، حاميت مامەتيمىن بىلاي دەدى: شاعىن رايون قاراستى ٴمالى باسقارماسى، الەۋمەتتىك رايون سونداي-اق ورتتەن ساقتانۋ-ٴورت ٴوشىرۋ جاۋىنگەرلەرىنىڭ قايتا-قايتا تەكسەرىپ انىقتاۋىنشا، شاعىن رايوننىڭ باس ساۋعالاۋ جولىن تەمىر سىممەن بايلاپ تاستاۋ ماسەلەسى كورىلمەگەن، ٴاربىر وتباسىنىڭ ەسىگى، قاباتقا كىرۋ ەسىگىنىڭ بارلىعى بەكىتىلمەگەن. توراپتا تارالىپ جۇرگەن قابات ەسىكتەرىن تەمىر سىممەن بايلاپ تاستاعان سۋرەتتىڭ بارلىعى بوگدە نيەتپەن جالعاننان تاراتقان سۋرەتتەر.

توراپتاستار كۇدىكتەنگەن «ٴورت كەتكەن شاعىن رايون ىندەت قاتەرى تومەن رايون ەكەن، ادامداردىڭ عيماراتتان تۇسىنۋىنە بولادى ەكەن عوي» دەگەن سياقتى ماسەلەلەر جونىندە، حاميت مامەتيمىن بىلاي دەدى: 2022-جىلى 11-ايدىڭ 12-كۇنىنەن باستاپ، ٴورت كەتكەن شاعىن رايون قاتەرى جوعارى رايوننان قاتەرى تومەن رايونعا تەڭشەلگەن. سوڭىنان، تيانشان رايوندىق ىندەتتەن ساقتانۋ-تىزگىندەۋ قولباسشىلىق ٴبولىمى جان-جاقتىلى باعالاپ سارالاۋ ارقىلى، 11-ايدىڭ 20-كۇنىنەن باستاپ، شاعىن رايون تۇرعىندارى كەزەكپەن سىرتقا شىعىپ، شاعىن رايون ىشىندە ٴجۇرىپ تۇرۋىنا بولاتىن بولعان.

ٴۇرىمجى قالالىق ورتتەن ساقتانۋ-ٴورت ٴوشىرۋ بولىمشە اترەتىنىڭ باستىعى لي ۋىنشىڭ بىلاي دەدى: وسى رەتكى ٴورتتىڭ وت كۇشى كۇشتى، ٴورشۋى تەز، قامالىپ قالعان ادام كوپ، ادامداردى بىتىراتۋ، قۇتقارۋ قيىن بولۋ سياقتى ەرەكشەلىكتەر بولدى. ورتتەن ساقتانۋ-ٴورت ٴوشىرۋ تاراۋلارى 23 ٴورت ٴوشىرۋ كولىگىن شىعارىپ، 109 ٴورت ٴوشىرۋشى كوماندىر-جاۋىنگەر ٴورت ٴوشىرۋ-قۇتقارۋعا قاتىناستى. ٴورت كەتكەن شاعىن رايوننىڭ جولى تار، كولىك توقتاتاتىن ورىن ٴبىرشاما از، جولدىڭ ەكى جاعىنا توقتاتىلعان جەكە كولىكتەر كوپ بولعاندىقتان ٴىرى تۇرپاتتى ٴورت ٴوشىرۋ كولىگىنىڭ شاعىن رايونعا كىرۋى قيىنعا سوقتى. ادام قۇتقارۋ جانە عيماراتتىڭ ٴىشى-سىرتىنداعى ٴورتتى ٴوشىرۋ جۇمىستارىن ىستەۋمەن بىرگە، قاتىستى تاراۋلاردى ۇيىمداستىرىپ، عيماراتتىڭ الدىنا توقتاتقان كولىكتەردى ورنىنان جىلجىتىپ، جەرگە ورناتقان قادالاردى الىپ، عيماراتتىڭ وڭتۇستىك جانە سولتۇستىك بۇيىرىندەگى ٴورتتى ٴوشىرۋ جولىن دەرلىكتەي اشتىق.

مامەتيمىن قادىر بىلاي دەدى: شينجياڭ ۇيعۇر اۆتونوميالى رايونى مەن ٴۇرىمجى قالاسى بىرلەسپە تەكسەرۋ گرۋپپاسىن قۇرىپ، ٴورت كەتۋ سەبەبى مەن جاۋاپكەرشىلىگىن ىشكەرىلەي تەكسەرۋدە، قىزمەتىنەن اعاتتىق كەتىرگەن قىزمەتكەرلەردىڭ جاۋاپكەرشىلىگىن زاڭ-ٴتۇزىم بويىنشا قاتاڭ قۋزاستىرادى، استە اياقسىز قالدىرمايدى.

11-ايدىڭ 24-كۇنى ساعات 19 دان 49 مينۋت وتكەندە، ٴۇرىمجى قالاسى تيانشان رايونى جيشياڭيۋان شاعىن رايونىنداعى ٴبىر بيىك تۇرعىندار عيماراتىنا ٴورت كەتىپ، 10 ادام قازا بولىپ، 9 ادام جارالاندى. قاتىستى تاراۋلار ناق مايداندا تەكسەرۋ جانە ۋاقيعاعا قاتىستى ادامنىڭ ايتقانىمەن بىرلەستىرە وتىرىپ، ٴورت تۇتانعان ورىن 1502-ٴنومىرلى ٴۇيدىڭ شىعىس جاتىن بولمەسىنىڭ شىعىس وڭتۇستىك بۇرىشى ەكەندىگىن تۇراقتاندىردى، ٴورتتىڭ جاتىن بولمەدەگى ەلەكتر جابدىعى سىم تاقتاسىنىڭ جانۋىنان تۋىلعاندىعى العاشقى قادامدا تۇراقتاندىرىلدى، ۋاقيعا جالعاستى ىشكەرىلەي تەكسەرىلۋ ۇستىندە. 

اۋدارعان: اناربەك ٴابىلماجىن ۇلى. 

来源：新华社

翻译：阿那尔别克

审稿、制作：古丽美热