ينفورماتسيا اشكەرەلەۋ: mzjubao@cnr.cn

ٴتۇيىندى تۇعىر

مۇنداي كادرلاردىڭ بۇقارانى زارلاتۋىنا ەندىگارى جول بەرىلمەيدى

来源:央广网     |责编:阿依娜|     发布日期: 2023-01-23 20:17

مۇنداي كادرلاردىڭ بۇقارانى زارلاتۋىنا ەندىگارى جول بەرىلمەيدى

ورتالىق ءتارتىپ تەكسەرۋ كوميتەتىنىڭ توراپ بەكەتى: ٴىس بىتىرمەيتىن كادرلاردىڭ بۇقاراعا زالال جەتكىزۋىنە ەندىگارى جول قويۋعا بولمايدى

«باسە، شىن تىڭ مەن ما لي بولماسا، كونسەرتتىڭ ءسانى كەلە مە»، بۇل كومەديانىڭ ايتپاق ويى مەنىڭ دە كوڭىلىمدەگىنى ءداپ باستى ەمەس پە»… 2023-جىلى قويان جىلعى كوكتەم مەرەكەسىنە ارنالعان ساۋىق كەشتە، شىن تىڭ، ما لي، اي لۇن قاتارلىلار ورىنداعان كومەديا «ور» اشتى اجۋاعا قۇرىلعان بولىپ، باستالعاننان اقىرلاسقانعا دەيىن كورەرمەننىڭ ىشەك-سىلەسىن قاتىرىپ، بىردەن جۇرت جۇرەگىنە جول تارتتى.

«ور» اتتى كومەديادا، شىن تىڭ «جاۋاپكەرشىلىك ارقالامايتىن، مىندەتىن وتەمەيتىن، ىستەگىسى كەلمەيتىن، ىستەۋگە باتىلدىق تا ەتە المايتىن، تەك بىلەگىن ءتۇرىپ ءبىر شەتتە قاراپ عانا تۇراتىن» كادردىڭ وبرازىن توتەنشە جاندى سومداعان. كومەدياداعى حاۋ مەڭگەرۋشى جاۋاپكەرشىلىكتەن جۇرداي بولىپ، بۇقارانىڭ مۇڭ-مۇقتاجىنا نەمقۇرايدى قارايدى، سونىمەن بىرگە، ءوز قىلىعىنا ۇنەمى ادام تاپپاس تاماشا سەبەپتەر مەن سىلتاۋلار تاۋىپ الادى. ماسەلەن: «حالىق بۇقاراسىنىڭ جولداعى كومەسكى حاۋىپ-قاتەردەن ساقتانۋ تانىمى جەتەرسىز» دەيتىن ءبىر ءسوزى بار، مۇنى ەستىگەندە كۇلەرىڭىزدى دە، جىلارىڭىزدى دا بىلمەيسىز. وسى ءبىر «ءمانساپ مايدانىنداعى بىلىق-شىلىقتىڭ» سوڭى بىلايشا اقىرلاسادى: الگى جارتى جىلعا دەيىن تولتىرىلماعان جولداعى ور ءمانساپقا ەندى وتىرعان ما مەكەمە باستىعىنا كەسىرىن تيگىزۋمەن عانا قويماي، حاۋ مەڭگەرۋشىنىڭ ءوز وبرازى مەن ورنىنا دا زالال كەلتىرەدى.

«ٴىس بىتىرمەيتىن» كادرلاردىڭ قوعامعا جەتكىزەتىن زالالى اسا زور. ولاردىڭ ارەكەتى پارتيا مەن مەملەكەت ىستەرىنىڭ دامۋىنا ورالعى بولادى، حالىقتىڭ باي-باقۋاتتى تۇرمىسقا كەنەلۋىنە كەسىر تيگىزەدى. ول عانا ەمەس-اۋ، بەينە كومەدياداعى ما مەكەمە باستىعى ايتقانداي، ولار بۇقارانىڭ جۇرەگىن جارالايدى.

قابىرعاعا بەت جۇزدىك ءۇشىن ءىلىپ قويىلعان جالعان سيلىق جالاۋلارمەن سالىستىرعاندا، بۇقارانىڭ القاۋى عانا ولمەس ەڭبەككە بەرىلگەن شىنايى قۇرمەت بولار ەدى. ءمانساپتىلاردىڭ جۇمىستان قاشقالاقتاۋى، ولار ءۇشىن ومىرىندەگى ەڭ ۇلكەن نامىستى ءىس سانالۋى كەرەك. پارتيالى باسشى كادر بولعان ادام، دۇرىس قىزمەت ناتيجە كوزقاراسىن ورناتىپ جانە ايگىلىپ، بۇقارانىڭ مۇڭ-مۇقتاجىنا جوقشى بولۋى، جاۋاپكەرشىلىك ارقالاپ، ءىس تىندىرۋدى داڭق ساناۋى، حالىق ءۇشىن قىزمەت ىستەۋدى داڭق ساناۋى، قىزمەت پوزيتسياسىن دۇرىستاپ، قىزمەت ستيلىن جاقسارتۋى كەرەك. سونىمىن بىرگە، ۇيرەنۋ مەن شىڭدالۋعا كۇش سالىپ، ماسەلەنى شەشۋ قابىلەتى مەن ونەرىن بارىنشا جوعارىلاتۋى، «جەتى-سەگىز ورىندى سايكەستىرۋ» سياقتى ماسەلەنى اۋىر كورىپ قاشقالاقتاماۋى، جاۋاپكەرشىلىك ارقالاپ، ىسكەرلىك كورسەتۋ ارقىلى، بۇقاراعا اناعۇرلىم زور باقىت جاراتۋى كەرەك.

 «ٴىس بىتىرمەيتىن» كادرلارعا قاراتا، سىرقاتىنا قاراي ەم جاساۋ كەرەك، ياعني، اركىمىنىڭ ناقتى احۋالىنا قاراي ءىس كورىپ، كوپ ءتۇرلى ءتاسىلدى قاتار قولدانۋ قاجەت. مۇنىڭ ىشىندەگى ەڭ ماڭىزدى ءبىر جاعى ـ ادام تاڭداۋ، ادام ىستەتۋدىڭ عىلمي مەحانيزمىن ورناتىپ جانە كەمەلدەندىرىپ، جاۋاپكەرشىلىك ارقالاۋعا، ىسكەرلىك كورسەتۋگە ىنتالاندىرىپ، كادرلاردى دۇرىس تاني ءبىلۋ، تاڭداي ءبىلۋ جانە ويداعىداي ىستەتە ءبىلۋ. «ٴىس بىتىرمەيتىندەردەن» باتىل باس تارتىپ، جاۋاپكەرشىلىك ارقالاي الاتىنداردى باتىل قولداپ، اتويشىلاردى، ىسكەرلەردى تاڭداپ ءوسىرۋ، «تىندىرعان جۇمىسىڭ كوپ بولسا، قاتەلىك كوپ شىعادى؛ قانشالىق از ىستەسەڭ، قاتەلىك تە سونشالىق از بولادى؛ ال، ەشتەمە ىستەمەسەڭ، ەش قاتەلىك تۋىلمايدى» دەيتىن قاتە كوزقاراستىڭ ءورشىپ، ەتەك الۋىنان ساقتانۋ كەرەك. 20-كەزەكتى ورتالىق ءتارتىپ تەكسەرۋ كوميتەتى 2-جالپى ءماجىلىسىنىڭ مازمۇنداماسىندا، فورماشىلدىقتى، تورەشىلدىكتى تۇزەتىپ، «پارتيا ورتالىق كوميتەتىنىڭ ماڭىزدى شەشىمدەرى مەن ورنالاستىرۋلارىن دايەكتىلەندىرۋ جاعىندا كەزىگەتىن جاۋاپكەرشىلىك ارقالاماۋ، كۇش سالماۋ»، «قىزمەتىنە نەم قۇرايدى قاراپ، مىندەتىن وتەمەۋ» سياقتى ستيل ماسەلەلەرىن رەتتەۋ-جونگە سالۋعا قاراتا ورنالاستىرۋ جاسالدى، ءتارتىپ تەكسەرۋ، باقىلاۋ-تەكسەرۋ ورگاندارىنان ءتۇپ تامىرىن قازىپ، ءتۇيىندى ءداپ باسىپ تاۋىپ، دالمە-ءدال تۇزەتىپ، ناقتى ونىمدىلىكتى ارتتىرۋ تالاپ ەتىلدى.

«ٴىس بىتىرمەيتىن» كادرلاردى جونگە سالۋ ءتارتىپ تەكسەرۋ، باقىلاۋ ورگاندارىنىڭ بەل شەشىپ، بىلەك سىبانا كىرىسۋىن قاجەت ەتەدى. مۇندا ءتارتىپتى قاتاڭ اتقارىپ، جاۋاپقا تارتىپ، ەسكەرتۋ بەرىپ ساقتاندىرىپ، «ەگەر كادر ەكەنىڭ راس بولسا، بۇلايشا ەپتەپ-سەپتەپ كۇن وتكىزۋىڭە استە جول بەرىلمەيدى» دەيتىن نىسايدى شىنداپ اڭعارتۋ كەرەك. سونىمەن بىرگە، كۇندەلىكتى باقىلاۋدى كۇشەيتىپ، باقىلاۋ تاسىلىندە جاڭالىق جاراتىپ، باقىلاۋ ارناسىن كەڭەيتىپ، پارتيالى كادرلاردا كورىلەتىن قىزمەت بارىسىندا ەپتىلىككە باسىپ اۋىردىڭ ۇستىمەن، جەڭىلدىڭ استىمەن زاۋلاۋ، باقاي قۋلىققا باسىپ ارامزالىق ىستەۋ، العا ۇمتىلعىسى كەلمەي كەرەناۋلىق تانىتۋ سياقتى ءتۇرلى «نەم كەتتىلىك» ماسەلەلەرىن ەرتە بايقاپ، ەرتە ەسكەرتىپ، ەرتە تۇزەتىپ، «ٴىس بىتىرمەيتىن» كادرلاردىڭ جۇرەگىنە جاۋاپكەرشىلىك ۇيالاتىپ، وزىمشىلدىكتەن ارىلىپ، حالىققا باقىت جاراتۋ جولىندا قۇلشىناتىن ەتىپ، ستيلى پاك، سالتى دۇرىس ءىس تىندىرۋ، شارۋاشىلىق قۇرۋ ورتاسىن جاراتۋ كەرەك.

جىل ەسەبى كوكتەمدە، قۇلشىنىس نە ءبىر كەرەمەتتەردى جاراتادى. پارتيالى كادرلاردىڭ قول-اياعى جەڭىل، ىسكەر دە ەلگەزەك بولۋى، باتىلدىقپەن ىستەۋى، پەيىلدەنە ىستەۋى، شىنايى ىستەۋى، تىندىرا ىستەۋى كەرەك. ەپتەپ-سەپتەپ كۇن وتكىزەتىن، مىندەتىن وتەگىسى كەلمەيتىن، شالقادان جاتۋدى عانا كۇيتتەيتىن كادرلار ەندىگارى تابان تىرەپ تۇرا المايدى.

اۋدارعان: نۇرگۇل قۇمارقان قىزى 

来源:中央纪委国家监委网站

 

译:努尔古丽

编辑、制作:阿依娜

中央广播电视总台 央广网 版权所有

مۇنداي كادرلاردىڭ بۇقارانى زارلاتۋىنا ەندىگارى جول بەرىلمەيدى

ورتالىق ءتارتىپ تەكسەرۋ كوميتەتىنىڭ توراپ بەكەتى: ٴىس بىتىرمەيتىن كادرلاردىڭ بۇقاراعا زالال جەتكىزۋىنە ەندىگارى جول قويۋعا بولمايدى