1.تىلەكتەر تىزىمدىگىن جاساپ شىق

جاڭا ءبىر جىلدا، ۋاقىتتى بوس وتكىزبەيىن دەسەڭ، ەرتەرەك جوسپارلاپ، تىڭ نىسانالارىڭدى ورىناتىپ ال. ءبىر بەت قاعازعا تىلەكتەرىڭدى ەرىنبەي انىقتاپ ءتىزىپ شىق.

ايتالىق، تىڭنان ءبىر ونەر ۇيرەنىپ، بولاشاققا باراتىن جولىڭدى كەڭەيتە ءتۇس؛ دوستارىڭدى بىرگە ساياحاتتاۋعا شاقىرىپ، ەمىن-ەركىن تۇرمىستىڭ قىزىعىن كور؛ نە بولماسا كوڭىلىڭدەگى ادامىڭا جۇرەك ۇنىڭدى ءبىلدىرىپ، ءومىردىڭ تىڭ وربيتاسىن بىرگە باس…

جاڭا ءبىر جىلداعى جاڭا تىلەكتەردىڭ جەتەگىندە، بۇدان بىلايعى ءار مينۋت ءار سەكۋنتتا، بارلىعىمىز قىزۋ سۇيىسپەنشىلىك ارقالاپ، شىت جاڭا بەينەدە كورىنەتىن بولايىق. 

2.تىڭ سايىستاردى قابىلداي ءبىل

ومىردە تىڭ سايىستارعا ءدوپ كەلىپ وتىرامىز، مىنادان الاڭداپ انادان قورقىپ جۇرگەنشە، باتىلدىق كورسەتىپ، ۇدىرە العا تارتا بەرگەنگە جەتپەيدى. 

باتىلدىق كورسەتۋ الكەۋدەلىك ىستە، ءوز بەتىڭمەن كەتە بەر دەگەندىك ەمەس، قايتا راحات قۇمارلىقتى تاستاپ، ارمانىڭدى ىسكە اسىرا ءبىل دەگەندىك.

جۇرەكتى بولعاندا عانا بىردەڭە تىندىرا الاسىڭ. ۇمتىلۋعا، سىناپ كورۋگە، ويلاۋعا، ىستەۋگە باتىل بول، سوندا عانا ومىردە وكىنىش از، قۋانىش كوپ بولادى.

3.شامانىڭ كەلىسىنشە قول ۇشىن بەرەتىن بول

بىرەۋگە گۇل ۇسىنساڭ، قولىڭدا قوش ءيسى قالادى. باسقالارعا قايىرىمدى بول، كورشىڭمەن تاتۋ ءوت، باسقالارعا قول ۇشىن بەرۋ وزىڭە شاتتىق سيلاعانمەن تەڭ.

ءومىردىڭ ۇزاق ساپارىندا، قول ۇشىن بەرەتىن ورايلار كوپ بولادى. جاڭبىرلى كۇنى، قاتار كەتىپ باراجاتقان بىرەۋگە قولشاتىرىڭدى كوتەر، كوشە اۆتوبۋزىندا بىرەۋگە ورنىڭدى بەر…

زارەدەي جاقسىلىق بولسادا ىستەي بەر. ىزگى ىستەردى شاماڭنىڭ كەلگەنىنشە كوپ ىستەپ، مەيىر باعىشتاي جۇرسەڭ، دۇنيە اناعۇرلىم كوركەم بولا تۇسەدى. 

4.ءار ۋاق ۇلكەن تازالىق ىستەپ تۇر

ءۇي ءىشى بىقسىپ جاتسا، ەڭسەڭ ءتۇسىپ، كوڭىل-كۇيىڭە ىقپال جاسايدى. ال تەرەزەلەر جارقىراپ، ءۇي ءىشى تاپ-تۇيناقتاي تۇرسا، رۋحىڭ سەرپىلىپ، كوڭىلدى جۇرەسىڭ.

جاڭا ءبىر جىلدا، ءۇيدى ءار ۋاق تازالاپ تۇراتىن ادەت قالىپتاستىر. قاجەتكە جارايتىن نارسەلەردى قۇنىتتاپ ساقتاپ قوي، قاجەتى جوق نارسەلەردى دەر كەزىندە جوعالت.

تاستاۋعا ءتيىستىنى تاستاي ءبىلۋ، قيۋعا ءتيىستىنى قيا ءبىلۋ ءتيىس، سوندا عانا تۇرمىستى ەركىن مەڭگەرىپ، ساپارعا جەڭىل اتتانامىز.

5.نازاردى شوعىرلاندىرا ءبىل

ۇيرەنگەندە نازاردى ەرەكشە شوعىرلاندىرساق عانا تەرەڭ وي جۇگىرتە الامىز. ەگەر ىنتا قويماساق، قانشا ۇزاق ۋاقىت جۇمسادىق دەگەنمەن، ءونىمى ماردىمسىز بولادى.

جاڭا ءبىر جىلدا، قىزىعاتىن سالاڭدى تاڭداپ الىپ، زەيىنىڭدى سولاي قاراي شوعىرلاندىراتىن بول. وقىعان كىتاپ، ۇيرەنگەن ءبىلىم تۇبىندە كوز ايامىزدى كەڭەيتىپ، رۋحىمىزدى بايىتاتىن بولادى.

 ءبارىن جيناعانشا ءنارىن جينا، ارنەگە اۋەس بولعانشا بىرەۋىنە مامان بول. نازاردى شوعىرلاندىرا بىلسەڭ، قانداي الىس نىساناعا دا جەتە الاسىڭ.

6.دەنە شىنىقتىرۋعا تاباندى بول

ساۋ دەنەلى ءجۇرۋ وزىڭە دە وتباسىڭداعىلارعا دا جاۋاپتى بولعاندىق. ساۋ دەنەلى بولامىن دەسەڭ، بويكۇيەزدىكتى تاستاپ، دەنە شىنىقتىرىپ تۇر.

 وسى كوكتەم مەرەكەسى دەمالىسىنان باستاپ، ءار كۇنى ۋاقىت شىعارىپ دەنە شىنىقتىرىپ تۇر. جۇگىر، سۋدا ءجۇز، دوپ وينا…اققان ءار تامشى تەرىڭ ءۇمىتىڭدى اقتايتىن بولادى.

دەنە شىنىقتىرۋ اتتاي جەلگەن ۋاقىتقا كۇلە قاراۋدىڭ ەڭ جاقسى قۇرالى. جاڭا ءبىر جىلدا، قانشا قاربالاس جۇرسەڭدە، دەنە شىنىقتىرۋعا ۋاقىت بولە ءبىل. ءۇرتىس العا قادام تاستاپ وتىرساڭ بولعانى، دۇنيە اقىرىنداپ ءبىر الۋان تۇسكە ەنەدى.

7.جاڭا ءبىر ونەر يگەرەتىن بول

زاماننىڭ وزگەرىسى وتە تەز، ءوزىن ورگە جەتەلەپ وتىرعان ادام عانا زاماننىڭ اياق الىسىنا ىلەسە الادى.

ءوزىن جەتىلدىرۋدىڭ ەڭ ءونىمدى ءتاسىلى جاڭا ونەر يگەرۋ. تاماق جاساۋ، حاتكەرلىك، سۋرەت تارتۋ ت.ب، تەك ىقىلاس قويىپ، ۇمتىلۋعا نيەت ەتسەڭ بولعانى، تابىسقا يە بولارىڭ داۋسىز.

ومىردە كەش قيمىلداۋ دەگەن بولمايدى. ومىرىڭە شەك قويما، قاجىر-قايراتىم جەتپەيدى دەمە، جەڭىل-جەلپى ءباز كەشۋدەن اۋلاق بول. ءوزىمىزدى ءار دايىم جاڭالاپ وتىرۋعا، بۇعاۋلاردى بۇزىپ وتىرۋعا باتىلدىق ەتسەك بولعانى، تۇبىندە اعالاپ العا شىعىپ، كوركەم تۇرمىس جاراتا الامىز.

اۋدارعان:جەڭىس جىكباس ۇلى

来源：人民日报

翻译：金额斯

审稿、制作：古丽美热