جوعارى دارەجەلى ءمانساپتى ەكى جىلدا 1898 قۇمىرا ماۋتايدى جەكە پايدالاندى، سەرىكتەستىك ساقشىعا مالىمدەدى

جارناسى بازارعا شىعارىلعان سەرىكتەستىكتىڭ ءبىر جوعارى دارەجەلى ءمانساپتىسى ەكى جىلدان استام ۋاقىتتا 1900 قۇمىراعا تاياۋ ماۋتاي اراعىن الىپ، جەكە پايدالاندى.... 

جاقىندا، گۋاڭجوۋ مەي-يا جارنا شەكتى سەرىكتەستىگى وسى سەرىكتەستىكتىڭ بۇرىنعى ورىنباسار باس جوراسى، قوسىمشا باس ديرەكتورى شۇي ليديدى اشىق مالىمدەپ: مىندەتتە تۇرعان مەزگىلدە كوپ مولشەردە ماۋتاي اراعىن ساتىپ العانىن، سونداي-اق كاسىپ جاقتان مەيمان قابىلداۋ سياقتىلاردى سىلتاۋ ەتىپ قۇنى 4 ميلليون يۋانعا تۇراتىن 1898 قۇمىرا ماۋتاي اراعىن الىپ ىستەتكەنىن ايتتى. 

تانىستىرۋعا قاراعاندا، گۋاڭجوۋ مەي-يا سەرىكتەستىگى 4-ايدىڭ 20-كۇنى، «سەرىكتەستىكتىڭ مال-مۇلكىن يەمدەنىپ الدى» دەگەن كۇماندى سىلتاۋ ەتىپ ساقشىعا مالىمدەگەن، گۋاڭجوۋ قالالىق قوعام حاۋىپسىزدىگى مەكەمەسىنىڭ حۋاڭپۋ بولىمشە مەكەمەسى بۇل دەلونى قابىلداعان. 

ورتا ەسەپپەن كۇنىنە 3 قۇمىرا ماۋتاي اراعىن شىعىندادى 

گۋاڭجوۋ مەي-يا سەرىكتەستىگىنىڭ قازىرگى جوعارى دارەجەلى ءمانساپتىسى حۋاڭ فاميليالىنىڭ قامداعان ماتەريالىندا كورسەتىلۋىنشە، شۇي ليدي 2017-جىلى 7-ايدان 2022-جىلى 3-ايعا دەيىن گۋاڭجوۋ مەي-يا سەرىكتەستىگىنىڭ ورىنباسار باس جوراسى، 2019-جىلى 7-ايدان باستاپ باس ديرەكتورلىق مىندەتتى قوسىمشا اتقارىپ، سەرىكتەستىكتىڭ كۇندەلىكتى تيجاراتىن باسقارۋ قىزمەتىنە جاۋاپتى بولعان. گۋاڭجوۋ مەي-يا سەرىكتەستىگى: شۇي ليدي مىندەتتەگى كەزىندە شوفەرى ۋاڭ دۇڭچيدى 2017-جىلى 7-ايدان 2022-جحلى 3-ايعا دەيىن گۋاڭجوۋ مەي-يا سەرىكتەستىگىنىڭ باس جوراسىنا تاعايىنداعاندىعىن ءبىلدىردى.

گۋاڭجوۋ مەي-يا سەرىكتەستىگى تاعى: مىندەتتەگى كەزىندە شۇي ليديدىڭ باس جورانى شەڭگەلىنە الىپ، باسقارۋ القاسىن مەڭگەرۋ ارقىلى قاتىستى قىزمەتكەرلەردى «ساتىپ الىپ ازىرلەپ قويۋعا» جانە «كاسىپ جاقتاعى مەيمان قابىلداۋعا ىستەتۋگە» نۇسقاۋشىلىق ەتۋدى سىلتاۋ ەتىپ، كوپ مولشەردە ماۋتاي اراعى مەن اۆستراليا قىزىل اراعىن ساتىپ العاندىعىن اڭىس ەتتى. سەرىكتەستىكتىڭ ساناعىنا قاراعاندا، 2020-، 2021-جىلى ەكى جىل ۋاقىتتا، باعاسى 4 ميلليون 700 مىڭ يۋاننان استام تۇراتىن 1600 قۇمىرا ماۋتاي سياقتى اراقتاردى ساتىپ العان.

گۋاڭجوۋ مەي-يا سەرىكتەستىگى قامداعان ماتەريالعا قاراعاندا، 2020-جىلدان 2022-جىلى 3-اي مەرزىمىندە، شۇي ليدي باسقالارمەن بىرلىكتە «قاريدارلاردى جەتكىزۋ، قارىم-قاتىناس جاساۋ جانە كاسىپتى كەڭەيتۋدى» سىلتاۋ ەتىپ، جيىنى 1898 قۇمىرا اراق العان. مۇنىڭ ىشىندە، 2021-جىلى 10-ايدىڭ 31-كۇنى، شۇي ليدي جانە شوفەرى ءبىر جولدا 373 قۇمىرا فيتيان ماۋتاي اراعىن، 8 قۇمىرا 15 جىلدىق ماۋتاي اراعىن، 2 قۇمىرا بەس جۇلدىزدى ماۋتاي اراعىن، 4 جاشىك شيجيۋ ساقتامالى 1988 ماركالى ماۋتاي اراعىن العان، بۇلاردىڭ باعاسى 1 ميلليون 300 مىڭ يۋان بولعان.

دەلو مالىمدەۋ ماتەريالىندا كورسەتىلۋىنشە، سەرىكتەستىك ساتىپ العان قىرۋار اراقتى ەڭ سوڭىندا شۇي ليدي ەرەجەگە قايشى تۇك قويماي جۇمساپ تۇگەتكەن، شۇي ليدي مىندەتتەگى مەرزىمدە، گۋاڭجوۋ مەي-يا سەرىكتەستىگىنەن كۇنىنە 3 قۇمىرا ماۋتاي اراعى شىعىن بولىپ وتىرعان. 

سەرىكتەستىك: سەرىكتەستىكتىڭ مال-مۇلكىن يەمدەنىپ الدى دەگەن كۇمانمەن ساقشىعا مالىمدەدى. 

گۋاڭجوۋ مەي-يا سەرىكتەستىگى مىنالاردى ءبىلدىردى: بيىل جىل باسىندا، سەرىكتەستىك قازىنالىق باقىلاۋ ارقىلى جوعارىداعى ماسەلەنى بايقاپ، قاتىستى ساتىپ الۋ ەستەلىكتەرىن جانە قامبادان شىعارۋ تىزىمدىگىن دەرەۋ تەكسەرىپ، رەتتەدى. 

گۋاڭجوۋ مەي-يا سەرىكتەستىگى قامداعان ماتەريالدا كورسەتىلۋىنشە، 2017-جىلدان 2022-جىلى 3–ايعا دەيىنگى مەرزىمدە، گۋاڭجوۋ مەي-يا سەرىكتەستىگى قىرۋار ماۋتاي اراعىن ساتىپ الۋ قاراجاتىن ەسەپكە كىرگىزىپ، ماۋتاي اراعىن ساتىپ العان، ءسويتىپ، الىپ ىستەتۋدەگى باسقارۋى بىلىعىپ، قابىلداۋ قاراجاتىن راستاپ انىقتاۋ قيىنعا سوعۋ احۋالى جارىققا شىققان.

گۋاڭجوۋ مەي-يا سەرىكتەستىگىنىڭ تاعى ءبىر جوعارى ءمانساپتىسى بىلاي دەدى: شۇي ليدي قىرۋار ماۋتاي اراعىن العان كەزدە سەرىكتەستىككە تۇسىنىك جاسامايدى، ءارى اراقتى قايسى قاريدارلارعا جەتكىزەتىنى، كىممەن قارىم-قاتىناستا بولىپ ىستەتەتىنى سياقتى ينفورماتسيالارىن بەرمەيدى، كەيدە ءبىر جولدا مەيمان قابىلداعاندا ون نەشە قۇمىرا ماۋتاي اراعىن ىستەتەدى، مىنە وسىنداي وراسان زور سارىپ بولۋ مولشەرى كورنەكتى بولدى.

جوعارىداعى احۋالعا قاراتا، ءۇشىنشى جاقتىڭ بۇعالتىرلىق ىستەر باسقارماسى قازىنالىق باقىلاۋ پىكىرىن شىعارىپ، شۇي ليدي مەجە ەسەپتەن اسىرىپ كوپ مولشەردە اراق الدى، اراقتىڭ شىعىنى قالىپسىز بولدى دەپ قارادى. باقىلاۋ كامەراسىن اقتارۋ، قول قويعان ماتەريالدار سياقتى قاتىستى دالەل-سپاتتاردى العاننان كەيىن، سەرىكتەستىك شۇي ليدي قاتارلى جوعارى دارەجەلى ءمانساپتىلاردىڭ قىلمىسقا شاتىلعاندىعىن انىقتادى. 

4-ايدىڭ 20-كۇنى، گۋاڭجوۋ مەي-يا سەرىكتەستىگى شۇي ليديدى« سەرىكتەستىكتىڭ مال-مۇلكىن يەمدەنىپ الدى» دەگەن كۇمانمەن ساقشىعا مالىمدەدى، قازىر ساقشى جاق بۇل دەلونى قابىلداپ، قاراۋ ۇستىندە. 

بازارعا شىعارىلعان سەرىكتەستىكتەن قىزمەتتەن شەگىندى.

اشىق ماتەريالدا كورسەتىلۋىنشە، گۋاڭجوۋ مەي-يا جارنا سەرىكتەستىگى 1995-جىلى قۇرىلعان، شياڭگاڭ جارنالاندىرعان بازارعا شىعارىلعان سەرىكتەستىگى مەي-يا جارنا يەلەۋ سەرىكتەستىگىنىڭ بولىمشە سەرىكتەستىگى، تىزىمگە الىنعان ورنى گۋاڭجوۋ ەكونوميكالىق تەحنيكالىق اشۋ رايونىندا بولىپ، نەگىزىنەن تاتتانبايتىن بولات ترۋبا، قۇبىر بولشەكتەرى، كومىرتەكتى بولاتتى كەسىپ مانەرلەۋ، جاساۋ سياقتىلاردى تيجارات ەتەدى. 

2021-جىلى 12-ايدىڭ 3-كۇنى، شۇي ليدي مەي-يا جارنا يەلەۋ سەرىكتەستىگىندەگى قىزمەتىنەن شەگىنەدى، 2021-جىلى 1-ايدىڭ 11-كۇنى، ۋاڭ دۇڭچي دا مەي-يا جارنا يەلەۋ سەرىكتەستىگىندەگى قىزمەتىنەن شەگىنەدى. 

مەي-يا جارنا يەلەۋ سەرىكتەستىگىنىڭ حابارلاندىرۋىنا قاراعاندا، 2021-جىلى 12-ايدىڭ 2 –كۇنى، شۇي ليديدى مەي-يا جارنا يەلەۋ سەرىكتەستىگىنىڭ تاڭباسىن الباتى ىستەتتى جانە قاتىستى جورالىق ورىنداردى زاڭسىز كۇشىنەن قالدىردى دەگەندى سىلتاۋ ەتىپ، مەي-يا جارنا يەلەۋ سەرىكتەستىگىندەگى جانە گۋاڭجوۋ مەي-يا سەرىكتەستىگىندەگى بارلىق قىزمەتىن توقتاتىپ، گۋاڭجۋ مەي-يا سەرىكتەستىگى قاتارلى سەرىكتەستىكتەردىڭ تاڭباسى، توقتام تاڭباسى، قازىنا تاڭباسى قاتارلى قاتىستى تاڭبالارىن قايتارىپ بەرۋدى تالاپ ەتكەن. 2022-جىلى 1-ايدىڭ 29-كۇنى، گۋاڭجوۋ مەي-يا سەرىكتەستىگى ۋاقىتتىق جارناگەرلەر ءماجىلىسىن اشىپ، شۇي ليديدى ورىنباسار باس جورالىق جانە باس ديرەكتورلىق مىندەتتەن قالدىردى، سونىمەن قوسا ۋاڭ دۇڭچيدى دا باس جورالىق مىندەتتەن قالدىردى. 

اۋدارعان: مارالبەك ابدىكارىم ۇلى 

来源：中国经济网

编辑，制作：阿依娜