9-ايدىڭ 7-كۇنى ساعات 16 مولشەرىندە، ىشكى موڭعۇل اۆتونوميالى رايونىنىڭ وردوس قالاسى حاڭجين ەكونوميكالىق اشۋ رايونى دۋگۇيتالا كاسىپ باقشاسى سولتۇستىك نىسان رايونى وردوس يديڭ ەكولوگيالىق اۋىل شارۋاشىلىعىن اشۋ شەكتى سەرىكتەستىگىنىڭ گازدەندىرۋ سەحىندا جوعارى قىسىمدى گاز اتىلىپ شىعۋ شىرعالاڭى تۋىلىپ، بيىك ورىندا جۇمىس ىستەپ جاتقان قىزمەتكەرلەر گاز اتىلىپ شىعۋدان جازىم بولدى، مۇردەنى ناق مايداندا تەكسەرىپ سالىستىرۋ، سالاۋاتىن تۇراقتاندىرۋدان قازىرگە دەيىن، جيىنى 10 ادام قازا بولىپ، 3 ادام جارالاندى. 9-ايدىڭ 8-كۇنى تۇستەن كەيىن ساعات 4 تە، وردوس «9.7» ءوندىرىس حاۋىپسىزدىگى شىرعالاڭىن تەكسەرىپ ءبىر جاقتى ەتۋ قولباسشىلىق شتابى اقپارات جاريالاۋ ءماجىلىسىن اشىپ، شىرعالاڭنان قۇتقارۋ جانە جارالانعانداردى قۇتقارۋ، ەمدەۋ قاتارلى قىزمەتتەر جونىندە اشىق حابارلاندىرۋ شىعاردى.

اقپارات جاريالاۋ ماجىلىسىندە وردوس قالاسى حاڭجين اۋداندىق ۇكىمەتتىڭ باستىعى جاڭ جۇڭپيڭ تانىستىرىپ بىلاي دەدى: شىرعالاڭ تۋىلعاننان كەيىن، اۆتونوميالى رايون، وبلىس، اۋدان ءۇش دارەجە دەرەۋ شۇعىل جاعدايعا توتەپ بەرۋ جوباسىن جولعا قويىپ، شىرعالاڭدى تەكسەرىپ ءبىر جاقتى ەتۋ قىزمەتى باسشىلىق گرۋپپاسىن قۇرىپ، ءبىر تۇتاس ورنالاستىرۋ، جۇمىس ءبولىسى بويىنشا جاۋاپتى بولۋ قىزمەت مەحانيزمىن ورناتىپ، شىرعالاڭدى تەكسەرۋ، ەمدەۋ، قۇتقارۋ، سوڭعى جۇمىستارىن ءبىر جاقتى ەتۋ، ارتقى شەپتى قامتاماسىز ەتۋ قاتارلى 8 ارناۋلى قىزمەت گرۋپپاسىن ۇيىمداستىرىپ قۇرىپ، مىندەت ءبولىسى بويىنشا قىزمەتتى جەدەل قانات جايدىردى.

ءبىرىنشى، ناق مايداندا قۇتقارۋ قىزمەتىن دەرەۋ قانات جايدىردى. شىرعالاڭ تۋىلعاننان كەيىن، وردوس قالاسى شۇعىل جاعدايعا توتەپ بەرۋ، دەنساۋلىق ساقتاۋ، سالاماتتىق كوميتەتى، قوعام حاۋىپسىزدىگى، ءورت ءسوندىرۋ، ورتتەن ساقتانۋ قاتارلى كاسىپتىك كۇشتەردى دەرەۋ ۇيىمداستىرىپ، تىزگىن ۇشىندا ناق مايدانعا جەتىپ بارىپ، بار كۇشپەن قۇتقارۋ قىزمەتىن قانات جايدىردى، مۇندا قۇتقارۋ اۆتوكولىگىنەن 27 سى، قىزمەتكەرىنەن 169 ادام شىقتى، سول كۇنى ساعات 16 دان 30 مينۋت وتكەن مولشەردە، شىرعالاڭ تۋىلعان ناق مايداندى باسقارۋ، مەڭگەرۋدى ورىنداپ بولىپ، ادامداردى شۇعىل بىتىراتتى.

ەكىنشى، جارالانعانداردى شۇعىل قۇتقاردى. ەڭ الدىمەن جارالانعانداردى شىرعالاڭ تۋىلعان ناق مايدانعا ەڭ جاقىن جەردەگى ۋراتى اۋداندىق حالىق شيپاحاناسىنا جەتكىزىپ شۇعىل قۇتقارىپ، جارالانعانداردى ءتىپتى دە جاقسى ەمدەتۋ ءۇشىن، جارالانعان 3 ادامدى سول كۇنى ساعات 22 دەن 10 مينۋت وتكەن مولشەردە، تۇندەلەتىپ ىشكى موڭعۇل اۆتونوميالى رايوندىق حالىق شيپاحاناسىنا جوتكەپ، ىشكەرىلەي دياگنوز قويۋ، تەكسەرۋ جانە ەمدەۋدى قابىلداتتى.

ءۇشىنشى، ناق مايداننىڭ حاۋىپسىزدىك كومەسكى قاتەرىن جويدى. 9-ايدىڭ 8-كۇنى ساعات 0 دەن 30 مينۋت وتكەن مولشەردە، جەرگىلىكتى ورىن شۇعىل جاعدايعا توتەپ بەرۋ، ورتانى قورعاۋ، تۇرعىن ءۇي جانە قالا، اۋىل قۇرىلىسى قاتارلى تاراۋلار مەن قاتىستى مامانداردى ۇيىمداستىرىپ، شىرعالاڭ تۋىلعان ناق مايداننىڭ جانە ونىڭ توڭىرەگىنىڭ اۋا ساپاسىن، قۇرىلىس حاۋىپسىزدىگىن جاپپاي تەكسەرىپ، قوسالقى شىرعالاڭنىڭ تۋىلۋىنان ءونىمدى ساقتاندى.

ءتورتىنشى، سوڭعى جۇمىستارىن ءبىر جاقتى ەتۋ قىزمەتىن بار كۇشپەن ويداعىداي ىستەۋدە. سوڭعى جۇمىستارىن ءبىر جاقتى ەتۋ ارناۋلى گرۋپپاسىن قۇرىپ، كاسىپورىنمەن بىرگە قازا بولعانداردىڭ ءۇي ىشىندەگىلەرىنىڭ كوڭىلىن ورنىقتىرۋ، تۇسىنىك جاساۋ، زاڭ بويىنشا تولەم بەرۋ جانە قيىنشىلىعى بارلارعا كومەكتەسۋ قاتارلى سوڭعى جۇمىستارىن ءبىر جاقتى ەتۋ قىزمەتىن ويداعىداي ىستەپ، قازا بولعانداردىڭ ءۇي ىشىندەگىلەرىنىڭ قاتىستى ۇقىق، مۇددەسىن ەڭ جوعارى شەكتە قامتاماسىز ەتتى.

بەسىنشى، شىرعالاڭنىڭ سەبەبىن ىشكەرىلەي تەكسەرۋدە. شۇعىل جاعدايعا توتەپ بەرۋ، قوعام حاۋىپسىزدىگى، ءورت ءسوندىرۋ، ورتتەن ساقتانۋ قاتارلى تاراۋلاردان ۇيىمداسقان شىرعالاڭنىڭ سەبەبىن تەكسەرۋ گرۋپپاسىن قۇرىپ، حيميا ونەركاسىبى سالاسىنداعى بەدەلدى مامانداردى شىعارىپ، شىرعالاڭنىڭ سەبەبىن تۇبەگەيلى تەكسەرىپ، زاڭعا قايشى قىلمىسقا ساياتىن، مىندەتىن، جاۋاپكەرشىلىگىن ادا ەتپەگەندەردى زاڭ بويىنشا قۋزاستىرىپ، جاۋاپقا تارتىپ، استە ىرقىنا جىبەرمەۋدى قاتاڭ قاداعالادى. 

التىنشى، حاۋىپسىزدىك شىرعالاڭىنىڭ كومەسكى حاۋىپ، قاتەرىن جاپپاي تەكسەرىپ، جونگە سالۋدا. 9-ايدىڭ 8-كۇنى تۇستەن بۇرىن، وردوس قالاسى ارناۋلى جىيىن اشىپ، شىرعالاڭدى ءبىر جاقتى ەتۋ جانە كومەسكى حاۋىپ، قاتەردى تەكسەرۋ قاتارلى قاتىستى قىزمەتتەردى تاعى دا ورنالاستىرىپ، بۇل كەزەكتى شىرعالاڭنان تەرەڭ ساباق الىپ، بىرەۋى ارقىلى وزگەسىن تۇجىرىمداۋدى، دەرەۋ اتقارىپ، لەزدە وزگەرتۋدى، كەن تاۋى، ونەركاسىپ، ساۋدا، قاتەرلى حيميالىق بۇيىمدار، قاتىناس قاتارلى ءتۇيىندى سالالاردى تىعىز توڭىرەكتەپ، بۇكىل قالا كولەمىندە ءوندىرىس حاۋىپسىزدىگىن جاپپاي تەكسەرۋ، جاپپاي جونگە سالۋ ارەكەتىن ۇزدىكسىز قانات جايدىرىپ، حالىق بۇقاراسىنىڭ ءومىرى مەن مال-مۇلكىنىڭ حاۋىپسىزدىگىن بار كۇشپەن قامتاماسىز ەتۋدى تياناقتاندىرۋعا كىرىستى. 

اۋدارعان: ساعىنبەك رابات ۇلى

来源：央视新闻

翻译：萨恒别克

审稿、制作：古丽美热