شي جينپيڭ ا ق ش-نىڭ ونەركاسىپ-ساۋدا سالاسىنداعى جانە ستراتەگيالىق عىلىم سالاسىنداعى ۋاكىلدەرمەن كەزدەستى

ءوز حابارىمىز. 3-ايدىڭ 27-كۇنى مەملەكەت ءتوراعاسى شي جينپيڭ بەيجيڭدە حالىق سارايىندا ا ق ش-نىڭ ونەركاسىپ-ساۋدا سالاسىنداعى جانە ستراتەگيالىق عىلىم سالاسىنداعى ۋاكىلدەرمەن كوللەكتيۆ كەزدەستى.

شي جينپيڭ ا ق ش-نىڭ ونەركاسىپ-ساۋدا سالاسىنداعى جانە ستراتەگيالىق عىلىم سالاسىنداعى قايراتكەرلەردىڭ كوكتەم لەبى ەسكەن كەزدە جۇڭگوعا ساپارلاي كەلگەندىگىن قارسى الاتىندىعىن بىلدىرە كەلە بىلاي دەپ انىق ايتتى: جۇڭگو-ا ق ش قاتىناسى دۇنيە جۇزىندەگى ەڭ ماڭىزدى ەكى جاقتى قاتىناستىڭ ءبىرى. جۇڭگو مەن ا ق ش سەلبەستىك جاساي ما، الدە قارسىلاسا ما، بۇل ەكى ەل حالقىنىڭ باقىتى مەن ادامزاتتىڭ بولاشاق تاعدىرىنا تىرەلەدى. جۇڭگو مەن ا ق ش-نىڭ ءار قايسىسىنىڭ تابىسقا جەتۋى ءبىر-بىرىنە وراي ەسەپتەلەدى. ەكى جاق ءبىر-ءبىرىن سەرىك دەپ قاراپ، ءبىرىن-ءبىرى قۇرمەتتەپ، بەيبىت قاتار تۇرىپ، سەلبەسە ورتاق يگىلىكتەنسە بولعانى، جۇڭگو-ا ق ش قاتىناسى جاقسارادى. بيىل جۇڭگو مەن ا ق ش ديپلوماتيالىق قاتىناس ورناتقاندىعىنىڭ 45 جىلدىعى. جۇڭگو-ا ق ش قاتىناسى تاريحى-ەكى ەل حالقىنىڭ دوستىق بارىس-كەلىس تاريحى. بۇل تاريحتى بۇرىن حالىق جازعان، بولاشاقتا دا حالىق جازادى. جۇڭگودا جاقسىلىق وپا كورەدى، جاماندىق جاپا تارتادى دەگەن ءسوز بار. ەكى ەلدىڭ ءار سالا قايراتكەرلەرىنىڭ كوبىرەك بارىس-كەلىس، كوبىرەك اۋىس-كۇيىس جاساپ، ۇزدىكسىز ورتاق تانىم قالىپتاستىرىپ، سەنىمدى ارتتىرىپ، ءتۇرلى كەدەرگىلەردى الاستاپ، ءوزارا ءتيىمدى سەلبەستىكتى تەرەڭدەتىپ، ەكى ەل حالقىنا اناعۇرلىم كوپ ناقتى باقىت جاراتىپ، دۇنيە جۇزىنە اناعۇرلىم كوپ ورنىقتىلىق ۇستەۋىن ءۇمىت ەتەمىن.

شي جينپيڭ ا ق ش جاقتىڭ ۋاكىلدەرىنىڭ ءسوزىن مۇقيات تىڭدادى ءارى ولار كوڭىل ءبولىپ وتىرعان ماسەلەلەرگە ءبىر-بىرلەپ جاۋاپ قايتاردى.

شي جينپيڭ بىلاي دەپ انىق ايتتى: جۇڭگو ەكونوميكاسى اقاۋسىز، باياندى بولۋدا. بىلتىر جۇڭگو ەكونوميكاسىنىڭ ارتۋ قارقىنى دۇنيە جۇزىندەگى نەگىزگى ەكونوميكالىق تۇلعالاردىڭ ىشىندە الدىڭعى قاتاردا بولىپ، دۇنيە ءجۇزى ەكونوميكاسىنىڭ ارتۋىنا قوسقان ۇلەسى ۇزدىكسىز %30 تەن استى، مۇنى جۇڭگو حالقى ءوز قولىمەن ىستەدى، سونداي-اق مۇنى حالىقارالىق سەلبەستىكتەن بولە قاراۋعا بولمايدى. جۇڭگونىڭ دامۋى ءتۇرلى قيىنشىلىقتار مەن سىن-سايىستاردى باستان كەشىرىپ بۇگىنگى كۇنگە جەتتى، بۇرىن «جۇڭگو كۇيرەۋ نازارياسىندا» ايتىلعانداي كۇيرەگەن جوق، قازىر دە جۇڭگو ەڭسە كوتەرگەندە، وزگەلەرگە وكتەمدىك ىستەمەيدى. ءبىز جوعارى ساپالى دامۋدى ۇزدىكسىز ىلگەرىلەتىپ، جۇڭگو ۇلگىسىندەگى وسىزامانداندىرۋدى ۇزدىكسىز العا جۇرگىزىپ، جۇڭگو حالقىن ۇزدىكسىز اناعۇرلىم جاقسى تۇرمىسقا كەنەلتۋمەن بىرگە، دۇنيە ءجۇزىنىڭ باياندى دامۋىنا اناعۇرلىم زور ۇلەس قوسامىز. جۇڭگونىڭ دامۋ بولاشاعى نۇرلى، بىزدە وسىنداي جىگەر جانە سەنىم بار.

شي جينپيڭ مىنالاردى انىق ايتتى: مەن رەفورما جاساپ، ەسىك اشۋ زامانىمىزداعى جۇڭگونىڭ ارشىندى قاداممەن داۋىرمەن جارىسا العا باسۋىنىڭ ماڭىزدى اسىلى دەپ تالاي رەت ايتقان ەدىم. جۇڭگونىڭ رەفورماسى توقتامايدى، ەسىك اشۋى توقتامايدى. ءبىز رەفورمانى جالپى بەتتىك تەرەڭدەتۋ جونىندە ءبىر قىدىرۋ كەلەلى شارالاردى جوبالاپ جانە اتقارىپ، بازارلانعان، زاڭمەن باسقارىلاتىن، حالىقارالانعان بىرەگەي ساۋدا ورتاسىن ۇزدىكسىز قۇرىپ، ا ق ش كاسىپورىندارىن قامتىعان ءار ەل كاسىپورىندارىنا اناعۇرلىم كەڭ دامۋ اياسىن اشۋعا قۇلشىنۋدامىز. جۇڭگو مەن ا ق ش-نىڭ ەكونوميكا-ساۋدا قاتىناسىندا سوڭعى جىلداردان بەرى جارىققا شىققان جاڭا جاعداي، جاڭا وزگەرىستەر جونىندە، ەكى جاق ءوزارا قۇرمەت ەتۋگە، ءوزارا تيىمدىلىك جاساۋعا، تەڭ تۇرعىدا كەڭەسۋگە تاباندى بولىپ، ەكونوميكالىق زاڭدىلىق جانە بازار ەرەجەسى بويىنشا ءىس ىستەپ، ەكونوميكا-ساۋداداعى ءوزارا ءتيىمدى سەلبەستىكتى كەڭەيتىپ جانە تەرەڭدەتىپ، ءبىر-ءبىرىنىڭ دامۋ ۇقىعىنا قۇرمەت ەتىپ، جۇڭگو مەن ا ق ش-نىڭ ورتاق يگىلىككە كەنەلۋىنە جانە دۇنيە ءجۇزىنىڭ ورتاق يگىلىككە كەنەلۋىنە تالپىنۋ كەرەك. ا ق ش كاسىپورىندارىنىڭ «ءبىر بەلدەۋ، ءبىر جولدى» ورتاق قۇرۋ، جۇڭگو حالىقارالىق يمپورت كورمەسى سياقتى ءىرى ەكونوميكا-ساۋدا قيمىلدارىنا كوبىرەك قاتىناسۋىن، جۇڭگوعا ۇزدىكسىز قارجى قوسۋىن، جۇڭگوعا تامىر تارتىپ، جۇڭگودا تابىسقا جەتۋىن قارسى الامىز.

شي جينپيڭ مىنالاردى باسا دارىپتەدى: وسى بىرنەشە جىلدا جۇڭگو مەن ا ق ش قاتىناسى كوپتەگەن بۇراڭدىقتاردى باستان كەشىردى، سونداي-اق قاتاڭ سىن-سايىستارعا دا تاپ بولدى، بۇدان ساباق الۋعا تاتيدى. جۇڭگو-ا ق ش قاتىناسى وتكەن كۇنگە قايتا ورالمايدى، ءبىراق اناعۇرلىم جاقسى بولاشاققا يە بولا الادى. بىلتىر بايدەن زۇڭتۇڭمەن سان-فرانسيسكودا كەزدەسكەندەگى ەڭ ۇلكەن ورتاق تانىم—جۇڭگو مەن ا ق ش قاتىناسىن ورنىقتىرۋ، جاقسارتۋ. وتكەن بىرنەشە ايدا ەكى جاقتىڭ ۇيىرمەلەرى بايدەن زۇڭتۇڭ ەكەۋىمىز كەلىسكەن ورتاق تانىمدى توڭىرەكتەي، ساياسي ديپلوماتيا، ەكونوميكا-ساۋدا، قازىنا-فينانس، زاڭ اتقارۋ، ەسىرتكىگە تيىم سالۋ، كليمات وزگەرىسى، گۋمانيتارلىق اۋىس-كۇيىس سياقتى سالالاردا قويۋ قاتىناستى ساقتاپ، ىلگەرىلەۋشىلىككە قول جەتكىزدى. قازىرگى جاعدايدا، جۇڭگو مەن ا ق ش-نىڭ ورتاق مۇددەسى ازايمايدى، قايتا ءتىپتى دە كوبەيەدى. مەيلى ەكونوميكا-ساۋدا، اۋىل شارۋاشىلىعى سياقتى ءداستۇرلى سالالاردا بولسىن، الدە كليمات وزگەرىسى، جاساندى زەيىن سياقتى جاڭادان گۇلدەنگەن سالالاردا بولسىن، جۇڭگو مەن ا ق ش ءبىر-ءبىرىنىڭ دامۋىنا دەم بەرۋى، ءبىر-بىرىنە كەدەرگى بولماۋى كەرەك. دۇنيە ءجۇزى ەكونوميكاسىنىڭ قالپىنا كەلۋىن ىلگەرىلەتۋ، حالىقارالىق جانە وڭىرلىك قولامتالى ماسەلەلەردى شەشۋ جۇڭگو مەن ا ق ش-نىڭ سايكەسە سەلبەسۋىن، ءىرى ەلدىك دارقاندىقتى ايگىلەپ، ءىرى ەلدىك جاۋاپكەرشىلىك ارقالاۋىن قاجەت ەتەدى. ا ق ش جۇڭگومەن باعىتتاسا العا باسىپ، دۇرىس ستراتەگيالىق تانىم ورناتىپ، سەزگىر ماسەلەلەردى ۇيلەسىمدى ءبىر جاقتى ەتىپ، جۇڭگو-ا ق ش قاتىناسىنىڭ سۋىنۋىن توقتاتىپ، ورنىقتى بولۋ جاعدايىن ساقتاپ، دۇرىس قاتار تۇرۋ جولىن بەلسەنە قاراستىرىپ، جۇڭگو-ا ق ش قاتىناسىنىڭ باياندى، ورنىقتى، اقاۋسىز دامۋىن ىلگەرىلەتۋى كەرەك.

ا ق ش-جۇڭگو قاتىناسى مەملەكەتتىك كوميتەتى القالار كەڭەسىنىڭ ءتوراعاسى گرينبەرگ، حيشى توبىنىڭ باس القاسى، باس اتقارۋشىسى سۋ شىمين، گاۋتۇڭ سەرىكتىگىنىڭ باس القاسى، باس اتقارۋشىسى ەممون، حارۆارد داشۋەسى كەننەدي ۇكىمەت شۋەيۋانىنىڭ نەگىزىن قالاۋشى اليسون، ا ق ش-جۇڭگو ساۋدا مەملەكەتتىك كوميتەتىنىڭ باستىعى اللەن قاتارلى ا ق ش جاق ۋاكىلدەرى سوزدەرىندە ءتوراعا شي جينپيڭنىڭ ۋاقىت شىعارىپ كەزدەسكەندىگىنە العىس ايتا كەلە مىنالاردى ءبىلدىردى: وتكەن ونداعان جىلدان بەرى، جۇڭگو ەرەكشە ەكونوميكالىق ارتۋ مەن بۇرىلىس جاساۋدى جۇزەگە اسىرىپ، قۇدىرەتتى سەرپىمدىلىك پەن ومىرشەڭدىك كۇش ايگىلەدى.ءتوراعا شي جينپيڭنىڭ كورنەكتى باسشىلىعىندا، جۇڭگو جاڭا ساپالى وندىرگىش كۇشتەردى دامىتۋعا، اناعۇرلىم باياندى جوعارى ساپالى دامۋدى جۇزەگە اسىرۋعا كۇش سالۋدا. جۇڭگو حالقىنىڭ دامۋ ۇقىعى قۇرمەتتەلۋگە ءتيىس. جۇڭگونىڭ وزىندىك دامۋ نىساناسىن جۇزەگە اسىرىپ، دۇنيە ءجۇزى ەكونوميكاسىنىڭ دامۋى مەن توعىسۋىن جەبەيتىندىگىنە سەنەمىز. قۇدىرەتتى، كوركەيگەن جۇڭگو دۇنيە ءجۇزىنىڭ وڭ ەنەرگياسى. ا ق ش مەن جۇڭگونىڭ ەكونوميكالىق قاتىناسى ءبىر-بىرىنە تىعىز سۇيەنەدى، ەكى ەل بەيبىت قاتار تۇرعاندا عانا، وزدەرىنىڭ دامۋىن، كوركەيۋىن جۇزەگە اسىرا الادى. سۋسيديس ايتىلىمى ءسوزسىز ىسكە اسا قويۋى ناعايبىل. ا ق ش كاسىپورىندارى جۇڭگو جاقتىڭ تاياۋدا شىعارعان رەفورما جاساپ، ەسىك اشۋ جونىندەگى ءبىر قىدىرۋ ماڭىزدى شارالارىن القايدى، جۇڭگو ەكونوميكاسىنىڭ دامۋ بولاشاعىنا ۇمىتپەن قارايدى، جۇڭگودا تاباندىلىقپەن تامىر تارتىپ، جۇڭگومەن ۇزاق ۋاقىت تىعىز سەلبەستىك قاتىناسىن دامىتادى. ءتوراعا شي جينپيڭ بايدەن زۇڭتۇڭمەن بىلتىر 11-ايدا سان فرانسيسكودا ءساتتى كەڭەس وتكىزىپ، ا ق ش-نىڭ ءار سالاسى مەن دۇنيە ءجۇزىنىڭ ا ق ش-جۇڭگو قاتىناسىنىڭ بولاشاعى جونىندەگى مەجەسى مەن سەنىمى ارتتى. ا ق ش-نىڭ ونەركاسىپ-ساۋدا سالاسى مەن ستراتەگيالىق عىلىم سالاسى ا ق ش-جۇڭگو ەلدەرىنىڭ ءار دارەجەلى بارىس-كەلىستى، اۋىس-كۇيىستى كۇشەيتۋىن قولدايدى، ءوزارا ءتۇسىنىسۋدى، سەنىمدىلىكتى جانە سەلبەستىكتى كۇشەيتىپ، الەمدىك سىن-سايىستارعا قول ۇستاسا توتەپ بەرىپ، ورنىقتى، باياندى، ءونىمدى جۇڭگو-ا ق ش قاتىناسىن ورناتۋدى ىلگەرىلەتۋگە كۇش قوسۋدى قالايدى.

ۋاڭ ي كەزدەسۋگە قاتىناستى.