ءوز حابارىمىز. مەملەكەت ءتوراعاسى شي جينپيڭ 4-ايدىڭ 12-كۇنى تۇستەن كەيىن بەيجيڭدە حالىق سارايىندا جۇڭگوعا مەملەكەتتىك ساپارمەن كەلگەن سۋرينامنىڭ زۇڭتۇڭى ساندوگيمەن كەڭەس وتكىزدى.

مەملەكەت ءتوراعاسى شي جينپيڭ 4-ايدىڭ 12-كۇنى تۇستەن كەيىن حالىق سارايىنىڭ شىعىس قاقپاسىنىڭ سىرتىنداعى الاڭدا سالت وتكىزىپ، سۋرينام رەسپۋبليكاسىنىڭ زۇڭتۇڭى چاندرا كاپەلسادە سانتوگيدىڭ ەلىمىزگە مەملەكەتتىك ساپارمەن كەلگەندىگىن قارسى الدى.

ءتوراعا شي جينپيڭنىڭ حانىمى پىڭ لييۋان، ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق سىرتقى ىستەر قىزمەت كوميتەتى كەڭسەسىنىڭ مەڭگەرۋشىسى ۋاڭ ي قاتارلىلار قارسى الۋ سالتىنا قاتىناستى.

ساندوگيمەن بىرگە جۇڭگوعا ساپارلاي كەلگەندەردەن زۇڭتۇڭنىڭ حانىمى، سىرتقى ىستەر مينيسترى، حالىقارالىق ساۋدا جانە حالىقارالىق سەلبەستىك مينيسترى، جاراتىلىستىق بايلىق مينيسترى قاتارلىلار بار.

اسكەري وركەستر سۋرينام مەن جۇڭگونىڭ مەملەكەت ءانىن ورىندادى، 21 رەت قۇرمەت ساليۋتى اتىلدى.

شي جينپيڭنىڭ سەرىك بولۋىندا ساندوگي جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى.

ەكى ەل باسشىلارى پارات مىنبەسىنە قايتىپ كەلىپ قۇرمەت قاراۋىلىنىڭ سالتانات سابىن كوردى.

شي جينپيڭنىڭ ۇسىنىسىمەن ساندوگي ەلىمىزدە مەملەكەتتىك ساپاردا بولدى.

قارسى الۋ سالتىنان كەيىن، ءتوراعا شي جينپيڭ ساندوگي زۇڭتۇڭمەن كەڭەس وتكىزدى. 

شي جينپيڭ بىلاي دەپ انىق ايتتى: جۇڭگو مەن سۋرينامنىڭ دوستىعىنىڭ تاريحى ۇزاق، تاريح كەرۋەنىندە سومدالىپ كەلەدى. سۋرينام تۇڭعىش توپتا جاڭا جۇڭگومەن ديپلوماتيالىق قاتىناس ورناتقان، جۇڭگومەن ستراتەگيالىق سەرىكتەستىك قاتىناس ورناتقان، سونداي-اق جۇڭگومەن «ءبىر بەلدەۋ، ءبىر جولدى» ورتاق قۇرۋ سەلبەستىك جوباسىنا قول قويعان كارايب ەلدەرىنىڭ ءبىرى.

شي جينپيڭ بىلاي دەدى: ەكى ەل باستان-اياق ءوزارا قۇرمەت ەتىپ، تەڭ تۇرعىدا مامىلە جاساپ، وڭتۇستىكتەگىلەر سەلبەستىگىنىڭ ۇلگىسىنە اينالدى. جۇڭگو جاق سۋرينام جاقپەن ورتاق قۇلشىنىپ، ساياسي ءوزارا سەنىمدىلىكتى ونان ارى بەكەمدەپ، ەكونوميكا-ساۋدا سەلبەستىگىن كۇشەيتىپ، گۋمانيتارلىق اۋىس-كۇيىستى كەڭەيتىپ، حالىقارالىق سەلبەستىكتى جيىلەتىپ، جۇڭگو مەن سۋرينامنىڭ اناعۇرلىم تىعىز ستراتەگيالىق سەلبەستىك سەرىكتەستىك قاتىناسىن ورناتۋدى ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى.

شي جينپيڭ مىنالاردى باسا دارىپتەدى: جۇڭگو سۋرينامنىڭ جۇڭگوعا دەگەن دوستىعىن باستان-اياق بەكەمدەپ، جۇڭگونىڭ وزەكتى مۇددەسىنە ساياتىن جانە كوكەيتەستى قاداعالاپ وتىرعان كەلەلى ماسەلەلەردە جۇڭگونى باتىل قولداعاندىعىن ايرىقشا القايدى. جۇڭگو جاق سۋرينامنىڭ مەملەكەتتىڭ يەلىك ۇقىعىن، تاۋەلسىزدىگىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن دامۋ جولىن دەربەس تاڭداۋىن باتىل قولدايدى. جۇڭگو جاق سۋرينام جاقپەن ۇزدىكسىز ءوزارا ءتۇسىنىسىپ، ءوزارا قولداۋ كورسەتىپ، جوعارى جىكتەگىلەر بارىس-كەلىسىن ساقتاپ، تاراۋلار، زاڭ شىعارۋ قۇرىلىمدارى، ساياسي پارتيالار اراسىنداعى دوستىق بارىس-كەلىستى جيىلەتىپ، ەل باسقارۋ تاجىريبەلەرىن جانە اۋىس-كۇيىسىن كۇشەيتۋدى قالايدى. جۇڭگو جاق سۋرينامنىڭ اناعۇرلىم كوپ ساپالى ەرەكشە ونىمدەرىن جۇڭگو بازارىنا كىرگىزۋدى قارسى الادى، سۋرينام جاقپەن «ءبىر بەلدەۋ، ءبىر جولدى» ورتاق قۇرۋ سەلبەستىگىن تەرەڭدەتىپ، دامۋ ستراتەگياسىن ۇشتاستىرۋدى كۇشەيتۋدى؛ ساۋدا، قارجى قوسۋ، اۋىل شارۋاشىلىعى، ەنەرگيا، كەن شارۋاشىلىعى، نەگىزدىك قۇرىلعى قۇرىلىسى، سيفرلى ەكونوميكا سياقتى سالالارداعى سەلبەستىكتى كەڭەيتىپ، ەكى ەل حالقىنا اناعۇرلىم مول ناقتى باقىت اكەلۋدى قالايدى. سۋرينام كارايب رايونىنداعى جۇڭگو قانداستار ەڭ كوپ ەلدەردىڭ ءبىرى، سونداي-اق باتىس جارتى شارداعى جۇڭگونىڭ كوكتەم مەرەكەسىن تۇڭعىش رەت زاڭدا بەلگىلەنگەن دەمالىس كۇنى ەتىپ تۇراقتاندىرعان مەملەكەت. ەكى جاق گۋمانيتارلىق اۋىس-كۇيىستى ۇزدىكسىز جەبەپ، ادامدار بارىس-كەلىسىنە قولايلىلىق تۋدىرىپ، كۇڭزى شۋەيۋانىن بىرلىكتە ويداعىداي قۇرۋ كەرەك. جەرلىك ورىندار سەلبەستىگىن كۇشەيتىپ، ەكى ەلدىڭ اۋىس-كۇيىس، سەلبەستىك مازمۇنىن ۇزدىكسىز بايىتۋ كەرەك. جۇڭگو جاق سۋرينام سياقتى وركەندەپ كەلە جاتقان ەلدەرمەن بىرلىكتە كوپ جاقتى سايكەستىكتى جانە ىنتىماقتى، سەلبەستىكتى كۇشەيتىپ، ورتاق مۇددەنى قورعاپ، ورتاق دامۋدى جۇزەگە اسىرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. جۇڭگو كارايب ەلدەرىمەن قاتىناستى دامىتۋعا باسا ءمان بەرەدى، كارايب ەلدەرىنىڭ كوركەيىپ-گۇلدەنۋىنە، دامۋعا تالپىنۋىنا، حالىقتى باقىتقا كەنەلتۋىنە قولداۋ كورسەتەدى، وڭىردەگى ەلدەردىڭ ەكونوميكالىق، قوعامدىق دامۋىنا قولىنان كەلگەنىنشە ۇزدىكسىز كومەك كورسەتۋدى قالايدى.

ساندوگي مىنالاردى ايتتى: سۋرينام مەن جۇڭگونىڭ دوستىق بارىس-كەلىسىنىڭ تاريحى ۇزاق. سۋرينامداعى جۇڭگولىقتار سۋرينامنىڭ مەملەكەت قۇرىلىسىنا ماڭىزدى ۇلەس قوستى. سۋرينام مەن جۇڭگو ديپلوماتيالىق قاتىناس ورناتقان 48 جىلدان بەرى، سۋرينام جاق باستان-اياق ءبىر جۇڭگو پرينسيبىنە تاباندى بولىپ، جۇڭگونىڭ مەملەكەتتىڭ تۇتاستىعىن جۇزەگە اسىرۋىن ۇزدىكسىز تاباندىلىقپەن قولداپ كەلەدى. جۇڭگو سۋرينامنىڭ جاڭا تيپتى ايدارشا ۆيرۋس وكپە قابىنۋ اۋرۋىنا قارسى تۇرۋىنا جانە ەكونوميكالىق، قوعامدىق دامۋىنا قىمباتتى كومەك كورسەتىپ، ەكى ەلدىڭ اۋىل شارۋاشىلىعى، دەنساۋلىق ساقتاۋ، نەگىزدىك قۇرىلعى سياقتى سالالارداعى سەلبەستىگىندە سۇبەلى تابىستارعا قول جەتتى، وسىنىڭ ءبارى ەكى ەلدىڭ وسكەلەڭ ساياسي سەنىمدىلىگى مەن تەرەڭ باۋىرلاستىق سۇيىسپەنشىلىگىن ايگىلەيدى. جۇڭگو سۋرينامنىڭ ەكونوميكاسىنىڭ دامۋى مەن حالىق تۇرمىسىنىڭ جاقسارۋىنا بارىنشا دەم بەرىپ، وڭتۇستىكتەگىلەر سەلبەستىگىنىڭ ۇلگىسىن ورناتتى.ءتوراعا شي جينپيڭنىڭ «ءبىر بەلدەۋ، ءبىر جولدى» ورتاق قۇرۋ جانە الەمدىك دامۋ دارىپتەمەسى سياقتى ماڭىزدى الەمدىك دارىپتەمەلەردى العا قويىپ، دۇنيە ءجۇزىنىڭ تەڭ، ءتارتىپتى كوپ ۇيەكتەنۋىن جانە جالپىعا ءتيىمدى، سيىسىمدى ەكونوميكالىق جەر شارىلانۋدى دارىپتەۋى كوپ جاقتىلىقتى قورعاۋدا، دۇنيە ءجۇزىنىڭ بەيبىتشىلىگى مەن باياندى دامۋىن جەبەۋدە كەلەلى ماڭىز الادى، سۋرينام جاق مۇنى قولدايدى، جۇڭگو جاقپەن سەلبەستىكتى كۇشەيتىپ، ادامزاتتىڭ تاعدىرلاس ورتاق تۇلعاسىن قۇرۋدى بىرلىكتە ىلگەرىلەتۋدى قالايدى. وسى رەتكى ساپاردى وراي ەتە، ەكى ەلدىڭ ساياسي پارتيالار اۋىس-كۇيىسىن ونان ارى كۇشەيتىپ، ەكونوميكا-ساۋدا، قارجى قوسۋ، جاسىل دامۋ، كليمات وزگەرىسىنە توتەپ بەرۋ سياقتى سالالارداعى سەلبەستىكتى كەڭەيتىپ، سۋرينام مەن جۇڭگونىڭ ستراتەگيالىق سەلبەستىك سەرىكتەستىك قاتىناسىن ونان ارى تەرەڭدەتۋدى ءۇمىت ەتەمىن. سۋرينام كارايب ەلدەرىنىڭ جۇڭگومەن قاتىناسىن دامىتۋ ءۇشىن بەلسەندى قۇلشىنىس جاساۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى ەكونوميكا-ساۋدا، قارجى قوسۋ، جاسىل دامۋ، سيفرلى ەكونوميكا، وقۋ-اعارتۋ سياقتى سالالارداعى كوپتەگەن ەكى جاقتى سەلبەستىك قۇجاتتارعا قول قويۋعا بىرلىكتە كۋا بولدى.

ەكى جاق «جۇڭحۋا حالىق رەسپۋبليكاسى مەن سۋرينام رەسپۋبليكاسىنىڭ بىرلەسكەن اقپاراتتىق مازمۇنداماسىن» جاريالادى.

سول كۇنى كەشتە شي جينپيڭ مەن پىڭ لييۋان حالىق سارايىنىڭ التىن رەڭ زالىندا ساندوگي مەن حانىمىنا ارناپ قارسى الۋ قوناعاسىن وتكىزدى.

ۋاڭ ي جوعارىداعى قيمىلدارعا قاتىناستى.