جاڭا يدەيا جاڭا جورىققا جەتەكشىلىك ەتەدى—جالپى تۇلعالىق مەملەكەت حاۋىپسىزدىگى كوزقاراسىنا تاباندى بولىپ، جاڭا حاۋىپسىزدىك جاعدايى ارقىلى جاڭا دامۋ جاعدايى قامتاماسىزداندرىلدى

 

 

ءوز حابارىمىز. 4-ايدىڭ 15-كۇنى 9-رەتكى جالپى حالىقتىق مەملەكەت حاۋىپسىزدىگى تاربيەسى كۇنى، سونداي-اق باس شۋجي شي جينپيڭنىڭ جالپى تۇلعالىق مەملەكەت حاۋىپسىزدىگى كوزقاراسىن العا قويعاندىعىنىڭ 10 جىلدىعى. باس شۋجي شي جينپيڭ بىلاي دەپ باسا دارىپتەدى: مەملەكەت حاۋىپسىزدىگى--ۇلتتىڭ گۇلدەنۋىنىڭ نەگىزى، قوعام ورنىقتىلىعى—مەملەكەتتىڭ قۇدىرەتتەنۋىنىڭ العى شارتى. 10 جىلدان بەرى، جەر-جەر مەن تاراۋلار جالپى تۇلعالىق مەملەكەت حاۋىپسىزدىگى كوزقاراسىن جاپپاي دايەكتى تياناقتاندىرىپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعاپ، مەملەكەت حاۋىپسىزدىگىن جاپپاي كۇشەيتتى.

 

 تاياۋدا مەملەكەت حاۋىپسىزدىگى مينيسترلىگى مەملەكەت حاۋىپسىزدىگى سالاسىنداعى ءبىر توپ تيپتىك دەلولاردى جاريالادى. چىڭ فاميليالى ەلىمىزدىڭ سيرەك كەزدەسەتىن جەر مەتالدارى سالاسىنداعى قۇپيالىقتى ساقتايتىن قىزمەتكەر بولا تۇرا، جەكە باسىنىڭ مۇددەسىن كوزدەپ، قىزمەت بارىسىندا يگەرگەن قۇپيالىققا ساياتىن ينفورماتسيالاردى شەكارا سىرتىنداعى سەرىكتىك قىزمەتكەرلەرىنە بەرىپ، ەلىمىزدىڭ مەملەكەت حاۋىپسىزدىگىنە اۋىر زيان جەتكىزدى. مەملەكەت حاۋىپسىزدىگى ورگانىنىڭ ساقشىسى بىلاي دەدى: چىڭ فاميليالى كوپ رەت مەملەكەت قۇپيالىعىن ساقتاۋ تاربيەسىن قابىلداعانمەن، مەملەكەت قۇپيالىعىن ساقتاۋ تانىمى تومەن بولعاندىقتان، شەتەلگە مەملەكەت قۇپيالىعىن بەرۋدىڭ قانداي زارداپ تۋدىراتىندىعىن، وزىنە قانداي ىقپال جاسايتىندىعىن تانىپ جەتپەگەن.

 سوڭعى جىلداردان بەرى، مەملەكەت حاۋىپسىزدىگىنە زالال جەتكىزەتىن مۇنداي دەلولار ەلىمىزدە بايلىق، استىق، توراپ، جاساندى زەردە، يدەولوگيا سياقتى سالالاردا ۇنەمى تۋىلىپ، ءداستۇرلى حاۋىپسىزدىك پەن بەي ءداستۇرلى حاۋىپسىزدىك قاتەرى ءوزارا قاباتتاستى.

2014-جىلى 4-ايدىڭ 15-كۇنى ورتالىق مەملەكەت حاۋىپسىزدىگى كوميتەتىنىڭ 1-رەتكى ماجىلىسىندە باس شۋجي شي جينپيڭ جالپى تۇلعالىق مەملەكەت حاۋىپسىزدىگى كوزقاراسىن جاسامپازدىقپەن العا قويىپ، مەملەكەت حاۋىپسىزدىگى قىزمەتىندە بىتىراندىلىقتان شوعىرلانۋعا، باياۋ بولۋدان جوعارى ونىمدىلىككە، ىرىقسىزدىقتان ىرىقتىلىققا دەيىنگى تاريحي وزگەرىستى جۇزەگە اسىرۋدى ىلگەرىلەتتى. جالپى تۇلعالىق مەملەكەت حاۋىپسىزدىگى كوزقاراسىن زەرتتەۋ ورتالىعىنىڭ ورىنباسار باس حاتشىسى فۋ شياۋچياڭ بىلاي دەپ اتاپ كورسەتتى: جالپى تۇلعالىق مەملەكەت حاۋىپسىزدىگى كوزقاراسىنىڭ تەتىگى «جالپى تۇلعادا»، «ۇلكەن حاۋىپسىزدىك» تانىمىن باسا دارىپتەۋ-ساياسي، اسكەري ىستەر، مەملەكەت جەرى، ەكونوميكا، مادەنيەت، ينتەرنەت، بيولوگيا سياقتى كوپتەگەن سالالاردى قامتيدى ءارى قوعامنىڭ دامۋىنا ىلەسە ۇزدىكسىز كەڭەيەدى. «جالپى تۇلعا» جۇيەلىلىك، جالپىلىق، ديالەكتيكالىق سيپاتتان دەرەك بەرەدى. جالپى تۇلعالىق مەملەكەت حاۋىپسىزدىگى كوپتەگەن مەملەكەت حاۋىپسىزدىگى فاكتورلارىن كوپ نەگىزدى، ءبىر تۇلعالى ورگانيكالىق تۇتاس تۇلعاعا قويىپ، كورەگەندىكپەن وي جۇگىرتۋدى، جالپى جاعدايلىق جوسپارلاۋدى، ستراتەگيالىق ورنالاستىرۋدى، جالپى تۇلعالىق ىلگەرىلەتۋدى كۇشەيتۋدى تالاپ ەتەدى.

 كەزەكتە ءبىز ءدوپ كەلىپ وتىرعان مەملەكەت حاۋىپسىزدىگى ماسەلەسىنىڭ كۇردەلىلىگى، جاپالىلىعى كورنەكتى ارتۋدا. 2019-جىلى 1-ايدا باس شۋجي شي جينپيڭ ولكە، مينيسترلىك دارەجەلى نەگىزگى باسشى كادرلاردىڭ تومەنگى شەكتە ويلاۋعا تاباندى بولىپ، اۋىر حاۋىپ-قاتەردەن ساقتانۋعا جانە ونى جويۋعا كۇش سالۋ جونىندەگى ارناۋلى تاقىرىپتىق زەرتتەۋ-تالقى كۋرسىندا بىلاي دەپ اتاپ كورسەتتى: اۋمالى-توكپەلى حالىقارالىق جاعداي، كۇردەلى دە سەزىمتال توڭىرەكتىك ورتا، جاپالى دا اۋىر رەفورما، دامۋ، ورنىقتىلىق مىندەتى الدىندا، ءبىز، ءسوز جوق، باستان-اياق وسكەلەڭ قىراعىلىقتى ساقتاۋىمىز كەرەك. «قارا قۋ» ۋاقيعاسىنان بارىنشا قىراعى بولۋمەن بىرگە، «سۇر ءمۇيىز تۇمسىق» ۋاقيعاسىنان دا ساقتانۋ؛ حاۋىپ-قاتەردەن ساقتانۋدىڭ اتويشىسى بولۋمەن بىرگە، حاۋىپ-قاتەر مەن سىن-سايىستارعا توتەپ بەرۋدىڭ جانە ونى شەشۋدىڭ ۇتىمدى شاراسى دا بولۋ؛ حاۋىپ-قاتەردەن ساقتانۋدىڭ جانە وعان توتەپ بەرۋدىڭ دايىندىق شايقاسىن ويداعىداي جۇرگىزۋمەن بىرگە، حاۋىپ-قاتەردى ارىلتۋدىڭ، حاۋىپ-قاتەردى ورايعا اينالدىرۋدىڭ ستراتەگيالىق ىرىقتى شايقاسىن دا ويداعىداي جۇرگىزۋ كەرەك.

 بيىل 3-ايدىڭ 19-كۇنى شياڭگاڭ ەرەكشە اكىمشىلىك رايوندىق زاڭ شىعارۋ كەڭەسى مەملەكەت حاۋىپسىزدىگىن قورعاۋ ەرەجەسىن تولىق داۋىسپەن ماقۇلدادى، بۇل شياڭگاڭ ەرەكشە اكىمشىلىك رايونى نەگىزدىك زاڭىنىڭ 23-تارماعىن جاساۋدىڭ ءساتتى ورىندالعاندىعىن كورسەتەدى، سونداي-اق شياڭگاڭنىڭ مەملەكەت حاۋىپسىزدىگىن قورعاۋ زاڭدىق ءتۇزىم جاۋاپكەرشىلىگىن اتقارۋدا كەلەلى ىلگەرىلەۋشىلىككە قول جەتكىزگەندىگىنەن دەرەك بەرەدى.

 باس شۋجي شي جينپيڭ بىلاي دەپ اتاپ كورسەتتى: مەملەكەت حاۋىپسىزدىگى بۇكىلدەي حالىق ءۇشىن بولادى، بارلىق ىستە حالىققا سۇيەنەدى. تاياۋدا وقۋ-اعارتۋ مينيسترلىگى ۇقتىرۋ باسىپ تاراتىپ، جەر-جەر مەن ءارقايسى مەكتەپتەردەن مەملەكەت حاۋىپسىزدىگى ۇگىت-تاربيە قيمىلىن ىشكەرىلەي ورىستەتۋدى تالاپ ەتتى. انحۇي ولكەسى حىفەي قالالىق 45-ورتا مەكتەپ وقۋشىلاردى لي كىنۇڭنىڭ بايىرعى تۇراعىنا بارىپ «توڭكەرىستىك گەندى جالعاستىرىپ، مەملەكەت حاۋىپسىزدىگى تانىمىن كۇشەيتۋ» اتىنداعى توڭكەرىستىك زەرتتەۋ-ۇيرەنۋ قيمىلىن ورىستەتۋگە ۇيىمداستىردى. مەكتەپتىڭ ورىنباسار باستىعى شيە ميڭ بىلاي دەدى: ءبىز مەملەكەت حاۋىپسىزدىگى تاربيەسى بىلىمدەرىن كۇندەلىكتى تاربيەگە، وقىتۋعا ءسىڭىرىپ، وقۋشىلاردىڭ مەملەكەت حاۋىپسىزدىگى تانىمى مەن جاۋاپكەرشىلىك سەزىمىن جوعارىلاتۋىمىز كەرەك، بۇدان كەيىن وسى تەكتەس قيمىلداردى ءتىپتى دە كوپتەپ ورىستەتەمىز.

10 جىلدان بەرى، مەملەكەت حاۋىپسىزدىگى ۇگىت-تاربيەسى ورگاندارعا، مەكتەپتەرگە، كاسىپورىندارعا، اۋىل-قىستاقتارعا، الەۋمەتتىك اۋماقتارعا، اسكەري كازارمالارعا، ينتەرنەتكە جالپىلاسىپ، حالىق بۇقاراسىنىڭ مەملەكەت حاۋىپسىزدىگى تانىمى كۇشەيىپ، ۇلكەن حاۋىپسىزدىك تانىمى جۇرت جۇرەگىنە تەرەڭ ۇيالادى. بۇكىل پارتيا، بۇكىل قوعام بىرگە قۇلشىنىپ، مەملەكەت حاۋىپسىزدىگىن قورعاۋدىڭ قۇدىرەتتى كۇشىن ۇيىستىردى.