جۇڭگو بانكەسىنىڭ بۇرىنعى باس جوراسى ليۋ ليانگىنىڭ پارا الۋ، زاڭعا قايشى قارىز اقشا تاراتۋ دەلوسىن ءبىرىنشى سوتتا اشىق سوت اشىپ قارادى 

2024-جىلى 4-ايدىڭ 24-كۇنى شاندۇڭ ولكەسى جينان قالالىق ورتا دارەجەلى حالىق سوت مەكەمەسى جۇڭگو بانكەسى شەكتى جارنا سەرىكتىگى پارتكومىنىڭ بۇرىنعى شۋجيى، باس جوراسى ليۋ ليانگىنىڭ پارا الۋ، زاڭعا قايشى قارىز اقشا تاراتۋ دەلوسىن ءبىرىنشى سوتتا اشىق سوت اشىپ قارادى. 

2010-جىلدان 2023-جىلعا دەيىن جاۋاپكەر ليۋ ليانگى جۇڭگو يمپورت-ەكسپورت بانكەسى پارتكومىنىڭ مۇشەسى، ورىنباسار بانكە باستىعى، پارتكومنىڭ ورىنباسار شۋجيى، ورىنباسار باس جوراسى، بانكە باستىعى، جۇڭگو بانكەسى شەكتى جارنا سەرىكتىگى پارتكومىنىڭ ورىنباسار شۋجيى، ورىنباسار باس جوراسى، بانكە باستىعى، پارتكوم شۋجيى، باس جوراسى سياقتى قىزمەت قولايلىلىعى مەن قىزمەت ۇقىعىنا سۇيەنىپ، قاتىستى ورىندار مەن جەكەلەردىڭ قارىز اقشا ارقىلى قارجى قۇراۋ، نىسان سەلبەستىگى سياقتى جۇمىستارىنا قولايلىق جاراتۋ ءۇشىن باسقالاردان زاڭسىز سۇراپ نەمەسە قابىلداپ العان مال-مۇلىك سوماسى جيىنى 121 ميلليون يۋاننان اسقان، سونىمەن قاتار 2017-جىلدىڭ سوڭىنان 2020-جىلدىڭ باسىنا دەيىن قاتىستى كاسىپورىنداردىڭ قارىز اقشا تاراتۋ شارتىنا ۇيلەسپەيتىندىگىن بىلە تۇرا، «جۇڭحۋا حالىق رەسپۋبليكاسىنىڭ ساۋدا بانكەسى زاڭى»، «جۇڭحۋا حالىق رەسپۋبليكاسىنىڭ بانكە سالاسىن باقىلاۋ-باسقارۋ زاڭى» سياقتى زاڭدىق بەلگىلەمەلەرگە قايشىلىق جاساپ، قاتىستى ورىندارعا جيىنى 3 ميلليارد 320 ميلليون يۋان قارىز اقشا تاراتىپ، 190 ميلليون يۋاننان استام زيان تۋدىرعان. 

پروكۋراتۋرا ورگاندارى پارا الۋ قىلمىسى، زاڭعا قايشى قارىز اقشا تاراتۋ قىلمىسى بويىنشا ليۋ ليانگىنىڭ قىلمىستىق ىستەر جاۋاپكەرشىلىگىن قۋزاستىرۋدى ۇسىنىس ەتتى.

تەرگەۋ بارىسىندا پروكۋراتۋرا ورگانى قاتىستى دالەل-ىسپاتتاردى كورسەتتى، ايىپكەر ليۋ ليانگى جانە ونىڭ اقتاۋشىسى دالەل-ىسپاتتاردى راستادى، ايىپتاۋشى مەن اقتاۋشى ەكى جاق سوتتىڭ باسقارۋىندا تولىق پىكىر ءبىلدىرىپ، ليۋ ليانگى سوڭعى بايانداۋىن جۇرگىزدى ءارى سوتتا قىلمىسىن مويىنداپ، وكىنگەندىگىن ايتتى.